Ieeschte Johanes

1 Daut wia von Aunfank aun, wie haben daut jehieet, wie haben daut met onse Uagen jeseenen, wie haben daut beoobacht un daut met onse Henj jespäat: Daut jeit om daut Läweswuat. 2 (Jo, daut Läwen wort openboa jemoakt, un wie haben daut eewje Läwen jeseenen un zeijen doafäa un brinjen junt daut. Daut wia bie dän Voda un wort ons openboat.) 3 Waut wie jeseenen un jehieet haben, brinj wie uk junt, soo daut jie uk kjennen met ons veeent sennen*. Un wie sent met dän Voda un sienen Sän Jesus Christus veeent. 4 Un wie schriewen dise Sachen, soo daut onse Freid kaun volstendich sennen.

5 Dit es de Norecht, waut wie von am jehieet haben un junt bekauntmoaken: Gott es Licht un doa es verheipts kjeen Diestret en am*. 6 Wan wie sajen: “Wie sent met am veeent” un oba wieda em Diestren gonen, dan lieej wie un läwen nich no de Woarheit. 7 Oba wan wie en daut Licht gonen, soo aus hee selfst en daut Licht es, dan sent wie eena met dän aundren veeent un sien Sän Jesus sien Bloot reinicht ons von jieda Sind.

8 Wan wie sajen: “Wie haben kjeene Sind”, dan schmäa wie ons selfst aun un de Woarheit es nich en ons. 9 Wan wie onse Sinden bekjanen, dan vejeft hee ons dee un reinicht ons von aule Ojjerajchtichkjeit, wiels hee es tru un jerajcht. 10 Wan wie sajen: “Wie haben nich jesindicht”, dan moak wie am toom Läajna un sien Wuat es nich en ons.