De ieeschta Breef aun de Korinta

2 Breeda, aus ekj no junt kjeem un junt Gott sien heiljet Jeheemnis* bekauntmuak, brukt ekj nich besondre Wieed un deed daut nich soo, daut sikj daut met mie sull weis hieren. 2 Ekj wia mie eenich, to junt von sestnuscht to räden* aus von Jesus Christus un daut hee es aum Pol omjebrocht worden. 3 Aus ekj no junt kjeem, wia ekj schwak un flautad ut Angst. 4 Aus ekj met junt räd un junt lieed, brukt ekj nich soone Wieed toom junt äwaräden ooda waut sikj weis hieeden. Enne Städ daut weesen miene Wieed de Macht von Gott sienen Jeist. 5 Dit deed ekj, daut jie sullen aun Gott siene Macht jleewen un nich aun menschelje Weisheit.

6 Wie räden mank dee, waut jeistlich riep sent, äwa Weisheit, oba dauts nich de Weisheit vonne Welt ooda de Weisheit von dee äare Harscha, waut veschwinjen woaren. 7 Wie räden äwa Gott siene Weisheit en een heiljet Jeheemnis*; de vestoakne Weisheit, waut Gott aul lang trigj* bestemt haft to onse Harlichkjeit. 8 Dits de Weisheit, waut kjeena von de Harscha von dise Welt* kjanen jelieet haft. Wiels wan dee wudden haben, dan wudden dee dän harlichen Harn nich omjebrocht haben. 9 Oba soo aus daut jeschräwen steit: “Daut Uag haft daut nich jeseenen un daut Ua haft daut nich jehieet un uk kjeen Mensch haft sikj daut em Hoat väajestalt, waut Gott fa dee reedjemoakt haft, waut am leewen.” 10 Oba ons haft Gott daut derch sienen Jeist openboat, wiels de Jeist sieekjt aule Sachen derch; mau rajcht Gott siene deepe Sachen.

11 Wiels woon Mensch weet de Jedanken von eenen aundren Mensch? Dee weet bloos daut, waut en sien ieejnet Hoat* es. Krakjt soo uk, kjeena kaun Gott siene Jedanken weeten, buta derch Gott sienen Jeist. 12 Wie haben nich de Welt äaren Jeist jekjräajen, oba Gott sienen Jeist. Daut es, daut wie daut vestonen kjennen, waut Gott ons leeftolich jelieet haft. 13 Wie räden uk von dise Sachen, oba wie brucken nich soone Wieed, waut von de menschelje Weisheit komen. Wie brucken soone Wieed, waut de Jeist ons jelieet haft, om Jeisteljet uttolajen.

14 Oba soona, waut fleeschlich jesonnen es, dee nemt daut nich aun, waut von Gott sienen Jeist openboat woat; dee denkjt, daut et waut Onkluaket es. Dee kaun daut nich vestonen, wiels eena mott daut met de Help von Gott sienen Jeist unjasieekjen. 15 Oba de Mensch, waut von dän Jeist jeleit woat, dee kaun aules vestonen, oba kjeena kaun dän vestonen. 16 Wiels “wäa haft Jehowa* sien Denkjen kjanen jelieet, soo daut dee am belieren kaun?” Oba wie haben Christus sien Denkjen.