De ieeschta Breef aun de Korinta

5 Ekj hab jehieet, daut et mank junt sintelje Sorten Sex* jeft; soon Schlemmet, aus daut nich mol mank de aundre Sorten Menschen* jeft. Mie wort vetalt, daut een Maun met sienen Voda siene Fru toopläft*. 2 Un doo jie junt doamet groot? Wudd jie nich leewa sellen truarich sennen doaräwa, soo daut jie dän Mensch, dee dit jedonen haft, wudden sellen von mank junt rutsaten? 3 Wan ekj uk nich kjarpalich bie junt sie, sie ekj oba met miene Jedanken* bie junt. Un ekj hab dän Mensch, waut dit jedonen haft, aul jerecht, soo aus wudd ekj aul werkjlich bie junt sennen. 4 Wan jie en onsen Harn Jesus sienen Nomen toopkomen, dan sell jie weeten, daut ekj met miene Jedanken* bie junt sie un soo es uk onsen Harn Jesus siene Krauft bie junt. 5 Jie motten soonen Mensch dän Soton äwajäwen, soo daut de Sind, waut dee enne Vesaumlunk nennjebrocht haft, wajchjeschauft woat*. Daut es, daut de Vesaumlunk aun dän Harn sienen Dach eene goode Enstalunk haft*.

6 Jun Jepuch es nich goot. Weet jie daut nich, daut een kjlienet bät Häw opp dän gaunzen Dieech wirkjt? 7 Doot de oole Häw doa wajchschaufen, daut jie een niea Dieech sent, waut frie es von Häw un frie blift. Wiels Christus, ons Passalaum, wort jeopfat. 8 Doawäajen well wie daut Passafast hoolen; oba nich met Broot, waut oole Häw haft, uk nich met soone Häw von Sind un Schlajchtet, oba met soon Broot, waut kjeene Häw haft; soont, waut opprechtich un de Woarheit es.

9 En mienen Breef schreef ekj junt, daut jie sullen opphieren, met soone Menschen Jemeenschoft to haben, waut sintelje Sorten Sex* haben. 10 Ekj räd nich von Menschen von dise Welt, waut sintelje Sorten Sex* haben ooda bejierich sent ooda stälen* ooda Aufjetta aunbäden; sest wudd jie motten von dise Welt veloten. 11 Oba nu schriew ekj junt, daut jie sellen opphieren, met soonen Mensch Jemeenschoft to haben, waut sikj een Brooda nant un oba sintelje Sorten Sex* haft ooda bejierich es ooda Aufjetta aunbät ooda aundre dommsajcht ooda een Supa ooda een Stäla es*. Jie sellen met soonen Mensch nich mol toop äten. 12 Wiels waut hab ekj doamet to doonen, dee to rechten, waut nich to de Vesaumlunk jehieren? Recht jie nich dee, waut to de Vesaumlunk jehieren, 13 äwadäm daut Gott dee recht, waut nich to de Vesaumlunk jehieren? “Sat dän schlajchten Mensch von mank junt rut.”