De ieeschta Breef aun de Korinta
10 Breeda, nu well ekj, daut jie daut weeten, daut onse Väavodasch aula unja de Wolkj wieren un aula derch daut Mäa jinjen. 2 Un aule worden jedeept aus Moses siene Nofolja, aus dee unja de Wolkj wieren un en daut Mäa wieren. 3 Un dee eeten aula dautselwje jeistelje Äten 4 un aule drunken dautselwje jeistelje Wota. Wiels dee drunken emma von dän jeisteljen Steen, waut dee hinjaraunkjeem, un dee Steen bedied* de Christus. 5 Oba Gott wia met de Mieeschte von dee nich tofräd, un doawäajen worden dee enne Wiltnis omjebrocht.
6 Soo, aul daut, waut met dee passieed, es fa ons eene Woarnunk, soo daut wie ons nich waut jankren loten, waut toom Schoden es, soo aus dee daut deeden. 7 Doot uk nich Aufjetta aunbäden, soo aus eenje von dee deeden. Krakjt soo aus jeschräwen steit: “De Menschen saden sikj dol un eeten un drunken. Dan stunden see opp toom sikj daut loten scheen gonen.” 8 Well wie uk nich sintelje Sorten Sex* driewen, soo aus eenje von dee deeden, wuaderch 23,000 von dee aun eenen Dach todood kjeemen. 9 Well wie uk nich Jehowa* aufproowen, soo aus eenje von dee deeden, waut dan von de Schlangen dootjemoakt worden. 10 Doot uk nich romgrunzen, soo aus eenje von dee deeden, waut dan von dän Venichta* dootjemoakt worden. 11 Aules, waut met dee passieed, es fa ons eene Lia. Daut wort oppjeschräwen aus eene Woarnunk fa ons, dee wie aum Enj von dise TIET* läwen.
12 Doawäajen saul deejanja, waut doa jleeft, daut hee faust steit, oppaussen, daut hee nich felt. 13 Aule Proowen, waut jie derchmoaken, sent soone, waut aundre Menschen uk aul derchjemoakt haben. Oba Gott es tru un woat daut nich tooloten, daut jie dolla aufjeprooft woaren, aus waut jie vedroagen kjennen. Oba wan jie aufjeprooft woaren, dan woat Gott eenen Wajch opmoaken, soo daut jie daut uthoolen kjennen.
14 Doawäajen, miene leewe Frind, rant wajch von Aufjettarie. 15 Ekj räd to junt soo aus to Menschen, waut Sachen goot bejriepen kjennen; entscheit selfst, aus daut rajcht es, waut ekj saj, ooda nich. 16 Hab wie nich Poat aun Christus sien Bloot derch daut Säajenskuffel, fa waut wie Gott danken*? Hab wie nich Poat aun Christus sienen Kjarpa derch daut Broot, waut wie bräakjen? 17 Doa es bloos een Broot. Doawäajen, wan wie uk väle sent, sent wie oba een Kjarpa, wiels wie haben aula Poat aun daut eene Broot.
18 Denkjt mol aun daut Volkj I̱srael: Wan dee von daut Opfa äten, haben dee dan nich Poat aun daut, waut doa oppem Aultoa jeopfat woat? 19 Well ekj doamet sajen, daut soont, waut eenen Aufgott jeopfat es, waut enhelt ooda daut et met eenen Aufgott waut enhelt? 20 Nä. Oba ekj well doamet sajen, daut de aundre Sorten Menschen* de beese Jeista Opfa brinjen un nich Gott. Un ekj well nich, daut jie irjenteen Poat haben aun de beese Jeista. 21 Jie kjennen nich von Jehowa* sien Kuffel drinkjen un von de beese Jeista äat. Jie kjennen nich Poat haben aun Jehowa* sienen Desch un aun de beese Jeista äaren Desch. 22 Ooda proow wie, Jehowa* aufjenstich to moaken? Wie sent doch nich stoakja, aus hee es, ooda jo?
23 Doa es to aules Frieheit, oba nich aules deent toom Gooden. Doa es to aules Frieheit, oba nich aules but opp. 24 Siet wieda no daut ut, waut fa aundre toom Gooden es, un nich bloos no daut, waut fa junt selfst toom Gooden es.
25 Ät aules, waut oppem Fleesch-Moakjt vekoft woat, un doot nich noch noforschen wäajen jun Jewessen. 26 Wiels “Jehowa* jehieet de Ieed un aules, waut doatoo jehieet.” 27 Wan junt wäa enlot, waut nich em Gloowen es, un jie wellen doa hangonen, dan ät, wautemma dee junt väasaten un doot nich noch noforschen wäajen jun Jewessen. 28 Oba wan doa wäa to junt sajcht: “Dit es waut, waut eenen Aufgott jeopfat wort”, dan ät daut nich wäajen dänjanjen, waut junt daut säd, un wäajen daut Jewessen. 29 Ekj meen hia nich jun ieejnet Jewessen, oba daut von dän aundren. Wiels ekj well miene Frieheit nich brucken, daut een aundra mie wäajen sien Jewessen rechten mott. 30 Mau rajcht, wan ekj Gott fa daut Äten dank un daut Rajcht hab, daut to äten, to waut sull ekj daut äten, wan aundre daut veuasoakt, schlajcht äwa mie to räden?
31 Doawäajen, aus jie äten ooda drinkjen ooda irjentwaut aundret doonen, doot aules toom Gott veharlichen. 32 Komt doafäa opp, daut jie aundre nich tofaulbrinjen; nich de Juden uk nich de Griechen ooda dee, waut to Gott siene Vesaumlunk jehieren. 33 Dauts, waut ekj proow to doonen. Ekj proow, aule Menschen to jefaulen, endoont waut ekj doo. Ekj sie nich no daut ut, waut fa mie toom Gooden es, oba waut fa de Mieeschte toom Gooden es, soo daut dee kjennen jerat woaren.