De Breef aun de Reema
5 Nu, daut wie sent fa jerajcht jetalt worden derch dän Gloowen, well wie ons to dän Fräd met Gott freien* derch onsen Harn, Jesus Christus. 2 Derch dän Gloowen aun Jesus kjenn wie no Gott komen un sien grootet Metleet* haben; wie kjennen Freid haben, wäajen wie de Hopninj haben, von Gott Harlichkjeit to kjrieen. 3 Nich bloos daut, wie kjennen Freid haben, wan daut uk schwoare Tieden sent. Wäajen derch schwoare Tieden lia wie, staunthauft to sennen. 4 Wan wie staunthauft bliewen, dan es Gott met ons tofräd, un daut jeft ons Hopninj. 5 Un dise Hopninj deit ons nich aunschmäaren, wiels Gott siene Leew es en onse Hoaten nennjegoten derch dän heiljen Jeist, dän hee ons jeef.
6 Wiels aus wie noch helploos* wieren, storf je Christus to de bestemde Tiet fa de gottloose Menschen. 7 Dauts schwoa, daut doa wäa wudd fa eenen jerajchten Mensch stoawen. Veleicht wudd sikj daut noch wäa woagen, fa eenen gooden Mensch to stoawen. 8 Oba Gott wees ons siene Leew; wiels mau rajcht aus wie noch Sinda wieren, storf Christus fa ons. 9 Soo, nu daut wie derch Jesus sien Bloot sent fa jerajcht jetalt worden, kjenn wie ons noch sechra sennen, daut wie woaren von Gott siene Wutt jerat woaren. 10 Wan wie uk Gott siene Fiend wieren, sent wie oba met am wada toopjebrocht worden, doaderch daut sien Sän fa ons storf. Woo väl sechra es daut dan nich, daut wie jerat woaren, wäajen Jesus aum Läwen es, nu daut wie aul met Gott sent toopjebrocht worden. 11 Un nich bloos daut, wie kjennen uk Freid haben, wäajen wie derch onsen Harn Jesus Christus nu wada sent met Gott toopjebrocht worden.
12 Doawäajen, krakjt soo aus de Sind derch eenen Maun enne Welt nennkjeem un derch de Sind uk de Doot, soo haft de Doot sikj äwa aule Menschen jespreet, wäajen dee aula jesindicht haben. 13 De Sind wia aul enne Welt, ea daut Jesaz wia. Oba de Menschen woat de Sind nich väajehoolen, wan doa nich een Jesaz es. 14 De Doot rejieed soo aus een Kjennich von A̱dam bat Moses. Dee rejieed mau rajcht äwa dee, waut nich soo sindjen deeden, aus A̱dam deed, waut dän likjend*, waut doa komen sull.
15 Oba Gott sien Jeschenkj es nich soo aus A̱dam siene Sind. Wäajen dän eenen Maun siene Sind sent väle jestorwen. Oba Gott sien grootet Metleet* un dän eenen Maun, Jesus Christus, sien grootet Metleet*, waut een Jeschenkj* es, es väl jrata. Derch dit Jeschenkj jeft Gott väle äwajenuach Säajen. 16 Gott sien Jeschenkj un disen eenen Maun siene Sind sent uk en disen Stekj veschieden: Daut Jerecht von eene Sind haft de Menschen veuadeelt, oba wäajen Gott sien Jeschenkj, waut hinja een deel Sinden kjeem, kjennen de Menschen fa jerajcht jetalt woaren. 17 Wan wäajen de Sind von disen eenen Maun de Doot soo aus een Kjennich rejieet, woo väl mea woaren dan nich dee, waut daut groote Metleet* un daut Jeschenkj von de Jerajchtichkjeit kjrieen, läwen un aus Kjennichs rejieren derch dän eenen Maun, Jesus Christus.
18 Krakjt soo aus eene Sind daut bat doa brocht, daut aule Sorten Menschen veuadeelt worden, soo haft een jerajchtet Woakj* daut bat doa jebrocht, daut aule Sorten Menschen fa jerajcht jetalt woaren un Läwen kjrieen. 19 Wiels krakjt soo aus derch daut Ojjehuarsom-Sennen von eenen Maun väle to Sinda worden, soo woaren derch daut Jehuarsom-Sennen von eenen Maun väle jerajcht jemoakt. 20 Daut Jesaz wort jejäft toom wiesen, woo sindhauft de Menschen wieren. Oba aus daut kloa wort, woo väl Sind doa es, wort Gott sien grootet Metleet* noch väl jrata. 21 Aulsoo, krakjt soo aus de Sind aus Kjennich rejieet un dän Doot veuasoakt, soo rejieet Gott sien grootet Metleet* nu uk aus Kjennich derch Jerajchtichkjeit. Un daut fieet to eewjet Läwen derch Jesus Christus, onsen Harn.