De ieeschta Breef aun de Tessalonicha

1 Ekj sie Paulus; un Silwa̱nus* un Timotä̱us sent bie mie. Dis Breef es aun de Vesaumlunk en Tessalo̱nich jeschräwen, waut met Gott, dän Voda, un dän Harn Jesus Christus veeent es:

Mucht jie Gott sien grootet Metleet* un Fräd haben.

2 Wie danken Gott emma, wan wie junt aula en onse Jebäda met ennämen. 3 Un ver onsen Voda un Gott denkj wie emma wada aun june true Oabeit un woo jie junt ut Leew aunstrenjen un woo staunthauft jie sent wäajen june Hopninj en onsen Harn Jesus Christus. 4 Jie Breeda, waut von Gott jeleeft woaren, wie weeten, daut Gott junt jewält haft. 5 Wiels de goode Norecht, waut wie junt prädijden, wieren nich bloos Wieed, oba doa wia uk Macht un de heilja Jeist doahinja, un wie wieren ons gaunz secha, daut et de Woarheit wia. Un jie weeten je, waut fa Menschen wie fa junt worden, aus wie bie junt wieren. 6 Un jie deeden ons no un uk dän Harn, wiels jie neemen daut Wuat met Freiden aun, waut derch dän heiljen Jeist kjemt, wan jie uk väl Schwoaret derchmuaken. 7 Wäajen dit sent jie een Väabilt jeworden fa aul dee, waut en Mazedo̱nien un en Acha̱ja em Gloowen sent.

8 Derch junt haft sikj nich bloos Jehowa* sien Wuat en Mazedo̱nien un en Acha̱ja vespreet, oba jun Gloowen aun Gott es wiet un breet opp jieda Städ bekauntjeworden, soo daut wie aul nuscht mea sajen brucken. 9 Wiels de Menschen räden emma wada doavon, aus wie daut ieeschte Mol met junt to doonen hauden un woo jie junt von june Aufjetta wajchjedreit haben un junt haben no Gott jedreit, om eenen läwendjen un woaren Gott siene Sklowen to sennen 10 un om no sienen Sän vom Himmel to luaren, dän hee vom Doot oppwuak, aulsoo Jesus, waut ons von de Wutt rat, waut doa kjemt.