Dredde Johanes

1 Ekj, de elra Maun*, schriew aun die, mien leewa Brooda Ga̱jus, dän ekj werkjlich väl räakjen.

2 Leewa Frint, ekj bäd, daut die daut wieda en aule Stekjen goot jeit un daut du eene goode Jesuntheit hast, krakjt soo aus die* daut nu goot jeit. 3 Ekj freid mie sea, aus de Breeda kjeemen un mie vetalden*, daut du die aun de Woarheit helst, jo, daut du wieda no de Woarheit läfst. 4 Ekj hab kjeene jratre Freid*, aus wan ekj hia, daut miene Kjinja wieda no de Woarheit läwen.

5 Leewa Frint, met daut, waut du fa de Breeda deist, wiest du, woo tru du best, mau rajcht wan daut fa die uk Framde sent. 6 Dee haben ver de Vesaumlunk von diene Leew vetalt. Wan dee wajchreisen, dan halp dee toom Jefaulen opp soone Wajch, aus Gott daut jefelt. 7 Wiels dee haben sikj en Gott sienen Nomen oppem Wajch jejäft un haben nuscht von de aundre Sorten Menschen* velangt. 8 Doawäajen sent wie bemott, soone opptonämen, soo daut wie kjennen Metoabeida woaren en de Woarheit.

9 Ekj schreef waut aun de Vesaumlunk, oba Diotre̱fes, waut daut jleicht, mank dee daut Väaschte to sennen, nemt nuscht met Respakjt aun von ons. 10 Doawäajen, wan ekj ieescht kom, dan woa ekj daut oppbrinjen, waut dee deit – daut beese Jeräd*, waut dee äwa ons vespreet. Oba hee es met daut noch nich tofräd: Hee wäat sikj uk, de Breeda met Respakjt opptonämen, un dee, waut dee wellen oppnämen, prooft hee, doavon auftohoolen un von de Vesaumlunk ruttoschmieten.

11 Leewa Frint, doo nich daut Schlajchte no, oba daut Goode. Wäa Goodet deit, staumt von Gott; wäa Schlajchtet deit, haft Gott nich jeseenen. 12 Von Deme̱trius haben se Goodet vetalt, un daut stemt uk met de Woarheit. Mau rajcht wie zeijen von am, un jie weeten, daut et soo es, waut wie zeijen.

13 Ekj haud die noch een deel to schriewen, oba ekj well nich wiedaschriewen met eene Steft un Tint. 14 Oba ekj hop, die boolt to seenen un dan woa wie perseenlich räden.

Muchst du Fräd haben.

De Frind jreessen die. Jreess de Frind uk eenselwies* von mie.