De tweeda Breef aun de Tessalonicha
1 Ekj sie Paulus; un Silwa̱nus* un Timotä̱us sent bie mie. Dis Breef es aun de Vesaumlunk en Tessalo̱nich jeschräwen, waut met Gott, onsen Voda, un dän Harn Jesus Christus veeent es:
2 Mucht jie grootet Metleet* un Fräd haben von Gott dän Voda, un von dän Harn Jesus Christus.
3 Breeda, wie kjennen nich aundasch, aus Gott emma wada wäajen junt danken. Un daut paust uk fa junt, wäajen jun Gloowen soo sea waust un wäajen de Leew emma jrata woat, waut jie aula unjarenaunda haben. 4 Dauts, wuarom wie to Gott siene Vesaumlungen brow von junt räden. Wiels jie bliewen staunthauft un wiesen Gloowen, wan jie uk derch aul de Vefoljunk un Schwoaret gonen* motten. 5 Dits een Bewies, daut Gott jerajcht recht un doawäajen woa jie daut wieetjeacht en Gott sien Kjennichrikj nenntokomen, wuafäa jie uk lieden.
6 Wäajen Gott jerajcht es, woat hee deejanje met Lieden trigjtolen, waut Lieden opp junt brinjen. 7 Wan de Har Jesus met siene majchtje Enjel toop vom Himmel en een flaumendet Fia woat openboat woaren, dan woa jie, dee jie nu eene schwoare Tiet derchmoaken, met ons toop friejemoakt woaren. 8 En dee Tiet woat hee sikj aun deejanje rajchnen, dee Gott nich kjanen, un aun dee, waut de goode Norecht von onsen Harn Jesus nich jehorchen. 9 Dise woaren veuadeelt woaren fa de eewje Venichtunk, un soo woaren dee von ver dän Harn siene Uagen wajch sennen un von siene groote Macht aufjeschnäden sennen. 10 To de Tiet, wan de Har met siene Heilje toop woat veharlicht woaren, woat hee von dee, waut Gloowen weesen, huachjeacht woaren, wäajen jie daut Zeichnis, waut wie junt jeewen, met Gloowen aunneemen.
11 Wäajen aul dit, bäd wie emma fa junt, daut Gott junt mucht fa daut Läwen wieetachten, fa woont hee junt jewält haft. Un mucht hee aul daut Goode, waut hee met siene Krauft doonen well, volstendich to Enj brinjen, un mucht hee aules, waut jie em Gloowen doonen, goot utkomen loten. 12 Opp dise Wajch woat onsen Harn Jesus sien Nomen derch junt veharlicht woaren, un jie woaren veharlicht woaren, wäajen jie met am veeent sent, derch daut groote Metleet* von onsen Gott un von dän Harn Jesus Christus.