Lekzion 8

Een Famieljeläwen waut Gott jefelt

Woone Stalunk haft de Maun en de Famielje? (1)

Woo saul een Maun siene Fru behaundlen? (2)

Waut fa Veauntwuatungen haft een Voda? (3)

Waut es de Fru äare Oppgow en de Famielje? (4)

Waut velangt Gott von Elren un Kjinja? (5)

Waut sajcht de Bibel äwa Uteneengonen un Scheedunk? (6, 7)

1. De Bibel sajcht, daut de Maun daut Haupt, ooda Kopp, von de Famielje es (1. Korinta 11:3). Een Maun doaf mau bloos eene Fru haben. See motten em Jesaz befriet sennen (1. Timotäus 3:2; Titus 3:1).

2. Een Maun saul siene Fru goot sennen soo aus sikj selfst. Hee mott ar soo behaundlen, aus Jesus siene Nofolja behaundelt (Efeesa 5:25, 28, 29). Hee woat siene Fru kjeemol schlonen ooda opp eenen aundren Wajch schlajcht behaundlen. Enne Städ daut woat hee ar schazen un achten (Kolossa 3:19; 1. Petrus 3:7).

3. Een Voda mott sea oabeiden om fa siene Famielje to sorjen. Hee mott doaropp bedocht sennen, daut siene Fru un siene Kjinja jenuach to äten, toom Auntrakjen un een Dak äwrem Kopp haben. Een Voda mott sikj uk om daut kjemren, waut siene Famielje em Jeistlichen brukt (1. Timotäus 5:8). Hee leit siene Famielje waut äwa Gott un siene Väasaza to lieren (5. Mose 6:4-9; Efeesa 6:4).

4. Eene Fru mott eene goode Help fa äaren Maun sennen (1. Mose 2:18). See woat äaren Maun biestonen äare Kjinja to belieren un opptotrakjen (Spricha 1:8). Jehova velangt von eene Fru, daut see leewvoll fa äare Famielje sorcht (Spricha 31:10, 15, 26, 27; Titus 2:4, 5). See sull deepen Respakjt fa äaren Maun haben (Efeesa 5:22, 23, 33).

5. Gott velangt von Kjinja, daut see äare Elren jehorchen sellen (Efeesa 6:1-3). Hee well haben, daut Elren äare Kjinja lieren un trajchtwiesen sellen. Elren motten sikj Tiet fa äare Kjinja nämen un de Bibel met an studieren un doafäa sorjen, daut see sikj ennalich un jeistlich goot feelen (5. Mose 11:18, 19; Spricha 22:6, 15). Elren motten äare Kjinja kjeemol hoat ooda onen Erboarmen strofen (Kolossa 3:21).

6. Wan Ehepoatna daut schwoafelt, toop uttokomen, dan sullen see proowen, dän biblischen Rot notogonen. De Bibel foddat an opp leewvoll un toom Vejäwen reed to sennen (Kolossa 3:12-14). Gott sien Wuat rot nich too toom Uteneengonen aus een Meddel om kjliene Schwierichkjeiten to leesen. Eene Fru kaun oba beschluten äaren Maun to veloten (1) wan hee ieejenkoppich es un daut nich deit fa siene Famielje sorjen, (2) wan hee soo jewaultsom es, daut äare Jesuntheit un Läwen en Jefoa sent, ooda (3) wan sien Jäajenstaunt ar daut ommäajlich moakt, Jehova auntobäden (1. Korinta 7:12, 13).

7. Ehepoatna motten eena dän aundren tru sennen. Ehebruch es eene Sind jäajen Gott un jäajen dän Poatna (Hebräa 13:4). No de Schreft no es Jeschlajchtsvekjia buta de Ehe de eensja Grunt fa eene Scheedunk, wua daut toojeloten woat sikj wada to befrieen (Matäus 19:6-9; Reema 7:2, 3). Jehova äakjelt daut, wan Menschen sikj onen schreftlichen Grunt scheeden loten un sikj dan met sest wäm befrieen (Maleachi 2:14-16).

[Bilda oppe Sied 16-17]

Een leewenda Voda sorcht fa siene Famielje, em Wirtschoftlichen un em Jeistlichen

[Bilt oppe Sied 17]

Gott velangt, daut Elren äare Kjinja lieren un trajchtwiesen sellen