Kapitel 6

Daut Paradies es dicht bie!

Aul de schlajchte Dinja, waut vondoag passieren, wiesen, daut daut Paradies dicht bie es. De Bibel säd, daut wie grulich schwoare Tieden beläwen wudden, jrod ea daut Paradies komen wudd. Wie läwen nu en soone Tieden! Hia sent miere von de Dinja, waut de Bibel em Verut säd:

Groote Kjriej. „Een Volkj woat jäajen daut aundre oppstonen, un een Kjennichrikj jäajen daut aundre“ (Matäus 24:7). Dise Profezeiunk haft sikj erfelt. Von 1914 aun jeef daut twee Weltkjriej un väle kjlandre Kjriej. Millionen von Menschen sent doabie jestorwen.

Wiet vebreede Krankheiten. „Doa woat opp veschiedne Städen . . . Pestilenz sennen“ (Lukas 21:11). Haft sikj daut erfelt? Jo! Millionen von Menschen sent aun Kjräft, Hoatkrankheiten, Tuberkulose, Zockakrankheit, jeschlajchtlich äwadroagne un aundre Krankheiten jestorwen.

Hungaschnooten. Äwaraul oppe Ieed jeft daut Menschen, dee nich jenuach to äten haben. Aule Joa vehungren Millionen von Menschen. Daut es noch een Tieekjen, daut daut Paradies boolt komen woat. De Bibel sajcht: „Doa woat Hungaschnoot . . . sennen“ (Markus 13:8).

Ieedbäben. „Doa woaren opp veschiedne Städen . . . Ieedbäben sennen“ (Matäus 24:7). Daut haft sikj uk erfelt. Äwa eene Million Menschen sent von 1914 aun en Ieedbäben omjekomen.

Schlajchte Menschen. De Menschen wudden „nom Jelt hinjaraun sennen“ un „väl von sikj selfst hoolen“. Dee wudden „daut Vejnieejen leewa haben aus Gott“. De Kjinja wudden „de Elren nich jehorchen“ (2. Timotäus 3:1-5). Meenst du nich uk, daut et en de vondoagsche Tiet väle soone Menschen jeft? Dee achten Gott nich un trublen dee, waut mea äwa Gott lieren wellen.

Vebräakjen. „De Gottloosichkjeit [„Jesazloosichkjeit“, NW] woat äwahaunt nämen“ (Matäus 24:12). Secha stemst du doamet en, daut de Vebräakjen nu mea sent aus ea. Aulawäajen es de Jefoa, daut eena äwafollen, hinjagonen ooda velazt woat.

Aul dit wiest, daut Gott sien Kjennichrikj dicht bie es. De Bibel sajcht: „Wan jie dit aula passieren seenen, räakjent doamet, daut daut Gottesrikj dicht bie es“ (Lukas 21:31). Waut es daut Kjennichrikj von Gott? Daut es Gott siene Rejierunk em Himmel, dee daut Paradies hia oppe Ieed häastalen woat. Gott sien Kjennichrikj woat enne Städ aule menschelje Rejierungen harschen (Daniel 2:44).