Kapitel 10
Woo eena de rajchte Relijion finjen kaun
Wan du west een Frint met Gott sennen, motst du am soo deenen, aus hee daut fa rajcht helt. Jesus säd, daut „de woarhauftje Aunbäda“ Gott soo aunbäden, daut et met „de Woarheit“ stemt (Johanes 4:23-24). Daut jeft mau bloos eenen rajchten Wajch toom Gott deenen (Efeesa 4:4-6). De rajchte Relijion fieet toom eewjen Läwen, un de faulsche Relijionen no de Venichtunk (Matäus 7:13-14).
De rajchte Relijion kaust du utfinjen, wan du de Menschen beoobachst, dee doano läwen. Wiels Jehova goot es, motten uk siene true Aunbäda goode Menschen sennen. Een Biespel: Een gooda Aupelsienenboom drajcht goode Aupelsienen. Krakjt soo mott de rajchte Relijion goode Menschen verendach brinjen (Matäus 7:15-20).
Jehova siene Frind achten sea de Bibel. See weeten, daut de Bibel von Gott kjemt. See loten sikj en äa Läwen aunleiden von waut de Bibel sajcht, un brucken dee, om met äare Probleemen foadich to woaren un om Gott bäta kjanen to lieren (2. Timotäus 3:16). See strenjen sikj aun, daut notokomen, waut see aundre lieren.
Jehova siene Frind bewiesen, daut see Leew unjarenaunda haben. Jesus bewees siene Leew to de Menschen doaderch, daut hee an äwa Gott belieed un Kranke heeld. Deejanje, waut de rajchte Relijion uteewen, wiesen uk äare Leew to aundre. Jesus säd, eena wudd siene Jinja doaraun erkjanen kjennen, daut see Leew unjarenaunda haben (Johanes 13:35).
Gott siene Frind ieren Gott sienen Nomen, Jehova. Wudd eena, dee sikj wäad, dienen Nomen to brucken, dien gooda Frint sennen? Secha nich! Wan wie eenen Frint haben, bruck wie sienen Nomen un räden goot äwa am. Daut bediet, wan wie wellen Gott siene Frind sennen, sell wie sienen Nomen brucken un aundre von am vetalen. Jehova wenscht, daut wie daut doonen (Matäus 6:9; Reema 10:13-14).
Soo aus Jesus deed, räden uk Gott siene Frind met aundre äwa Gott sien Kjennichrikj. Daut Kjennichrikj von Gott es siene himlische Rejierunk, dee ut de Ieed een Paradies moaken woat. Gott siene Frind brinjen aundre dise goode Norecht von Gott sien Kjennichrikj (Matäus 24:14).
Jehova siene Zeijen strenjen sikj aun, Frind met Gott to sennen. See achten de Bibel un haben Leew unjarenaunda. See ieren un brucken Gott sienen Nomen un unjarechten aundre äwa daut Kjennichrikj von Gott. En de vondoagsche Tiet eewen Jehova siene Zeijen de rajchte Relijion ut.