Een junga Maun, waut äwanäment wia

Doa wia mol een junga Maun, waut sea äwanäment wia un sienen Onkel daut Läwen rad. Wie weeten nich, woo dee heet, oba sien Onkel wia de Apostel Paulus. Wurscht du wellen weeten, waut dis junga Maun deed? –

Paulus es en Jerusalem em Jefenkjnis. Dee haben am faustjenomen, wiels hee de Menschen von Jesus vetalt haft. Eenje Mana, waut äwa Paulus spietich sent, plonen waut sea schlajchtet. Dee sajen: “Well wie dän Kommandaunt froagen, aus siene Soldoten Paulus ver de Rotslied brinjen kjennen. Wie woaren ons biesied dän Wajch vestäakjen, un wan Paulus doa vebie kjemt, moak wie dän doot.”

De junga Maun, waut met Paulus em Frintschoft es, hieet von dise Sach. Waut deit dee nu? Hee jeit nom Jefenkjnis un vetalt sienen Onkel Paulus daut. Paulus sajcht to am: “Go fuaz nom Kommandaunt un saj dän, waut dise schlajchte Mana sikj väajenomen haben.” Waut denkjst du, es daut fa disen jungen Maun leicht, met dän Kommandaunt to räden? – Daut es nich, wiels de Kommandaunt es een wichtja Maun. Oba Paulus sien Vewaunta es soo äwanäment, daut hee daut doawäajen deit.

De Kommandaunt weet krakjt, waut hee nu doonen saul. Noch dänselwjen Owent lat hee Paulus no Cäsarea brinjen. Un hee schekjt soo bie 500 Soldoten met, waut no dän oppaussen sellen. Waut passieet dan met Paulus? Woat dee jerat ooda moaken dee dän doot? – De schlajchte Mana kjennen Paulus nuscht aundoonen. Daut, waut dee sikj väajenomen haben, es tonuscht.

Waut kjenn wie von dise Jeschicht lieren? – Wie kjennen uk soo sennen aus dis junga Maun, waut sienen Onkel daut Läwen rad. Wan wie aundre wellen äwa Jehova vetalen, mott wie äwanäment sennen. Woascht du äwanäment sennen un fa wieda met aundre äwa Jehova räden? – Soo woascht du veleicht uk kjennen wäm daut Läwen raden.