Een Breef vom Väastaunt

Leewe Breeda un Sestren,

onse Leew fa Gott un fa de Menschen brinjt ons bat doa, Jesus sien Jeboot notokomen, waut sajcht: “Got no aule Sorten Menschen un lieet dee, mie notofoljen, un deept dee” (Mat. 28:19-20, NW; Mar. 12:28-31). De woare Leew haft väl Krauft un jeit dee to Hoaten, “waut to daut eewje Läwen rajcht enjestalt” sent (Apj. 13:48, NW).

Joaren trigj proowd wie foaken, daut utwendich to lieren, waut wie em Deenst sajen wullen. Wie wieren uk dolla doarom to doonen, aulawäajen Bieekja to loten. Nu well wie ons doarenn vebätren, woo wie met de Menschen räden. Wie wellen dee Leew wiesen un äwa soont vetalen, waut dee intressieet. Daut kjenn wie doonen, wan wie ons fa de Menschen enstalen un goot doaräwa nodenkjen, waut dee intressieet un äwa waut dee sikj sorjen. Woo woat ons dit Heft halpen, ons doarenn to vebätren?

Dit Heft haft 12 Kapitels. En jieda Kapitel jeit daut om eene Ieejenschoft, waut ons fält, daut wie kjennen onse Leew wiesen un Jinja moaken. Daut jeit uk emma om eene biblische Jeschicht, wua Jesus ooda eena von de ieeschte Christen em Deenst eene bestemde Ieejenschoft wees. Daut kaun ons halpen, daut wie nich eefach daut utwendich lieren, waut wie sajen wellen, oba daut wie no Jeläajenheiten sieekjen, woo wie de Menschen onse Leew wiesen kjennen. Emma wan wie em Deenst sent, fälen ons dee Ieejenschoften, wua dit Heft von rät. Oba jewesse Ieejenschoften fälen ons besonda dan, wan wie eene Vetal aunfangen wellen, aundre wan wie Wadabesuchs moaken un noch aundre fälen ons, wan wie een Bibelstudium leiden.

Wan du een Kapitel studieescht, dan denkj goot doaräwa no, woo du dee Ieejenschoft wiesen kaust, wan du met de Menschen en diene Jäajent rätst. Schauf doaropp, emma eene jratre Leew fa Jehowa un fa de Menschen to kjrieen. Dise Leew woat die mea aus irjentwaut aundret halpen, Jinja to moaken.

Wie räakjnen daut sea väl, daut wie Jehowa met junt toop en Eenichkjeit deenen kjennen (Zef. 3:9, NW). Mucht Jehowa junt säajnen, wan jie de Menschen wieda june groote Leew wiesen un dee to Jinja moaken!