Waut Läsa weeten wellen
Wuarom “veschoond David Mefi Boschet”, soo aus 2. Samuel 21:7-9 sajcht, wan hee doch tooleet, daut se Mefi-Boschet dootmuaken?
Wan wie de Jeschicht bloos bosich äwaläsen wudden, dan kunn wie veleicht soo aus dit denkjen. Oba en Werkjlichkjeit jeft daut twee Mana, waut Mefi-Boschet heeten. Un wan wie ons de Jeschicht unjastonen, kjenn wie doa waut ut lieren.
De Kjennich Saul von Israel haud säwen Säns un twee Dajchta. De ieeschta Sän wia Jonatan. Un eent von siene Säns wia Mefi-Boschet, waut hee met siene Näbenfru Rizpa toop haud. Intressaunt es, daut Jonatan uk eenen Sän haud, waut Mefi-Boschet heet. Soo, de Kjennich Saul haud eenen Sän uk eenen Grootsän, waut Mefi-Boschet heet.
Opp eene Sauz kjamft de Kjennich Saul jäajen de Gibeonita, waut mank de Israeliten wonden, un wull dee utroden. Daut lat soo, daut een schoof von dee omjebrocht worden. Daut wia gaunz orrajcht. Wuarom? Wiels en Josua siene Tiet muaken de israelitische Leida met de Gibeonita eenen Frädensbunt (Jos. 9:3-27).
En dän Kjennich Saul siene Tiet wia dis Bunt noch emma jeltich. Oba enne Städ daut hee sikj aun disen Bunt hilt, proowd hee de Gibeonita uttoroden. Doaderch hauden “Saul un siene Famielje . . . Schult aun Bloot vejeeten” (2. Sam. 21:1). Lota wort David dan de Kjennich. De Gibeonita räden to am äwa dit schlemme, waut Saul jedonen haud. David fruach dee, waut hee doonen sull, om disen Schoden goottomoaken, soo daut Jehova daut Launt wada säajnen kunn. Enne Städ daut de Gibeonita no Jelt fruagen, fruagen dee no säwen Säns toom dee dootmoaken, von dän Maun, waut an haud wult von mank de Israeliten utroden (4. Mo. 35:30-31). David jeef an dee (2. Sam. 21:2-6).
En dise Tiet wieren Saul un Jonatan aul em Kjrich jestorwen, oba Jonatan sien Sän Mefi-Boschet läwd noch. Hee wia derch een Ojjlekj von Kjint aun vekjräpelt un haud nuscht doamet to doonen, daut sien Grootvoda de Gibeonita utroden wull. David haud met sienen Frint Jonatan eenen Bunt jemoakt, waut dän siene Nokomen wudd togood komen, wua uk sien Sän Mefi-Boschet met en wia (1. Sam. 18:1; 20:42; 21:1). De Berecht sajcht äwa dän Kjennich David: “[Hee] veschoond . . . Mefi Boschet, dän Sän von Saul sienen Sän Jonatan, wäajen dän Eit dän David met Saul sienen Sän Jonatan ver däm HARN jemoakt haud” (2. Sam. 21:7).
Woo deed David daut, waut de Gibeonita haben wullen? Hee jeef dee twee von Saul siene Säns, eent von dee wia Mefi-Boschet, un fief von Saul siene Grootsäns (2. Sam. 21:8-9). Doaderch, daut David daut deed, wia daut Launt nich mea blootschuldich.
Dit es nich bloos eene Jeschicht, oba wie kjennen doa waut von lieren. Gott wees gaunz kloa: “Kjinja sellen nich dootjemoakt fa äare Vodasch äare Schult” (5. Mo. 24:16). Jehova wudd doa nich sennen met envestonen jewast, daut Saul siene twee Säns un siene fief Grootsäns dootjemoakt worden, wan dee doa kjeene Schult aun jehaut hauden. Daut Jesaz wees gaunz kloa: “Een jiedra saul fa siene ieejne Sinden bestroft [ooda dootjemoakt] woaren”. Daut sitt soo, daut Saul siene twee Säns un siene fief Grootsäns doa een jewesset Schult aun hauden, daut Saul de Gibeonita utroden wull. Doawäajen musten dee äare ieejne Schult droagen.
Dis Berecht wiest, daut eena nich waut schlajchtet doonen kaun un lota dan denkjen ooda sajen kaun, daut eena daut bloos deed, wäajen aundre daut haben wullen. En de Schreft sent de weise Wieed bennen: “Paus opp wua du jeist, dan woascht du en aul diene Wäaj secha gonen” (Spr. 4:24-27; Efs. 5:15).