Woo kaun eena sikj fein fa de Toopkomes reedmoaken?

Wan du met eent von Jehova siene Zeijen de Bibel studieescht, dan jeist du daut secha aul verhäa derch, waut jie studieren woaren. Soo kaun eena daut uk fa de Toopkomes doonen. Daut schauft aulatoop väl bäta, wan eena daut em verut plont, wanea eena sikj reedmoaken well.

Daut faustsaten, wua un wanea eena studieren well. To woone Tiet best du daut weinichste aufjelenkjt? Zemorjes ver de Oabeit ooda zeowes, wan de Kjinja ieescht em Bad sent? Wan du uk nich lang studieren kaust, wurscht du die doawäajen kjennen een bät Tiet nämen un doa nuscht loten mank komen. Sieekj die eene ruje Städ, un switsch daut Rädio, Tellewizhen un Fon ut, soo daut du nich von irjentwaut aufjelenkjt woascht. Ea du aunfangst to studieren, wudd daut goot sennen to bäden. Daut woat die halpen, diene Trubbels to vejäten un die met Gott sien Wuat auftojäwen (Filippa 4:6-7).

Wieed ooda Saza tieekjnen un Auntwuaten reedmoaken. See ieescht mol, von waut daut Kapitel ooda de Artikjel sikj haundelt. Doatoo wurscht du ieescht mol kjennen äwa dän Tietel nodenkjen un seenen, woo de Äwaschreften doa biepaussen. Besee die uk de Bilda un de Wadaholungsfroagen; dee kjennen die uk halpen to vestonen, om waut daut jeit. Doahinja läs eenselwies de Varzh von daut Buak un de Froagen, waut doatoo jehieren, un sieekj no de Auntwuaten. Läs die uk de Bibelvarzh no, waut doa aunjejäft sent, un see, woo dee met daut tooppaussen, waut em Buak steit (Aposteljeschicht 17:11). Wan du de Auntwuat fa de Froag ieescht hast, dan tieekjen dee Wieed ooda Saza, waut die halpen, de Auntwuat wada to finjen. Soo kaust du bie de Toopkomes de Haunt opphäwen un eene korte Auntwuat met diene ieejne Wieed jäwen.

Wan du die jieda Wäakj fa aul daut reedmoakst, waut bie de Toopkomes derchjenomen woat, dan woascht du emma mea von de Schreft lieren un diene jeistelje “Schauzkoma” emma volla moaken (Matäus 13:51-52).

• Waut kaun eena doonen, daut eena sikj fa de Toopkomes reedmoaken kaun?

• Woo kaun eena sikj eene Auntwuat reedmoaken?