Josia socht sikj feine Frind

Es daut schwoa, daut rajchte to doonen? – De mieeschte Menschen sajen, daut es. En de Schreft läs wie von eenen Jung, fa dän daut besonda schwoa es. Dee heet Josia. Oba Josia haft feine Frind, waut am halpen, Jehova to deenen. Well wie mol seenen, waut wie von am un siene Frind lieren kjennen.

Josia sien Voda es Amon, de Kjennich von Juda. Amon es een sea schlajchta Kjennich, waut faulsche Jetta aunbäden deit. Aus dee stoaft, woat sien Sän Josia Kjennich von Juda. Oba dee es noch mau acht Joa oolt. Denkjst du, Josia es uk soo schlajcht aus sien Voda? – Josia es aundasch aus sien Voda.

Josia es noch sea junk, oba hee well Jehova jehorchen. Doawäajen sieekjt hee sikj bloos soone Frind, waut Jehova uk deenen wellen. Dee halpen am, daut rajchte to doonen. Wäa sent Josia siene Frind?

Eent von dee es Zefanja. Zefanja es een Profeet un woarnt de Menschen en Juda. Dee sajcht, wan see fa wieda faulsche Jetta aunbäden, woat daut met an sea schlajcht utkomen. Josia horcht no Zefanja un bät bloos Jehova aun un nich Aufjetta.

Een aundra von Josia siene Frind es Jeremia. Dee beid sent meist jlikjenoolt un aus dee oppwaussen, wonen dee nich wiet uteneen. Josia un Jeremia stonen sikj bie, daut see daut rajchte doonen un Jehova jehorchen kjennen. Dee beid sent soone groote Frind, daut Jeremia no Josia sienen Doot een besondret Leet schrift. Daut haundelt sikj doavon, woo truarich hee doaräwa es, daut sien Frint jestorwen es.

Waut kjenn wie von Josia lieren? – Josia wull aul von kjlien aun daut rajchte doonen. Daut dee daut kunn, must dee sikj Frind sieekjen, waut Jehova uk wullen deenen. Wan du Jehova west tru bliewen, es daut wichtich, daut du soone Frind hast, waut Jehova jleichen un waut die halpen, daut rajchte to doonen.