Met Jelt rajcht omgonen

Jieda eena brukt Jelt toom fa de Famielje sorjen (Spricha 30:8). Un äwajens jeft je “Jelt eenem Schutz” (Liera 7:12). Oba eenjemol es daut fa Lied schwoa, äwa Jeltsachen to räden. Lot daut oba nich too, daut et wäajen Jelt en junen Ehestaunt stuckat (Efeesa 4:32). Lied sellen sikj unjarenaunda vetruen un toop entscheiden, fa waut see äa Jelt brucken wellen.

1 MOAKT GOODE PLONS

WAUT DE SCHREFT SAJCHT: “Wan von junt wäa wudd wellen een Torm buen, wudd dee sikj nich ieescht hansaten un de Kosten äwaräakjnen, om to seenen auf hee daut uk betolen kunn?” (Lukas 14:28). Daut es needich, daut jie junt daut toop trajchtplonen, woo jie jun Jelt brucken woaren (Amos 3:3). Finjt ut, waut jie kjeepen motten un wooväl jie doafäa betolen kjennen (Spricha 31:16). Bloos wiels jie daut Jelt oppducken kjennen, bediet daut nich, daut jie junt aules kjeepen motten. Jäft junt uk nich onneedich enne Schult nenn; brukt bloos daut Jelt, waut jie haben (Spricha 21:5; 22:7).

WAUT JIE DOONEN KJENNEN:

• Wan jie utgangs Moonat noch Jelt äwajehoolen haben, dan berät daut toop, waut jie met daut doonen wellen

• Wan daut Jelt nich toorieekjt, dan berät junt daut, wua jie dolla spoaren kjennen. Biejlikj enne Städ wua äten foaren, wudd jie kjennen tus Äten moaken

2 SIET OPPRECHTICH UN DERCHJEDOCHT

WAUT DE SCHREFT SAJCHT: “Jie sellen unja eenaunda de Woarheit sajen” (Sacharja 8:16). Hoolt daut nich eena fa dän aundren unjare Dakj, wooväl jie vedeenen un utjäwen.

Wan doa waut grootet to entscheiden es, wua daut om Jelt jeit, dan doot daut emma toop (Spricha 13:10). Daut woat halpen, daut enne Ehe Fräd es, wan jie doaräwa räden, woo daut met de Jeltsachen steit. See daut Jelt, waut du vedeenst, nich bloos aus dient aun, oba aus de Famielje äat (1. Timotäus 5:8).

WAUT JIE DOONEN KJENNEN:

• Berät junt daut unjarenaunda, wooväl jieda eena utjäwen kaun, onen dän aundren daut ieescht to weeten doonen

• Wacht nich, bat junt daut ieescht knaup jeit, ea jie äwa Jeltsachen räden