De Jinja kjrieen dän heiljen Jeist

Tieen Doag nodäm daut Jesus wia nom Himmel jefoaren, kjrieejen siene Jinja dän heiljen Jeist. Daut wia Pinjsten aune 33. To daut Pinjstfast wieren Menschen von veschiedne Städen no Jerusalem jekomen. En eene Bowastow wieren soo bie 120 von Jesus siene Jinja toopjekomen. Met eenst wort doa waut butajeweeneljet. Opp jieda eenem sienen Kopp wia waut, waut no eene Flaum sach, un nu räden dee aula opp veschiedne Sproaken. En daut gaunze Hus wia een ludet Jeruzh, soo aus een stoakja Wint.

Dee, waut von aundre Lenda no Jerusalem jekomen wieren, hieeden daut Jeruzh un randen no daut Hus. Dee wullen seenen, waut doa aunjinkj. Aus dee de Jinja hieeden opp aundre Sproaken räden, wieren dee vewundat. Dee säden: “Dise Menschen sent je von Galiläa. Woo kjennen dee opp jieda eenem siene Sproak räden?”

Petrus un de aundre Apostel stalden sikj dan ver de Häad Menschen. Petrus vetald dee, woo se Jesus hauden dootjemoakt un daut Jehova dän wada vom Doot oppwuak. Petrus säd: “Jesus es nu em Himmel bie Gott to rajchte Haunt, un dee haft nu dän vesproaknen heiljen Jeist utjegoten. Doawäajen hab jie dise Wunda jeseenen un jehieet.”

De Menschen jinkj daut sea to Hoaten, waut Petrus säd, un dee fruagen: “Waut sell wie doonen?” Hee säd: “Habt een Leetsennen äwa june Sinden, un lot junt en Jesus sienen Nomen deepen. Dan woat junt uk de heilja Jeist jeschonken woaren.” Dän Dach leeten sikj ojjefäa 3 000 Menschen deepen. Von dan aun jeef daut en Jerusalem sea bosich mea Jinja. De heilja Jeist holp de Apostel, mea Vesaumlungen opptostalen, soo daut dee de Jinja aules lieren kunnen, waut Jesus an oppjejäft haud.