Waut kjenn wie von Jesus siene Wunda lieren?
HAST du daut jewist, daut wan de Bibel äwa Jesus sien Läwen oppe Ieed rät, dan brukt dee opp Griechisch kjeenmol daut Wuat fa “Wunda”. Daut griechische Wuat dýnamis woat eenjemol met “Wunda” äwasat, oba werkjlich bediet daut “Krauft” (Lukas 8:46, PB). Daut Wuat kaun uk met “kjraftje Woakje” ooda “Fäichkjeit” äwasat woaren (Matäus 11:20, NTR; 25:15, JHF). No eenen Jelieeden no meent dit griechische Wuat, “daut doa een majchtjet Woakj jedonen wort, un besonda uk de Krauft, met woone daut jedonen wort. Aun daut, waut doa passieed, kaun eena seenen, woo Gott siene Krauft utjeeeft woat.”
Daut jeft uk noch een aundret griechischet Wuat, téras, waut jeweenlich met “Wunda” äwasat woat (Johanes 4:48, PB; Aposteljeschicht 2:19, PB). Dit Wuat haft mea doamet to doonen, waut daut aun deejanje deit, waut daut Wunda beoobachten. Foaken wieren de Menschen un Jesus siene Jinja sea äwarauscht un staunden äwa de groote Woakjen, waut Jesus deed (Markus 2:12; 4:41; 6:51; Lukas 9:43).
Een dreddet griechischet Wuat, waut fa Jesus siene Wunda jebrukt wort, wia seméíon, un daut meent “Tieekjen”. Dit Wuat “wiest dolla opp de deepe Bediedunk von een Wunda han”, sajcht de Jelieeda Robert Deffinbaugh. Un hee sajcht uk: “Een Tieekjen es een Wunda, waut eene Woarheit äwa onsen Harn Jesus wiest.”
Kjeemen de Wunda werkjlich von Gott ooda worden dee bloos oppjemoakt?
No de Schreft no wieren Jesus siene Wunda nich bloos waut oppjemoaktet. Dee weesen “de groote Macht Gottes,” biejlikj aus Jesus mol eenen jungen Maun von eenen beesen Jeist friemuak (Lukas 9:37-43, JHF). Wudd daut fa dän aulmajchtjen Gott un “siene groote Krauft” ommäajlich sennen, soont to doonen? (Jesaja 40:26, PB). Secha nich!
De Evangelien räden von ojjefäa 35 Wunda, waut Jesus deed. Oba daut woat nich jesajcht, woo väl Wunda Jesus em gaunzen deed. Biejlikj sajcht daut en Matäus 14:14 (PB), Jesus sach “aul dee Menschen, un am jaumad daut äwa an, un hee heeld de kranke.” Wie weeten nich krakjt, woo väl kranke Menschen hee daut Mol heeld.
Jesus siene Wunda beweesen daut kloa, daut hee Gott sien Sän wia, de vesproakna Messias. De Schreft wiest, daut Jesus de Wunda derch Gott siene Krauft deed. De Apostel Petrus säd, Jesus wia “een Maun, derch dän Gott mank junt Wundawoakjen un Wundatieekjens deed, soo aus jie selfst weeten” (Aposteljeschicht 2:22, PB). Un een aundret Mol säd Petrus, daut “Gott dän Heiljen Jeist un siene Krauft äwa Jesus von Nazaret jeeten deed, dee dan omhäa jinkj un goodet deed un aul dee heeld, dee vom beesen Fient unjadrekjt worden, wiels Gott wia met am” (Aposteljeschicht 10:37-38, PB).
Jesus siene Wunda un siene Lieren wieren beid Poat von sien Woakj. Markus 1:21-27 wiest, woo de Menschen daut jinkj, aus see eent von Jesus siene Wunda sagen un siene Lieren hieeden. En Markus 1:22 (PB) sajcht daut, de Menschen “staunden äwa siene Lia” un Varsch 27 (PB) sajcht, daut daut Volkj “staund” aus hee eenen beesen Jeist utdreef. Jesus siene Wunda un daut, waut hee lieed, weesen, daut hee de vesproakna Messias wia.
Jesus säd nich bloos, daut hee de Messias wia. Oba siene Wunda beweesen daut uk. Aus eenje Juden fruagen, derch woone Krauft hee siene Wunda deed, säd hee: “Ekj oba hab een jratret Zeichnis aus Johanes [de Deepa] haud, wiels daut Woakj, daut de Voda mie oppjelajcht haud to verechten, un daut ekj uk doo, rät fa mie, daut de Voda mie jeschekjt haft” (Johanes 5:36, PB).
Bewies, daut Jesus siene Wunda werkjlich Wunda wieren
Woosoo kjenn wie ons secha sennen, daut Jesus siene Wunda werkjlich soo wieren? Well wie ons mol een poa Sachen unjastonen.
Aus Jesus Wunda deed, deed hee sikj kjeenmol selfst groot doamet. Hee sach emma doano, daut Gott de Iea doafäa kjrieech. Biejlikj säd Jesus eemol, ea hee eenen blinjen Maun heeld, daut hee daut doawäajen deed, “daut Gott siene Woakjen aun am verendach komen sullen” (Johanes 9:1-3, PB; 11:1-4).
Jesus wia aundasch aus soone, waut väajeewen, daut see kunnen Wunda doonen. Jesus wia nich een Zaubra uk nich een Wundaheela. Hee fieed de Menschen nich hinjaret Licht un brukt uk nuscht, waut met Äwagloowes to doonen haud toom dee heelen. See mol, opp waut vonne eefache Wajch hee twee blinje Mana heelen deed. Daut sajcht: “Jesus strikjt an ut Metlieden äwa de Uagen; un fuaz kunnen see wada seenen, un see jinjen met Jesus met” (Matäus 20:29-34, PB). Hee deed dit Wunda nich doatoo, daut aundre sullen Wunda denkjen von am. Jesus deed siene Wunda uk soo, daut aundre dee seenen kunnen. Daut es aundasch aus bie soone, waut vondoag dän Dach sajen daut dee kjennen Wunda doonen, oba dee kjennen daut nich bewiesen (Markus 5:24-29; Lukas 7:11-15).
Jesus heeld foaken Menschen, waut Gloowen aun am weesen. Oba mau rajcht wan een Mensch nich Gloowen haud, kunn Jesus dän doawäajen heelen. Aus Jesus en de Staut Kapernaum en Galiläa wia, “brochten see väle no am, dee von beese Jeista besäten wieren, un hee dreef de Jeista rut met sien Wuat un muak aul äare kranke jesunt” (Matäus 8:16, PB; von ons dunkel jemoakt).
Jesus deed Wunda toom de Menschen halpen, waut daut werkjlich fäld, nich toom sikj eenen grooten Nomen moaken (Markus 10:46-52; Lukas 23:8). Un Jesus deed kjeenmol Wunda fa sienen ieejnen Nutzen (Matäus 4:2-4; 10:8).
Kjenn wie opp daut vetruen, waut en de Evangelien steit?
En de vea Evangelien kjenn wie von Jesus siene Wunda läsen. Oba kjenn wie uk werkjlich doaropp vetruen, daut daut soo wia, aus daut doabennen steit? Jo, wie kjennen.
Soo aus wie ea aul säden, sagen een deel Menschen Jesus siene Wunda. Eenje von dise Evangelien worden to dee Tiet oppjeschräwen, aus de mieeschte von dee Menschen noch läwden, waut de Wunda jeseenen hauden. Daut Buak The Miracles and the Resurrection sajcht, daut et wudd sea ojjerajcht sennen, de Evangelien-Schriewa to beschuljen un to sajen, daut dee äwa Jesus siene Wunda lieejen deeden, bloos wiels dee äaren ieejnen Gloowen wullen vebreeden. Daut Buak sajcht uk: “Daut wieren opprechtje Schriewa”.
Dee Juden, waut jäajen de Christen wieren, säden kjeenmol, daut de Wunda, waut en de Evangelien oppjeschräwen sent, nich passieeden. Dee säden bloos, daut Jesus daut doawäajen doonen kunn, wäajen de beese Jeista am de Krauft jeewen (Markus 3:22-26). Nich mol dee, waut sikj lota jäajen de Christen stalden, kunnen daut bewiesen, daut Jesus siene Wunda nich passieeden. Daut jeft uk aundre Schreften von de ieeschte 200 Joa nodäm aus Jesus oppe Ieed läwd, waut uk von Jesus siene Wunda räden. Soo wie kjennen doaropp vetruen, daut daut, waut en de Evangelien von Jesus siene Wunda jeschräwen es, soo es.
Waut von Mensch wia Jesus?
Daut es oba lang nich jenuach bloos to jleewen, daut Jesus siene Wunda werkjlich passieeden. Daut es uk needich, dän Mensch kjanen to lieren, waut dise Wunda deed. De Evangelien lieren ons, daut Jesus leeftolich, sea metliedent un werkjlich om de Menschen bekjemmat wia.
Biejlikj kjeem eemol een Leprakranka no Jesus un prachad am un säd: “Wan du west kaust du mie reinjen.” Un “Jesus jaumad daut äwa am” un hee schieed dän aun un säd: “Ekj woa daut doonen; sie rein!” Un dee Maun wia fuaz jeheelt (Markus 1:40-42, PB). Aun dit kjenn wie seenen, daut Jesus Wunda deed, wäajen hee de Menschen leewd un om dee bekjemmat wia.
Waut passieed aus Jesus no de Staut Nain kjeem un doa jroz Menschen rutkjeemen, waut eenen Dooden wullen begrowen? De junga Maun, waut jestorwen wia, wia de eensja Sän von eene Wätfru. Un aus Jesus daut sach, “jaumad am daut äwa ar”. Hee jinkj no de Fru opptoo un säd: “Hiel nich!” Un dan wuak hee äaren Sän vom Doot opp (Lukas 7:11-15, PB).
Wan wie von Jesus siene Wunda läsen, dan jeft ons daut Troost, wäajen wie seenen kjennen, daut hee werkjlich om de Menschen bekjemmat wia un dee halpen wull. Oba dise Wunda jäwen ons uk Hopninj fa lota. Hebräa 13:8 (PB) sajcht: “Jesus Christus es deeselwja jistren un vondoag un fa aule Eewichkjeit”. Nu es hee Kjennich em Himmel un es reed noch väl mea Wunda to doonen, aus dee, waut hee don deed, aus hee oppe Ieed wia. Boolt woat Jesus siene Krauft brucken toom de jehuarsome Menschen heelen. Jehova siene Zeijen wellen die wellich halpen, mea äwa dise scheene Hopninj fa lota to lieren.
[Bilt]
Jesus siene Wunda weesen “de groote Macht Gottes”
[Bilt]
Jesus wia een Mensch, waut sea väl Metjefeel haud