Wuarom de Goaden Eden fa die wichtich es
VÄL Menschen jleewen doawäajen nich aun de Jeschicht von dän Goaden Eden, wäajens dee sajen, daut de Schreft opp aundre Städen nich mea doavon rät. Biejlikj sajcht de Jelieeda Paul Morris, waut äwa Gloowessachen studieet, daut de Schreft bloos en 1. Mose gaunz dietlich von dän Goaden Eden rät. Aundre Jelieede stemmen met am met, oba daut es nich rajcht, waut dee jleewen.
De Schreft rät ieremol von dän Goaden Eden un von Adam un Eva un von de Schlang.a Wan se sajen, daut de Jeschicht von dän Goaden Eden en 1. Mose nich rajcht es, dan es daut eene iernste Sach, wiels dan wudden dee doamet aul sajen, daut de gaunze Schreft nich rajcht es. Wuarom kjenn wie daut sajen?
Ons fält daut to vestonen, waut en dän Goaden Eden passieed, wan wie de äwaje Schreft wellen vestonen. Gott haft ons sien Wuat jejäft, daut wie de Kloarheit kjrieen äwa wichtje Sachen, waut wie weeten wellen. Sea foaken haben de Auntwuaten waut doamet to doonen, waut en dän Goaden Eden passieed. Unjasto wie ons mol een bät waut doavon.
● Wuarom woa wie oolt un stoawen? Adam un Eva wudden haben kunt fa emma läwen, wieren dee bloos Jehova jehuarsom jewast. Oba wiels dee ojjehuarsom wieren, musten dee stoawen. Un von dän Dach aun fungen dee aun to stoawen (1. Mose 2:16-17; 3:19). Wäajen dee nich mea volkomen wieren, orwen dee äare Kjinja de Sind un Onvolkomenheit met. Doawäajen sajcht de Schreft: “Soo aus derch eenen Mensch de Sind en de Welt nenn kjeem un derch de Sind de Doot, soo haft sikj de Doot äwa aule Menschen jespreet, wiels see aula sindijden” (Reema 5:12, PB).
● Wuarom lat Gott daut schlajchte too? En dän Goaden Eden nand de Soton Gott eenen Läajna un säd, daut Gott von de Menschen goodet trigjhilt (1. Mose 3:3-5). Doamet säd de Fient, daut Jehova een schlajchta Harscha wia. Adam un Eva stalden sikj opp dän Soton siene Sied un stalden sikj derch daut uk jäajen Jehova sien Rajcht to rejieren. Dee wullen selfst entscheiden, waut goot un schlajcht wia. Jehova es sea weis un toom disen Twiewel oppem kloaren brinjen, leet hee de Menschen äwa sikj selfst harschen, soo aus dee wullen. Von doa aun haft de Soton väl kunt aun de Menschen oppe Ieed doonen, un daut haft sikj kloa utjewäsen, daut de Menschen nich kjennen äwa sikj selfst harschen, onen Gott (Jeremia 10:23, NW).
● Waut haft Gott sikj met de Ieed väajenomen? Woo Jehova dän Goaden Eden muak, wees, woo hee wull haben, daut de gaunze Ieed sull loten. Hee säd to Adam un Eva, daut dee sullen Kjinja haben un daut dee sikj sullen om de Ieed kjemren, soo daut de gaunze Welt wudd soo schmock loten aus dän Goaden Eden (1. Mose 1:28). Gott wull haben, daut de gaunze Welt sull een schmocket Paradies woaren. Hee wull, daut de Nokomen von Adam un Eva sullen soo aus eene Famielje veeent toop läwen. Meist aules, waut wie enne Schreft läsen, haft met dit to doonen.
● Wuarom kjeem Jesus Christus no de Ieed? Wäajen Adam un Eva sikj jäajen Gott stalden, musten aul dee äare Nokomen stoawen. Oba Gott schekjt sienen Sän ut Leew no de Ieed, daut dee sien Läwen jeef. De Schreft nant daut daut Leesjelt (Matäus 20:28). Waut meent daut? Na Jesus wia “de latsta Adam”, oba hee wia aundasch aus de ieeschta Adam, hee wia Jehova emma jehuarsom. Jesus wia reed, sien Läwen aus een Opfa, ooda een Leesjelt, to jäwen, daut aule true Menschen kunn de Sinden vejäft woaren. Soo wudden dee noch mol wada kjennen en een Paradies läwen, soo aus daut en dän Goaden Eden wia (1. Korinta 15:22, 45, PB; Johanes 3:16). Wie kjennen ons gaunz secha sennen, daut de Welt noch mol wada woat een Paradies woaren, soo aus Jehova daut haben wull, wäajen Jesus sien Läwen jeef.b
Waut Gott sikj met de Ieed väajenomen haft, es gaunz dietlich un daut woat sikj opp iernst soo romnämen. Krakjt soo aus de Goaden Eden eene opp iernste Städ oppe Ieed wia, wua Menschen un Tieren wieren, soo woat Gott gaunz secha sien Vespräakjen uk boolt erfellen. Wurscht du daut wellen beläwen, waut Gott fa lota vesproaken haft? Daut henjt väl von die auf, aus du woascht ooda nich. Gott jeft aulem de Mäajlichkjeit, mau rajcht soone, waut waut schlajchtet jedonen haben (1. Timotäus 2:3-4).
Aus Jesus batem stoawen wia, räd hee to eenen Maun, waut waut sea schlajchtet jedonen haud. Dee Maun wist daut, daut hee daut vedeent haud, omjebrocht to woaren. Oba dee wull von Jesus Troost un Hopninj haben. Waut deed Jesus dan? Hee säd: “Du woascht … met mie em Paradies sennen” (Lukas 23:43, PB). Wan Jesus wull haben, daut dis Maun sull em Paradies läwen, dan kaust du die gaunz secha sennen, daut Jesus un sien Voda daut uk wellen haben, daut du doa läwen saust. Wan du west em Paradies läwen, dan lia soo väl aus mäajlich von dän Gott, waut dän Goaden Eden muak.
[Footnooten]
a See biejlikj 1. Mose 13:10; 5. Mose 32:8, NW; 2. Samuel 7:14, NW; 1. Chronik 1:1; Jesaja 51:3; Hesekiel 28:13; 31:8-9; Lukas 3:38; Reema 5:12-14; 1. Korinta 15:22, 45; 2. Korinta 11:3; 1. Timotäus 2:13-14; Judas 14 un Openboarunk 12:9.
b Wan du mea von Christus sien Leesjelt weeten west, dan see daut 5. Kapitel en daut Buak Waut lieet de Schreft werkjlich?, waut von Jehova siene Zeijen rutjejäft woat.
[Kausten]
EENE PROFEZEIUNK WUA DAUT EN DE GAUNZE BIBEL OM JEIT
“Du [de Schlang] un de Fru woaren junt fientlich sennen, un june Nokomen woaren sikj nich lieden kjennen. Hee woat die dien Kopp vewunden, un du woascht am de Hak vewunden” (1. Mose 3:15, PB).
Dit es de ieeschte Profezeiunk, un dee säd Gott em Goaden Eden. Om wäm jeit daut en dise Profezeiunk, wan daut von de Fru, dän Nokomen, de Schlang un dee äare Nokomen rät? Woo es daut to vestonen, daut dee sikj woaren “fientlich sennen”?
DE SCHLANG
Soton, de beesa Fient (Openboarunk 12:9).
DE FRU
Jehova siene himlische Organisazion, de Enjel (Galata 4:26-27). Jesaja säd verut, daut doa eene Fru wudd een jeisteljet Volkj to Welt brinjen (Jesaja 54:1; 66:8).
DE NOKOMEN VON DE SCHLANG
Dee, waut daut doonen wellen, waut de Soton haben well (Johanes 8:44).
DE NOKOMEN VON DE FRU
Jesus Christus es daut wichtichste Poat von disen “Nokomen”, hee jehieet uk to Jehova siene Organisazion em Himmel. Jesus siene jeistelje Breeda, waut met am toop em Himmel rejieren, sent uk Poat von disen “Nokomen”. De jesaulwde Christen sent een jeisteljet Volkj, “Gott sien Israel” (Galata 3:16, 29; 6:16; PB; 1. Mose 22:18).
DE HAK VEWUNDEN
De Soton leet Jesus oppe Ieed dootmoaken, oba dee Schoden bleef nich fa emma, wiels Jesus wort vom Doot oppjewakjt.
DÄN KOPP VEWUNDEN
Jesus woat dän Soton dootmoaken un daut fa emma. Oba noch ea dee daut doonen woat, woat dee aul daut schlajchte, waut de Soton aunjerecht haft, oppriemen, waut em Goaden Eden aunfunk (1. Johanes 3:8; Openboarunk 20:10).
Wan du noch mea weeten west, dan see daut Heft De Bibel: Om waut jeit daut doa bennen?. Daut es bie Jehova siene Zeijen to haben.
[Bilt]
Adam un Eva musten sea lieden, wäajens dee sindijden