Jehova es dee, waut daut mieeschte vejeft

1. Waut lieet de Kjennich Salomo ons en Liera 7:20?

DE Kjennich Salomo schreef: “Kjeen Mensch oppe Ieed es soo jerajcht, daut hee bloos goodet, un nuscht orrajchtet deit” (Liera 7:20). Daut es werkjlich soo! Wie sent aules Sinda (1. Joh. 1:8). Ons fält daut aula, daut Gott un aundre Menschen ons vejäwen.

2. Woo feelst du die, wan een gooda Frint die wellich vejeft?

² Hast du eent von diene Frind mol beleidicht? Secha wia die daut sea leet un du fruachst om togoodhoolen, daut jie wada kunnen Frind sennen. Woo feelsd du die, aus dien Frint wellich reed wia, die to vejäwen? Wieescht du nich sea froo un schaftich?

3. Äwa waut woa wie en disen Artikjel räden?

³ Wie wellen, daut Jehova ons basta Frint es. Oba eenjemol saj wie ooda doo wie waut, waut am beleidicht. Wuarom kjenn wie ons dan secha sennen, daut hee reed es, ons to vejäwen? Wuarom es daut aundasch, wan Jehova wäm vejeft, aus wan wie wäm vejäwen? Un wäm deit Jehova vejäwen?

JEHOVA ES REED TOOM VEJÄWEN

4. Wuarom kjenn wie ons secha sennen, daut Jehova reed es to vejäwen?

⁴ De Schreft vesechat ons, daut Jehova reed es, ons to vejäwen. Jehova säd bie dän Sinai-Boajch derch eenen Enjel to Moses, woo hee wia. Hee säd: “De HAR. De HAR es Gott, metliedent, voll Jnod, nich leicht doll, un sea leeftolich un truhoatich. Ekj hab truhoatje Leew fa dusende . . ., daut ekj june Sind, jun beeset benämen, un jun wadaspanstjet vejäw” (2. Mo. 34:6-7). Jehova es een leeftolja un metliedenda Gott un es emma reed to vejäwen, wan de Sinda een Leetsennen haft (Neh. 9:17; Psa. 86:15).

5. Waut deit Jehova no Psalm 103:13-14 no, wäajen hee ons soo goot kjant?

⁵ Jehova es ons Schepfa un doawäajen weet hee aules äwa ons. Denkj mol han – hee weet jieda Bietskje von jieda eenen, waut en dise Welt läft (Psa. 139:15-17). Un hee kaun aule Fäla seenen, waut wie von onse Elren metjeorwen haben. Hee weet mau rajcht, waut wie aules beläft haben, wuaderch wie soone Menschen sent, aus wie sent. Waut deit Jehova, wäajen hee ons soo goot kjant? Daut brinjt am bat doa, daut hee ons Metleet wiest (Psa. 78:39; läs Psalm 103:13-14).

6. Woo haft Jehova bewäsen, daut hee reed es toom vejäwen?

⁶ Jehova haft bewäsen, daut hee reed es to vejäwen. Hee weet, daut wie wäajen Adam sindje Menschen sent un met de Tiet stoawen (Reem. 5:12). Doa es kjeene Mäajlichkjeit, daut wie ons selfst ooda eenen aundren von de Sind un Doot friemoaken kjennen (Psa. 49:8-10). Oba ons leeftolja Gott wees Metleet un deed waut toom ons friemoaken. Waut deed hee? No Johanes 3:16 no schekjt Jehova sienen ieeschtjebuarnen Sän, daut dee fa ons storf (Mat. 20:28; Reem. 5:19). Jesus storf en onse Städ, daut aul deejanje kunnen friekomen, waut aun am jleewden (Heb. 2:9). Jehova mott daut sea weejedonen haben, aus hee sach, daut se sienen leewen Sän veachten un grausom dootmuaken! Wan Jehova ons nich haud wult vejäwen, wudd hee nienich toojeloten haben, daut se sienen Sän dootmuaken.

7. Waut fa Biespels jeft daut en de Schreft, dee Jehova wellich vejeef?

⁷ En de Bibel sent väle Biespels bennen von soone, dee Jehova wellich vejeef (Efs. 4:32). Aun wäm denkjst du nu? Na, veleicht aun dän Kjennich Manasse. Dis schlajchta Maun bejinkj groote Sinden jäajen Jehova. Hee bäd faulsche Jetta aun un rod aundre too, dautselwje to doonen. Hee muak siene ieejne Kjinja doot, om dee eenen faulschen Gott to opfren. Hee jinkj mau rajcht soo wiet, daut hee en Jehova sienen heiljen Tempel eenen Aufgott oppstald. De Schreft sajcht äwa am: “[Hee] deed väl, waut däm HARN schlajcht jefoll, om däm sien Oaja äwa sikj to brinjen” (2. Chr. 33:2-7). Oba aus Manasse opp iernst een Leetsennen bewees, wia Jehova reed, am to vejäwen. Gott leet am mau rajcht wada Kjennich sennen (2. Chr. 33:12-13). Veleicht denkjst du uk aun dän Kjennich David, waut uk schwoa jäajen Jehova sindjen deed un mau rajcht Ehebruch un Mort bejinkj. Oba aus David sienen Fäla aunerkjand un opp iernst een Leetsennen haud, vejeef Jehova am (2. Sam. 12:9-10, 13-14). Soo, wie kjennen ons secha sennen, daut Jehova reed es, ons to vejäwen. Un soo aus wie en disen Artikjel seenen woaren, es daut gaunz aundasch, wan Jehova wäm vejeft, aus wan Menschen daut doonen.

JEHOVA VEJEFT AUNDASCH AUS MENSCHEN

8. Wuarom es Jehova de basta Rechta?

⁸ Jehova es “de Rechta fa de gaunze Ieed” (1. Mo. 18:25). Een gooda Rechta mott goot om daut Jesaz omweeten. Jehova es ons Rechta un hee weet hundat Prozent om daut Jesaz om, wiels hee selfst de Jesazjäwa es (Jes. 33:22, NW). Kjeena weet soo goot, waut rajcht un orrajcht es aus Jehova. Waut fält eenen gooden Rechta noch? Hee mott bie eene Sach om jieda Eenselheit omweeten, ea hee eene Entscheidunk moakt. Doawäajen es Jehova de basta Rechta.

9. Aun waut denkjt Jehova aules, ea hee wäm vejeft?

⁹ Bie Jehova es daut nich soo, aus bie de menschelje Rechta, wiels hee weet om jieda Sach rein gaunz om (1. Mo. 18:20-21; Psa. 90:8). Bie am es daut uk nich soo aus bie de Menschen, waut bloos daut weeten, waut see seenen un hieren. Hee kaun biejlikj krakjt vestonen, waut vonne Ieejenschoften eena von de Elren metjeorwen haft, waut vonne Belierunk ooda Schoolen eena jekjräajen haft, wua eena läft un uk, woo daut met eenem siene Jefeelen steit. Jehova weet, daut aul dit doamet to doonen haft, waut een Mensch deit. Jehova kaun mau rajcht seenen, waut wie em Hoat haben. Hee weet, daut aul dit doamet to doonen haft, woo wie sent, waut wie doonen un wuarom wie daut doonen. Ver am es nuscht em Jeheemen (Heb. 4:13). Doawäajen, wan Jehova wäm vejeft, dan es daut, wäajen hee om de Sach gaunz un goa omweet.

10. Wuarom kjenn wie sajen, daut Jehova emma rajcht rechten deit? (5. Mose 32:4).

¹⁰ Jehova deit emma jerajcht rechten. Hee moakt kjeenen Unjascheet. Aus Jehova wäm vejeft, haft nuscht doamet to doonen, aus eenem schmock lat, rikj es, goot aunjeseenen es ooda väl kaun (1. Sam. 16:7; Jak. 2:1-4). Kjeena kaun Jehova to waut bemotten ooda bekjeepen (2. Chr. 19:7). Un siene Entscheidungen sent uk nich doano, woo hee sikj dän Dach jroz feelt (2. Mo. 34:7). Soo, Jehova es de basta Rechta, wiels hee weet om jieda Eenselheit om, woo daut met ons steit (läs 5. Mose 32:4, JHFb).

11. Waut es daut besondre doaraun, wan Jehova vejeft?

¹¹ De Schriewa von de hebräische Schreften kunnen vestonen, daut daut besonda es, woo Jehova ons vejeft. Eenjemol brukten dee een hebräischet Wuat, waut bloos jebrukt woat toom beschriewen, woo Jehova eenen Sinda vejeft un nienich, woo een Mensch eenen aundren vejeft. Bloos Jehova haft de Macht, eenen Sinda volstendich to vejäwen. Waut kjemt doabie rut, wan Jehova ons vejeft?

12-13. (a) Woo feelt een Mensch sikj, dän Jehova vejeft? (b) Woo lang helt daut väa, wan Jehova vejeft?

¹² Wan wie daut aunnämen, daut Jehova ons togood helt, dan kjrie wie “eene fresche Beläwungstiet” un wie haben dan uk ennalich Fräd un een goodet Jewessen. Opp soone Wajch vejäwen kaun bloos Jehova (Apj. 3:19). Wan hee ons vejeft, dan lat hee ons wada siene Frind sennen un daut es soo, aus wudd wie nienich jäajen am jesindicht haben.

¹³ Wan Jehova ons togood jehoolen haft, dan woat hee ons de Sinden nienich mea väahoolen ooda ons doafäa bestrofen (Jes. 43:25; Jer. 31:34). Hee schmitt onse Sinden soo wiet wajch, “aus de Oosten vom Wasten es” (Psa. 103:12).c Wan wie doaräwa nodenkjen, woo besonda daut es, wan Jehova vejeft, dan sent wie sea dankboa un weeten ons Wunda nich uttospräakjen (Psa. 130:4). Oba wäm woat Jehova opp soone Wajch vejäwen?

WÄM WOAT JEHOVA VEJÄWEN?

14. Waut hab wie bat nu jeseenen, wuarom Jehova wäm vejeft ooda nich?

¹⁴ Soo aus wie jeseenen haben, es daut nich doano, aus daut eene groote ooda kjliene Sind es, aus Jehova vejäwen woat ooda nich. Wie haben uk jelieet, daut Jehova siene Erkjantnis aus Schepfa, Jesazjäwa un Rechta brukt toom entscheiden, aus hee wäm vejäwen woat. No waut kjikjt Jehova krakjt, ea hee wäm vejeft?

15. Waut es eent, wua Jehova no kjikjt, ea hee wäm vejeft no Lukas 12:47-48 no?

¹⁵ Eent, wua Jehova no kjikjt, es, aus de Sinda vestonen kaun, daut daut schlajcht wia, waut hee deed. Daut muak Jesus dietlich en Lukas 12:47-48 (läs). Wan doa wäa mootwellich plont, waut schlajchtet to doonen un hee weet daut, daut daut jäajen Jehova es, dee bejeit eene schwoare Sind. Un Jehova woat sikj dan veleicht eenich, dänjanjen nich to vejäwen (Mar. 3:29; Joh. 9:41). Oba eenjemol doo wie waut, wan wie uk weeten, daut et orrajcht es. Woat Jehova ons dan togood hoolen? Jo! Dit brinjt ons no daut näakjste, no waut Jehova kjikjt, ea hee wäm vejeft.

16. Waut bediet daut, een Leetsennen to haben, un wuarom es daut needich, daut Jehova ons vejäwen kaun?

¹⁶ Noch waut, wua Jehova no kjikjt, es, aus dän Sinda daut opp iernst leet deit. Waut bediet daut, opp iernst een Leetsennen to haben? Daut bediet, daut wäa sien denkjen un siene Enstalunk endat. Doa es uk met en, daut deejanja daut sea beschoden deit un opp iernst truarich es äwa daut, waut hee jedonen haft ooda daut hee nich daut rajchte jedonen haft, waut hee wudd haben sult. Soona, waut opp iernst een Leetsennen haft, es nich bloos truarich äwa daut, waut hee jedonen haft, oba uk doawäajen, daut hee em jeisteljen soo raufjekomen es, waut to de Sind fieed. Denkj wie noch eemol aun dän Kjennich Manasse un David. Beid hauden schwoa jesindicht, oba Jehova wia reed, an to vejäwen, wäajen see opp iernst een Leetsennen hauden (1. Kjen. 14:8). Daut Jehova ons vejäwen kaun, mott hee seenen kjennen, daut ons de Sinden opp iernst leet sent. Daut es noch nich jenuach, bloos een Leetsennen to feelen, oba eena mott uk waut doonen.d Un daut brinjt ons noch no daut aundre, wua Jehova no kjikjen deit.

17. Waut bediet daut omtokjieren, un wuarom es daut onbedinjt needich, om nich emma wada deeselwje Sind to begonen? (Jesaja 55:7).

¹⁷ Eene aundre wichtje Sach, wua Jehova opp achten deit bie eenen Sinda, es, aus dee omkjieet. Omkjieren bediet “omwenjen”. Aundasch jesajcht, deejanja mott opphieren, schlajchtet to doonen un mott daut doonen, waut Jehova haben well (läs Jesaja 55:7). Dee mott sien denkjen endren un soo denkjen, aus Jehova deit (Reem. 12:2; Efs. 4:23). Hee mott sikj gaunz eenich sennen, dän schlajchten Läweswaundel von ea hinja sikj to loten (Kol. 3:7-10). Daut aul dit mäajlich es, mott wie aun Christus sien Opfa jleewen, wiels daut es de Gruntloag, wuaderch Jehova ons von de Sinden reinwauschen kaun. Wan Jehova sitt, daut wie ons opp iernst aunstrenjen, ons Läwen to endren, kaun hee ons derch dit Opfa vejäwen (1. Joh. 1:7).

VELOT DIE DOAROPP, DAUT JEHOVA DIE VEJÄWEN WOAT

18. Waut hab wie doaräwa jelieet, woo Jehova vejeft?

¹⁸ Wadahol wie mol een bät de wichtje Sachen, waut wie bat nu jelieet haben. Secha jeft daut kjeenen aundren, waut soo vejäwen deit aus Jehova. Wuarom kjenn wie daut sajen? Ieeschtens, wiels hee emma reed es toom vejäwen. Tweedens, wiels hee ons hundat Prozent kjant. Hee weet krakjt, wäa wie sent un hee es de eensja, waut werkjlich seenen kaun, aus ons daut opp iernst leet es. Un dreddens, wan Jehova ons vejeft, dan es daut soo, aus wan hee de Waunttofel reinwescht. Doaderch kjenn wie dan een reinet Jewessen haben un wada siene Frind woaren.

19. Wuarom kjenn wie schaftich sennen, wan wie uk onvolkomen sent un emma wada sindjen?

¹⁹ Secha woa wie emma wada sindjen, wäajen wie onvolkomen sent. Oba ons kjennen de Wieed treesten, waut wie en daut Buak finjen Einsichten über die Heilige Schrift, Band 2, Sied 693. Doa sajcht daut: “Jehova es metliedent un hee weet, daut siene Deena schwak sent. Doawäajen es daut nich needich, daut dee dän Tiet äwa truarich sent, daut see onvolkomen sent un Fäla moaken (Psa 103:8-14; 130:3). Wan dee äa bastet doonen, om Gott sienen Wellen to doonen, dan kjennen dee schaftich sennen (Filip. 4:4-6; 1. Joh. 3:19-22).” Es daut nich werkjlich een groota Troost?

20. Waut woa wie en dän näakjsten Artikjel seenen?

²⁰ Wie sent sea dankboa, daut Jehova reed es, ons to vejäwen, wan wie werkjlich een Leetsennen haben. Oba woo kjenn wie aundre uk soo vejäwen, aus Jehova deit? En waut fa Stekjen likjent ons vejäwen sikj met Jehova sien vejäwen, un en waut vonne Stekjen es daut aundasch? Wuarom es daut wichtich, daut wie disen Unjascheet vestonen kjennen? De näakjsta Artikjel woat dise Froagen beauntwuaten.