Waut lieet de Bibel ons äwa Jehova?

1. Wuarom best du dankboa fa de Bibel?

SENT wie Jehova Gott nich sea dankboa fa de Bibel? En de Bibel haft hee een deel weisen Rot loten oppschriewen, waut ons halpen kaun, wan wie Trubbels haben. Hee jeft ons uk eene wundascheene Hopninj fa lota. Un noch wichtja es, daut Jehova ons derch de Bibel een deel von siene goode Ieejenschoften weeten lat. Wan wie äwa dise goode Ieejenschoften nodenkjen, jeit ons daut sea to Hoaten un wie wellen am emma noda komen un siene Frind woaren (Psa. 25:14).

2. Woo haft Jehova de Menschen von sikj waut weeten loten?

² Jehova well, daut de Menschen am kjanen lieren. Ieeschtemma leet hee eenje Menschen Dreem un Visionen haben ooda hee schekjt eenen Enjel, daut de Menschen waut von am weeten kunnen (4. Mo. 12:6; Apj. 10:3-4). Oba wie wudden daut nich studieren kjennen, wan hee dise Dreem un Visionen ooda dise Norechten von de Enjel nich haud loten oppschriewen. Dit es, wuarom Jehova eenje Mana daut “en een Buak” oppschriewen leet, waut hee ons wull weeten loten (Jer. 30:2). Wäajen “Gott siene Wäaj . . . volkomen” sent, kjenn wie ons secha sennen, daut et fa ons daut baste es un ons daut mieeschte halpt, daut hee opp dise Wajch met ons rät (Psa. 18:31).

3. Woo sach Jehova doano, daut wie de Bibel bie dise Tiet noch haben kjennen? (Jesaja 40:8).

³ Läs Jesaja 40:8. Fa dusende Joaren es de gooda Rot ut de Schreft de true Mana un Frues togood jekomen. Woo wia daut mäajlich? De Schreften worden je aul lang trigj opp soont oppjeschräwen, waut nich lang väahilt. Bie dise Tiet hab wie aul nuscht von daut, wua dee daut ieeschtemma oppschreewen. Oba Jehova sach doano, daut dis besondra Takjst emma wada aufjeschräwen wort. Wan de Aufschriewa uk onvolkomen wieren, deeden dee daut oba sea krakjt. Een Jelieeda schreef biejlikj äwa de Hebräische Schreften: “Wie kjennen ons gaunz secha sennen, daut nich een aundret ieeschtemmaschet Buak soo krakjt aufjeschräwen worden es.” Wan de Schreft uk aul lang trigj oppjeschräwen wort un dan noch opp soont, waut nich lang väahilt, un de Aufschriewa uk onvolkomen wieren, kjenn wie ons oba secha sennen, daut daut Jehova siene Jedanken sent, waut wie nu en de Bibel läsen.

4. Waut woat dis Artikjel ons wiesen?

⁴ Von Jehova komen “aule goode Sachen un aule volkomne Gowen” (Jak. 1:17). De Bibel es eent von daut jratste Jeschenkj, waut Jehova ons jejäft haft. Wan wie een Jeschenkj kjrieen, dan wiest ons daut, woo goot deejanja ons kjant un weet, waut wie brucken. Krakjt soo es daut uk met de Bibel. Wan wie dit Jeschenkj unjasieekjen, lia wie väl von Jehova. Wie lieren, woo goot hee ons kjant un krakjt weet, waut wie brucken. En disen Artikjel woa wie dree Ieejenschoften von Jehova seenen: siene Weisheit, siene Jerajchtichkjeit un siene Leew. Well wie daut ieeschte mol seenen, waut de Bibel ons doaräwa wiest, woo weis Gott es.

WAUT DE BIBEL VON GOTT SIENE WEISHEIT LIEET

5. Waut es eent, waut de Bibel von Gott siene Weisheit lieet?

⁵ Jehova weet, daut wie sienen weisen Rot brucken. En sien Jeschenkj, de Bibel, es väl Weisheit bennen. De Rot ut de Bibel deit de Menschen goot. De Bibel endat Läwes. Aus Moses de ieeschte Bieekja von de Bibel schreef, säd hee to de Israeliten: “Dise Väaschreften sent nich ladjet Sprie. Nä, dee sent Läwen fa junt” (5. Mo. 32:47). Deejanje, waut doano horchten, kunnen een tofrädnet Läwen haben (Psa. 1:2-3). Gott sien Wuat haft kjeenmol de Macht veloaren, daut et nich kunn Läwes endren. Opp jw.org bie “De Schreft haft äa Läwen veendat” kjenn wie biejlikj een schoof Biespels finjen, waut doa kunnen groote Endrungen moaken, wäajen dee aunfungen, no dän biblischen Rot to horchen. De Schreft wirkjt nu noch en dee, “dee doa jleewen” (1. Tess. 2:13).

6. Wuarom kjenn wie sajen, daut de Bibel nich soo es aus irjenteen aundret Buak?

⁶ Kjeen aundret Buak es soo besonda aus Gott sien Wuat. Wuarom es daut soo? Wäajen deejanja, waut dit Buak oppschriewen leet, Jehova Gott es. Hee es aulmajchtich, hee es eewich, un doa es kjeena weisa aus hee. Een deel aundre Bieekja woaren noch jeläst, wan de Schriewa uk aul lang doot sent, oba dee äa Rot es irjentwanea nich mea to brucken. De Bibel es aundasch. Dee äa Rot un de Gruntsauzen sent emma to brucken. De Menschen kjeem disen Rot aul emma togood. Wan wie dit besondre Buak läsen un doaräwa nodenkjen, waut wie doavon lieren, kaun Jehova sienen majchtjen, heiljen Jeist brucken, om ons halpen to seenen, woo wie dän biblischen Rot en ons Läwen nokomen kjennen (Psa. 119:27; Mal. 3:16; Heb. 4:12). Jehova es deejanja, waut de Schreft oppschriewen leet, un hee läft noch emma un well die halpen! Aul dit saul ons bat doa brinjen, de Schreft pinkjlich to läsen.

7. Woo haft de Bibel Gott siene Deena ieeschtemma veeent?

⁷ Noch een aundra Bewies, daut enne Bibel Gott siene Weisheit es, kjenn wie doaraun seenen, daut Gott siene Deena halpt, en Eenichkjeit to bliewen. Aus de Israeliten en daut vesproakne Launt nennkjeemen, trocken dee no gaunz veschiedne Städen. Eenje von dee worden Fescha, aundre schauften mankem Vee un noch aundre schauften oppem Foarm. Fa de Israeliten wudd daut sennen gaunz leicht jewast, sikj nich mea om de aundre Israeliten to kjemren, waut opp de aundre Städen en Israel wonden. Oba Jehova haud daut fa de Israeliten soo enjerecht, daut dee emma wada toopkomen sullen, om no daut to horchen, waut von sien Wuat väajeläst un utjelajcht wort (5. Mo. 31:10-13; Neh. 8:2, 8, 18). Stal die mol väa, woo eenen truen Israelit daut mott jegonen haben, wan hee no Jerusalem kjeem un de aundre millionende Israeliten sach, waut von gaunz Israel kjeemen! Opp dise Wajch holp Jehova dee, en Eenichkjeit to bliewen. Lota, aus de Christenvesaumlunk oppjestalt wort, wieren doa een deel Mana un Frues, waut veschiedne Sproaken räden deeden. Eenje von dee wieren bekaunt un aundre wieren eefache Menschen; eenje wieren rikj un aundre oam. Oba dee kunnen Jehova aula en Eenichkjeit aunbäden, wäajen dee de Schreften väl räakjenden. Soone, waut de Woarheit kjanen lieeden, kunnen Gott sien Wuat bloos doaderch vestonen, wäajen dee Help kjrieejen von de aundre un sikj met dee toop vesaumelden (Apj. 2:42; 8:30-31).

8. Woo veeenicht de Bibel Jehova siene Deena vondoag dän Dach?

⁸ Jehova lieet un veeent siene Deena wieda derch de Bibel. Aules, waut wie äwa Jehova weeten motten, finj wie enne Bibel. Wie vesaumlen ons räajelmässich bie onse Toopkomes un Kongressen un horchen doa no daut, waut väajeläst un utjelajcht woat. De Bibel es een sea wichtjet Poat von daut, woo Jehova siene Deena halpt, “am en Eenichkjeit to deenen” (Zef. 3:9, NW).

9. Woo mott wie sennen toom de Bibel vestonen? (Lukas 10:21).

⁹ See wie mol noch eenen aundren Bewies von Gott siene Weisheit. Hee haft een deel von de Bibel loten soo oppschriewen, daut bloos deemootje Menschen daut vestonen kjennen (läs Lukas 10:21). Aulawäajen läsen de Menschen de Bibel. Een Jelieeda säd, “daut de Bibel daut gaunz foakenste un daut gaunz krakjste jeläst wort von aule Bieekja”. Oba bloos de deemootje Menschen vestonen daut un komen daut no, waut dee sajcht (2. Kor. 3:15-16).

10. Waut kjenn wie enne Bibel noch von Jehova siene Weisheit lieren?

¹⁰ Wie lieren noch von eene aundre Sach enne Bibel, woo weis Jehova es. Jehova brukt de Schreft nich bloos, om ons aula toop to lieren, oba uk, om jieda eenselnen to treesten un to lieren. Wan wie Gott sien Wuat läsen, dan kjenn wie späaren, daut Jehova om jieda eenselnen todoonen es (Jes. 30:21). Wan du eenen Trubbel hast, woo foaken nemst du dan de Schreft un läst eenen Varsch un denkjst, daut dee krakjt fa die jeschräwen es? Krakjt soo jeit millionende Menschen daut. Woo es daut mäajlich, daut doa vondoag dän Dach noch soon Rot bennen es, waut krakjt paussent es fa diene Loag? Daut es bloos mäajlich, wäajen de Bibel von dän gaunz Kjlieekjsten kjemt (2. Tim. 3:16-17).

WAUT DE BIBEL VON GOTT SIENE JERAJCHTICHKJEIT LIEET

11. Aun waut es to seenen, daut Gott nich eenen Unjascheet muak, aus hee de Bibel oppschriewen leet?

¹¹ Jerajchtichkjeit es noch eene aundre Ieejenschoft von Jehova (5. Mo. 32:4). Wäa jerajcht es, moakt fa jeweenlich kjeenen Unjascheet. Un wäajen Jehova jerajcht es, muak hee kjeenen Unjascheet en de Sproaken, aus hee de Schreft oppschriewen leet (Apj. 10:34-35; Reem. 2:11). De ieeschte 39 Bieekja sent mieeschtens opp Hebräisch jeschräwen, wäajen Gott siene Deena to dee Tiet dee Sproak räden deeden un vestonen kunnen. Oba en de Aposteltiet wort de griechische Sproak sea jebrukt un doawäajen worden de latste 27 Bieekja mieeschtens opp Griechisch oppjeschräwen. Jehova leet sien Wuat nich bloos opp eene Sproak schriewen. Bie dise Tiet jeft daut soo bie achtdusent millionen Menschen oppe Welt un dee räden veschiedne Sproaken. Woo kjennen soo väl Menschen von Jehova lieren?

12. Woo erfelt sikj Daniel 12:4 en de latste Doag?

¹² Derch dän Profeet Daniel vespruak Jehova, daut doa en de latste Tiet “äwajenuach woare Erkjantnis” von de Bibel sennen woat. Väle wudden daut vestonen kjennen (läs Daniel 12:4, NW). Een Grunt, wuarom doa väl Erkjantnis es, es, wäajen de Bibel un de biblische Bieekja äwasat, rutjejäft un vebreet woaren. De Bibel es daut Buak, waut daut mieeschte Mol äwasat wort un daut gaunz wietste vebreet wort. Wan eena em Stua eene Bibel kjaft, es dee foaken sea dia. Oba Jehova siene Deena haben Gott sien Wuat bat nu gaunz ooda poatwies en äwa 240 Sproaken äwasat un irjenteena kaun emsonst eene Bibel haben. Doaderch kjennen de Menschen von aule Velkja “daut Evangelium von Gott sien Rikj” hieren, ea daut Enj kjemt (Mat. 24:14). Wäajen Jehova de Menschen soo sea leeft un wäajen hee soo jerajcht es, well hee, daut aule Menschen de Jeläajenheit kjrieen, am derch sien Wuat kjanen to lieren.

WAUT DE BIBEL VON GOTT SIENE LEEW LIEET

13. Woo kjenn wie Jehova siene Leew enne Bibel seenen? (Johanes 21:25).

¹³ De Bibel halpt ons to vestonen, daut Jehova siene jratste Ieejenschoft Leew es (1. Joh. 4:8, NW). See wie mol, waut Jehova aules haft loten enne Bibel oppschriewen un waut nich. Hee jeft ons bloos daut, waut wie brucken toom met am Frind sennen, uk daut wie nu aul kjennen schaftich sennen un daut wie daut eewje Läwen kjrieen. Un wäajen Jehova ons soo sea leeft, haft hee ons nich een deel Eenselheiten oppschriewen loten, waut ons goanich fälen toom am deenen (läs Johanes 21:25).

14. Woo wiest de Bibel noch, daut Gott ons leeft?

¹⁴ Jehova rät met ons soo, daut et eene Iea fa ons es. Doaderch wiest hee ons siene Leew. Hee jeft ons derch de Bibel nich eene lange List met Räajlen, waut wie krakjt en jieda Loag doonen sellen un waut nich. Enne Städ daut brukt hee werkjelje Jeschichten, intressaunte Profezeiungen un gooden Rot toom ons halpen, goode Entscheidungen to trafen. Wäajen hee soo met ons rät, well wie am vom Hoaten leewen un jehorchen.

15. (a) Woo wiest de Bibel, daut Jehova om ons bekjemmat es? (b) Äwa waut von Mensch denkjt de kjliene Mejal ooda de junga Brooda ooda de elre Sesta no, soo aus daut Bilt wiest?

¹⁵ Woo wiest de Bibel, daut Jehova sea om ons bekjemmat es? En sien Wuat sent een deel Jeschichten, waut beschriewen, woo Menschen sikj feelden. Wie kjennen ons en dee äare Städ stalen, wäajen daut soone Menschen wieren aus wie un soo feelden aus wie (Jak. 5:17). To seenen, woo Jehova met dee Menschen omjinkj, halpt ons to vestonen, daut Jehova metliedent es un sikj erboarmt (Jak. 5:11).

16. Waut lia wie äwa Jehova, wan wie en de Bibel von soone läsen, waut Fäla muaken? (Jesaja 55:7).

¹⁶ Enne Bibel see wie Jehova siene Leew noch opp eene aundre Wajch. De Schreft vesechat ons, daut Jehova ons nich veloten woat, wäajen wie Fäla moaken. De Israeliten deeden emma wada jäajen Jehova sindjen, oba wan dee opp iernst een Leetsennen hauden, vejeef hee dee (läs Jesaja 55:7). De ieeschte Christen wieren sikj uk secha, daut Jehova an leewd. Hee rod de Christen derch dän Apostel Paulus too, daut see eenen Maun, waut jesindicht haud un opp iernst een Leetsennen haud, vejäwen un treesten sullen (1. Kor. 5:1-5; 2. Kor. 2:6-7). Woo scheen daut nich es, daut Jehova siene Deena nich aufwiesen deit, bloos wäajen dee Fäla moaken. Enne Städ daut halpt hee dee leeftolich un wiest dee trajcht un well, daut dee wada met am Frind woaren. Aul dit vesprakjt hee uk deejanje, waut vondoag dän Dach een Leetsennen haben un omkjieren (Jak. 4:8-10).

GOTT SIEN WUAT ES EEN GOODET JESCHENKJ

17. Wuarom es de Bibel soon besondret Jeschenkj?

¹⁷ Jehova haft ons een besondret Jeschenkj jejäft – sien Wuat, de Bibel. Wuarom es daut soo besonda? Wie haben jelieet, daut de Bibel wiest, daut Gott weis es, jerajcht es un ons sea leeft. Dit Buak bewiest, daut Jehova well, daut wie am kjanen lieren. Hee well, daut wie siene Frind sent.

18. Woo kjenn wie dankboa sennen fa aul de “goode Sachen” enne Bibel?

¹⁸ Wie wellen kjeenmol vejäten, daut aul de “goode Sachen” en Gott sien Wuat een Jeschenkj sent (Jak. 1:17). Well wie wieda dankboa sennen fa daut. Daut kjenn wie, wan wie sien heiljet Wuat läsen un doaräwa nodenkjen. Wan wie daut doonen, dan kjenn wie ons secha sennen, daut deejanja, waut de Schreft haft loten oppschriewen, onse Aunstrenjunk säajnen woat un daut wie woaren “Gotteserkjantnis finjen” (Spr. 2:5).