“Mana aus Jeschenkja” – Sie dankboa fa dee

1. Waut vonne Jeschenkja haft Jesus ons jejäft?

KJEEN Mensch es jeemols soo friejäwrich jewast aus Jesus. Aus hee oppe Ieed wia, brukt hee siene Macht, Wunda to doonen, om aundre to halpen (Luk. 9:12-17). Sien jratstet Jeschenkj wia, daut hee sien Läwen fa ons jeef (Joh. 15:13). Jesus bleef wieda friejäwrich, aus hee vom Doot oppstunt. Krakjt soo aus hee vespruak, fruach hee Jehowa no sienen heiljen Jeist toom ons lieren un treesten (Joh. 14:16-17, Fn.; 16:13). Vondoag dän Dach woa wie uk derch de Toopkomes wieda von Jesus utjelieet, om de Menschen äwa de gaunze Ieed to lieren, am notofoljen (Mat. 28:18-20).

2. Wäa jehieet to dee, waut Jesus aus Jeschenkja jeef no Efeesa 4:7-8 no?

² Doa es noch een Jeschenkj, waut Jesus ons jeef. De Apostel Paulus schreef, daut Jesus “Mana aus Jeschenkja” jeef, nodäm daut hee nom Himmel fua (läs Efeesa 4:7-8). Hee räd doavon, daut Jesus dise Mana jeef toom de Vesaumlungen opp veschiedne Wäaj unjastetten (Efs. 1:22-23; 4:11-13). Vondoag dän Dach sent daut de Deenstaumthelpa, ooda Vesaumlungshelpa, Eltestasch un Kjreisoppsechtasch.a Wie weeten, daut dee nich volkomen sent un Fäla moaken (Jak. 3:2). Oba Jesus Christus brukt dise Mana, waut Jeschenkja sent, doawäajen toom ons halpen.

3. Woo kaun jieda eena von ons dise “Mana aus Jeschenkja” unjastetten? Vejlikj daut.

³ Dise “Mana aus Jeschenkja” sent Breeda, waut Jesus aunjestalt haft toom de Vesaumlunk oppbuen un stoakjen (Efs. 4:12). Oba wie aula kjennen dee doabie unjastetten, dise groote Veauntwuatunk notokomen. Daut jeit doamet to vejlikjen, wan een Vesaumlungshus jebut woat. Eenje doonen de Buoabeit un aundre doonen dee doabie unjastetten, wäajen dee veleicht daut Äten reedmoaken ooda Sachen opp un dol fieren ooda opp eene aundre Wajch uthalpen. Krakjt soo es daut uk en de Vesaumlunk. Wie aula kjennen de Vesaumlungshelpa, Eltestasch un Kjreisoppsechtasch bie äare Oabeit unjastetten derch daut, waut wie sajen un doonen. Well wie ons daut nu mol unjastonen, woo ons daut togood kjemt, daut dise Breeda sea schaufen, un woo wie Jesus un de Breeda, waut Jeschenkja sent, wiesen kjennen, daut wie äant sea väl räakjnen.

VESAUMLUNGSHELPA, “WAUT AUNDRE HALPEN”

4. Woo deeden de Vesaumlungshelpa enne Aposteltiet “aundre halpen”?

⁴ Enne Aposteltiet jeef daut Breeda, waut aus Vesaumlungshelpa aunjestalt worden (1. Tim. 3:8). Daut späat sikj soo, daut Paulus von dee räd, aus hee säd, daut daut soone enne Vesaumlunk jeef, “waut aundre holpen” (1. Kor. 12:28). De Vesaumlungshelpa kjemmaden sikj secha om aul de needje Sachen, un doaderch hauden de Eltestasch mea Tiet un Krauft toom Liera un Hoads sennen. Daut kaun goot sennen, daut de Vesaumlungshelpa metholpen, de heilje Schreften auftoschriewen ooda daut koften, waut doatoo needich wia.

5. Woo doonen de Vesaumlungshelpa vondoag dän Dach aundre halpen?

⁵ Waut doonen de Vesaumlungshelpa en diene Vesaumlunk toom aundre halpen? (1. Pet. 4:10). Veleicht kjemren dee sikj om de Räakjninj von de Vesaumlunk ooda om de Prädichtdeenst-Jebieten; doonen Bieekja bestalen un dee uk utdeelen; halpen met daut Audio- un Video-Jereetschoft; sent Ordna ooda halpen uk met, daut Vesaumlungshus to unjahoolen. Aul dit mott jedonen, daut et enne Vesaumlunk kaun jlei ranen (1. Kor. 14:40). Bowenenn haben eenje Vesaumlungshelpa uk Oppgowen en daut Toopkomen fa Läwen un Deenst un hoolen biblische Räden. Eenje Vesaumlungshelpa woat uk oppjejäft, eenen Gruppenoppsechta to halpen. Un aundre, waut doatoo fäich sent, kjennen toop met de Eltestasch Hoadbesuchs moaken.

6. Wuarom räakjen wie onse flietje Vesaumlungshelpa soo väl?

⁶ Woo kjemt de Vesaumlunk daut togood, waut de Vesaumlungshelpa doonen? Beberlyb, eene Sesta en Bolivien, vetalt: “Wäajens onse Vesaumlungshelpa flietich sent, jeit mie daut sea scheen enne Toopkomes. Biejlikj kaun ekj Leeda sinjen, Auntwuaten jäwen, no de Räden horchen un derch de Bilda un Videos fein lieren. Dee sent om onse Sechaheit bedocht un seenen doano, daut eena uk kaun äwa Internet doabie sennen. Uk no daut Toopkomen sent dee flietich, wiels dee reinmoaken, met de Räakjninj halpen un doafäa sorjen, daut wie de Bieekja haben, waut ons fälen. Ekj sie sea dankboa fa dee äare Oabeit!” Leslie wont en Kolumbien un äa Maun es Eltesta. See sajcht: “Mienen Maun fält daut, daut de Vesaumlungshelpa am met veschiednet uthalpen. Onen dee wudd hee noch väl drocka sennen. Ekj räakjen daut väl, daut see wellich reed sent, am met Freiden to unjastetten.” Feelst du die nich uk soo? (1. Tim. 3:13).

7. Woo kjenn wie wiesen, daut wie fa de Vesaumlungshelpa dankboa sent? (See uk daut Bilt.)

⁷ Wan daut veleicht uk soo es, daut wie dankboa sent fa de Vesaumlungshelpa, woat ons oba uk toojerot: “Wiest, daut jie dankboa sent” (Kol. 3:15). Christoph es een Eltesta en Finnlaunt un hee vetalt, woo hee daut deit. Hee sajcht: “Ekj schekj de Vesaumlungshelpa een Koatje ooda eene korte Norecht. Doa schriew ekj eenen Bibelvarsch nenn un saj dee, woo see mie krakjt Moot jemoakt haben ooda wuarom mie daut soo väl wieet es, waut see doonen.” Pascal un Jael, waut en Nie-Kaledoonien läwen, bäden fa de Vesaumlungshelpa. Hee vetalt: “De latste Tiet hab wie foaken un iernstlich fa dise Breeda en onse Vesaumlunk jebät un uk jedankt.” Secha horcht Jehowa wellich no soone Jebäda, un daut kjemt de gaunze Vesaumlunk togood (2. Kor. 1:11).

ELTESTASCH, “WAUT SEA SCHAUFEN”

8. Wuarom kunn Paulus sajen, daut de Eltestasch to jane Tiet “sea schauften”? (1. Tessalonicha 5:12-13).

⁸ De Eltestasch enne Aposteltiet schauften sea un strenjden sikj fa de Vesaumlungen aun (läs 1. Tessalonicha 5:12-13; 1. Tim. 5:17). Dise Breeda deeden de Vesaumlunk doaderch “veroppgonen”, daut see Toopkomes aufhilden un enne Vesaumlunk Entscheidungen muaken. Dee deeden uk leeftolich, oba dietlich “Rot jäwen”, om de Vesaumlunk to beschitzen (1. Tes. 2:11-12; 2. Tim. 4:2). To deeselwje Tiet musten dise Breeda uk em Tieteljen schaufen toom fa äare Famieljes sorjen un doano seenen, daut see selfst em Gloowen stoakj bleewen (1. Tim. 3:2, 4; Tit. 1:6-9).

9. Waut es eenjet, waut de Eltestasch vondoag dän Dach enne Vesaumlungen doonen?

⁹ Uk vondoag dän Dach sent de Eltestasch sea drock. Dee sent Vekjindja, waut de goode Norecht bekauntmoaken (2. Tim. 4:5). Dee jäwen ons een goodet Biespel, wiels see selfst flietich prädjen, oba uk daut Prädjen en onse Vesaumlunk plonen. Butadäm lieren see ons, woo wie fein prädjen un lieren kjennen. Dee sent uk metliedende Rechta, waut kjeenem väatrakjen. Wan doa wäa eene growe Sind bejeit, dan proowen dee, dänjanjen to halpen, daut met Jehowa äwareen to moaken. To deeselwje Tiet seenen dee uk doano, daut de Vesaumlunk rein blift (1. Kor. 5:12-13; Gal. 6:1). Oba daut ieeschte sent de Eltestasch onse jeistelje Hoads (1. Pet. 5:1-3). Dee hoolen biejlikj biblische Räden, waut see fein reedjemoakt haben, un strenjen sikj aun, aule Breeda un Sestren von de Vesaumlunk kjanen to lieren un moaken Hoadbesuchs. Bowenenn halpen eenje Eltestasch uk met bie daut Buen un Unjahoolen von Vesaumlungshiesa, plonen onse Kongressen un deenen en een Hospitol-Vemedlungs-Kommitee ooda en eene Besuchsgrupp fa Kranke em Hospitol. Dise Breeda doonen werkjlich väl fa ons!

10. Wäajen waut räakjen wie onse flietje Eltestasch soo väl?

¹⁰ Jehowa vespruak ons jeistelje Hoads, waut fein fa ons sorjen wudden, soo daut wie ons “nich . . . enjsten” ooda grulen motten (Jer. 23:4). Johanna, waut en Finnlaunt wont, haft krakjt daut beläft, aus äare Mutta sea krank wort. See vetalt: “Mie felt daut schwoa, aundre daut to sajen, woo ekj mie feel. Oba een Eltesta, dän ekj nich goot kjand, horcht mie jeduldich too, bäd met mie toop un vesechad mie, daut Jehowa mie leewd. Mie denkjt daut nich mea krakjt, waut hee säd, oba ekj weet noch goot, daut ekj mie väl ruja feeld. Ekj wudd sajen, Jehowa schekjt mie disen Brooda krakjt to de rajchte Tiet, om mie to halpen.” Woo haben de Eltestasch en diene Vesaumlunk die mol jeholpen?

11. Woo kjenn wie wiesen, daut wie fa de Eltestasch dankboa sent? (See uk daut Bilt.)

¹¹ Jehowa wenscht sikj, daut wie de Eltestasch wiesen, woo dankboa wie sent fa “de Oabeit, waut dee doonen” (1. Tes. 5:12-13). Henrietta, waut uk en Finnlaunt wont, sajcht: “Eltestasch halpen de aundre wellich. Oba dee haben nuscht mea Tiet un Krauft aus aundre un haben uk Trubbels en äa Läwen. Doawäajen saj ekj eenjemol to dee: ‘Weetst waut? Du best een sea feina Eltesta. Ekj wull die daut bloos mol sajen.’” Eene Sesta en de Turkei, waut Sera heet, sajcht: “Eltestasch fält daut aun Moot, daut see wiedamoaken kjennen. Soo, wie kjennen dee biejlikj een Koatje schriewen, dee toom Äten kroagen ooda met dee toop prädjen.” Jeft daut bie junt eenen Eltesten, waut du besonda väl räakjenst? Dan sieekj no Mäajlichkjeiten, am daut uk to wiesen (1. Kor. 16:18).

KJREISOPPSECHTASCH, WAUT DE VESAUMLUNGEN STOAKJEN

12. Derch waut worden de Vesaumlungen enne Aposteltiet jestoakjt? (1. Tessalonicha 2:7-8).

¹² Jesus Christus jeef de Vesaumlungen uk opp eene aundre Wajch “Mana aus Jeschenkja”. Derch siene Aunleidunk schekjten de Eltestasch en Jerusalem reisende Oppsechtasch ut, soo aus Paulus, Barnabas un aundre Breeda (Apj. 11:22). Wuafäa worden dise Breeda aunjestalt? Om de Vesaumlungen to stoakjen – krakjt soo aus daut uk bie de Vesaumlungshelpa un Eltestasch wia (Apj. 15:40-41). Dise Breeda neemen sea väl opp sikj un saden uk eenjemol äa Läwen opp Spell, om aundre to lieren un Moot to moaken (läs 1. Tessalonicha 2:7-8).

13. Waut es eenjet, waut de Kjreisoppsechtasch doonen?

¹³ Kjreisoppsechtasch motten väl reisen. Eenjemol sent daut hundade Kilomeeta von eene Vesaumlunk no de näakjste. Jieda Wäakj haft de Kjreisoppsechta miere Räden un Hoadbesuchs. Dee haft uk miere Toopkomes: fa de Pionieren, fa de Eltestasch un fa dän Prädichtdeenst. Un dan moakt hee uk noch aundre Räden reed; plont de eendachsche Kongressen un daut besondre Toopkomen fa aule Pionieren em Kjreis; halpt bie de dreedoagsche Kongressen met un es een Liera bie de Pionia-School. Buta daut deent daut Betel am uk noch aundre Sachen aun, waut eenjemol sea drinjent sent.

14. Wuarom räakjen wie onse flietje Kjreisoppsechtasch soo väl?

¹⁴ Woo kjemt de Vesaumlungen de goode Oabeit von de Kjreisoppsechtasch togood? Een Brooda en de Turkei sajcht doaräwa: “Jieda Besuch vom Kjreisoppsechta muntat mie opp, mie mea Tiet to nämen, om miene Breeda un Sestren to halpen. Ekj hab aul väl Kjreisoppsechtasch kjanen jelieet, oba nich eena von dee jeef mie auntovestonen, daut hee too drock wia ooda daut hee nich met mie räden wull.” Johanna, wua wie aul em Varsch 10 von räden, wia met dän Kjreisoppsechta toop em Prädichtdeenst, oba dee kunnen met kjeenem räden. See sajcht: “Ekj woa dän Dach doawäajen kjeenmol vejäten. Miene twee Sestren wieren korz wajchjetrocken un ekj bangd mie sea no dee. De Kjreisoppsechta haft mie leeftolich jetreest un holp mie to vestonen, daut wie wäajen onsen Deenst fa Jehowa veleicht nu fa een Stootskje nich kjennen met Frind un Famielje toop sennen. Oba en de niee Welt woa wie eewich Tiet haben fa daut.” Secha kaust du die uk noch von waut besennen, waut een Kjreisoppsechta fa die jedonen haft (Apj. 20:37 – 21:1).

15. (a) Woo kjenn wie de Kjreisoppsechtasch no 3. Johanes 5-8 no wiesen, daut wie fa äant dankboa sent? (See uk daut Bilt.) (b) Wuarom sell wie uk de Ehefrues von aule aunjestalde Breeda dankboa sennen, un woo kjenn wie äant daut wiesen? (See uk daut Hock “Denkjt uk aun dee äare Ehefrues”.)

¹⁵ De Apostel Johanes schreef Gajus, daut hee de Breeda leeftolich oppnämen sull, waut doa no äant jeschekjt worden. Un hee sull äant “soo opp dän Wajch . . . halpen, daut Gott doaraun eenen Jefaulen” haud (läs 3. Johanes 5-8). Woo wudd wie daut uk soo doonen kjennen? Eenatlei es, daut wie dän Kjreisoppsechta toom Äten enloden. Un eene aundre Wajch es, daut wie bie de Toopkomes fa dän Prädichtdeenst sent, wan hee onse Vesaumlunk besieekjen deit. Leslie, von dee wie aul en Varsch 6 jerät haben, wiest äare Dankboakjeit noch opp eene aundre Wajch. See sajcht: “Ekj bäd Jehowa, daut hee fa aules sorjen saul, waut dise Breeda fält. Ekj un mien Maun schekjen dee uk Breew, wua wie äant sajen, woo sea ons de Besuchswäakj jeholpen haft.” Denkj doaraun, daut de Kjreisoppsechtasch uk bloos Menschen sent. Dee woaren noch mol krank, moaken sikj Sorjen ooda woaren mootloos. Veleicht sent diene leeftolje Wieed ooda dien kjlienet Jeschenkj krakjt de Auntwuat opp dee äare Jebäda! (Spr. 12:25).

ONS FÄLT DAUT AUN MEA “MANA AUS JESCHENKJA”

16. Äwa waut kjennen de Breeda nodenkjen no Spricha 3:27 no?

¹⁶ Oppe gaunze Welt fält daut aun mea “Mana aus Jeschenkja”. Best du een jedeepta Brooda un steit daut “en diene Krauft . . . goodet to doonen”? (Läs Spricha 3:27.) Best du reed, doaropp to schaufen, een Vesaumlungshelpa to woaren? Ooda wurscht du mau rajcht reed sennen, diene Breeda aus Eltesta to deenen?c Wurscht du die daut veleicht kjennen soo enrechten, die fa de School fa Kjennichrikjsvekjindja auntojäwen? Bie dise School kaust du lieren, woo du noch mea fa Jesus doonen kaust. Oba waut, wan du die to aul daut nich emstaund feelst? Dan bäd Jehowa om sienen heiljen Jeist, daut du jieda Oppgow nokomen kaust, waut du kjrichst (Luk. 11:13; Apj. 20:28).

17. Waut wiest daut äwa onsen Kjennich Jesus Christus, daut hee ons “Mana aus Jeschenkja” jeef?

¹⁷ Daut Jesus ons en de latste Tiet aunleiden deit, es doaraun to seenen, daut hee “Mana aus Jeschenkja” aunjestalt haft (Mat. 28:20). Sent wie nich dankboa, daut wie eenen Kjennich haben, waut leeftolich, friejäwrich un om ons bekjemmat es, un daut hee Breeda aunjestalt haft, om fa ons to sorjen? Dan sieekj no Jeläajenheiten, dise flietje Breeda diene Dankboakjeit to wiesen. Un vejät uk nich, Jehowa to danken, wiels von am komen “aule goode Sachen un aule volkomne Gowen” (Jak. 1:17).