Woo kjennen junge Breeda Markus un Timotäus nodoonen?

1-2. Waut wudd Markus un Timotäus haben kunt doavon aufhoolen, mea fa aundre to doonen?

JUNGE Breeda, well jie mea en Jehowa sienen Deenst un fa de Breeda en june Vesaumlunk doonen? Secha well jie daut. Woo scheen es daut nich to seenen, daut doa soo väl junge Mana wellich reed sent, waut fa aundre to doonen! (Psa. 110:​3, NW). Oba dauts nich emma leicht. Helst du die doavon trigj, mea fa Jehowa to doonen, wiels du nich weetst, waut du aules en sienen Deenst beläwen woascht? Hast du mol eene Oppgow aufjesajcht, wiels du dochst, du wieescht nich emstaund doatoo? Du best nich de eensja, dän daut soo jeit.

² Markus un Timotäus jinkj daut krakjt soo. Dee wisten nich, waut see en äaren Deenst aules beläwen wudden, un see dochten veleicht, daut see nich emstaund doatoo wieren, oba see wieren doawäajen reed, mea fa aundre to doonen. Aus de Apostel Paulus un Barnabas Markus fruagen, aus hee met äant toop opp äare ieeschte Missionsreis komen wull, wond hee woomäajlich en een jemieteljet Hus met siene Mutta toop (Apj. 12:​12-13, 25). Oba Markus veleet sien Hus, om mea em Deenst to doonen. Ieeschtlich trock hee no Antiochia. Un dan reisd hee met Paulus un Barnabas toop no aundre Städen, waut wiet auf wieren (Apj. 13:​1-5). Timotäus wond woomäajlich uk bie siene Elren, aus Paulus am fruach, aus hee met am toop en daut Prädichtwoakj metmoaken wull. Timotäus wia junk un onerfoaren, un doawäajen docht hee veleicht, daut hee nich goot jenuach doatoo wia (see uk 1. Korinta 16:​10-11 un 1. Timotäus 4:12). Oba hee wia doawäajen reed, met Paulus mettogonen, un hee wort sea jesäajent (Apj. 16:​3-5).

3. (a) Woo weet wie, daut Paulus Markus un Timotäus väl räakjend? (2. Timotäus 4:​6, 9, 11). (See uk de Bilda.) (b) Waut vonne Froagen woa wie en disen Artikjel derchgonen?

³ Aus Markus un Timotäus noch junk wieren, kjrieejen dee väl Erfoarunk un lieeden daut, met groote Veauntwuatungen en de Vesaumlunk omtogonen. Paulus räakjend dise junge Mana soo väl, daut hee äant wull bie sikj haben, aus hee enwort, daut hee boolt stoawen wudd (läs 2. Timotäus 4:​6, 9, 11). Waut vonne Ieejenschoften hauden Markus un Timotäus, wuawäajen Paulus dee soo väl räakjend? Woo kjennen de junge Breeda soo sennen aus Markus un Timotäus? Un woo kjennen Paulus siene goode Aunwiesungen de junge Breeda togood komen?

SIE REED, WAUT FA AUNDRE TO DOONEN SOO AUS MARKUS

4-5. Woo wees Markus, daut hee wellich reed wia, fa aundre waut to doonen?

⁴ Waut fa aundre to doonen, kaun bedieden, daut eena schwoa schauft, om dee to halpen, un daut emma wada deit, uk wan daut nich emma leicht es. Markus wia een goodet Biespel doarenn. Aus Paulus am opp siene tweede Missionsreis nich metnämen wull, wia hee veleicht mootloos un enteischt (Apj. 15:​37-38). Oba daut hilt am nich doavon auf, waut fa siene Breeda un Sestren to doonen.

⁵ Markus jinkj met sienen Fada Barnabas toop no eene aundre Städ, om doa to deenen. Rom 11 Joa lota wia Markus mank dee, waut Paulus biestunden, aus hee en Room toom ieeschte Mol faustjenomen wia (Filem. 23-24). Paulus wia soo dankboa, daut Markus am biestunt, daut hee am mau rajcht “eene Kjwal … met väl Troost” nand (Kol. 4:​10-11).

6. Woo kjeem Markus daut togood, daut hee met erfoarne Gloowesbreeda toop wia? (See uk de Footnoot.)

⁶ Markus beläwd väl scheene Erfoarungen, wäajen hee met erfoarne Gloowesbreeda toop wia. Aus hee fa eene jewesse Tiet en Room met Paulus toop jewast wia, jinkj hee no Babel, om doa met Petrus toop to schaufen. Dee beid worden soone goode Frind, daut Petrus Markus “mien Sän” nand (1. Pet. 5:13). Aus dee doa toop schauften, haft Petrus sienen jungen Frint secha väl intressaunte Eenselheiten äwa Jesus sien Läwen un Deenst vetalt, waut Markus lota en sien Evangelium oppschreef.a

7. Woo deed een junga Brooda, waut Sangwu heet, Markus sien Biespel no? (See uk daut Bilt.)

⁷ Markus bleef drock em Deenst un hilt sikj faust aun erfoarne Gloowesbreeda. Woo kaust du Markus nodoonen? Veleicht wurscht du jleichen, een Väarajcht em Deenst fa Jehowa to haben, waut du oba noch nich hast. Dan woa nich mootloos, enne Städ daut kjikj doano, woo du Jehowa un de Vesaumlunk opp aundre Wäaj deenen kaust. See wie mol daut Biespel von Sangwu, waut nu een Eltesta es. Aus hee noch jinja wia, deed hee sikj met aundre junge Breeda vejlikjen. Eenje von dee hauden ea Väarajchten aus hee. Sangwu feeld sikj mootloos un enteischt, un met de Tiet vetald hee de Eltestasch daut, woo hee sikj feeld. Een Eltesta jeef am dän Rot, soo goot aus mäajlich waut fa de Breeda to doonen, uk wan daut foaken nich oppfoll. Dis Rot brocht Sangwu bat doa, daut hee aunfunk, de Elre to halpen un aundre Breeda met no de Vesaumlunk to nämen, waut daut doaraun fäld. Wan hee nu soo trigjdenkjt, sajcht hee: “Ekj kunn vestonen, waut doa werkjlich met en wia, fa aundre waut to doonen. Un ekj kunn de Freid späaren, waut doavon kjemt, aundre uttohalpen.”

WIES, DAUT DU WERKJLICH OM AUNDRE BEKJEMMAT BEST SOO AUS TIMOTÄUS

8. Wuarom neem Paulus Timotäus met opp siene Reis? (Filippa 2:​19-22).

⁸ Paulus fäld daut aun äwanämende Breeda, waut met am toop no dee Stauten reisen kunnen, wua hee ea vefolcht wort. Daut ieeschte fruach hee eenen erfoarnen Brooda, waut Silas heet, aus hee met am metkomen wull (Apj. 15:​22, 40). Lota fruach Paulus Timotäus, aus hee uk metreisen wull. Waut jleicht Paulus von Timotäus? Eent es, daut de Breeda goot von am räden (Apj. 16:​1-2). Un hee wia uk werkjlich om aundre bekjemmat (läs Filippa 2:​19-22).

9. Woo wees Timotäus, daut hee werkjlich om de Breeda un Sestren bekjemmat wia?

⁹ Von Aunfank aun, aus hee met Paulus toop schauft, wees Timotäus, daut hee dolla om aundre to doonen wia aus om sikj selfst. Doawäajen leet Paulus am en de Staut Beria, wäajen hee sikj gaunz secha wia, daut Timotäus sikj goot om de niee Breeda un Sestren kjemren wudd (Apj. 17:​13-14). En dise Tiet haft Timotäus secha väl von Silas sien Biespel jelieet, waut uk en Beria bleef. Oba lota schekjt Paulus Timotäus gaunz auleen no de Staut Tessalonich, om de Breeda doa to stoakjen (1. Tes. 3:2). De näakjste 15 Joa lieed Timotäus daut, “met dee mettoroaren, waut roaden”, un wees dee Metleet, waut doa lieden musten (Reem. 12:15; 2. Tim. 1:4). Woo kjennen junge Breeda Timotäus nodoonen?

10. Woo lieed Brooda Minho, dolla om aundre bekjemmat to sennen?

¹⁰ Een Brooda, waut Minhob heet, lieed daut, dolla om aundre bekjemmat to sennen. Aus hee jinja wia, wia daut schwoa fa am, met elre Breeda un Sestren to räden. Doawäajen deed hee dee biem Vesaumlungshus bloos bejreessen un jinkj doa wajch. Een Eltesta rood Minho too, met de Breeda un Sestren een bät äwa daut to vetalen, waut hee von dee jleicht. De Eltesta säd uk to am, daut hee doaräwa nodenkjen sull, waut de aundre Persoon veleicht intressieren wudd. Minho kjeem disen Rot no, wan hee met aundre to doonen haud. Minho es nu een Eltesta un sajcht: “Nu es mie daut leichta, met Menschen von veschiednet Ella to vetalen. Ekj frei mie, daut ekj dee äare Schwierichkjeiten nu bäta vestonen kaun. Un doaderch kaun ekj miene Gloowesbreeda bäta halpen.”

11. Woo kjennen junge Breeda daut lieren, dolla om aundre en de Vesaumlunk bekjemmat to sennen? (See uk daut Bilt.)

¹¹ Jie junge Breeda kjennen daut uk lieren, noch dolla om aundre bekjemmat to sennen. Woo? Proow, en de Toopkomes met veschiedne Menschen to räden, waut een veschiednet Ella haben un veschieden oppjewossen sent. Froag dee, woo dee daut jeit, un dan horch dee too. Doaderch woascht du veleicht enwoaren, woo du dee halpen kaust. Veleicht woascht du en, daut eene elre Lied Help fält met de JW Library^®-App. Ooda du woascht en, daut dee noch nich Plons haben, met wäm toop em Prädichtdeenst to gonen. Wurscht du dee met äare Fons halpen kjennen ooda met dee toop em Prädichtdeenst gonen? Wan wie aundre halpen, onen daut dee doano froagen, dan woa wie fa aule een goodet Biespel sennen.

PAULUS SIENE AUNWIESUNGEN KJENNEN DIE TOGOOD KOMEN

12. Woo kjennen Paulus siene Aunwiesungen aun Timotäus de junge Breeda vondoag dän Dach togood komen?

¹² Paulus jeef Timotäus gooden Rot, om am to halpen, een scheenet Läwen un eenen gooden Deenst to haben (1. Tim. 1:18; 2. Tim. 4:5). Paulus siene Aunwiesungen kjennen junt junge Breeda uk togood komen. Woo? Läst Paulus siene beid Breew aun Timotäus soo, aus wudd hee dee aun junt jeschräwen haben, un kjikjt doano, woone von dise Aunwiesungen jie en jun Läwen nokomen kjennen. See wie mol een poa Biespels.

13. Waut woat ons halpen, Jehowa tru to sennen?

¹³ “Eew die doarenn, Gott tru to deenen (1. Tim. 4:7b). Paulus säd to Timotäus, daut dee dän Wunsch haben sull, daut to doonen, waut Jehowa jefoll, un daut dee Gott hanjejäft deenen sull. Wiels wie Gott nich vonne Jeburt aun tru sent un leewen, mott wie doaraun schaufen. Woo kjenn wie daut? Daut griechische Wuat, waut met “eew die doarenn” äwasat es, wort foaken fa de schwoare, kjarpaliche Eewunk jebrukt, waut soone muaken, dee enne Wad randen. Dise Menschen musten Selfstkontroll haben. Krakjt soo mott wie uk Selfstkontroll haben, om soone Jewanheiten to kjrieen, waut ons halpen, Jehowa noch noda to komen.

14. Waut sell wie nich vejäten, wan wie de Bibel läsen? Jeff een Biespel.

¹⁴ Wie sellen de Jewanheit haben, jieda Dach de Bibel to läsen, un daut nich vejäten, wuarom wie dise Jewanheit haben – daut es, om Jehowa noda to komen. Biejlikj waut lieet ons de Jeschicht von Jesus un dän rikjen, jungen Leida äwa Jehowa? (Mar. 10:​17-22). Dis junga Maun jleewd daut, daut Jesus de Messias wia, oba hee haud nich jenuach Gloowen toom dän nofoljen. Oba Jesus haud doawäajen Leew fa am. Jeit die daut nich to Hoaten, woo Jesus met disen jungen Maun räd? Secha wull Jesus, daut dee eene goode Entscheidunk muak. Un daut wia uk een Bewies von Jehowa siene Leew fa disen jungen Maun (Joh. 14:9). Wan du äwa dise Jeschicht un äwa diene ieejne Omstend nodenkjst, dan froag die: “Waut mott ekj doonen, om Jehowa noch noda to komen un aundre noch bäta to halpen?”

15. Wuarom saul een junga Brooda doaropp achten, een goodet Väabilt to sennen? Jeff een Biespel (1. Timotäus 4:​12-13).

¹⁵ “Woa een Väabilt fa dee, waut tru sent” (läs 1. Timotäus 4:​12-13). Paulus muntad Timotäus opp, aun Fäichkjeiten to schaufen – biejlikj väaläsen un aundre lieren –, oba uk aun Ieejenschoften – soo aus Leew, Gloowen un een reinet Benämen. Wuarom? Wiels Woakjen mea doonen aus dusent Wieed. Saj wie biejlikj mol, du saust eene Räd hoolen, äwa woo wie noch flietja sennen kjennen em Deenst. Wudd die daut nich leichta sennen, doaräwa to räden, wan du aul dien Bastet em Deenst jeefst? Wan du een goodet Väabilt best, woaren diene Wieed mea aun de Breeda doonen (1. Tim. 3:13).

16. (a) En woone fief Sachen kjennen junge Mana een goodet Väabilt sennen? (b) Woo kaun een junga Brooda een goodet Väabilt sennen em Räden?

¹⁶ En 1. Timotäus 4:12 räd Paulus von fief Sachen, wuarenn junge Breeda een goodet Väabilt sennen kjennen. Wuarom wurscht du die dise Sachen nich mol en dien perseeneljet Studium eent no daut aundre dolla unjastonen? Saj wie mol, du west een goodet Väabilt sennen “en dien Räden”. Dan denkj doaräwa no, woo du aundre oppbuen kaust met daut, waut du sajchst. Wan du biejlikj noch tus wonst, wurscht du die bie diene Elren een bät foakna bedanken kjennen fa aules, waut dee fa die doonen? Ooda wurscht du no de Toopkomes wäm daut sajen kjennen, waut du von dän siene Oppgow jejleicht hast? Du kaust uk proowen, bie de Toopkomes met diene ieejne Wieed Auntwuaten to jäwen. Wan du die aunstrenjst, en dien Räden een goodet Väabilt to sennen, dan woaren aundre daut seenen kjennen, daut du em Jeisteljen veraunkjemst (1. Tim. 4:15).

17. Waut woat eenen jungen Brooda halpen, daut notokomen, waut hee sikj em Jeisteljen väajenomen haft? (2. Timotäus 2:22).

¹⁷ “Ran wajch von de Wenschen, waut enne Jugentjoaren oppkomen, oba sträw no Jerajchtichkjeit” (läs 2. Timotäus 2:22). Paulus rood Timotäus too, jäajen soone Wenschen to kjamfen, waut am daut kunnen schwoa moaken, daut notokomen, waut hee sikj em Jeisteljen väajenomen haud, un waut am von Jehowa aufbrinjen kunnen. Veleicht woascht du uk en, daut eenjet, wua nuscht met orrajcht es, die weinich Tiet loten fa de jeistelje Sachen. Denkj biejlikj doaräwa no, woo väl Tiet du fa daut Internet brukst ooda woo lang du Video-Gäms spälst ooda Sport moakst. Wurscht du waut von dee Tiet fa Jeisteljet brucken kjennen? Du wurscht die kjennen aunmalden toom met dän Bieekjakrota prädjen ooda toom methalpen, daut Vesaumlungshus to unjahoolen. Wan du soo waut aus dit deist, dan woascht du woomäajlich fresche Frind kjrieen, waut die oppmuntren woaren, die em Jeisteljen waut väatonämen un daut uk notokomen.

WAUT FA AUNDRE DOONEN, BRINJT SÄAJNUNGEN

18. Wuarom kjenn wie sajen, daut Markus un Timotäus een tofrädnet Läwen hauden?

¹⁸ Markus un Timotäus musten en äa Läwen een deel endren, daut dee mea fa aundre doonen kunnen, un dee hauden een schaftjet Läwen met scheene Erfoarungen (Apj. 20:35). Om daut Markus waut fa siene Gloowesbreeda doonen kunn, reisd hee opp veschiedne Städen oppe Welt. Hee schreef uk een besondret Evangelium äwa Jesus sien Läwen un Deenst. Timotäus holp Paulus, Vesaumlungen opptostalen un de Breeda un Sestren opptobuen. Jehowa sach aul dit, waut Markus un Timotäus fa am deeden, un doawäajen wia hee sea tofräd met dee.

19. Wuarom sellen de junge Breeda no de Aunwiesungen horchen, waut Paulus Timotäus jeef; un woo woat daut dan utkomen?

¹⁹ Aun Paulus siene Breew, waut hee aun Timotäus schreef, es to seenen, daut hee sienen jungen Frint sea leewd. Dise Breew, waut Jehowa oppschriewen leet, wiesen, daut hee de junge Breeda sea leeft. Hee well, daut dee een scheenet Läwen haben en sienen Deenst. Soo horch no Paulus siene goode Aunwiesungen un schauf doaropp, eenen jratren Wunsch to kjrieen, mea fa aundre to doonen. Wan du daut deist, dan woascht du nu aul een scheenet Läwen haben un die “aun daut werkjelje Läwen kjennen fausthoolen” (1. Tim. 6:​18-19).