Woo wie jäajen schlajchte Wenschen jewennen kjennen

1. Jäajen waut motten aule onvolkomne Menschen kjamfen?

HAFT die daut aul mol sea jejankat, waut to doonen, waut Jehowa fa orrajcht talt? Wan jo, dan denkj nich, daut du dolla aufjeprooft woascht aus aule aundre. De Bibel sajcht: “Aule Proowen, waut jie derchmoaken, sent soone, waut aundre Menschen uk aul derchjemoakt haben” (1. Kor. 10:13).a Dit bediet, daut aundre met krakjt soone schlajchte Wenschen foadich woaren motten aus du. Soo, du best nich auleen un met Jehowa siene Help kaust du jäajen dee jewennen.

2. Jäajen waut vonne Vesieekjungen motten eenje Christen un soone, waut de Bibel studieren, kjamfen? (See uk de Bilda.)

² De Bibel sajcht uk: “Jieda eena woat aufjeprooft, wan hee von sienen ieejnen Janka metjeräten un veleit woat” (Jak. 1:14). Nich aule Menschen woaren von dautselwje veleit. Biejlikj woaren eenje Christen veleicht vesocht, met wäm von dautselwje Jeschlajcht ooda von daut aundre Jeschlajcht sintelje Sorten Sex to haben. Soone, waut oppjehieet haben, Pornografie to kjikjen, kjrieen veleicht irjentwanea wada dän Wunsch, soont to kjikjen. Soo es daut uk met soone, waut mol Droggs jebrukt haben ooda Supa wieren. Dit sent eenje Vesieekjungen, wua eenje Christen un soone, waut de Bibel studieren, jäajen kjamfen motten. Veleicht hab wie ons aula mol soo jefeelt aus de Apostel Paulus, waut schreef: “Wan ekj daut Rajchte doonen well, dan es daut Schlajchte bie mie” (Reem. 7:21).

3. Woo kaun eena sikj feelen, wan eena emma wada mott jäajen eenen orrajchten Wunsch kjamfen?

³ Wan du emma wada jäajen eenen schlajchten Wunsch kjamfen motst, feelst du die veleicht soo, daut du nich de Krauft hast, jäajen dee to jewennen. Veleicht denkjst du uk, daut du Hopninjsloos best – aulsoo daut Jehowa die fa schlajcht talt, eefach wäajen du eenen schlajchten Wunsch hast. Oba du kaust die secha sennen, daut et nich soo es! Daut ons daut dietlich woat, woat dis Artikjel twee Froagen beauntwuaten: (1) Wäa well, daut wie soone Jefeelen haben? (2) Woo kjenn wie jäajen orrajchte Wenschen jewennen?

WOO WELL DE SOTON, DAUT WIE ONS FEELEN?

4. (a) Waut well de Soton haben, waut wie jleewen sellen? (b) Wuarom kjenn wie ons secha sennen, daut wie stoakj jenuach sent, jäajen schlajchte Wenschen to jewennen?

⁴ De Soton well ons enbillen, daut wie nich de Krauft haben, jäajen de Vesieekjungen to stonen. Jesus wist daut un doawäajen lieed hee siene Nofolja, soo aus dit to bäden: “Halp ons, nich notojäwen, wan wie aufjeprooft woaren, un moak ons frie von dän Beesen” (Mat. 6:13). De Soton behaupt, daut de Menschen Jehowa fuaz aufwiesen woaren, wan dee von schlajchte Wenschen vesocht woaren (Hiob 2:​4-5). Wuarom jleeft de Soton daut? Wiels hee wia de Ieeschta, waut sikj von sienen ieejnen Janka veleiden leet un Jehowa nich tru bleef. Un hee jleeft, daut wie soo sennen woaren aus hee un Jehowa fuaz dän Rigjen dreien, wan wie eemol woaren aufjeprooft woaren. De Soton docht mau rajcht, daut Gott sien volkomna Sän biejäwen wudd, wan dee wudd aufjeprooft woaren! (Mat. 4:​8-9). Oba denkj mol aun dit: Hab wie werkjlich nich de Krauft, jäajen schlajchte Wenschen to jewennen? Doch, wie haben! Wie sent met daut envestonen, waut de Apostel Paulus schreef: “Ekj hab fa aules Krauft derch dän, dee mie stoakj moakt” (Filip. 4:13).

5. Woo weet wie, daut Jehowa sikj secha es, daut wie jäajen de schlajchte Wenschen jewennen kjennen?

⁵ Krakjt aundasch aus de Soton es Jehowa sikj gaunz secha, daut wie jäajen de schlajchte Wenschen jewennen kjennen. Woo weet wie daut? Wäajen hee verutsäd, daut eene groote Häad am tru bliewen wudd un de groote Liedenstiet äwaläwen wudd. Äwalaj mol, waut daut meent. Jehowa, dee nich lieejen kaun, sajcht, daut eene groote Häad – un nich bloos een poa Stekj – woaren enne niee Welt nennkomen. Dise sent met “witte lange Äwarakj jekjleet”; daut bediet, daut dee en Jehowa siene Uagen rein sent (Opb. 7:​9, 13-14). Dauts dietlich, daut Jehowa daut verheipts nich doafäa aunsitt, daut wie nich de Krauft haben, jäajen schlajchte Wenschen to jewennen.

6-7. Waut well de Soton ons noch enbillen; un wuarom?

⁶ De Soton well ons nich bloos enbillen, daut wie nich de Krauft haben, oba uk daut wie hopninjsloos sent – aulsoo daut Jehowa ons veuadeelen woat, bloos wiels wie schlajchte Wenschen haben. Oba denkj mol wada aun dit: De Soton es dee, waut nich Hopninj haft un von Jehowa aul jerecht es un daut nich wieet es, fa emma to läwen (1. Mo. 3:15; Opb. 20:10). Dauts uk nich een Wunda, daut de Soton ons enbillen well, daut wie nich Hopninj haben – besonda wiels hee selfst disen grooten Säajen spretz jegonen es. Oba wie sent nich hopninjsloos soo aus dee. De Bibel vesechat ons, daut Jehowa ons halpen un nich veuadeelen well. “Hee well nich, daut doa irjenteena venicht woat; enne Städ daut well hee, daut aule bat doa komen, een Leetsennen to kjrieen” (2. Pet. 3:9).

⁷ Wan wie jleewen wudden, daut wie nich de Krauft haben, jäajen schlajchte Wenschen to jewennen, ooda daut wie hopninjsloos sent, dan wudd wie krakjt soo denkjen, aus de Soton daut haben well. Dit to vestonen, kaun ons de Krauft jäwen, ons faust jäajen am to stalen (1. Pet. 5:​8-9).

WOO KJENN WIE ONS FEELEN, WÄAJEN WIE ONVOLKOMEN SENT?

8. Waut es bie de Sind noch met en, aus bloos Orrajchtet to doonen? (Psalm 51:7). (See uk “Wieed utjelajcht”.)

⁸ Buta dän Soton jeft daut noch waut, waut ons daut Jefeel jäwen kaun, daut wie nich de Krauft haben, jäajen de Vesieekjungen to stonen, un daut wie hopninjsloos sent. Waut es daut? Onse Onvolkomenheit, waut wie von Adam un Eva metjeorwen haben (Hiob 14:4; läs Psalm 51:7).b

9-10. (a) Woo feelden Adam un Eva sikj, aus dee ieescht onvolkomen wieren? (See uk daut Bilt.) (b) Woo feel wie ons, wiels wie onvolkomen sent?

⁹ Woo feelden Adam un Eva sikj, aus dee ieescht onvolkomen wieren? Nodäm daut dee Jehowa ojjehuarsom jewast wieren, vestuaken dee sikj un wullen äaren Kjarpa bedakjen. En daut Buak Einsichten über die Heilige Schrift sajcht daut doaräwa: “De Onvolkomenheit brocht dee bat doa, sikj schuldich un onsecha to feelen, Angst to haben un sikj to schämen.” Daut wia soo, aus wudden Adam un Eva en een Hus enjestopt sennen, wua bloos vea Stowen bennen wieren. Dee kunnen von eene Stow no de aundre gonen, oba dee kunnen nich ut daut Hus rut. Dee kunnen opp kjeene wajch ut dise Loag rut – aulsoo von de Onvolkomenheit looskomen.

¹⁰ Wie sent je nich en deeselwje Loag aus Adam un Eva, dee nich eenen Nutzen haben kjennen von daut Leesjelt. Daut Leesjelt moakt ons von onse Sinden rein un halpt ons, een reinet Jewessen to haben (1. Kor. 6:11). Un doch sent wie onvolkomen. Doawäajen es daut nich toom wundren, daut wie ons mol schuldich un onsecha feelen, Angst haben un ons schämen. De Bibel sajcht soogoa, daut de Menschen unja de Sind äare Macht sent. De Sind rejieet “mau rajcht äwa dee, waut nich soo sindjen deeden, aus A̱dam deed” (Reem. 5:14). Wan daut uk toom mootloos woaren es, mott wie oba nich denkjen, daut wie nich de Krauft haben, jäajen de Vesieekjungen to stonen, un daut wie hopninjsloos sent. Woo kjenn wie dise Jefeelen aufwiesen?

11. Waut sell wie no Reema 6:12 no doonen, wan wie denkjen, daut wie nich de Krauft haben, jäajen de Vesieekjungen to stonen?

¹¹ Eenjemol es doa soo to sajen eene Stemm en ons, waut doa sajcht, daut wie nich de Krauft haben, jäajen de Vesieekjungen to stonen. Oba wie sellen doa nich no horchen. Wuarom nich? Wiels de Bibel lieet, daut wie nich brucken de Sind loten “aus Kjennich … rejieren” äwa ons (läs Reema 6:12). Daut bediet, daut wie nich brucken onse schlajchte Wenschen nogonen (Gal. 5:16). Jehowa es sikj secha, daut wie dee aufwiesen kjennen; aundasch wudd hee daut nich von ons velangen (5. Mo. 30:​11-14; Reem. 6:6; 1. Tes. 4:3). Dauts dietlich, daut wie de Krauft haben, jäajen de schlajchte Wenschen to jewennen.

12. Waut sell wie nich doonen, wan wie denkjen, daut Jehowa ons veuadeelen woat, wiels wie schlajchte Wenschen haben; un wuarom?

¹² Eenjemol es doa uk soo to sajen eene Stemm en ons, waut doa sajcht, daut Jehowa ons veuadeelen woat, eefach bloos wiels wie schlajchte Wenschen haben. Oba wie sellen doa nich no horchen. Wuarom nich? Wiels de Bibel lieet, daut Jehowa daut vesteit, daut wie onvolkomen sent (Psa. 103:​13-14). “Hee weet aules” äwa ons. Biejlikj weet hee, waut de Onvolkomenheit doamet to doonen haft, daut wie schlajchte Wenschen haben (1. Joh. 3:​19-20). Oba soo lang aus wie wieda jäajen de schlajchte Wenschen kjamfen un dee nich nogonen, sitt Jehowa ons fa rein aun. Wuarom kjenn wie ons doaräwa secha sennen?

13-14. Woat Jehowa ons veuadeelen, bloos wiels wie noch mol schlajchte Wenschen haben? Laj daut ut.

¹³ De Bibel sajcht, daut doa een groota Unjascheet es tweschen schlajchte Wenschen haben un dee nogonen. Schlajchte Wenschen komen foaken von veselfst opp, oba wie kjennen selfst entscheiden, aus wie dee nogonen woaren ooda nich. Biejlikj wieren doa en Korint eenje Christen, waut ea Sex hauden met wäm von dautselwje Jeschlajcht. Paulus schreef: “[Dauts, waut] eenje von junt … jewast sent.” Bediet daut, daut dee kjeenmol mea een Velangen hauden, soont to doonen? Woomäajlich nich, wiels soone Wenschen en eenem foaken deep enjewartelt sent. Oba de Christen, waut Selfstkontroll hauden un soone Wenschen nich nojinjen, kunnen doawäajen Frind sennen met Jehowa. Fa am wieren dee “rein jewoschen” (1. Kor. 6:​9-11). Un bie die kaun daut krakjt soo sennen!

¹⁴ Endoont jäajen waut vonne schlajchte Wenschen du kjamfen motst, du kaust jewennen. Wan du dee uk nich looswoascht, kaust du oba Selfstkontroll haben un nich daut doonen, “waut de sintelje Natua un [diene] Jedanken” haben wellen (Efs. 2:3). Waut kaun die halpen, jäajen de schlajchte Wenschen to jewennen?

WOO WIE JEWENNEN KJENNEN

15. Wuarom mott wie opprechtich sennen met ons selfst, wan wie wellen jäajen schlajchte Wenschen jewennen?

¹⁵ Daut wie kjennen jäajen onse schlajchte Wenschen jewennen, mott wie opprechtich sennen met ons selfst un aunerkjanen, woont onse schwake Sieden sent. Doo die nich selfst “met een orrajchtet Denkjen” veleiden (Jak. 1:22). Wan du eenen Trubbel kjlanda moakst, aus dee es, woat daut väl leichta sennen, bie eene Vesieekjunk bietojäwen. Veleicht denkjst du: “Ekj drinkj nich soo väl, aus aundre doonen.” Ooda du deist aundre beschuljen un denkjst soowaut aus: “Wan miene Fru mie mea Leew wees, wudd ekj nich brucken Pornografie kjikjen.” Sieekj nich no eene Uträd, waut Schlajchtet to doonen – nich mol en diene Jedanken. Denkj doaraun: Du best selfst veauntwuatlich fa daut, waut du deist (Gal. 6:7).

16. Woo kaust du die noch eenja sennen, daut Rajchte to doonen?

¹⁶ Buta daut du opprechtich met die selfst best un diene schwake Sieden aunerkjanst, motst du die uk eenich sennen, nich bietojäwen (1. Kor. 9:​26-27; 1. Tes. 4:4; 1. Pet. 1:​15-16). Denkj doaräwa no, waut die daut dolste vesieekjt un wanea. Daut kaun veleicht eene jewesse Vesieekjunk ooda eene jewesse Tiet em Dach sennen. Es die daut veleicht schwanda, jäajen eene Vesieekjunk to stonen, wan du meed best ooda wan daut lot zeowes es? Moak die doaropp reed un sie die em Kloaren, waut du doonen woascht. Daut Baste wudd sennen, ea waut to doonen, ea du enne Vesieekjunk nennkjemst (Spr. 22:3).

17. Waut kjenn wie von Josef sien Biespel lieren? (1. Mose 39:​7-9). (See uk de Bilda.)

¹⁷ See wie mol, waut Josef deed, aus Potifar siene Fru am proowd to veleiden. Hee säd ar daut fuaz gaunz auf (läs 1. Mose 39:​7-9). Waut wiest ons daut? Josef wia sikj aul gaunz eenich, daut Rajchte to doonen, ea Potifar siene Fru am proowd to veleiden. Krakjt soo kaust du die uk gaunz eenich sennen, daut Rajchte to doonen, ea du en eene Vesieekjunk nennkjemst. Opp dee wajch woat die daut leichta sennen, daut Rajchte to doonen, wiels du aul entschieden hast, waut du dan doonen woascht.

“UNJASIEEKJT JUNT EMMA WADA”

18. Woo kaust du jäajen schlajchte Wenschen jewennen? (2. Korinta 13:5).

¹⁸ Daut du jäajen schlajchte Wenschen jewennen kaust, motst du die emma wada selfst unjasieekjen (läs 2. Korinta 13:5). Kjikj aule jewesse Tiet doano, woo daut met diene Jedanken un Woakjen steit, un enda daut, waut doa fält. Wan du biejlikj uk jäajen eene Vesieekjunk jewonnen hast, dan denkj doaräwa no: “Woo lang dieed mie daut, dee auftowiesen?” Wan du enwoascht, daut du dee nich fuaz aufwiesen kust, dan woa nich mootloos. Kjikj leewa doano, woo du fa daut näakjstemol bäta reed sennen kaust. Denkj äwa soone Froagen aus dit no: “Wan ekj schlajchte Jedanken hab, kaun ekj dee noch haustja aufwiesen? Deit mien Tietvedrief mie daut schwanda moaken, jäajen Vesieekjungen to stonen? Drei ekj miene Uagen fuaz wajch von onmoralische Sachen? Es mie daut dietlich, wuarom Jehowa siene Jesazen äwa rajcht un orrajcht emma daut baste sent fa mie, wan ekj mie uk sea beoabeiden mott?” (Psa. 101:​3, NW).

19. Woo kjennen kjliene schlajchte Entscheidungen daut schwanda moaken, jäajen schlajchte Wenschen to kjamfen?

¹⁹ Sieekj uk nich no eene Uträd, waut Orrajchtet to doonen. De Schreft sajcht: “Daut Hoat es weinja to truen aus sest irjentwaut un doa es kjeene Rot fäa” (Jer. 17:​9, NW). Jesus säd, daut “utem Hoat schlajchte Jedanken komen” (Mat. 15:19). Biejlikj wudd een Mensch, waut oppjehieet haft, Pornografie to kjikjen, met de Tiet denkjen kjennen, daut et nich jefäadlich es, no soone Bilda to kjikjen, waut am oppreizen kunnen, wiels de Menschen doa nich gaunz noaktich sent. Ooda veleicht denkjt dee soo: “Doa es nuscht met orrajcht, sikj daut väatostalen, waut Orrajchtet to doonen, soolang aus eena daut nich werkjlich deit.” Soonen Mensch sien Hoat plont soo to sajen em Verut, woo dee daut kaun tofrädstalen, waut sien Fleesch jankat (Reem. 13:14). Waut kaun die halpen, daut et nich bat doa kjemt? Pauss opp un moak nich kjliene schlajchte Entscheidungen, waut die bat doa brinjen kjennen, groote schlajchte Entscheidungen to moaken, soo aus eenen schlajchten Wunsch nogonen.c Wies aule “schlajchte Jedanken” auf, waut eene Uträd sennen kunnen, waut Orrajchtet to doonen.

20. Waut vonne Hopninj hab wie fa lota; un waut vonne Help hab wie nu aul?

²⁰ Soo aus wie jelieet haben, hab wie met Jehowa siene Help de Krauft, jäajen de Vesieekjungen to stonen. Un wäajen sien Metleet hab wie uk de Hopninj, fa emma enne niee Welt to läwen. Woo scheen woat daut nich sennen, wan wie Jehowa met reine Jedanken un een reinet Hoat deenen woaren! Bat daut bat doa es, kjenn wie ons secha sennen, daut wie emma de Krauft kjrieen woaren, jäajen de schlajchte Wenschen to kjamfen, un daut wie nich hopninjsloos sent. Wiels Jehowa onse Aunstrenjungen säajent, kjenn wie jewennen!