Hast du uk mol wult de Schreft läsen, oba dan jinkj die daut krakjt soo aus dee, von waut wie jroz jerät haben? Oba waut, wan du enwortst, daut de Schreft die kunn halpen, een bätret un tofrädnet Läwen to haben? Un waut, wan du dee kust opp eene Wajch läsen, waut intressaunta wia? Wurscht du dan wellens sennen, dee proowen to läsen?

Eenje sent sikj eenich jeworden, mol de Schreft to läsen. Kjikj mol, woo dee daut jeholpen haft, aus dee doamet aunfungen.

Ezekiel, waut enne 20 Joa es, sajcht: “Ea wia daut met mie soo aus met wäm, waut met een Foatich foat, onen to weeten, wua dee hanwell. Oba de Schreft to läsen haft mie jeholpen, een bätret Läwen to haben. Doa es gooda Rot bennen, waut eenem em Läwen halpen kaun.”

Frieda, waut uk enne 20 Joa es, sajcht: “Ea wia ekj sea kortnatuarich. Oba wäajen ekj de Schreft läs, hab ekj jelieet, mie to beoabeiden. Wäajen daut kjennen aundre nu väl leichta met mie foadich woaren un ekj hab nu uk mea Frind.”

Eene Fru, waut Eunice heet un enne 50 Joa es, sajcht von de Schreft: “Dee haft mie jeholpen, een bätra Mensch to woaren un uk schlajchte Jewanheiten to endren.”

Millionende Menschen haft daut krakjt soo jegonen aus dee. De Schreft läsen kaun die uk halpen, een väl bätret Läwen to haben (Jesaja 48:17-18). Dee kaun die biejlikj halpen, (1) goode Entscheidungen to moaken, (2) woare Frind to kjrieen, (3) met Schwierichkjeiten foadich to woaren un (4) daut baste es, de Woarheit äwa Gott kjanen to lieren. De Rot von de Schreft kjemt von Gott un Gott jeft kjeenmol schlajchten Rot.

Waut doa talt es, daut du die doatoo kjrichst, doamet auntofangen. Waut von gooda Rot kaun die halpen, daut die daut leichta es un uk scheena jeit, de Schreft to läsen?

Waut kaust du doonen, daut die daut scheen jeit, de Bibel to läsen un daut du uk daut mieeschte doabie hast? See mol fief Sachen, waut een deel Menschen jeholpen haft.

Sieekj die de rajchte Tiet un de rajchte Städ. Proow, opp soone Städ to läsen, wua daut stell es. Lot die nich von irjentwaut auflenkjen, soo daut du kaust dienen Kopp bie de Sach haben. Wan daut fein dach es un doa fresche Loft es, dan kaun daut uk halpen, daut eena daut mieeschte ut daut Bibelläsen rutschapen kaun.

Sie wellens to lieren. Wäajen de Bibel von onsen himlischen Voda kjemt, woat ons daut toom basten sennen, wan wie soone Enstalunk haben aus een Kjint, waut reed es, von siene leeftolje Elren to lieren. Wan du veleicht nich väl von de Bibel helst, dan proow mol, dee Iedee tosied to lajen un lot die von Gott belieren (Psalm 25:4).

Bäd, ea du läst. En de Schreft sent Gott siene Jedanken bennen un doawäajen fält ons daut uk aun siene Help toom dee vestonen. Gott vesprakjt daut, daut hee dee woat “dän Heiljen Jeist jäwen, dee am doano froagen” (Lukas 11:13, PB). De heilja Jeist kaun die halpen, Gott siene Jedanken to vestonen. Met de Tiet woascht du soogoa “Gott siene deepste Jeheemnisen” vestonen kjennen (1. Korinta 2:10, PB).

Denkj doaräwa no, waut du läst. Doo nich bloos läsen, om daut du wiet jekomen best. Denkj doa noch uzhent äwa no, waut du läsen deist. Äwalaj, woo de Mensch es, von dän du jroz läst, un äwalaj uk, woo die daut en dien Läwen halpen kaun.

Hab daut kloa, waut krakjt du biem läsen lieren west. Om daut du eenen jratren Nutzen von daut Bibelläsen haben kaust, sieekj no waut, waut dien Läwen werkjlich vebätren kaun. Du wurscht biejlikj kjennen sajen: “Ekj well mea von Gott lieren”, “Ekj well een bätra Mensch woaren” ooda “Ekj well een bätra Ehemaun ooda Ehefru woaren”. Un dan läs die Poats von de Bibel ut, waut krakjt fa daut paussent sent.a

Dise fief Sachen woaren die halpen, aunfangen met de Schreft to läsen. Oba woo kaust du daut noch intressaunta moaken? De näakjsta Artikjel woat die doatoo Rot jäwen.

Wan du de Schreft läst, es die daut dan enoolent ooda jeit die daut scheen? Een deel haft doamet to doonen, woo du doa naunjeist. Well wie mol seenen, waut du doonen kaust, daut die daut scheen jeit un daut du Freid doaraun hast.

Läs die eene Bibel ut, wua opp to veloten es un waut eene niemootsche Sproak haft. Wan du waut läst, waut een deel schwoare, ooltmootsche Wieed haft, waut du nich kjanst, dan woascht du daut woomäajlich nich sea jleichen to läsen. Doawäajen wäl die eene Bibel, waut die to Hoaten jeit un soone Wieed haft, waut leicht to vestonen sent. Oba acht uk doaropp, daut et doawäajen eene Bibel es, waut krakjt äwasat es.a

Nemm niemootsche Sachen to Help. Bie dise Tiet es de Schreft uk ellektroonisch to haben, nich bloos jedrekjt. Eenje Biblen kaun eena em Internet läsen ooda sikj dee raufloden opp sienen Komputa, Tablet ooda Fon. Bie eenje ellektroonische Biblen kaun eena leicht Bibelvarzhen wiedaschlonen, wua daut om dautselwje jeit. Un bie eenje Biblen kaun eena bie eenen Varsch uk fuaz aundre Bibeläwasatungen vejlikjen. Daut jeft uk oppjeschnakte Biblen, wan du dee dolla jleichst to horchen, aus to läsen. Väl Menschen jleichen dee to horchen, wan dee hinjawäajes sent, wan dee tus waut doonen ooda bie irjent sestwaut, wua daut paussent es. Wuarom wurscht du nich mol proowen, waut fa die daut baste es?

Nemm noch aundret to Help toom de Schreft studieren. Daut jeft Launtkoaten von biblische Lenda, waut die halpen kjennen, de Städ to finjen, äwa waut du jroz läst un soo kaust du weeten, wua waut passieet es. Soone Artikjels aus dise hia un de Artikjels en daut Poat “Biblische Lieren” opp jw.org kjennen die halpen to vestonen, waut daut meent, waut du jroz jeläst hast. Wan du dise Sachen to Help nemst, dan kaust du väl mea ut daut Bibelläsen rutschapen.

Proow daut opp veschiedne Wäaj. Wan die daut schwierich schient, de Bibel von väaren bat hinjen derchtoläsen, wuarom proofst du dan nich, een Poat to läsen, waut fa die sea intressaunt es? Wan du west waut von eenen bekaunden Mensch ut de Schreft weeten, dan kaust du dee Poats läsen, wua daut krakjt om dänjanjen jeit. En dän Kausten “Lia de Menschen von de Bibeltiet bäta kjanen” woat daut jewäsen, woo eena daut biejlikj doonen kaun. Ooda veleicht west du de Bibel uk teemawies derchläsen ooda woo aules nom Riem no passieet es. Wuarom wurscht du nich mol eent von dit proowen?

De Schreft es nich bloos irjenteen jeweeneljet Buak. Doa es Rot von onsen Schepfa bennen (2. Timotäus 3:16). Daut, waut de Schreft sajcht, kaun väl aun ons doonen. Dee sajcht: “Gott sien Wuat läft un es kjraftich” (Hebräa 4:12, PB). Dee kaun ons besonda bie tweeatlei halpen: Dee kaun ons Rot jäwen, woo wie nu läwen sellen, un kaun ons uk halpen, Gott un siene Vespräakjungen bäta kjanen to lieren (1. Timotäus 4:8; Jakobus 4:8).

Dee kaun ons Läwen nu aul bäta moaken. De Schreft kaun ons met onse ieejne Trubbels halpen. Dee jeft gooden Rot äwa Sachen soo aus dise:

• Met aundre Menschen foadich to woaren (Efeesa 4:31-32; 5:22, 25, 28, 33).

• Koasch to sennen un sikj ennalich goot to feelen (Psalm 37:8; Spricha 17:22).

• Woo eena läwen saul (1. Korinta 6:9-10).

• Woo eena sien Läwen moaken kaun (Spricha 10:4; 28:19; Efeesa 4:28).a

Een junget Ehepoa en Asien es sea dankboa fa dän gooden Rot ut de Schreft. Dee jinkj daut krakjt soo, aus een deel junge Ehepoaren, waut daut schwoa es, sikj eena to dän aundre to wanen un frie to sajen, waut see denkjen. Oba dee fungen aun, daut notokomen, waut de Schreft sajcht. Woo kjeem daut ut? De Ehemaun, Vicent, sajcht: “Waut ekj enne Schreft läsd, holp mie, met de Schwierichkjeiten en onse Ehe leeftolich omtogonen. No daut to läwen, waut de Schreft sajcht, haft ons jeholpen, schaftich toop to läwen.” Siene Fru, Annalou, es doamet envestonen. See sajcht: “Biespels ut de Schreft to läsen, holp ons. Ekj sie nu sea schaftich un tofräd met onse Ehe un met daut, no waut wie em Läwen sträwen.”

Dee woat die halpen, Gott kjanen to lieren. Vicent sajcht uk: “Wäajen ekj de Schreft läs, feel ekj mie Jehova nu väl dolla no aun aus jeemols ea.” Daut, waut Vicent sajcht, halpt ons to vestonen, daut de Schreft ons halpen kaun, Gott bäta kjanen to lieren. Wan du de Schreft läst, dan woascht du nich bloos Rot kjrieen, waut die toom gooden es, oba du woascht Gott uk aus Frint kjrieen. Un du woascht uk seenen, daut hee ons een bätret Läwen fa lota vesprakjt. Daut woat “daut woare Läwen” sennen, waut fa emma woat bliewen (1. Timotäus 6:19, PB). Daut es waut, waut kjeen aundret Buak vespräakjen kaun.

Wan du aunfangst, de Schreft to läsen, un doabie blifst, dan kaust du aulsoo disen Nutzen doavon kjrieen: Een bätret Läwen haben un Gott bäta kjanen lieren. Oba wan du de Schreft läst, dan woascht du secha uk noch väl aundre Sachen weeten wellen. Un wan daut soo es, dan denkj aun daut Biespel von eenen ätiopischen Huachbeaumten, waut tweedusent Joa trigj läwd. Hee wull mea weeten äwa veschiedne Sachen, wua de Schreft von rät. Un aus am jefroacht wort, aus hee daut vestunt, waut hee läsd, dan säd hee: “Woo kaun ekj, wan mie daut kjeena utlajcht?”b Hee wia fuaz reed, de Help von eenen Maun auntonämen, waut aul väl von de Schreft wist. Daut wia Filippus, eent von Jesus siene Jinja (Aposteljeschicht 8:30-31, 34, PB). Wurscht du uk wellen mea von de Schreft weeten? Dan kaust du wellich no een Bibelstudium froagen em Internet opp www.jw.org ooda no eene Adrass schriewen, waut doa aunjejäft es. Du kaust die uk en diene Jäajent wäm von Jehova siene Zeijen oppsieekjen ooda no een Vesaumlungshus wanken. Wuarom wurscht du nich mol vondoag de Schreft nämen un die von dee halpen loten, een bätret Läwen to haben?