De Woarheit brinjt nich Fräd, “oba daut Schwieet”
“Jleeft nich daut ekj jekomen sie, Fräd en dise Welt to brinjen. Ekj sie nich jekomen Fräd to brinjen, oba daut Schwieet” (MAT. 10:34, PB)
1-2. (a) Waut von Fräd kjenn wie nu aul haben? (b) Wuarom kjenn wie noch nich en aule Stekjen Fräd haben? (See daut Bilt aum Aunfank.)
JIEDA eena von ons wenschst sikj een rujet Läwen un Fräd; een Läwen, wua wie nich Sorjen haben. Un woo dankboa sent wie nich, daut wie “Gott sien Fräd” haben, de ennaliche Ru, waut ons beschizt, wan wie schwoare Jedanken haben ooda wan ons daut nich scheen jeit! (Filip. 4:6-7, PB). Wäajen wie ons Jehova hanjejäft haben, kjenn wie uk “Fräd met Gott” haben; wie kjennen met am Frind sennen (Reem. 5:1, PB, von ons dunkel jemoakt).
2 Oba noch es doa fa Gott nich de Tiet jekomen, daut hee en aule Stekjen fa Fräd sorcht. Wie läwen nu en de latste Doag un väl Menschen hoolen sea opp strieden (2. Tim. 3:1-4). Wäajens wie Christen sent, hab wie eenen jeisteljen Kjrich jäajen dän Fient un de faulsche Lieren, waut dee vebreet (2. Kor. 10:4-5). Oba waut ons kunn daut dolste toosaten es, wan daut Frintschoft jäajen ons es, wäajen wie Jehova deenen. Eenje vespotten ons veleicht wäajen onsen Gloowen un eenje beschuljden ons, wäajen wie minkj Famieljes uteneenrieten. Ooda dee sajen, daut wie nich mea kjennen Poat sennen von de Famielje, wan wie nich onsen Gloowen tochloten. Woo sell wie doaräwa denkjen, wan de Famielje jäajenaun es? Woo kjenn wie doa daut baste met omgonen?
WOO SELL WIE DOARÄWA DENKJEN, WAN DE FAMIELJE JÄAJEN ONS ES?
3-4. (a) Waut deit Jesus siene Lia aun de Menschen? (b) Wanea es daut besonda schwoa, Jesus notofoljen?
3 Jesus wist daut, daut siene Lieren de Menschen wudd uteneen brinjen un daut siene Nofolja wudden Moot brucken toom stoakj bliewen, wan doa wäa jäajen an wia. Soon Jäajenstaunt kaun uk von de Famielje komen. Jesus säd: “Jleeft nich daut ekj jekomen sie, Fräd en dise Welt to brinjen. Ekj sie nich jekomen Fräd to brinjen, oba daut Schwieet. Ekj sie jekomen een Maun jäajen sienen Voda to saten un de Dochta jäajen äare Mutta, un de Schwieedochta jäajen äare Schwieemutta. Un een Mensch siene Fiend woaren ut sien ieejnet Hushault sennen” (Mat. 10:34-36, PB).
4 Jesus säd: “Jleeft nich daut ekj jekomen sie, Fräd en dise Welt to brinjen.” Waut hee siene Toohiera sajen wull, wia, daut dee sikj sullen Jedanken moaken, waut doa passieren kunn, wan dee am nofoljden. Jesus siene Wieed wudd de Menschen uteneenbrinjen. Daut wia secha nich, waut Jesus wull; hee wull de Menschen bloos de Woarheit von Gott lieren (Joh. 18:37). Oba daut wudd fa siene Nofolja schwoa sennen, wieda daut notokomen, waut hee an jelieet haud, wäajens daut Frintschoft un goode Frind doa wudden jäajen sennen.
5. Waut motten Jesus siene Nofolja derchgonen?
5 Jesus säd, daut siene Nofolja doa sullen met räakjnen, daut dee äare Famielje wudd jäajen an sennen (Mat. 10:38). Wan see wullen wiesen, daut see Jesus siene woare Nofolja wieren, dan wudden see vespott woaren ooda de Famielje wudd an mau rajcht aufschuwen. Oba Jesus säd uk, daut dee väl mea wudden kjrieen, aus dee wudden velieren (läs Markus 10:29-30).
6. Waut mott wie em Denkj hoolen, wan ons Frintschoft jäajen ons es, wäajen wie Jehova deenen?
6 Wie woaren doawäajen wieda onse Famielje un ons Frintschoft leewen, wan dee uk doajäajen sent, daut wie Jehova deenen. Oba wie hoolen daut uk em Denkj, daut onse Leew fa Gott un fa Christus mott jrata sennen aus fa daut Frintschoft un Famielje (Mat. 10:37). Ons mott daut uk dietlich sennen, daut de Soton onse Leew fa de Famielje woat utnutzen toom ons seenen, von Jehova wajchtobrinjen. Well wie ons daut mol unjastonen, waut doa kunn oppkomen, wäajen de Famielje jäajen ons es, un waut wie dan kjennen doonen.
WAN DE EHEPOATNA JEHOVA NICH DEENT
7. Woo saust du doaräwa denkjen, wan dien Ehepoatna Jehova nich deent?
7 De Schreft sajcht ons gaunz dietlich, daut de Befriede woaren “Trubbel” haben (1. Kor. 7:28, PB). Wan dien Ehepoatna Jehova nich deent, dan kaun daut sennen, daut et noch schwanda es un doa noch mea Sorjen sent. Wan daut bie die soo es, dan es daut wichtich, daut du de Sach soo sitst, aus Jehova deit. Bloos wäajens dien Ehepoatna Christus nich nofolcht, meent daut nich, daut jie uteneengonen kjennen ooda junt scheeden loten kjennen (1. Kor. 7:12-16). Wan de Ehemaun Jehova nich deent, wudd de Ehefru doawäajen sellen dän achten, wäajen daut es daut Haupt von de Famielje. Un krakjt soo uk, wan de Ehefru Jehova nich deent, wudd de Ehemaun ar doawäajen sellen leewen un wiesen, daut hee ar väl räakjent (Efs. 5:22-23, 28-29).
8. Äwa waut vonne Froagen wurscht du kjennen nodenkjen, wan dien Ehepoatna well haben, daut du saust weinja em Deenst doonen?
8 Woo wudd daut sennen, wan de Ehepoatna haben wull, daut du weinja saust em Deenst doonen? Eene Sesta wort biejlikj von äaren Ehemaun jesajcht, daut see bloos wesse Doag de Wäakj sull prädjen gonen. Wan die daut soo jeit, dan denkjt äwa dise Froagen no: Well mien Ehepoatna haben, daut ekj verheipts nich saul Gott deenen? Wan dee mie daut nich aufsajcht, wudd ekj dan kjennen daut doonen, wua dee no frajcht? Wan du dän proofst to vestonen, dan woat daut halpen, daut jie nich noch onneedich enne Ehe Trubbel haben (Filip. 4:5, NW).
9. Woo kaust du diene Kjinja lieren, dienen Ehepoatna, waut Jehova nich deent, to ieren?
9 Kjinja opptrakjen kaun besonda schwoa sennen, wan eena von de Ehepoatna nich Jehova deent. Biejlikj sajcht de Schreft, daut jie june Kjinja sellen lieren, daut Jeboot notokomen, “Voda un Mutta [to] ieren” (Efs. 6:1-3, PB). Oba woo es daut, wan de Ehepoatna nich soon goodet Läwen fieet? Dan wurscht du kjennen een Väabilt sennen fa de Kjinja doaderch, daut du dienen Ehepoatna ieren deist. Kjikj no siene goode Sieden un saj dän daut, woo väl du am räakjenst. Räd ver de Kjinja kjeenmol schlajcht von dienen Ehepoatna. Enne Städ daut, laj dee daut ut, daut jieda Mensch selfst mott entscheiden, aus dee Jehova deenen well ooda nich. Wan de Ehepoatna, waut Jehova nich deent, seenen kaun, waut von goodet Läwen de Kjinja fieren, dan kaun dän daut bat doa brinjen, uk Jehova to deenen.
Lia june Kjinja de Woarheit ut de Schreft, wanemma daut mäajlich es (See Varsch 10)
10. Woo kaun eena de Kjinja de Woarheit ut de Schreft lieren, wan wäa von de Elren Jehova nich deent?
10 Daut kaun uk oppkomen, daut de Ehepoatna velangt, daut de Kjinja sellen bie faulsche Fasten metmoaken ooda daut dee saul de faulsche Gloowes jelieet. Eenjemol sajcht de Ehemaun siene christelje Fru daut auf, de Kjinja von de Schreft to lieren. Wan daut soo es, dan kaun de Fru doawäajen noch äare Kjinja de Woarheit ut de Schreft lieren (Apj. 16:1; 2. Tim. 3:14-15). Toom Biespel lat de Ehemaun daut veleicht nich too, daut de Fru pinkjlich kaun met de Kjinja de Schreft studieren ooda dee met no de Toopkomes nämen. See woat siene Entscheidunk achten, oba see kaun doawäajen ver äare Kjinja von äaren Gloowen räden, wan doa Jeläajenheiten oppkomen. Un soo kaun see äare Kjinja von Jehova lieren un woo dee kjennen een feinet Läwen fieren (Apj. 4:19-20). Oba eent es kloa: Irjentwanea motten de Kjinja selfst entscheiden, aus see Jehova deenen wellen ooda nich (5. Mo. 30:19-20).a
FRINTSCHOFT, WAUT JÄAJEN DE WOARHEIT ES
11. Wuahäa kaun tweschen ons un ons Frintschoft Trubbel oppkomen?
11 Ieeschtlich hab wie onse Famielje veleicht nuscht jesajcht, daut wie met Jehova siene Zeijen toop de Schreft studieeden. Oba wan ons Gloowen es emma stoakja jeworden, dan hab wie daut veleicht fa needich jeseenen, dee von onsen Gloowen to vetalen (Mar. 8:38). Wan du wäajen daut hast Trubbel jekjräajen met dien Frintschoft, dan denkj doaräwa no, waut du doonen kaust, daut du kaust Fräd hoolen un dan noch Jehova tru bliewen.
12. Wuarom kaun daut sennen, daut daut Frintschoft, waut Jehova nich deent, jäajen ons es? Woo kjenn wie wiesen, daut wie an proowen to vestonen?
12 Proow, dien Frintschoft to vestonen, waut Jehova nich deent. Daut es soo, wie sent sea schaftich, daut wie de Woarheit ut de Schreft jelieet haben. Oba ons Frintschoft denkj veleicht, daut wie sent veleit worden ooda daut wie nu Poat sent von eene jefäadelje Jemeent. Dee denkjen veleicht uk, daut wie an nuscht mea räakjnen, wäajen wie nich mea bie de Heljedoag metmoaken. Dee haben veleicht mau rajcht Angst, aus ons daut verheipts noch mol wada woat scheen gonen un aus wie woaren goot auf sennen. Wan daut soo es, dan wudd wie dee sellen proowen to vestonen un ons en dee äare Städ stalen. Daut kjenn wie, wan wie dee oppmoakjsom toohorchen un proowen to vestonen, waut soo rajcht äare Sorjen sent (Spr. 20:5). De Apostel Paulus proowd “eenem jiedren” to vestonen, soo daut hee to dee kunn von de goode Norecht räden, un krakjt daut kaun ons uk halpen (1. Kor. 9:19-23, PB).
13. Woo sell wie to ons Frintschoft räden, waut Jehova nich deent?
13 Räd ruich un natjes. De Schreft sajcht: “Jun räden saul emma leeftolich … sennen” (Kol. 4:6, PB). Wie kjennen Jehova no sienen heiljen Jeist froagen, soo daut wie kjennen leeftolich to ons Frintschoft räden. Wie wudden nich sellen met dee strieden äwa aul dee äare faulsche Glooweslieren. Wan dee waut sajen ooda doonen, waut ons weedeit, dan kjenn wie de Apostel nodoonen. Paulus schreef: “Wan schlajcht von ons jerät woat, dan säajnen wie de Menschen. Wan wie vefolcht woaren, droag wie daut. Wan wie vespott woaren, bliew wie frintlich” (1. Kor. 4:12-13, PB).
14. Woo goot kjemt daut ut, wan eena een feinet Läwen fieet?
14 Fia een feinet Läwen. Wan eena to daut Frintschoft, waut jäajen eenem es, leeftolich un frintlich es, kaun daut väl doonen. Oba noch mea kaun daut doonen, wan eena een feinet Läwen fieet (läs 1. Petrus 3:1-2, 16). Wies dien Frintschoft daut derch dien Biespel, daut Jehova siene Zeijen kjennen schaftich befriet sennen, daut dee sikj om äare Kjinja kjemren, daut dee een feinet un reinet Läwen fieren un daut dee uk een tofrädnet Läwen haben. Wan ons Frintschoft uk kjeenmol woat de Woarheit aunnämen, kjenn wie oba de Freid haben, waut daut jeft, wan eena Jehova tru deent.
15. Woo kjenn wie Striedarieen met ons Frintschoft väabieejen?
15 Denkj aul em verut. Jrebbel doaräwa no, waut du doonen kaust, wan daut eene Striedarie jeft (Spr. 12:16, 23). Eene Sesta von Australien vetalt: “Mien Schwieevoda wia sea jäajen de Woarheit. Wan wie wullen met dän räden, dan bäden ekj un mien Maun ieescht, daut Jehova ons sull halpen, frintlich to bliewen, wan dee wudd doll woaren. Wie muaken ons aul em verut Jedanken, von waut wie räden wullen, daut wie ons kunnen frintlich unjahoolen. Un om daut et nich opp eenst wudd eene groote Striedarie aufjäwen äwa Jemeenten, räd wie eefach nich too lang.”
16. Wan du truarich best, wäajen dien Frintschoft met die nich tofräd es, waut kaust du dan doonen?
16 Wie motten secha uk em Denkj hoolen, daut wie nich aule Oneenichkjeiten kjennen utem Stich gonen met ons Frintschoft, waut Jehova nich deent. Soone Oneenichkjeiten kjennen eenem truarich moaken besonda, wäajen wie dee soo väl räakjnen un wie wellen, daut dee ons uk waut räakjnen. Wan die daut soo jeit, dan proow em Denkj to hoolen, daut et wichtja es, Jehova tru to sennen, aus onse Leew fa de Famielje. Wan du daut soo deist, dan kaun daut sennen, daut daut Frintschoft irjentwanea sitt, woo iernst die de Woarheit es un daut et om Läwen jeit. Woo emma daut nu uk es: Hool em Denkj, daut du kjeenem bemotten kaust, de Woarheit auntonämen. Enne Städ daut kaust du aundre seenen loten, woo goot daut es, wan eena aules soo deit, aus Jehova daut haben well. Ons leeftolja Gott haft aundre de Jeläajenheit jejäft, selfst to entscheiden, waut von Läwen dee haben wellen krakjt soo aus ons (Jes. 48:17-18).
WAN WÄA VON DE FAMIELJE JEHOVA VELAT
17-18. Waut kaun die halpen, wan eena von de Famielje Jehova velat?
17 Wan wäa von de Famielje utjeschloten woat ooda Jehova velat, dan kaun eenem daut sea toosaten un weedoonen. Woo kaun eena doamet omgonen?
18 Bliew bie diene jeistelje Jewanheiten. Stoakj dienen Gloowen doaderch, daut du pinkjlich de Schreft studieescht, fa de Toopkomes väastudieescht un uk doa best. Doo uk prädjen un bäd om Krauft, daut du uthoolen kaust (Jud. 20-21). Oba waut es, wan du daut nu aul bloos noch deist, wäajen du motst, un nich, wäajen die daut Freid jeft? Jeff nich opp! Wan du woascht goode jeistelje Jewanheiten haben, dan woat die daut halpen, daut du wada kaust met diene Jedanken un Jefeelen foadich woaren. Denkj mol doaraun, woo dän daut jinkj, waut dän 73. Psalm schreef. Hee haud een orrajchtet denkjen jekjräajen un am jinkj daut sea schlajcht. Oba wäajens hee doahan jinkj, wua Gott aunjebät wort, kunn hee wada met sien denkjen trajchtkomen (Psa. 73:16-17). Wan du Jehova woascht tru deenen, dan woascht du krakjt dautselwje doonen kjennen.
19. Woo kaust du wiesen, daut du daut respakjten deist, wan Jehova wäm trajchtwiest?
19 Respakjt daut, wan Jehova wäm trajchtwiest. Wan ons daut ieeschtlich uk sea truarich moakt, es daut enne Lenjd oba emma daut baste, wan Jehova wäm trajchtwiest, uk fa dän Sinda (läs Hebräa 12:11). Jehova sajcht biejlikj, “daut jie nich sellen Jemeenschoft haben met eenem”, dee waut schlajchtet deit, wan dän daut nich opp iernst Leet es (1. Kor. 5:11-13, PB). Wan ons daut uk schlajcht jeit, wan doa wäa von onse Famielje utjeschloten es, mott wie doawäajen nuscht met dän to doonen haben; nich äwa Fon, nich schriewen, nich Breew, nich E-Mails uk nich äwa Internet.
20. Waut vonne Hopninj sell wie nich oppjäwen?
20 Jeff nich Hopninj opp. De Leew “hopt aules”, sajcht de Schreft. Doa es uk de Hopninj met en, daut dee, waut Jehova veloten haben, wada woaren trigj no am komen (1. Kor. 13:7, PB). Wan doa wäa von diene Famielje utjeschloten es un du sitst, daut dee Endrungen moakt, dan kaust du fa dänjanjen bäden, daut dee derch de Schreft Krauft kjricht un doano horcht, wan Jehova sajcht: “Komt wada no mie” (Jes. 44:22, PB).
21. Waut wurscht du sellen doonen, wan daut en diene Famielje Oneenichkjeit jeft, wäajen du Jesus nofoljen deist?
21 Jesus säd, daut wan aundre bie ons mea wieet wieren aus hee, dan wia wie daut nich wieet, siene Nofolja to sennen. Oba hee wia sikj gaunz secha, daut siene Jinja wudden dän Moot haben un wudden tru bliewen, krakjt endoont wan de Famielje uk jäajenaun wia. Wan doa en diene Famielje “daut Schwieet” nenjekomen es, wäajens du Jesus nofoljen deist, dan velot die doaropp, daut Jehova die halpen woat, met aul daut schwoare foadich to woaren (Jes. 41:10, 13). Frei die, wäajens du weetst, daut Jehova un Jesus met die tofräd sent un dee woaren daut beloonen, wiels du soo tru jewast best.
a Wan du mea weeten west, woo eena kaun Kjinja opptrakjen, wan eena von de Elren Jehova nich deent, dan see “Fragen von Lesern” em Wachtturm vom 15. August 2002.