Best du reed fa de groote Liedenstiet?

1. Wuarom es daut kluak, sikj fa een Owwada reedtomoaken?

SIKJ reed to moaken, kaun eenem daut Läwen raden. Biejlikj wan daut een Owwada jeft, kjennen deejanje ea äwaläwen, waut sikj reedjemoakt haben, un kjennen noch aundre halpen. Eene Grupp en Europa, waut aundre Menschen uthalpt, sajcht: “Sikj reedtomoaken, kaun werkjlich eenen grooten Unjascheet moaken.”

2. Wuarom sell wie ons fa de groote Liedenstiet reedmoaken? (Matäus 24:44).

² De “groote Liedenstiet” woat onverhofs aunfangen (Mat. 24:21, NW). Oba daut woat nich soo sennen aus bie väle Owwadasch, wiels wie weeten, daut dee kjemt. Soo bie 2,000 Joa trigj säd Jesus to siene Nofolja, daut dee sikj sullen fa dise Tiet reedmoaken (läs Matäus 24:44). Wan wie reed sent, woat ons daut leichta sennen, dise schwoare Tiet derchtostonen un aundre doabie to halpen (Luk. 21:36).

3. Woo kjenn wie ons fa de groote Liedenstiet reedmoaken derch staunthauft bliewen, Metjefeel un Leew wiesen?

³ Well wie nu mol dree Ieejenschoften seenen, waut ons woaren halpen, fa de groote Liedenstiet reed to sennen. Waut woa wie doonen, wan wie sellen eene Jerechtsbootschoft bekauntmoaken un Jäajenstaunt haben woaren? (Opb. 16:21). Wie motten staunthauft bliewen, om Jehova to jehorchen, un doaropp vetruen, daut hee ons beschitzen woat. Ooda waut woa wie doonen, wan onse Breeda een bät ooda aul äare tietelje Sachen velieren? (Hab. 3:17-18). Daut wie onse Breeda dan uthalpen kjennen, woa wie motten Metjefeel wiesen. Un woo woat daut sennen, wan wie woaren motten fa een Stoot sea enj met onse Breeda toop wonen, wäajen wie aunjejräpen woaren von de Velkja, waut sikj toopstonen? (Hes. 38:10-12). Om dise schwoare Tiet uttohoolen, mott wie onse Breeda sea leewen.

4. Woo wiest de Bibel, daut wie wieda doaraun schaufen motten, staunthauft to bliewen un Metjefeel un Leew to haben?

⁴ Gott sien Wuat rot ons too, wieda staunthauft to bliewen, Metjefeel un Leew to haben. En Lukas 21:19 sajcht daut: “Wan jie staunthauft bliewen, woa jie june Seelen jewennen.” Kolossa 3:12 sajcht, wie sellen ons “von Hoaten erboarmen”, ooda Metjefeel haben. Un en 1. Tessalonicha 4:9-10 schrift daut: “Wiels Gott selfst [haft] junt jelieet …, eenaunda goot to sennen. . . . Oba wie wullen junt Moot moaken, doarenn noch tootonämen.” Aul dise Bibelvarzhen wieren aun de Jinja jeschräwen, waut aul jewäsen hauden, daut see staunthauft bleewen, Metjefeel un Leew hauden. Oba dee sullen noch wieda aun dise Sachen schaufen. Wie motten dautselwje doonen. Ons woat daut halpen, wan wie seenen, woo de ieeschte Christen daut deeden. Dan woa wie seenen, woo wie dee nodoonen kjennen un ons fa de groote Liedenstiet reedmoaken kjennen.

EEW DAUT, STAUNTHAUFT TO BLIEWEN

5. Woo kunnen de ieeschtemmasche Christen staunthauft bliewen?

⁵ De ieeschtemmasche Christen musten staunthauft bliewen (Heb. 10:36). Dee musten met dautselwje foadich woaren, waut de auljemeene Menschen, un hauden bowenenn noch Trubbels, wiels dee Christen wieren. Väle worden von de reemische Rejierunk un von de judische Gloowesleidasch un uk von äare ieejne Famielje vefolcht (Mat. 10:21). Dee musten sikj bieaun uk jäajen de Aufjefolne wäaren, waut de Vesaumlunk met äare Lieren uteneenbrinjen wullen (Apj. 20:29-30). Woo kunnen dise Christen staunthauft bliewen? (Opb. 2:3). Dee dochten äwa soone true Deena von de Bibeltiet no aus Hiob (Jak. 5:10-11). Dee bäden om Krauft (Apj. 4:29-31). Un dee kjikjten no daut goode, waut see noch kjrieen wudden, wäajen see staunthauft bleewen (Apj. 5:41).

6. Waut kaust du von Merita lieren, waut Jäajenstaunt enne Famielje haud?

⁶ En Gott sien Wuat un en onse Bieekja jeft daut een deel Biespels von soone, waut staunthauft bleewen. Wan wie dee studieren un doaräwa nodenkjen, kaun ons daut halpen, uk uttohoolen. Daut es, waut Merita, eene Sesta en Albaunien, holp, doamet foadich to woaren, daut see soo hunjsch von äare Famielje behaundelt wort. See sajcht: “Mie jinkj daut sea to Hoaten, aus ekj de Jeschicht von Hiob studieed. Hee must sea lieden, un dan wist hee noch nich mol, von wua daut häakjeem. Oba hee säd: ‘Bat ekj stoaw, woa ekj tru bliewen!’ (Hiob 27:5, NW). Ekj docht doaräwa no, daut hee noch väl jratre Trubbels haud aus ekj. Oba ekj wist, wäa doahinja wia.”

7. Wan wie nu uk nich eenen grooten Trubbel haben, waut sell wie doawäajen doonen?

⁷ Wan wie Jehova foaken sajen, waut wie oppem Hoaten haben, dan kjenn wie staunthauft bliewen (Filip. 4:6; 1. Tess. 5:17). Veleicht hab wie nu jroz uk nich groote Trubbels, oba waut doo wie, wan wie ons mootloos, derchenaunda ooda äwafoddat feelen? Wan wie nu aul met Jehova doaräwa räden, met onse auldoagsche Trubbels foadich to woaren, dan woa wie daut uk krakjt soo doonen, wan wie jratre Trubbels haben. Wie kjennen ons dan gaunz secha sennen, daut Jehova krakjt weet, wanea un woo hee ons halpen kaun (Psa. 27:1, 3).

8. Woo kjenn wie daut aun Mira seenen, daut ons daut fa lota halpt, wan wie nu aul onse Trubbels uthoolen? (Jakobus 1:2-4). (See uk daut Bilt.)

⁸ Wie woaren bie de groote Liedenstiet bäta staunthauft bliewen, wan wie onse Trubbels nu aul tru uthoolen (Reem. 5:3). Wuarom kjenn wie daut sajen? Väl Breeda haben utjefungen, daut an daut leichta wia, met eenen Trubbel foadich to woaren, wan see ea aul eenen Trubbel utjehoolen hauden. Staunthauft to bliewen, stoakjt äaren Gloowen doaraun, daut Jehova emma reed es, an to halpen. Dis Gloowen holp an, met dän näakjsten Trubbel omtogonen (läs Jakobus 1:2-4). Mira, eene Pionia-Sesta en Albaunien, haft daut beläft. Ar haft daut jeholpen, staunthauft to bliewen, wan see ea aul en Trubbels utjehoolen haud. Eenjemol feelt see sikj soo, daut see de eensje es, waut soo väl Trubbels haft. Oba dan denkjt see doaräwa no, woo sea Jehova ar en de latste 20 Joa aul jeholpen haft, un see sajcht to sikj selfst: “Jeff nich opp! Lot nich too, daut aul dise Joaren, wua Jehova die met de Trubbels jeholpen haft, vejäfs sent.” Du kaust uk doaräwa nodenkjen, woo Jehova die jeholpen haft, staunthauft to bliewen. Sie die secha, daut Jehova die emma sitt, wan du uthoolen motst, un denkj doaraun, daut hee die beloonen woat (Mat. 5:10-12). Wan de groote Liedenstiet dan aunfangen woat, hast du daut aul jelieet, staunthauft to sennen, un du woascht uk wieda staunthauft bliewen.

WIES METJEFEEL

9. Woo wees de Vesaumlunk en Antiochia en Sierien, daut dee Metjefeel hauden?

⁹ Räd wie mol doavon, waut de Christen beläwden, aus daut en Judäa eene groote Hungaschnoot jeef. Aus de Vesaumlunk von Antiochia en Sierien von dise Hungaschnoot enwort, feelden dee onen Twiewel met äare Breeda en Judäa met. Oba dee deeden uk waut, om äa Metjefeel to wiesen. De Jinja “worden sikj eenich, daut een jiedra doano aus hee kunn, de Breeda en Judäa methalpen wudd” (Apj. 11:27-30). De Christen en Antiochia wullen äare Breeda en Judäa onbedinjt halpen, wan daut uk wiet auf wia (1. Joh. 3:17-18).

10. Woo kjenn wie Metjefeel wiesen, wan onse Breeda un Sestren von een Owwada betroffen sent? (See uk daut Bilt.)

¹⁰ Vondoag dän Dach kjenn wie uk Metjefeel wiesen, wan wie daut enwoaren, daut onse Breeda un Sestren von een Owwada betroffen sent. Wie sent fuaz reed, waut to doonen. Veleicht froag wie de Eltestasch, aus wie wua methalpen kjennen. Wie jäwen wellich onse Gowen fa daut weltwiede Woakj ooda wie bäden fa dee, waut derch een Owwada Schoden jekjräajen haben (Spr. 17:17).b Aune 2020 biejlikj worden äwa 950 Nootfaulkommitees äware gaunze Welt oppjestalt, om soone to unjastetten, waut wäajen de COVID-19-Krankheit Help fäld. Wie sent deejanje, waut bie soone Kommitees methalpen, sea dankboa. Ut Metjefeel fa äare Breeda un Sestren haben dee an met tietelje Sachen unjastett un jeholpen, Jehova wieda to deenen. Un eenjemol haben dee mau rajcht dee äare Hiesa ooda Vesaumlungshiesa jerepäat ooda fresch oppjebut (see uk 2. Korinta 8:1-4).

11. Woo brinjt daut Iea opp Jehova, wan wie Metjefeel wiesen?

¹¹ Wan wie no een Owwada ons Metjefeel wiesen, dan seenen aundre Menschen daut, waut wie aules doonen. Aune 2019 biejlikj brocht de Uarkaun Dorian een Vesaumlungshus oppe Bahamas tonicht. Aus onse Breeda daut Vesaumlungshus doa wada oppbuden, fruagen dee wäm, waut nich eent von Jehova siene Zeijen wia, waut hee fa eene Oabeit nämen wudd, waut doa fäld to doonen. Hee säd: “Ekj well fa daut Jereetschoft, de Oabeit un daut Toobehia . . . nuscht haben. . . . Mie jankat daut fa june Organisazion to doonen. Mie jeit daut to Hoaten, woo väl jie om june Frind romjäwen.” De mieeschte enne Welt kjanen Jehova nich, oba väle seenen, waut Jehova siene Zeijen doonen. Wan wie aundre Metjefeel wiesen, kaun aundre daut Jehova noda brinjen, dee “rikj aun Jnod” es. Es dit nich scheen to weeten? (Efs. 2:4).

12. Woo moakt ons daut fa de groote Liedenstiet reed, wan wie nu aul Metjefeel wiesen? (Openboarunk 13:16-17).

¹² Wuarom woat daut sea needich sennen, daut wie en de groote Liedenstiet Metjefeel wiesen? De Bibel wiest, daut deejanje, waut de Rejierungen von dise Welt nich unjastetten, daut schwoa haben woaren – nu aul un uk en de groote Liedenstiet (läs Openboarunk 13:16-17). Veleicht woa wie onse Breeda un Sestren halpen motten, daut dee daut needje haben kjennen. Wan ons Kjennich Jesus Christus ieescht komen woat, de Menschheit to rechten, woat hee ons dan uk doabie trafen, daut wie aundre Metjefeel wiesen? Wan jo, dan woat hee to ons sajen kjennen: “Oaft daut Rikj” (Mat. 25:34-40).

STOAKJ DIENE LEEW

13. Woo stoakjten de ieeschte Christen äare Leew no Reema 15:7 no?

¹³ Daut wia sea bekaunt, daut de ieeschte Christen sikj Leew weesen. Oba wia daut leicht fa dee? Denkj wie mol, woo veschieden de Menschen von de Vesaumlunk en Room wieren. Eenje wieren Juden un dee hauden jelieet, sikj aun daut Jesaz Moses to hoolen. Aundre wada wieren von veschiedne Velkja un dee wieren gaunz aundasch oppjewossen. Eenje wieren veleicht Sklowen un aundre hauden veleicht selfst Sklowen. Waut holp dise Christen, Leew to wiesen, wan dee uk gaunz veschieden wieren? De Apostel Paulus rod dee too: “Nämt junt unjarenaunda . . . opp” (läs Reema 15:7). Waut meend hee doamet? Daut Wuat “oppnämen” meent, daut eena leeftolich ooda gaustfrie es; biejlikj wan eena wäm bie sikj tus oppnemt ooda aus eenen Frint aunnemt. Toom Biespel säd de Apostel Paulus to Filemon, woo hee dän Sklow Onesimus, dee von am wajchjerant wia, oppnämen sull. Hee säd to Filemon: “Nemm am soo opp, aus wan du mie oppnämen wurscht” (Filem. 17). Un Priszilla un Aquilla neemen Apollos opp, waut nich soo väl von dän Christengloowen wist aus see, un “neemen . . . am bie sikj nenn” (Apj. 18:26). Dise Christen wieren gaunz veschieden, oba dee leeten nich too, daut an daut uteneenbrocht. Dee strenjden sikj aun, sikj unjarenaunda opptonämen.

14. Woo deeden Anna un äa Maun aundre Leew wiesen?

¹⁴ Wie kjennen onse Breeda un Sestren uk Leew wiesen, wan wie met dee Frind woaren un Tiet vebrinjen. Un jeweenlich brinjt dee daut uk bat doa, ons Leew to wiesen (2. Kor. 6:11-13). Räd wie biejlikj mol von Anna un äaren Maun. Een Stootje nodäm, daut dee aus Missionoaren no eene niee Städ en Wast-Afrika jeschekjt worden, kjeem de COVID-19-Krankheit opp. Doawäajen kunnen see nich perseenlich met de Breeda toop sennen. Oba woo deeden de Missionoa-Lied äare Leew wiesen? Dee fonden dee, un säden, daut see an jieren wudden bäta kjanen lieren. De Breeda un Sestren jinkj daut sea to Hoaten, waut dee deeden, un doawäajen fungen see uk aun, de Missionoaren to fonen un to schriewen. Wuarom strenjden de Missionoaren sikj aun, de Breeda un Sestren von äare niee Vesaumlunk kjanen to lieren? Anna sajcht: “Ekj mott emma doaraun denkjen, woo aundre mie un miene Famielje Leew jewäsen haben – en goode uk en schlajchte Tieden. Äa goodet Biespel brinjt mie bat doa, aundre uk Leew to wiesen.”

15. Waut lia wie von Vanessa doaräwa, aul onse Breeda un Sestren to leewen? (See uk daut Bilt.)

¹⁵ Väle von ons sent en Vesaumlungen, wua de Breeda un Sestren gaunz veschieden sent un von veschiedne Lenda komen. Onse Leew kaun noch jrata woaren, wan wie no dee äare goode Sieden kjikjen. Vanessa es eene Sesta, waut en Nie-Seelaunt deent. Ar foll daut schwoa, met jewesse von de Vesaumlunk delenjd to komen, wiels dee soont deeden, waut ar stieed. Oba see wort sikj eenich, met dee jroz dolla toop to sennen, enne Städ dee utem Stich to gonen. Daut holp ar to seenen, wuarom Jehova dee leewd. See sajcht: “Von dan, aus mien Maun Kjreisoppsechta es, sent wie noch met väl mea Breeda un Sestren toop, waut daut veschieden haben. Un nu es mie daut leichta, met dee delenjd to komen. Nu jleich ekj de veschiedne Menschen. Un Jehova jleicht daut uk, wiels hee haft ons no sien Volkj jetrocken, wua de Menschen soo veschieden sent.” Wan wie lieren, aundre soo to seenen aus Jehova, dan bewiest daut, daut wie dee leewen (2. Kor. 8:24).

16. Wuarom woat daut enne groote Liedenstiet soo wichtich sennen, daut wie onse Breeda un Sestren leewen? (See uk daut Bilt.)

¹⁶ En de groote Liedenstiet woat de Leew sea needich sennen. Woo woat Jehova ons beschitzen, wan de groote Liedenstiet aunfangt? See wie mol, waut vonne Aunwiesungen Jehova sien Volkj jeef, aus de oole Staut Babel aunjejräpen wort. Hee säd: “Mien Volkj, go en diene Bennastowen un schlut de Däaren hinja junt too. Vestäakj die fa een kjlienet Stootje, bat de Oaja vebie es” (Jes. 26:20, NW). Daut schient soo, daut dise Wieed uk waut met ons to doonen haben, wan de groote Liedenstiet kjemt. Met de “Bennastowen” kjennen onse Vesaumlungen jemeent sennen. En de groote Liedenstiet woat Jehova ons beschitzen, wan wie ons wieda enj met onse Breeda toophoolen. Doawäajen es daut needich, daut wie nu sea doaraun schaufen, onse Breeda un Sestren to leewen un nich dee bloos uttohoolen. Daut kaun mau rajcht doamet to doonen haben, aus wie äwaläwen!

MOAK DIE NU REED

17. Woo woat ons daut enne groote Liedenstiet togood komen, wan wie ons nu aul reedmoaken?

¹⁷ “De groota Dach fa däm HARN” woat eene schwoare Tiet sennen fa de Menschen (Zef. 1:14-15). Jehova siene Deena woaren doa uk unja lieden motten. Oba wan wie ons nu aul reedmoaken, dan woa wie kjennen ruich bliewen un aundre halpen. Wie woaren bie aul onse Trubbels staunthauft bliewen kjennen. Un wan onse Breeda woaren lieden motten, woa wie ons bastet doonen, om dee bietostonen, doaderch daut wie dee Metjefeel wiesen un uthalpen. Wie woaren met onse Breeda un Sestren toophoolen, wiels wie daut nu aul jelieet haben, dee to leewen. Jehova woat ons met daut eewje Läwen en de niee Welt beloonen, wua kjeena mea woat aun een Owwada ooda aun Lieden denkjen (Jes. 65:17).