Du kaust Fräd haben, wan uk waut schlemmet passieet

1. Waut es “Gott sien Fräd”, un woo kjemt ons dee togood? (Filippa 4:6-7).

DAUT jeft eene Sort Fräd, waut de Menschen en de Welt nich kjanen. Daut es “Gott sien Fräd”, aulsoo de Ru, waut doavon kjemt, goode Frind met onsen himlischen Voda to sennen. Wan wie Gott sienen Fräd haben, dan feel wie ons secha (läs Filippa 4:6-7). Wie kjennen uk goode Frind sennen met soone, waut am leewen. Un wie kjennen uk perseenlich goode Frind met dän “Frädens Gott” sennen (1. Tess. 5:23). Wan wie onsen himlischen Voda kjanen un opp am vetruen, dan woat dän sien Fräd ons ennalich berujen, wan wie Angst un Sorjen haben, wäajen wie schwoare Tieden derchmoaken.

2. Wuarom kjenn wie ons secha sennen, daut et mäajlich es, Gott sienen Fräd to haben?

² Es daut werkjlich mäajlich, Gott sienen Fräd to haben, wan doa Schwierichkjeiten sent, wäajen doa eene Krankheit utbrakjt, een Owwada, Orru em Launt ooda Vefoljunk es? Soone Schwierichkjeiten aus dit kjennen ons Angst moaken. Oba Jesus jeef siene Nofolja dän Rot: “Lot junt nich daut Hoat beorrujen, un fercht junt nich” (Joh. 14:27). Woo goot daut nich es, daut de Breeda un Sestren Jesus sienen Rot nokjeemen. Met Jehova siene Help haben dee kunt Fräd finjen, wan dee uk musten met groote Schwierichkjeiten foadich woaren.

WOO EENA KAUN FRÄD HABEN, WAN EENE KRANKHEIT UTBRAKJT

3. Woo kaun eene wiet vespreede Krankheit onsen Fräd wajchnämen?

³ Eene wiet vespreede Krankheit kaun daut Läwen en aules sea veendren. Denkj mol doaraun, waut de COVID-19-Krankheit aun väle deed. Opp eene Sauz fungen se rut, daut äwa de Halft Menschen säden, daut see en dise Tiet von de Krankheit nich goot schlopen kunnen. Un en dee Tiet jeef daut uk väl mea Menschen, waut Angst un Trubbel met de Narfen hauden, soopen un Droggs brukten. Dee worden tus uk hunjscha un wullen sikj mau rajcht daut Läwen nämen. Wan doa, wua du wonst, eene Krankheit utbrakjt, woo kaust du diene Angst dan unja Kontroll hoolen un Gott sienen Fräd haben?

4. Wuarom jeft Jesus siene Profezeiunk von de Enjtiet ons Fräd?

⁴ Jesus säd verut, daut en de latste Tiet “opp veschiedne Städen” wudd Pestilenz sennen, aulsoo wiet vespreede Krankheiten (Luk. 21:11). Woo brinjt ons daut Fräd, dit to weeten? Na wie wundren ons nich, wan doa Krankheiten utbräakjen. Wie woaren en, daut dit krakjt soo passieet, aus Jesus daut verutsäd. Doawäajen woa wie dän Rot nokomen, waut Jesus fa dee jeef, waut doa wudden en de Enjtiet läwen. Hee säd: “Siet nich too oppjeräacht” (Mat. 24:6).

5. (a) No Filippa 4:8-9 no, om waut sull wie bäden, wan doa eene Krankheit utbrakjt? (b) Woo kaun ons daut halpen, no daut Oppjeschnakte von de Bibel to horchen?

⁵ Wan doa eene Krankheit utbrakjt, dan kjenn wie ons leicht sea sorjen un mau rajcht Angst haben. Soo jinkj eene Sesta daut, waut Desi heet.b Nodäm aus äa Onkel, äa Vada un äa Dokta aula wieren aun COVID-19 jestorwen, haud see Angst, daut see sikj dän Virus uk oppschlapen wudd un äare elre Mame dän äwaschlapen. Un wäajen de Krankheit sorjd see sikj uk, daut see äare Oabeit velieren wudd. See wundad, woo see dan wudd kjennen daut Äten un de Husrent betolen. See muak sikj soo väl Sorjen doaräwa, daut see nich schlopen kunn. Oba Desi kjrieech äaren Fräd wada trigj. Woo? See bäd to Jehova un säd krakjt, daut hee ar halpen sull, sikj to berujen un goode Jedanken to haben (läs Filippa 4:8-9). See horcht soo to sajen no Jehova, wan see daut Oppjeschnakte horcht von de Bibel. See sajcht: “Derch de Läsa äare ruje Stemm wort ekj ruich un haud nich mea Angst un daut holp mie uk denkjen, daut Jehova metfeelent es” (Psa. 94:19).

6. Woo woat perseenlich studieren un de Toopkomes die halpen?

⁶ Wan eene Krankheit utbrakjt, dan es daut nich emma mäajlich, aules soo to doonen, aus eena ea deed. Oba hia doawäajen nich opp met perseenlich studieren un no de Toopkomes wanken. De Erfoarungen, waut en onse Tietschreften un Videos sent, woaren die denkjen halpen, daut diene Breeda un Sestren Jehova tru bliewen, wan dee uk Schwierichkjeiten haben soo aus du (1. Pet. 5:9). De Toopkomes woaren die uk halpen, daut du äwa goode Sachen ut de Schreft nodenkjst. Doa woaren aundre die uk kjennen Moot toospräakjen un du dee (Reem. 1:11-12). Wan du doaräwa nodenkjst, woo Jehova siene Deena unjastett haft, wan dee krank wieren, Angst hauden ooda sikj auleen feelden, woat daut dienen Gloowen stoakjen. Dan woascht du die kjennen secha sennen, daut hee die uk unjastetten woat.

7. Waut kjenn wie von dän Apostel Johanes lieren?

⁷ Strenj die aun, waut fa diene Breeda un Sestren to doonen. Wan doa eene Krankheit utbrakjt, dan woa wie veleicht uk von onse Gloowesbreeda uteneen bliewen motten. En soone Tiet späat sikj die daut veleicht soo aus dän Apostel Johanes. Hee wull sienen Frint Gajus seenen (3. Joh. 13-15). Oba hee wist, daut et to dee Tiet nich mäajlich wia. Doawäajen deed Johanes daut, waut hee kunn. Hee schreef Gajus eenen Breef. Wan daut nich emma mäajlich es, perseenlich no diene Breeda un Sestren to wanken, dan proow met dee äwa Fon ooda äwa Video to räden ooda schriew dee waut. Wan du met de Gloowesbreeda vebungen blifst, dan woascht du die sechra un ruja feelen. Räd uk wellich met de Eltestasch, wan du väl Angst un Sorjen hast, un nemm daut aun, wan dee die leeftolich Moot toospräakjen (Jes. 32:1-2).

WOO EENA KAUN FRÄD HABEN, WAN DOA EEN OWWADA ES

8. Woo kaun een Owwada die dän Fräd wajchnämen?

⁸ Wan du mol hast eene Äwaschwamunk, een Ieedbäben ooda grootet Fia beläft, dan hast du daut veleicht noch lang lota met daut schwoa. Wan doaderch wäa es todood jekomen, waut du väl räakjensd, ooda dien Hab un Goot loos jeworden best, dan wieescht du veleicht truarich, onen Hopninj ooda mau rajcht doll. Daut meent doawäajen nich, daut du nom tieteljen hinjaraun best ooda nich Gloowen hast. Du best derch waut sea schwoaret jegonen! Eenje denkjen dan veleicht mau rajcht, daut du doaderch kust schlajcht jesonnen sennen (Hiob 1:11). Oba du kaust doawäajen noch Hopninj haben. Woo?

9. Waut säd Jesus, waut ons reedmoakt fa Owwadasch?

⁹ Eenje Menschen enne Welt denkjen, daut dee kjeenmol woaren een Owwada beläwen. Oba wie weeten, daut et en onse Tiet emma mea Owwadasch jäwen woat, waut ons uk trafen kjennen. Denkj doaraun, waut Jesus verutsäd. Hee säd to siene Nofolja, daut daut ver daut Enj noch wudd opp veschiedne Städen “grootet Ieedbäben” un aundre Owwadasch jäwen (Luk. 21:11). Hee säd uk verut, daut de “Gottloosichkjeit woat äwahaunt nämen”. Un daut es krakjt, waut wie vondoag dän Dach seenen. Biejlikj see wie Vebräakjen, Jewault un daut Terroristen schlemmet aunrechten (Mat. 24:12). Jesus säd kjeenmol, daut soon schlemmet bloos dee passieren wudd, met dee Jehova nuscht to doonen haft. Mau rajcht väle von Jehova siene true Deena haben must een Owwada beläwen (Jes. 57:1; 2. Kor. 11:25). Jehova woat ons veleicht nich derch een Wunda fa aul daut schlemme beschitzen, oba hee woat ons daut jäwen, waut ons fält toom ruich bliewen.

10. Wuarom wiest daut Gloowen, wan wie ons em verut fa eenen Nootfaul reedmoaken? (Spricha 22:3).

¹⁰ Ons woat daut leichta sennen, en eenen Nootfaul ruich to bliewen, wan wie ons em verut doaropp reedmoaken. Oba wiest daut, daut eena nich Gloowen haft, wan eena sikj em verut doaropp reedmoakt? Nä, verheipts nich. Wan wie ons opp een Owwada reedmoaken, wiest daut, daut wie ons doaropp veloten, daut Gott fa ons sorjen woat. Woosoo? Gott sien Wuat rot ons mau rajcht too, fa een Ojjlekj reedtomoaken, waut oppkomen kunn (läs Spricha 22:3). Gott siene Organisazion haft ons emma wada denkjen jeholpen, ons reedtomoaken fa eenen Nootfaul, derch de Artikjels en de Tietschreften, bie de Toopkomes un Bekauntmoakungen.c Velot wie ons opp Jehova? Wan jo, dan woa wie dän Rot nu nokomen, ea waut schlemmet passieet.

11. Waut kjenn wie von Margaret lieren?

¹¹ See mol, waut eene Sesta, waut Margaret heet, beläwd. To ar wort jesajcht, daut see must äa Tus veloten, wäajen en äare Jäajent een grootet Wooltfia wia. Wäajen soo väl Menschen tojlikj musten veloten, wieren de Wäaj voll Foatieja un daut vestopt sikj. De Loft wia dikj voll schwoaten Ruak un Margaret kunn nich äa Foatich veloten. Oba wäajen see sikj reedjemoakt haud, kunn see daut äwaläwen. En äare Tausch haud see eene Launtkoat, waut ar holp, eenen Romwajch to finjen. See wia disen Wajch mau rajcht aul ea jefoaren, daut ar daut wudd leichta sennen, wan doa mol een Nootfaul wia. Wäajen Margaret sikj reedjemoakt haud, kunn see dit äwaläwen.

12. Wuarom hool wie ons aun de Aunwiesungen, waut fa onse Sechaheit sent?

¹² De Beaumte sajen ons veleicht eenjemol, daut wie sellen to eene jewesse Tiet tus sennen ooda ons Tus veloten toom ons selfst un aundre beschitzen. Eenje Menschen jehorchen de Aunwiesungen nich, wäajen dee nich wellen äa Hab un Goot veloten. Waut doonen Christen? De Schreft sajcht: “Om Gott sient Wellen hoolt june Rejierunk äare Jesazen, auf daut de Kjeisa selfst es, ooda dee, dee hee jeschekjt haft” (1. Pet. 2:13-14). Gott siene Organisazion jeft ons uk Aunwiesungen, woo wie kjennen secha sennen. Dee halpen ons pinkjlich denkjen, daut wie de Eltestasch sellen onse nieste Adrass un Fonnumma jäwen, daut dee om ons omweeten, wan doa mol een Nootfaul es. Hast du daut aul jedonen? Veleicht jäwen dee ons Aunwiesungen, daut wie mol sellen fa eene jewesse Tiet tus bliewen, ons Hus veloten ooda daut needichste tus haben. Veleicht sajen dee uk, wanea un woo wie aundre halpen kjennen. Wan wie nich jehorchen, kunn wie ons Läwen un uk de Eltestasch äa Läwen en Jefoa brinjen. Denkj doaraun, daut dise true Mana äwa ons woaken (Heb. 13:17). Margaret sajcht: “Ekj jleew faust, daut et mien Läwen rad, daut ekj dän Rot von de Eltestasch un de Organisazion nokjeem.”

13. Waut haft väl Christen, waut haben must äa Tus veloten, Fräd un Freid jejäft?

¹³ Väl Breeda un Sestren, waut wäajen Owwada ooda Kjrich ooda Orru em Launt haben must äa Tus veloten, doonen äa bastet toom sikj aun äare niee Omstend wanen un wada mea em Deenst fa Jehova doonen. Krakjt soo aus de ieeschte Christen, waut wäajen Vefoljunk aulawäajen vestreit worden, gonen dee uk wieda un prädjen daut Wuat (Apj. 8:4). Prädjen halpt dee, dolla no daut Kjennichrikj to kjikjen enne Städ no äare schwoare Omstend. Un doaderch haben dee kunt äaren Fräd un äare Freid hoolen.

WOO EENA KAUN FRÄD HABEN, WAN EENEM VEFOLCHT WOAT

14. Woo kaun Vefoljunk onsen Fräd stieren?

¹⁴ Wan wie Vefoljunk haben, kjenn wie soont velieren, waut ons jeweenlich halpt, ons secha to feelen. Wie sent schaftich un tofräd, wan wie kjennen frie met aundre toopkomen, frie prädjen un dee Sachen doonen, waut wie jewant sent, onen Angst to haben daut se ons faustnämen. Wan se ons dise Frieheit wajchnämen, dan kjrie wie Angst un moaken ons Sorjen, waut daut näakjste sennen woat. Daut es gaunz normal, sikj soo to feelen. Oba wie motten doawäajen oppaussen. Jesus säd, daut Vefoljunk siene Nofolja kunn tofaul brinjen (Joh. 16:1-2). Soo, woo kjenn wie dan en Vefoljunk onsen Fräd hoolen?

15. Wuarom sull wie ons nich fa Vefoljunk ferchten? (Johanes 15:20; 16:33).

¹⁵ En Gott sien Wuat sajcht daut: “Aul dee, dee dän fausten Wellen haben aus Christen fromm to läwen, motten met Vefoljunk räakjnen” (2. Tim. 3:12). Fa eenen Brooda, waut Andrei heet, wia daut schwoa to jleewen, daut en sien Launt aul Jehova siene Deena wudden vefolcht woaren, nodäm ons Woakj doa veboden wort. Hee docht soo: “Doatoo jeft daut hia too väl Zeijen! Woo wudd de Rejierunk ons aula faustnämen kjennen?” Oba enne Städ daut Andrei daut Fräd jeef, soo to denkjen, muak am daut bloos noch orruja. Aundre Breeda leeten daut en Jehova siene Henj, woo daut utkomen wudd. Dee proowden sikj nich selfst entobillen, daut see nich wudden faustjenomen woaren. Dee stunden daut too, daut se an wudden kjennen faustnämen. Oba dee wieren ruja aus Andrei. Dan wort hee sikj eenich, uk soo to denkjen aus dee un veleet sikj gaunz opp Gott. Boolt haud hee Fräd un nu es hee schaftich, mau rajcht wan hee uk Trubbels haft. Un soo kaun daut uk fa ons sennen. Wan Jesus uk säd, daut wie motten opp Vefoljunk räakjnen, vesechad hee ons oba uk, daut wie kjennen tru bliewen (läs Johanes 15:20; 16:33).

16. Waut vonne Aunwiesungen mott wie jehorchen, wan doa Vefoljunk es?

¹⁶ Wan ons Woakj veboden woat ooda en väl Stekjen nich frie es, dan kjrie wie veleicht Aunwiesungen von daut Betel un de Eltestasch. Dise Aunwiesungen sent toom ons beschitzen un secha moaken, daut wie wieda aules em jeisteljen kjrieen. Dee halpen ons uk, soo goot aus mäajlich wieda to prädjen. Doo dien bastet, dise Aunwiesungen notokomen, mau rajcht wan du uk nich krakjt vestonen kaust, wuarom daut dee jeft (Jak. 3:17). Saj uk kjeenmol waut von diene Breeda un Sestren ooda von de Vesaumlungssachen wieda to soone, waut nich daut Rajcht haben, daut to weeten (Liera 3:7).

17. To waut sent wie ons eenich soo aus de Apostel en daut ieeschte Joahundat?

¹⁷ Eent von de jratste Uasoak wuarom de Soton Kjrich fieet jäajen Gott sien Volkj, es, wäajen dee “de Oppgow haben, von Jesus Zeichnis to jäwen” (Opb. 12:17, NW). Lot dän Soton un siene Welt die nich enenjsten. Prädjen un aundre lieren, brinjt ons Fräd un Freid, uk wan doa Vefoljunk es. En daut ieeschte Joahundat, aus de judische Aunjestalde de Apostel daut vebooden to prädjen, worden dee true Mana sikj eenich, Gott to jehorchen. Dee deeden wiedaprädjen, un dee Oabeit muak an schaftich (Apj. 5:27-29, 41-42). Secha mott wie biem prädjen oppaussen, wan ons Woakj veboden es (Mat. 10:16). Oba wan wie ons bastet doonen, dan woa wie dän Fräd haben, waut doavon kjemt, Jehova to jefaulen, un de Norecht, waut Läwes rat, aundre mettodeelen.

“DE FRÄDENS GOTT [WOAT] MET JUNT SENNEN”

18. Bie wäm kjenn wie werkjeljen Fräd finjen?

¹⁸ Velot die doaropp, daut wie mau rajcht en de schwanste Tieden kjennen Fräd haben. En soone Tieden mott eena em Denkj hoolen, daut dee Fräd, waut ons fält, Gott sien Fräd es. Dän kaun bloos Jehova ons jäwen. Velot die opp am, wan doa eene Krankheit utbrakjt, een Owwada ooda eene Vefoljunk kjemt. Bliew met de Organisazion vebungen. Kjikj verwoats no daut wundascheene, waut opp ons tookjemt. Wan wie daut doonen, “woat de Frädens Gott met … [ons] sennen” (Filip. 4:9). En dän näakjsten Artikjel woa wie seenen, woo wie de Gloowesbreeda, waut Vefoljunk haben, halpen kjennen, Gott sienen Fräd to haben.