1. Ieedbäben

“Doa woat opp veschiedne Städen grootet Ieedbäben . . . sennen” (LUKAS 21:11, PB).

● Winnie, waut noch mau 16 Moonat wia, wort ut een gaunz vekjeiweldet Hus rutjeholt. Waut Norechta vom Tellewizhen haben dee jehieet hielen. Dee äwaläwd daut Ieedbäben, oba äare Elren deeden nich.

WAUT TO BEOOBACHTEN ES: Aus en Haiti em Jaunewoa 2010 een 7,0 stoakjet Ieedbäben wia, storwen äwa 300 000 Menschen. 1,3 Millionen Menschen veluaren äa Tus. Daut Ieedbäben en Haiti wia een besonda grootet, oba lang nich daut eensje. Tweschen Aprell 2009 un Aprell 2010 jeef daut oppe gaunze Welt oppet weinichste 18 Mol een grootet Ieedbäben.

WAUT EENJE SAJEN: Vondoag dän Dach jeft daut nich mea Ieedbäbens aus ea. Derch daut niemootsche Jereetschoft woa wie daut bloos dolla en aus de Menschen ieeschtemma.

ES DAUT SOO, AUS DEE SAJEN? Rajcht jesajcht sajcht de Schreft nich, daut et enne latste Doag mea Ieedbäben jäwen wudd; dee sajcht, daut et opp veschiedne Städen groote Ieedbäben jäwen wudd. Dise Ieedbäben sent een Tieekjen doafäa, daut wie nu en eene besondre Tiet läwen (Markus 13:8; Lukas 21:11).

WAUT JLEEFST DU? Jeft daut vondoag dän Dach groote Ieedbäben, soo aus de Schreft daut verutsäd?

3. Krankheiten

“De Menschen woaren . . . aun schrakjelje Krankheiten lieden” (LUKAS 21:11, Contemporary English Version).

● Bonzali schauft aus een Dokta fa de Rejierunk en een afrikaunischet Launt, wua Birjakjrich es. Hee prooft, soo goot aus hee kaun, de Mienenoabeida en siene Staut to halpen, waut von dän Marburg-Virus krank sent.a Hee kaun nich väl doajäajen doonen un frajcht de Beaumte von eene jratre Staut no Help, oba vejäfs. Vea Moonat lota schekjen dee doch noch Help, oba Bonzali es aul jestorwen. Hee haud sikj dän Marburg-Virus oppjeschlapt von de Mana, waut hee halpen wull.

WAUT TO BEOOBACHTEN ES: Lungenkrankheiten (soo aus Lungenenzindunk), Derchfaul, AIDS (SIDA), Tuberkulosis un Malaria sent von de Krankheiten, wua de mieeschte Menschen aun stoawen. En eent von de latste Joaren sent rom 10,7 Millionen Menschen aun irjenteene von dise fief Krankheiten jestorwen. Daut es ojjefäa aule dree Sekund een Mensch.

WAUT EENJE SAJEN: Daut jeft emma mea Menschen oppe Welt, un soo jeft daut uk mea Kranke. Je mea Menschen daut jeft, je mea kjennen sikj waut oppschlapen.

ES DAUT SOO, AUS DEE SAJEN? De Menschen sent werkjlich sea väl mea jeworden. Oba to selwje Tiet sent uk de Doktarieen väl bäta jeworden. Wudd daut dan nich sellen mäajlich sennen, de Krankheiten unja Kontroll to brinjen? Un doch woat daut enne Städ bäta emma schlemma.

WAUT JLEEFST DU? Lieden de Menschen aun schrakjelje Krankheiten, soo aus de Schreft daut verutsäd?