„Daut jie nich en Vesieekjunk faulen“
„Woakt un bät, daut jie nich en Vesieekjunk faulen!“ (MATÄUS 26:41).
NOCH kjeenmol ea wia Jesus Christus, Gott sienen Sän, waut soo schwoa jewast. Siene Tiet aus Mensch wia meist aufjerant. Jesus wist, daut hee boolt wudd faustjenomen, toom Doot veuadeelt un aun eenen Pol jenoagelt woaren. Hee wist, daut sikj siene Entscheidungen un sien gaunzet Vehoolen opp dän Nomen von sienen Voda utwirkjen wudden. Jesus wist uk, daut daut von am aufhonk, auf de Menschheit eemol fa emma läwen kunn. Woo jinkj Jesus met dise schwoare Laust om?
2 Jesus jinkj met siene Jinja toop no dän Goaden Getsemane. En disen Goaden wia hee emma jieren jewast. Dan jinkj Jesus een kortet Enjskje auf von siene Jinja. Aus hee ieescht auleen wia, bäd hee to sienen himlischen Voda om Krauft un säd am en een iernstet Jebäd aules, waut am aum Hoaten lieech. Un daut deed hee nich mau bloos eemol, oba soogoa dreemol. Uk wan Jesus volkomen wia, docht hee doawäajen nich, daut hee dise schwoare Laust auleen droagen kunn (Matäus 26:36-44).
3 En de vondoagsche Tiet hab wie daut uk foaken schwoa. Aum Aunfank von dit Heft hab wie kloaren Bewies doafäa jeseenen, daut wie nu en de latste Doag von dise beese Welt läwen. De Vesieekjungen un de Druck, waut Soton siene Welt ons veuasoakt, nämen emma mea too. Onse Entscheidungen un ons Vehoolen aus Gott siene Deena wirkjen sikj opp Gott sienen Nomen ut uk opp onse Utsecht, eemol en Gott siene niee Welt to läwen. Wie leewen Jehova un wellen ‘bat aum Enj uthoolen’ — entwäda bat aum Enj von ons Läwen ooda bat aum Enj von dise Welt, doano, waut daut ieeschte kjemt (Matäus 24:13). Oba, woo kjenn wie uk fa wieda waka bliewen un ons doaräwa em kloaren sennen, daut de Tiet drenjt?
4 Jesus wist, daut uk siene Jinja — to dee Tiet uk en de vondoagsche Tiet — daut wudden schwoa haben. Doahäa rod hee an sea too: „Woakt un bät, daut jie nich en Vesieekjunk faulen!“ (Matäus 26:41). Waut bedieden dise Wieed fa ons vondoag? Waut vonne Vesieekjungen bejäajenst du en dien Läwen? Un woo kaust du ‘woaken’ ooda waka bliewen?
Waut fa Vesieekjungen?
5 De Diewel vesieekjt ons jieda Dach en siene Schlenj nentolocken (2. Timotäus 2:26). De Bibel woarnt ons, daut hee besonda Jehova siene Aunbäda opp Ziel haft (1. Petrus 5:8; Openboarunk 12:12, 17). Waut haft Soton em Senn? Hee well ons nich onbedinjt daut Läwen nämen, wiels wan wie Gott bat aum Doot tru bliewen, haft hee kjeenen Jewenn. Schlieslich weet je Soton, daut Jehova disen Schoden to siene Tiet wada gootmoaken kaun, derch daut hee ons vom Doot oppwakjt (Lukas 20:37-38).
6 Soton well waut vedoawen, waut väl wieetvolla es aus ons vondoagschet Läwen — daut es onse Truheit to Gott. Hee well met aule Jewault bewiesen, daut hee ons von Jehova aufbrinjen kaun. Wan Soton ons doahäa soo wiet brinjen kaun, daut wie Jehova ontru woaren — derch daut wie opphieren, de goode Bootschoft to prädjen, ooda nich mea soo läwen, aus sikj daut fa Christen jehieet —, dan haft hee werkjlich jewonnen! (Efeesa 6:11-13). Doawäajen brinjt „de Vesieekja“ ons en Vesieekjunk (Matäus 4:3).
7 Soton benuzt eene lange Rieej ‘lestje Aunschläaj’ (Efeesa 6:11, Friesen). Hee vesieekjt ons veleicht derch Angst, Twiewel ooda een äwadräwnet Velangen no irdische Dinja ooda Vejnieejen. Oba besonda Jlekj haft hee, wan wie mootloos sent. Hinjalestich nuzt hee daut fuaz ut, wiels hee weet, daut wie dan schwak un leicht auntojriepen sent (Spricha 24:10, Neue-Welt-Übersetzung). Wan wie doahäa ennalich „doljedrekjt“ sent, vesieekjt hee besonda, ons soo wiet to brinjen, daut wie oppjäwen (Psalm 38:9).
8 Daut späat sikj soo, aus jeft daut emma mea Uasoaken fa Mootloosichkjeit, je noda daut Enj kjemt. Un kjeena es doavon frie. (See dän Kausten met de Äwaschreft „Waut eenem mootloos moaken kaun“.) Waut uk emma de Uasoak es, eent es kloa: Mootloosichkjeit kaun ons de Krauft wajchnämen. Wan eena em Kjarpa, em Vestaunt ooda en siene Jefeelen meed es, kaun eenem daut schwoa faulen, ‘de Tiet uttonutzen’ fa daut, waut von Christen velangt woat, soo aus de Bibel studieren, no de christelje Toopkomes gonen ooda prädjen gonen (Efeesa 5:15-16). Denkj doaraun: de Vesieekja well, daut du oppjefst. Oba daut es nu nich de Tiet, notoloten ooda to vejäten, woo drinjent dise Tiet es! (Lukas 21:34-36). Woo kaust du de Vesieekjungen wadastonen un waka bliewen? Well wie emol veatlei betrachten, waut die halpen kaun.
Doo aunhoolent bäden
9 Velot die derch daut Jebäd opp Jehova. Weetst du noch, waut Jesus em Goaden Getsemane deed, aus hee daut ennalich sea schwoa haud? Hee bäd to Jehova soo iernstlich om Help, daut „sien Schweet . . . soo aus groote Blootdreppen [wort], dee opp de Ieed follen“ (Lukas 22:44). Äwalaj emol: Jesus kjand Soton gaunz krakjt. Von utem Himmel haud hee aules beoobacht, waut Soton brukt, om Gott siene Deena to vesieekjen. Jesus docht doawäajen oba nich, daut hee sikj met de Vesieekjungen von Soton leicht weeten wudd. Wan soogoa Gott sien volkomna Sän daut fa needich aunsach, Gott om Help un Krauft to bedden, woo väl mea dan noch emol wie! (1. Petrus 2:21).
10 Denkj uk aun daut, waut Jesus säd, no däm hee siene Jinja toojerot haud, aunhoolent to bäden. Hee säd: „De Jeist es wellich, oba daut Fleesch es schwak“ (Matäus 26:41). Von wäm sien „Fleesch“ räd Jesus hia? Secha nich von sient, dan aus volkomna Mensch haud hee kjeene Schwakheiten (1. Petrus 2:22). Oba met siene Jinja wia daut aundasch. See wieren onvolkomen un hauden sindje Neijungen un wudden doahäa besonda Help brucken, om Vesieekjungen wadastonen to kjennen (Reema 7:21-24). Doawäajen rod Jesus an soo sea too, en Vesieekjungen om Help to bäden, un daut sell wie uk doonen (Matäus 6:13). Jehova beauntwuat soone Jebäda (Psalm 65:3). Woo deit hee daut? Weinichstens opp twee veschiedne Oaten.
11 Ieeschtens halpt Gott ons, Vesieekjungen to erkjanen. Soton siene Vesieekjungen sent soo aus Schlenjen, waut bie diestre Städen opp eenen Wajch oppjestalt sent. Wäa dee nich sitt, kaun doa leicht nenjeroden. Oba derch de Bibel un derch Bieekja, waut sikj opp de Bibel stetten, moakt Jehova dän Soton siene Schlenjen openboa un halpt ons doaderch, Vesieekjungen to wadastonen. Äwa de Joaren sent wie derch Schreften un opp Kongressen emma wada fa veschiedne Vesieekjungen jewoarnt worden, soo aus Menschenforcht, jeschlajchtliche Onmoral, no irdischet hinjaraun sennen un soo wieda (Spricha 29:25; 1. Korinta 10:8-11; 1. Timotäus 6:9-10). Best du Jehova nich dankboa, daut hee ons fa Soton siene Schlenjen woarnt? (2. Korinta 2:11). Derch soone Woarnungen beauntwuat Jehova diene Jebäda om Help, daut du Vesieekjungen wadastonen kaust.
12 Tweedens jeft Jehova ons de Krauft, en eene Vesieekjunk nich opptojäwen. Sien Wuat sajcht: „Gott . . . woat daut nich tooloten, daut jie schwanda vesocht woaren, aus jie Krauft haben. Hee woat fa eenen Wajch sorjen, ut de Vesieekjunk rut to komen“ (1. Korinta 10:13). Wan wie ons emma faust opp Gott veloten, woat hee niemols tooloten, daut eene Vesieekjunk soo äwahandich woat, daut wie nich mea de Krauft haben, dee to wadastonen. Woo sorcht hee „fa eenen Wajch . . ., ut de Vesieekjunk rut to komen“? Hee ‘jeft dee dän Heiljen Jeist, dee am doano froagen’ (Lukas 11:13). De heilja Jeist kaun ons aun biblische Gruntsauzen denkjen halpen. Soo kjenn wie goode Entscheidungen trafen un ons noch dolla entschieden sennen, daut rajchte to doonen (Johanes 14:26; Jakobus 1:5-6). Met de Help von dän heiljen Jeist kjenn wie ons de Ieejenschoften aunieejnen, waut needich sent, om schlajchte Neijungen to äwawinden (Galata 5:22-23). Gott sien Jeist kaun uk onse Gloowesbreeda doatoo driewen, ‘fa ons een Troost to sennen’ (Kolossa 4:11). Best du nich dankboa, daut Jehova diene Jebäda om Help opp soone leeftolje Oat beauntwuat?
Sie veninftich un velot die nich opp een sorjlooset Läwen
13 Om waka to bliewen, mott wie veninftich sennen un ons nich opp een sorjlooset Läwen veloten. Jieda eena von ons woat han un wada emol meed, wiels wie em Läwen foaken soo unja Druck sent. Oba wie motten em Denkj hoolen, daut Gott kjeenmol vesproaken haft, daut wie en dise Tiet een sorjlooset Läwen haben wudden. Soogoa en biblische Tieden hauden Gott siene Deena unja Vefoljunk, Oamoot, Mootloosichkjeit ooda Krankheit to lieden (Aposteljeschicht 8:1; 2. Korinta 8:1-2; 1. Tessalonicha 5:14; 1. Timotäus 5:23).
14 Uk en de vondoagsche Tiet hab wie onse Schwierichkjeiten. Veleicht jeit ons daut knaup ooda wie beläwen Vefoljunk, haben met Mootloosichkjeit to kjamfen, sent krank ooda motten wäajens aundre Sachen lieden. Wan Jehova ons derch een Wunda von aul dise Schwierichkjeiten bewoaren deed, wudd je Soton eene Uasoak haben, Jehova spatrich waut väatoschmieten (Spricha 27:11). Doawäajen lat Jehova derchut too, daut siene Deena vesocht un aufjeprooft un eenjemol soogoa von äare Jäajna omjebrocht woaren (Johanes 16:2).
15 Waut haft Jehova dan werkjlich vesproaken? Soo aus wie aul jeseenen haben, haft hee vesproaken, ons de Krauft to jäwen, jieda Vesieekjunk to wadastonen — soo lang aus wie faust opp am vetruen (Spricha 3:5-6). Derch sien Wuat, sienen Jeist un siene Organisazion beschizt hee ons em jeistlichen, soo daut wie ons Veheltnis met am bewoaren kjennen. Wan wie een goodet Veheltnis met Gott haben, hab wie jewonnen, uk wan wie stoawen. Nuscht — uk nich emol de Doot — kaun Gott doaraun hinjren, siene true Deena to beloonen (Hebräa 11:6). Un en de niee Welt woat Jehova deejanje, waut am leewen, aul de wundascheene Säajnungen tookomen loten, waut hee sest noch vesproaken haft (Psalm 145:16).
Denkj aun de Froagen, dee Soton oppbrocht
16 Om bat aum Enj uttohoolen, mott wie em Denkj hoolen, daut Jehova daut beese toolat, wiels daut om wichtje Froagen jeit. Wan wie ons met onse Schwierichkjeiten nich mea Rot weeten un ons daut ploacht opptojäwen, sell wie em Denkj hoolen, daut Soton Jehova sien Rajcht toom harschen en Froag jestalt haft. Hee haft uk en Froag jestalt, auf Gott siene Aunbäda am werkjlich leewden un tru bleewen (Hiob 1:8-11; 2:3-4). Bie dise Froagen un woo Jehova dee oppem kloaren brinjt, jeit daut om väl mea aus bloos om ons ieejnet Läwen. Wuarom kaun eena daut sajen?
17 Doaderch, daut Gott fa eene jewesse Tiet de Schwierichkjeiten toojeloten haft, haben väle Menschen kunt de Woarheit aunnämen. Äwalaj emol: Jesus haft väl jeläden, om daut wie eemol eewjet Läwen haben kjennen (Johanes 3:16). Sent wie nich dankboa doafäa? Oba, sent wie selfst uk reed, de Schwierichkjeiten een beskje lenja uttohoolen, om daut uk noch aundre de Jeläajenheit kjrieen, eemol eewich to läwen? Om daut wie bat aum Enj uthoolen kjennen, mott wie enseenen, daut Jehova väl weisa es aus wie (Jesaja 55:9). Hee weet, woont de rajchte Tiet es, om met daut beese een Enj to moaken. Daut woat krakjt verem paus komen, om de Froagen, dee Soton oppbrocht, fa emma oppem kloaren to brinjen un fa onse eewje Freid to sorjen. Woo wudd daut uk kjennen aundasch sennen, dan bie Gott jeft daut kjeene Ojjerajchtichkjeit! (Reema 9:14-24).
‘Noda die no Gott’
18 Om daut ons uk fa wieda kloa es, woo sea de Tiet drenjt, mott wie ons enj aun Jehova hoolen. Vejat kjeenmol, daut Soton met aule Jewault ons goodet Veheltnis met Gott vedoawen well. Soton well ons enbillen, daut daut Enj kjeenmol komen woat un daut daut kjeenen Senn haft, de goode Bootschoft to prädjen ooda no de Bibel to läwen. Oba hee es „een Lieeja . . . un de Voda äwa aule Läajes“ (Johanes 8:44). Wie motten ons faust entschieden sennen, ons ‘jäajen dän beesen Fient to stalen’. Näm wie ons Veheltnis met Jehova niemols fa selfstvestentlich. De Bibel rot ons too: „Nodat junt no Gott, dan woat hee uk dicht no junt komen“ (Jakobus 4:7-8). Woo kjenn wie Jehova noda komen?
19 Wie motten von Hoaten to Jehova bäden. Wan de Druck em Läwen soo groot woat, daut du die nich mea Rot weetst, dan schedd die gaunz ver Jehova ut. Je jeneiwa du am aule Eenselheiten vetalst, om soo väl leichta woat die daut faulen, siene Auntwuaten to erkjanen. De Auntwuat woat veleicht nich emma soo sennen, aus du die daut jedocht hast, oba wan du am werkjlich ieren un tru bliewen west, woat hee die de needje Help jäwen, om uttohoolen (1. Johanes 5:14). Wan du sitst, woo Jehova die em Läwen biesteit, woascht du am emma noda komen. Daut es uk wichtich, sikj derch daut Bibelläsen met Jehova siene Ieejenschoften un Haundlungen to beschaftjen un sikj deep doaräwa nentoloten. Daut woat die halpen, am bäta kjanen to lieren; daut woat die em Hoaten bewäajen un du woascht Jehova noch mea leewen (Psalm 19:15). Dise Leew to am woat die daut dolste halpen, Vesieekjungen to wadastonen un waka to bliewen (1. Johanes 5:3).
20 Om daut wie ons enj aun Jehova hoolen kjennen, mott wie ons uk enj aun onse Gloowesbreeda hoolen. Doavon haundelt sikj de latsta Artikjel en dit Heft.
FROAGEN TOOM STUDIEREN
• Waut deed Jesus, aus hee daut jrod ver sienen Doot sea schwoa haud, un to waut rod hee siene Jinja sea too? (Aufschn. 1-4).
• Wuarom haft Soton besonda Jehova siene Aunbäda opp Ziel, un woo prooft hee ons to vesieekjen? (Aufschn. 5-8).
• Om Vesieekjungen to wadastonen, wuarom mott wie aunhoolent bäden (Aufschn. 9-12), veninftich sennen (Aufschn. 13-15), aun de Froagen denkjen, dee Soton oppbrocht (Aufschn. 16-17), un Jehova emma noda komen? (Aufschn. 18-20).
[Kausten oppe Sied 25]
Waut eenem mootloos moaken kaun
Krankheit ooda Ella. Eene lang aunhoolende Krankheit ooda de Schwierichkjeiten, waut met daut Ella komen, kjennen eenem mootloos moaken, wiels eena em Deenst fa Gott nich mea soo väl doonen kaun aus ea (Hebräa 6:10).
Sikj enteischt feelen. Eena kaun mootloos woaren, wan eena sikj bemieecht, Gott sien Wuat to prädjen, oba mau weinich Menschen een intressaunt doafäa haben (Spricha 13:12).
Sikj wieetloos feelen. Wan een Mensch joarenlank schlajcht behaundelt worden es, kaun dee daut Jefeel haben, daut am kjeena jleicht, uk nich emol Jehova (1. Johanes 3:19-20).
Velazte Jefeelen. Wäa von eenen Gloowesbrooda sea beleidicht worden es, kaun sikj soo doljeschloagen feelen, daut hee kjeene Lost mea haft, no de Toopkomes ooda en dän Prädichtdeenst to gonen (Lukas 17:1).
Vefoljunk. Aundre, waut nich dienen Gloowen haben, sent veleicht jäajen die, vefoljen die ooda vespotten die (2. Timotäus 3:12; 2. Petrus 3:3-4).
[Bilt oppe Sied 26]
Jesus rod sea too, aunhoolent om Help to bäden, om Vesieekjungen wadastonen to kjennen