Aungowen fa daut Schoolheft fa Läwen un Deenst

Aungowen fa daut Schoolheft fa Läwen un Deenst

7.-13. MEI

SCHAZA UT GOTT SIEN WUAT | MARKUS 7-8

“Nemm dienen Liedenspol opp die un hia nich opp mie notofoljen”

Erkjläarunk toom studieren en nwtsty von Mar 8:34

mott von sikj selfst vejäten: Ooda “mott aul sien ieejnet Rajcht oppjäwen”. Dit wiest, daut eena wellens es, gaunz von sikj selfst to vejäten, ooda daut eena sikj gaunz Gott äwajeft, soo daut eena dan am jehieet. De Wieed opp Griechisch kaun eena uk äwasaten met “mott nä to sikj sajen”. Daut paust sea fein, wiels daut kaun bedieden, daut eena nä sajcht to daut, waut eena sikj wenscht, waut eena jleicht ooda waut eenem paust (2Ko 5:14-15). Dautselwje griechische Tietwuat wort uk von Markus jebrukt, aus hee doavon schreef, daut Petrus daut veluach, daut dee Jesus kjand (Mar 14:30-31, 72).

w92-X 1. 8. 17 V. 14

Woo ranst du en dän Läwesrees?

¹⁴ Jesus säd to siene Jinja un to de aundre, waut doa vesaumelt wieren: “Wäa met mie metkomen well, mott . . . von sikj selfst vejäten [ooda “mott ‘nä’ to sikj selfst sajen”, Charles B. Williams] un sienen Liedenspol opp sikj nämen un nich opphieren, mie notofoljen” (Markus 8:34, NW). Wan wie dise Enlodunk aunnämen, Jesus notofoljen, dan es doa met en, daut wie “nich opphieren” doamet. Un daut doo wie nich, wiels wie doa waut fäa kjrieen, oba wiels wie derch eenen Fäla ooda derch eene schlajchte Entscheidunk aules vedoawen kjennen, waut wie bat dan jedonen haben, un daut kaun soogoa ons eewjet Läwen opp Spell saten. Em jeisteljen waussen jeit jeweenlich langsom, oba woo haustich kaun daut tonuscht woaren, wan wie nich dän Tiet äwa oppaussen!

w08-X 15. 10. 25-26 V. 3-4

Waut woascht du oppjäwen, om läwen to bliewen?

³ Krakjt dan stald Jesus een poa Froagen, waut ons toom nodenkjen brinjen: “Waut wudd een Mensch daut halpen, wan hee de gaunze Welt jewennen wudd, wan am daut siene Seel kosten wudd? Ooda waut kaun een Mensch jäwen, siene Seel trigjtokjrieen?” (Markus 8:36-37). De Auntwuat to de ieeschte Froag es menschlich jeseenen gaunz kloa. Daut halpt nuscht, de gaunze Welt to jewennen, wan eena siene Seel, ooda sien Läwen, velist. Daut, waut eena haft, kaun eena bloos dan nutzen, wan eena läwendich es. Jesus siene tweede Froag wia: “Waut kaun een Mensch jäwen, siene Seel trigjtokjrieen?” Dit haft siene Toohiera veleicht aun daut denkjen jeholpen, waut de Soton to Hiob siene Tiet oppbrocht: “Wäa mau met heele Hut doavon kjemt! Waut jeft de Mensch nich fa siene Jesuntheit?” (Hiob 2:4). Fa soone Menschen, waut nich Jehova deenen, hieren sikj dän Soton siene Wieed veleicht rajcht. Väle wudden aules doonen un oppjäwen, wua see aun jleewen, om läwen to bliewen. Christen sent oba aundasch jesonnen.

⁴ Wie weeten, daut Jesus nich no de Ieed kjeem, om ons Jesuntheit, Rikjtum un een langet Läwen en dise Welt to jäwen. Hee kjeem, om ons de Mäajlichkjeit optomoaken, daut wie eewjet Läwen haben kjennen en eene niee Welt, un dise Hopninj es ons sea väl wieet (Johanes 3:16). Doawäajen es daut fa eenen Christ gaunz dietlich, waut Jesus met siene ieeschte Froag meend: “Waut wudd een Mensch daut halpen, wan hee de gaunze Welt jewennen wudd, wan hee dan oba siene Hopninj fa daut eewje Läwen velieren wudd?” De Auntwuat es: Rajcht nuscht (1. Johanes 2:15-17). Om Jesus siene tweede Froag to beauntwuaten, wudd wie ons kjennen froagen: “Woo väl sie ekj nu reed opptojäwen, om miene Hopninj fa daut Läwen en de niee Welt secha to moaken?” Daut es aun daut to seenen, woo wie läwen un woo stoakj dee Hopninj en ons Hoat es (see uk Johanes 12:25).

jy-X 143 V. 4

Wäa es de Menschensän?

Jo, wan wie daut wellen wieet sennen, Jesus siene Nofolja to sennen, dan mott wie Moot haben un reed sennen, Opfa to brinjen. Jesus säd: “Wäaemma sikj met mie un miene Wieed mank dise sintelje, ehebräakjarische Jennerazion schämen woat, met däm woat de Menschensän sikj uk schämen, wan hee en sienem Voda siene Harlichkjeit met siene heilje Enjel komen woat” (Markus 8:38). Jo, wan Jesus ieescht wadakjemt, dan woat hee eenen “jiedrem Loon jäwen, doano waut hee jedonen haft” (Matäus 16:27).

No jeistelje Schaza sieekjen

w16.08-X 30 V. 1-4

Waut Läsa weeten wellen

Wuarom wia daut Henj wauschen fa de Farisäa soo iernst?

▪ Jesus un siene Jinja worden foaken von äare Fiend beschuljd un dit wia mau eent von aul daut. Daut Jesaz Moses haud miere Jebooten äwa Renlichkjeits-Sachen, soo aus äwa Kjarpa-Flissichkjeit, Lepra un uk woo se sullen met doodje Menschen un Tieren omgonen. Daut jeef uk Aunwiesungen doaräwa, woo eena wada rein woaren kunn. Doatoo jehieeden Opfa, Reinjunk un bespretzen (3. Mo., Kap. 11-15; 4. Mo., Kap. 19).

De judische Rabis hauden fa jieda eenselnet Jesaz eene Erkjläarunk. Een Buak sajcht, daut dee fa jieda Sort Orreinheit waut nojeforscht hauden, wua un woo eena sikj dee wudd oppschlapen kjennen un uk woo sea daut äwaschlapen kunn, waut fa Jereetschoft un Dinja orrein woaren kunnen un woone nich un tolatst noch, waut eena aules doonen must, om rein to woaren.

Jesus siene Jäajna fruagen am: “Wuarom hoolen diene Jinja sikj nich aun onse Eltestasch äare Väaschreften, un äten daut Broot onen sikj de Henj to wauschen?” (Markus 7:5). Dee Gloowesleidasch wieren nich werkjlich besorcht äwa Jesuntheit. De Rabis velangden aus eene Väaschreft, daut se an Wota oppe Henj jeeten sullen. Daut Buak, wua wie ea aul von räden, sajcht noch wieda: “Doa woat äwa jesträden, waut vonne Dinja doa motten jebrukt woaren, waut fa Wota paussent es, wäa daut jeeten saul un woo wiet de Henj met Wota begoten motten.”

Waut Jesus äwa aul dise Menschenjebooten docht, wia gaunz kloa. Hee säd to de judische Gloowesleidasch en siene Tiet: “Jie Heichla! De Profeet Jesaja haft von junt gaunz rajcht verut jesajcht, soo aus jeschräwen steit: ‘Dit Volkj ieet mie met de Leppen, sajcht Gott; oba em Hoat sent see wiet auf von mie. See deenen mie vejäfs, wiels see lieren sest nuscht aus Menschen Väaschreften.’ Jie haben Gott siene Jebooten veloten, om Väaschreften von Menschen to hoolen” (Markus 7:6-8).

w00-X 15. 2. 17-18 V. 9-11

Hast du “Christus . . . siene Jesennunk”?

⁹ De Maun wia doof un kunn afens räden. Jesus mott daut jefeelt haben, daut dis Maun butajeweenlich jerettelt wia ooda sikj schämen deed. Dan deed Jesus waut, waut hee jeweenlich nich deed. Hee kroagd sikj dän Maun oppoat von aul de Menschen no eene eensome Städ. Dan wees Jesus am derch een Tieekjen, waut hee doonen wudd. Hee “läd am siene Finjasch en de Uaren un spieech un tukst am aun de Tung” (Markus 7:33). Dan kjikjt Jesus nom Himmel un aus hee bäd, hold hee deep Odem. Met dit wull hee dän Maun sajen: “Waut ekj die doonen woa, es derch Gott siene Krauft.” Tolatst säd Jesus: “Moak die op!” (Markus 7:34). Plazlich wia dän Maun sien Jehia trigj un hee kunn uk fein räden.

¹⁰ Woo sea Jesus doch met aundre metfeeld! Hee wia sea doarom bekjemmat, woo de Menschen sikj ennalich feelden, un daut brocht am bat doa, daut hee waut fa dee deed, daut dee daut bäta jinkj. Aus Christen well wie doaraun schaufen, daut wie en disen Stekj uk soo jesonnen sent, aus Jesus wia. De Bibel rot ons too: “Jie motten junt to goodalatst em Jeist eenich sennen, metlieden haben, breedalich goot sennen un von Hoaten deemootich sennen” (1. Petrus 3:8). Daut meent fa ons, daut wie opp soone Wajch räden un haundlen, daut et to seenen es, daut wie doa waut om romjäwen, woo aundre sikj feelen.

¹¹En de Vesaumlunk kjenn wie wiesen, daut wie waut om dee äare Jefeelen romjäwen, wan wie dee soo behaundlen, daut et to seenen es, daut dee waut wieet sent, un uk soo, aus wie wudden wellen behaundelt woaren (Matäus 7:12). Doa es met en, daut wie oppaussen, waut wie sajen un uk woo wie daut sajen (Kolossa 4:6). Denkjt doaraun, daut “onväasechtje Wieed spekjen aus een Schwieet” (Spricha 12:18). Un woo es daut en de Famielje? Een Maun un eene Fru, waut sikj werkjlich leewen, paussen opp no dän aundren siene Jefeelen (Efeesa 5:33). Dee brucken nich hoade Wieed, doonen nich onneedich dän aundren siene Fäla väaschmieten ooda äwa dän spotten. Aul daut kaun de Jefeelen velazen, waut nich soo leicht wada heelen. Kjinja haben uk Jefeelen, un Elren, waut äare Kjinja leewen, hoolen daut em Denkj. Wan dee motten trajchtjewäsen, dan doonen see daut opp soone Wajch, daut et to seenen es, daut see waut om äare Kjinja romjäwen, soo daut dee sikj nich wieetloos feelen un sikj onneedich schämen brucken (Kolossa 3:21). Wan wie daut doonen, dan wies wie, daut wie aundre ieren un daut wie Christus siene Jesennunk haben.

14.-20. MEI

SCHAZA UT GOTT SIEN WUAT | MARKUS 9-10

“Eene Vision, waut dän Gloowen stoakjt”

w05-X 15. 1. 12 V. 9-10

En de Profezeiungen jeit daut om Christus

⁹ Äwa een Joa wia vegonen von dan, aus Jesus bewees, daut hee de Messias wia. Daut Passafast von daut Joa 32 wia jekomen uk wada vebie. Väle, waut aun am jleewden, hauden oppjehieet, am notofoljen, veleicht wäajen Vefoljunk, wiels see no Rikjtum hinjaraun wieren ooda wäajen de Sorjen em Läwen. Aundre wieren veleicht enteischt, wäajen Jesus de Menschen aufwees, waut am wullen toom Kjennich moaken. Aus de judische Gloowesleida velangden, daut hee an een Tieekjen vom Himmel jäwen sull, waut am selfst veharlichen wudd, deed hee daut nich (Matäus 12:38-39). Eenje kunnen daut woll nich bejriepen. Dan funk Jesus noch aun, siene Jinja waut to openboaren, waut fa dee schwoa to vestonen wia. Hee säd, “daut hee no Jerusalem gonen must un derch de Eltestasch un Huagepriestasch un Schreftjelieede väl wudd lieden motten un dootjemoakt woaren” (Matäus 16:21-23).

¹⁰ Om näajen ooda tieen Moonat wieda wudd daut fa Jesus Tiet sennen, “dise Welt to veloten un trigj nom Voda to gonen” (Johanes 13:1). Jesus wia sea besorcht äwa siene true Jinja un vespruak eenje von dee krakjt daut, waut hee de onjleewende Juden nich jejäft haud: een Tieekjen vom Himmel. Hee säd: “Ekj saj junt de Woarheit: Hia stonen soone, dee dän Doot nich schmakjen woaren, bat see dän Menschensän woaren en sien Kjennichrikj komen seenen” (Matäus 16:28). Secha meend Jesus nich, daut eenje von siene Jinja läwen bliewen wudden, bat daut messianische Kjennichrikj em Joa 1914 wudd oppjestalt woaren. Jesus haud em Senn, dree von siene notste Jinja een bät seenen to loten, woo siene harliche Kjennichsmacht wudd sennen. Dise Vision woat de Vewaundlunk jenant.

w05-X 15. 1. 12 V. 11

En de Profezeiungen jeit daut om Christus

¹¹ Sas Doag wieda neem Jesus Petrus, Jakobus un Johanes opp eenen huagen Boajch nopp – woomäajlich wua opp dän Hermon-Boajch. Doa wort Jesus “vewaundelt, un sien Jesecht jlenzt aus de Sonnenschien, un siene Kjleeda worden witt aus daut Licht”. Met eenst wia de Profeet Moses un de Profeet Elia uk doa un räden met Jesus. Daut kaun aul sennen diesta jewast un doawäajen mott daut sennen noch oppfaulenda jewast. Petrus kjeem daut soo werkjlich väa, daut dee mau rajcht wull dree Zelten oppstalen – eent fa Jesus, eent fa Moses un eent fa Elia. Aus Petrus noch räd, kjeem eene Wolkj äwa dee un von doa ut de Wolkj säd eene Stemm: “Dit es mien leewa Sän, met däm ekj sea tofräd sie. Horcht no am!” (Matäus 17:1-6).

Erkjläarunk toom studieren en nwtsty von Mar 9:7

eene Stemm: Dit wia daut tweede Mol von de dree Städen en de Evangelien, wua Jehova selfst met Menschen räd (Joh 12:28; see de Erkjläarungen von Mar 1:11, mwbr18.04).

No jeistelje Schaza sieekjen

w08-X 15. 2. 30 V. 8

Besondret von daut Buak Markus

10:6-9. Gott sien Wellen es, daut Ehepoatna toopbliewen. Doawäajen sullen Ehemana un Ehefrues sikj aunstrenjen, biblische Gruntsauzen notokomen, om aule Schwierichkjeiten to äwastonen, waut en daut Eheläwen oppkomen kunnen (Mat. 19:4-6).

Erkjläarunk toom studieren en nwtsty von Mar 10:17-18

Gooda Meista: De Maun brukt dise Wieed “gooda Meista” secha aus eenen Tietel, om sikj bie Jesus eenen gooden Nomen to moaken, ooda ut Jewanheit, wiels de Gloowesleidasch jeweenlich velangden, jeieet to woaren. Wan Jesus doa uk nuscht doajäajen haud, daut se am “Har” un “Liera” nanden (Joh 13:13), jeef hee sienen Voda aule Iea.

Kjeena es goot, buta Gott selfst: Jesus aunerkjand hia, daut Jehova de eensja wia, waut daut volle Rajcht haud to bestemmen, waut goot un waut schlajcht wia. Aus Adam un Eva jäajen Gott sien Jeboot jinjen un von dän Boom eeten, dee daut Vestentnis jäwen kunn, waut goot un schlajcht wia, proowden see sikj daut Rajcht tootoieejnen. Jesus wia aundasch aus dee; hee jeef deemootich sienen Voda daut Rajcht to entscheiden. Gott haft daut en sien Wuat gaunz dietlich jemoakt un jesajcht, waut goot es (Mar 10:19).

ONS CHRISTELJET LÄWEN

Erkjläarunk toom studieren en nwtsty von Mar 10:4, 11

Scheedungsbreef: Ooda “Enlotungsbreef”. Wan een Maun sikj scheeden loten wull, must dee eenen Breef moaken, waut jesazlich jeltich wia un must woomäajlich uk de Eltestasch oppsieekjen. Daut jeef dänjanjen Tiet, soone schwoare Entscheidunk to äwalajen. Daut Jesaz wia secha doatoo, daut et nich haustje Scheedungen jäwen sull un om de Frues eenen jewessen Schutz to jäwen (5Mo 24:1). Oba en Jesus siene Tiet hauden de Gloowesleidasch de Menschen daut leicht jemoakt, eenen Scheedungsbreef to kjrieen. De Farisäa un Jeschichtsschriewa Josephus, von daut ieeschte Joahundat, waut sikj haud scheeden loten, säd, daut Ehescheedungen toojeloten worden “ut irjent eenen Grunt (un daut jeft väl soont manke Mana)”.

von siene Fru scheeden: Ooda “siene Fru wajchschekjen”. Wan wie Jesus siene Wieed äwa de Scheedunk hia en Markus vestonen wellen, dan mott wie ieescht seenen, waut Mat 19:9 äwa de Scheedunk sajcht, wiels doa es de Wieed bennen “wan see am nich es ontru jewast”. Oba en Markus jeit et doarom, daut eena sikj ut sest irjenteenen Grunt scheeden lat, wan doa uk kjeena es ontru jewast (opp Griechisch: pornéia).

brakjt siene Ehe met ar: Jesus wia gaunz jäajen de Gloowesleidasch äare Lieren, daut de Mana sikj kunnen “wäajens irjent eene Uasoak” von äare Frues scheeden loten (Mat 19:3, 9). Daut eena kunn jäajen eenem siene Fru Ehebruch begonen, wia fa de mieeschte Juden framd. No de Gloowesleidasch äare Lieren no kunn een Maun kjeenmol jäajen siene Fru de Ehe bräakjen, bloos de Fru kunn ontru woaren. Un nu, daut Jesus dän Maun un de Fru jlikjtrock, wees hee, daut hee de Frues uk fa huach tald un daut dee waut wieet wieren.

21.-27. MEI

SCHAZA UT GOTT SIEN WUAT | MARKUS 11-12

“See haft mea nenjelajcht aus aul de aundre”

Erkjläarunk toom studieren en nwtsty von Mar 12:41-42

Gotteskausten: Judische oole Schreften sajen, daut dise Gowenkaustes soo jemoakt wieren, daut dee no Trompeeten ooda Hieena sagen, met bowen een kjlienet Loch toom nenlajen. Menschen läden jeweenlich veschiedne Gowen nenn. Daut griechische Wuat, waut hia jebrukt woat, kjemt uk en Joh 8:20 väa, wua daut äwasat es aus de “Kausten, dee doa fa de Jeltkollakjten wia”. Daut kaun sennen, daut dit de Kausten wia, waut opp dän Väahoff von de Frues wia (see daut 18. Poat von daut Heft Help fa daut Bibelstudium). No de judische Rabischreften no, wieren doa 13 Gowenkaustes aun de Wenj von disen Väahoff. Daut woat jejleeft, daut doa em Tempel eene Schauzkoma wia, wua daut Jelt von ut de Gowenkaustes nenjebrocht wort.

twee Koppasch: Wuatlich: “twee Leptasch”, un daut es de Meazol von daut griechische Wuat leptón; daut meent waut kjlienet, dennet. Een Lepton wia daut kjlanste Jeltstekj von Koppa ooda Brons, waut en Israel jebrukt wort. 128 Leptasch jelden soo väl aus 1 Denarius (see daut 18. Poat von daut Heft Help fa daut Bibelstudium).

een Zent: Wuatlich: “waut een Kwadrans es”. Daut griechische Wuat kodrántes (waut von daut latiensche Wuat Kwadrans häakjemt) meent een reemischet Jeltstekj von Koppa ooda Brons. 64 Kwadrans jelden soo väl aus 1 Denarius. Markus brukt hia reemischet Jelt, om dietlich to moaken, woo väl de Jeltstekja wieet wieren, waut de Juden jeweenlich brukten (see daut 18. Poat von daut Heft Help fa daut Bibelstudium).

w97-X 15. 10. 16-17 V. 16-17

Jehova schazt daut, wan wie am met gaunze Seel deenen

¹⁶ Een poa Joa lota wia Jesus eenen Dach lang em Tempel. Daut wia de 11. Nissan. Doa wort siene Macht em Froag jestalt un daut jinkj om schwieeje Froagen soo aus äwa Taks tolen, daut Oppstonen vom Doot un aundre. Hee veuadeeld de Schreftjelieede un Farisäa, wäajen dee biejlikj “de Wätfrues utem Hus fräten” deeden (Markus 12:40). Dan sad Jesus sikj dol, woomäajlich em Väahoff von de Frues, wua von de Juden jesajcht woat, daut doa 13 Gowenkaustes stunden. Hee saut doa een Stoot un kjikjt sea oppmoakjsom, woo de Menschen äare Gowen nenschmeeten. Doa kjeemen väl rikje Menschen han. Eenje meenden veleicht, woo goot see wieren, ooda deeden sikj doa soogoa groot met (see uk Matäus 6:2). Oba Jesus foll besonda de eene Fru opp. Aundre Menschen wudden bie dee veleicht nuscht waut besondret jeseenen haben ooda woo besonda dee äare Gow wia. Oba Jesus kunn de Hoaten seenen un doawäajen wist hee, daut daut “eene oame Wätfru” wia. Hee wist uk krakjt, woo väl see jejäft haud. Daut sajcht, see “läd twee Koppasch nenn; ojjefäa een Zent” (Markus 12:41-42).

¹⁷ Jesus wull siene Jinja waut wichtjet lieren un doawäajen roopt hee dee, daut dee daut selfst seenen kunnen. See “haft mea em Gotteskausten nenjelajcht aus aul de aundre”, säd Jesus. Hee tald daut fa mea, waut see nenjelajcht haud, aus aul de aundre äat toop. See “jeef aules waut see toom läwen haud” – äa latstet bät Jelt. Aus see daut deed, jeef see sikj en Jehova siene Henj un see vetrud doaropp, daut hee fa ar sorjen wudd. Jesus brukt äa Väabilt toom wiesen, woo eena Gowen jäwen saul. Menschlich jeseenen jeld äare Gow to sajen nuscht, oba en Gott siene Uagen wia daut soo väl wieet, daut daut nich to talen jinkj (Markus 12:43-44; Jakobus 1:27).

w97-X 15. 10. 17 V. 17

Jehova schazt daut, wan wie am met gaunze Seel deenen

w87-X 1. 12. 30 V. 1

Sent diene Gowen een Opfa?

Daut jeft väl wieetvolle Lieren, waut wie ut dise Jeschicht rutnämen kjennen. Daut es fa ons aula waut besondret, de woare Aunbädunk met ons Hab un Goot to unjastetten. Oba daut, waut Jehova werkjlich väl räakjent, es, wan wie am waut jäwen, waut fa ons väl wieet es, un nich daut, waut wie aulmols äwahoolen. Aundasch jesajcht: Jäw wie waut, waut ons nich fälen woat? Ooda sent onse Gowen werkjlich een Opfa?

cl-X 185 V. 15

De Weisheit en “Gott sien Wuat”

¹⁵ Es daut nich intressaunt, daut bloos dise Wätfru utjeläst wort von aul de Menschen, waut dän Dach nom Tempel kjeemen, un bloos von dee enne Bibel de Räd es? Derch dit Biespel lieet Jehova ons, daut hee een dankboara Gott es. Hee haft eenen Jefaulen doaraun, wan wie onse Gowen von Hoaten jäwen, krakjt endoont aus aundre mea ooda weinja jäwen kjennen. Dit wia de baste Wajch, woo Jehova ons lieren kunn, woo hee doaräwa denkjt, un daut jeit ons sea to Hoaten!

No jeistelje Schaza sieekjen

Erkjläarunk toom studieren en nwtsty von Mar 11:17

een Bädhus fa aule Velkja: Von de dree Evangeliumsschriewa, waut Wieed ut Jes 56:7 neemen, brukt bloos Markus noch de Wieed “fa aule Velkja” (Mat 21:13; Luk 19:46). De Tempel en Jerusalem sull een Plauz sennen, wua Juden un gottesferchtje Framde sullen kjennen Jehova aunbäden (1Kj 8:41-43). Jesus veuadeeld de Juden, daut dee dän Tempel brukten, om Haundel to driewen, un dän doaderch to eene Reibaheel muaken. Soo hilden see de Menschen von aule Velkja doavon auf, Jehova en sien Bädhus auntobäden, un neemen an de Jeläajenheit wajch, am kjanen to lieren.

jy-X 244 V. 7

Een Fiejenboom woat jebrukt, om eene Lia to jäwen äwa Gloowen

Boolt jinjen Jesus un siene Jinja en Jerusalem nenn. Soo aus hee daut jewant wia, jinkj Jesus nom Tempel un funk aun to lieren. De Huagapriesta un Eltestasch von daut Volkj hauden daut woll noch nich vejäten, waut Jesus dän Dach verhäa met de Jeltwakjsla jedonen haud. Nu fruagen see am: “Derch waut fa eene Macht deist du dit? Ooda wäa haft die daut rajcht jejäft dit to doonen?” (Markus 11:28).

28. MEI – 3. JUNI

SCHAZA UT GOTT SIEN WUAT | MARKUS 13-14

“Lot daut nich too, daut de Menschenforcht die unjakjricht”

ia-X 200 V. 14

Hee lieed von Jesus, waut daut bedied to vejäwen

¹⁴ Petrus jinkj soo bie sacht wieda un kjeem bat eent von de gaunz besondre Hiesa en Jerusalem. Daut wia Kaifas, dän rikjen un majchtjen Huagenpriesta, sien Hus. Soone Hiesa worden jeweenlich rom dän Bennahoff jebut met de Däaren aune Väakaunt. Petrus kjeem no de Däa, oba am wort nich nenjeloten. Dan kjeem Johanes, waut dän Huagenpriesta kjand un aul doa bennen wia, un beräd de Deenarin, waut doa oppaust, daut dee Petrus sull nenloten. Woomäajlich bleef Petrus nich dicht bie Johanes un wia uk nich doa em Hus bennen, om doa bie Jesus to sennen. Hee bleef doa oppem Hoff, wua eenje Sklowen un Deena sikj dee kolde Nacht biem Fia woamden un kjikjten, woo de faulsche Zeijen rut- un nenjinjen, om jäajen Jesus to räden (Markus 14:54-57; Johanes 18:15-16, 18).

it-2-X 569 V. 5

Petrus

Een aundra Jinja von Jesus, waut woomäajlich uk wia hinjaraun jekomen no dän Huagenpriesta sien Hus, holp Petrus, daut dee doa uk nenn kunn (Joh 18:15-16). Petrus hilt sikj nich gaunz oppoat em diestren en eene Akj opp, oba jinkj un woamd sikj doa biem Fia. Wiels hee doa biem Fia wia, wua daut dachen deed, moakjten de aundre daut, daut hee wia met Jesus toop jewast, un dee moakjten daut uk doaraun, woo Petrus räden deed. Aus see am daut väaschmeeten, veluach hee daut dree Mol, daut hee Jesus kjand, un daut kjeem soo wiet, daut Petrus gaunz kortnatuarich wort. Irjentwua enne Staut kjreid dan een Hon toom tweede Mol un Jesus “dreid . . . sikj om un kjikjt Petrus aun”. Gaunz bedrekjt jinkj Petrus dan rut un road bettalich (Mat 26:69-75; Mar 14:66-72; Luk 22:54-62; Joh 18:17-18; see HAHNENSCHREI; EID). Oba Petrus sien Gloowen jinkj nich gaunz tonuscht, wiels Jesus ea fa dän jebät haud (Luk 22:31-32).

No jeistelje Schaza sieekjen

w08-X 15. 2. 30 V. 6

Besondret von daut Buak Markus

14:51-52 – Wäa wia de junga Maun, von dän jesajcht woat, hee “rand noaktich wajch”? Wäajen bloos Markus doavon räd, mott daut sennen hee selfst jewast.

jy-X 287 V. 5

Jesus woat ieescht no Hanas jefieet, dan no Kaifas

Kaifas wist, daut de Juden spietich wieren, wan doa irjentwäa jleewd, Gott sien Sän to sennen. Mol ea, aus Jesus jesajcht haud, daut Gott sien Voda wia, hauden de Juden am wult dootmoaken, wiels dee sikj no äare Meenunk no “Gott jlikj stald” (Johanes 5:17-18; 10:31-39). Un wiels Kaifas wist, woo de Juden doaräwa dochten, säd hee to Jesus gaunz hinjalestich: “Ekj velang nu en dän läwendjen Gott sien Nomen, daut du ons sajchst auf du de Messias, de Gottes Sän best” (Matäus 26:63). Secha haud Jesus daut mol hieren loten, daut hee Gott sien Sän wia (Johanes 3:18; 5:25; 11:4). Un wan hee nu nuscht säd, dan wudd daut soo jetalt woaren, aus wudd hee daut velieejen, daut hee Gott sien Sän un Christus wia. Doawäajen säd Jesus: “Ekj sie dee; un jie woaren dän Menschensän bie däm Aulmajchtjen to rajchte Haunt setten seenen, un am seenen en de Himmelswolkjen komen” (Markus 14:62).