Aungowen fa daut Schoolheft fa Läwen un Deenst
2.-8. APRELL
SCHAZA UT GOTT SIEN WUAT | MATÄUS 26
“Waut haft daut Passafast met daut Owentmol äwareen un waut nich?”
Bilt en nwtsty
Daut Passamol
Toom daut Passamol fieren brukt daut (1) een jebaktet Schop (kjeene Knoakes sullen jebroaken); (2) ojjesuadet Broot un (3) betre Kjriedarie (2Mo 12:5, 8; 4Mo 9:11). Dise betre Kjriedarie sull de Israeliten secha doaraun denkjen halpen, woo betta äare Sklowarie en Ägipten jewast wia. Jesus brukt daut ojjesuade Broot aus een Jlikjnis fa sienen volkomnen menscheljen Kjarpa (Mat 26:26). De Apostel Paulus säd, daut Jesus “ons Passalaum” wia (1Ko 5:7). (4) Em ieeschten Joahundat wort uk Wien jebrukt aus Poat von daut Passamol. Jesus brukt disen Wien, om sien Bloot väatostalen, waut hee aus een Opfa wudd utjeeten (Mat 26:27-28).
Erkjläarunk toom studieren en nwtsty von Mat 26:26
es: Waut daut Wuat estín hia sajen well, es: “bediet”; “es een Jlikjnis”; “steit fa” un “stalt väa”. Dise Bediedunk wia fa de Apostel gaunz kloa, wiels Jesus sien volkomna Kjarpa noch mank an wia un uk daut ojjesuade Broot, waut see äten wudden. Doawäajen kunn daut Broot nich en Werkjlichkjeit sien Kjarpa jewast sennen. Daut es oppfaulent, daut dautselwje griechische Wuat en Mat 12:7 steit, un väl Bibeläwasatungen sajen doa “bediet.”
Erkjläarunk toom studieren en nwtsty von Mat 26:28
Bloot en dän nieen Bunt: De niea Bunt tweschen Jehova un de jesaulwde Christen wort derch Jesus sien Opfa jeltich (Heb 8:10). Jesus brukt hia deeselwje Wieed, waut Moses brukt, aus hee aum Sinai-Boajch aus Vemedla dän Bunt von daut Jesaz jeltich muak (2Mo 24:8; Heb 9:19-21). Krakjt soo aus daut Bloot von Bolles un Kosen dän Bunt von daut Jesaz tweschen Gott un daut Volkj Israel jeltich muak, soo muak Jesus sien Bloot dän nieen Bunt jeltich, waut Jehova met daut jeistelje Israel moaken wudd. Von Pinjsten 33 aun wia dee Bunt dan jeltich (Heb 9:14-15).
No jeistelje Schaza sieekjen
Erkjläarunk toom studieren en nwtsty von Mat 26:17
Dän ieeschten Fastdach, aun dän see daut onjesuadet Broot eeten: Daut Fast von daut ojjesuade Broot funk aum 15. Nissan aun, dän Dach no daut Passamol (14. Nissan) un dieed säwen Doag. (See daut Heft Help fa daut Bibelstudium, Poat 19.) To Jesus siene Tiet wia daut Fast von daut ojjesuade Broot, waut säwen Doag dieed, sea met daut Passafast vebungen, waut eenen Dach dieed. Doawäajen worden aul de acht Doag foaken “daut Fast von onjesuade Brood” jenant (Luk 22:1). Opp dise Städ kjennen de Wieed “dän ieeschten Fastdach” uk äwasat woaren met “de Fastdach doa ver”. (See uk Joh 1:15, 30, wua daut griechische Wuat “ieeschte” [prṓtos] äwasat es met “ver” en eenen äneljen Sauz: “dee aul ver [prṓtos] mie wia”.) No daut no, woo daut opp Griechisch sajcht un no de judische Jewanheit no, motten de Jinja Jesus de Froag aum 13. Nissan jestalt haben. Dän 13. Nissan äwadach muaken de Jinja fa daut Passafast reed, un daut wort dan jefieet, “aus daut Owent wort”, aus de 14. Nissan aunfunk (Mar 14:16-17).
Erkjläarunk toom studieren en nwtsty von Mat 26:39
lot dise lieden . . . vebie gonen: Jesus wia onen Twiewel sea besorcht, wäajen sien Doot wudd Schaund opp Gott brinjen, wan hee wudd aus eena omjebrocht woaren, waut Gott lastren deed un aus eena, waut doa waut grootet aunrechten deed. Daut brocht am bat doa, daut hee fruach, aus “dise lieden” nich kunnen von am wajchjenomen woaren.
9.-15. APRELL
SCHAZA UT GOTT SIEN WUAT | MATÄUS 27-28
“Got un moakt Lieelinja – wuarom, wua un woo?”
w04-X 1. 7. 8 V. 4
Got un moakt Lieelinja
4 Jesus haud de Macht äwa siene Christenvesaumlunk, un von 1914 aun haft hee de Macht äwa Gott sien Kjennichrikj, waut doa wada oppjestalt wort (Kolossa 1:13; Openboarunk 11:15). Hee es de hechsta Enjel un doawäajen es hee äwa de himlische Armee von hundade Millionen Enjel aunjestalt (1. Tessalonicha 4:16; 1. Petrus 3:22; Openboarunk 19:14-16). Hee haft von sienen Voda de Macht jekjräajen, om “aule Harschoften un Rejierungen un Jewaulten”, waut sikj jäajen siene jerajchte Gruntsauzen stalen, to venichten (1. Korinta 15:24-26; Efeesa 1:20-23). Jesus siene Macht es nich bloos äwa de Läwendje – hee es uk de “Rechta äwa Läwendje un Doodje” un haft von Gott Krauft jekjräajen, om dee opptowakjen, waut em Doot enjeschlopen sent (Aposteljeschicht 10:42; Johanes 5:26-28). Secha wudd eena een Jeboot, waut eena von wäm kjrieech, waut soo väl Macht haud, aul sellen sea wichtich nämen. Doawäajen hool wie jehuarsom un wellich Christus sien Jeboot, daut wie sellen gonen Lieelinja moaken.
Erkjläarunk toom studieren en nwtsty von Mat 28:19
moakt . . . Lieelinja: Daut griechische Tietwuat mathēteuō kaun äwasat woaren aus “lieren” un doaropp, daut eena well Lieelinja ooda Jinja moaken. (See doatoo uk dit Wuat en Mat 13:52, wua daut met “lieet” äwasat woat.) Aun de Tietwieed “deepen” un “lieren” es to seenen, waut daut Jeboot aules bediet, Lieelinja to moaken.
de Velkja: Eene wuatliche Äwasatunk es “aule Velkja”, oba wan eena daut gaunze läst, dan es daut kloa, daut et hia von eenselne Menschen von de Velkja rät. Met daut griechische Wuat “an” en dän Sauz deept an, sent eenselne Menschen met jemeent. Dit Jeboot, no Menschen von “de Velkja” to gonen, wia waut nieet. No de Schreften no, wia daut aul ver Jesus sienen Deenst mäajlich, daut de Nichjuden mank de Israeliten kunnen Jehova aunbäden, wan dee ut sikj selfst kjeemen (1Kj 8:41-43). Oba met dit Jeboot säd Jesus to siene Jinja, daut doa nich bloos dee sull jeprädicht woaren, waut aus Juden jebuaren wieren, oba uk dee, waut nich wieren. Daut wiest, daut daut christelje Woakj, Jinja to moaken, oppe gaunze Welt saul jedonen woaren (Mat 10:1, 5-7; Opb 7:9; Mat 24:14).
Erkjläarunk toom studieren en nwtsty von Mat 28:20
Lieet an: Daut griechische Wuat äwasat met “lieren”, meent, daut eena Aunwiesungen jeft, Dinj utlajcht un kloa moakt un Bewies jeft. Aundre lieren, aules to doonen, waut Jesus säd, wudd nich met eemol jedonen sennen; daut wudd siene Tiet brucken, un doa wudd met en sennen, daut eena aundre daut lieed, waut Jesus lieed, daut dee daut uk doonen un am uk nofoljen (Joh 13:17; Ef 4:21; 1Pe 2:21).
No jeistelje Schaza sieekjen
Erkjläarunk toom studieren en nwtsty von Mat 27:51
Gardien: Dit straume Zeich deeld daut Heilje von daut Aulaheilichste em Tempel uteneen. No de Jeschicht von de Juden no, wia dise schwoare Gardien ojjefäa 18 Meeta (60 Schoo) lank, 9 Meeta (30 Schoo) breet un 7,4 Zentimeeta (2,9 Zoll) dikj. Doaderch, daut dee en twee Bieta reet, wees Jehova nich bloos, daut hee doaräwa vestalt wia, daut se sienen Sän dootjemoakt hauden, oba daut wees uk, daut doa nu eene Däa op wia toom em Himmel nenkomen (Heb 10:19-20).
Tempel: Hia es met daut griechische Wuat naós (Heilichtum) daut Jebied enne Medd jemeent met daut Heilje un daut Aulaheilichste.
Erkjläarunk toom studieren en nwtsty von Mat 28:7
sajcht siene Jinja, daut hee vom Doot oppjestonen es: Dise Frues wieren de ieeschte Jinja, waut daut to hieren kjrieejen, daut Jesus oppjestonen wia, oba nich mau daut, dee kunnen de aundre Jinja daut noch vetalen (Mat 28:2, 5, 7). De Juden hauden daut soo, daut eene Fru äa Zeichnis verem Jerecht nich jeltich wia, waut sikj oba nich oppe Schreft stetten deed. Em Jäajendeel jeef Jehova sien Enjel de Frues de Iea, daut dee dise freidje Norecht kunnen wiedabrinjen.
16.-22. APRELL
SCHAZA UT GOTT SIEN WUAT | MARKUS 1-2
“Die sent diene Sinden vejäft”
jy-X 67 V. 3-5
“Die sent diene Sinden vejäft”
Aus Jesus en een Hus voll von Menschen lieed, kjeemen vea Mana met eenen jelämden Maun aun, waut opp eene Madrauz wia. See wullen haben, Jesus sull äaren Frint heelen. Oba doa wieren soo väl Menschen, “daut see am nich bat Jesus brinjen kunnen” (Markus 2:4). Stal die mol väa, woo sea enteischt see wieren. See stieejen opp daut plaute Dak nopp, un muaken een Loch doaderch. Dan leeten see de Madrauz met dän jelämden Maun rauf en daut Hus nenn.
Oajad Jesus sikj, daut see am doa aufhilden? Äwahaupt nich! Hee must sikj wundren äwa dee äaren Gloowen, un hee säd to dän Jelämden: “Die sent diene Sinden vejäft” (Matäus 9:2). Oba kunn Jesus werkjlich Sinden vejäwen? De Schreftjelieede un de Farisäa beduaden daut, un dee dochten bie sikj soo: “Wuarom rät dis Maun soo? Daut es jelastat! Wäa sest aus Gott kaun Sinden vejäwen?” (Markus 2:7).
Wiels Jesus daut wist, waut see en sikj dochten, säd hee to dee: “Wuarom denkj jie soo äwa dee Sach? Waut es leichta to dän Jelämden to sajen: Die sent de Sinden vejäft, ooda to sajen: Sto opp, nemm dien Bad un go?” (Markus 2:8-9). Jo, derch daut Opfa, waut Jesus met de Tiet wudd brinjen, kunn hee disen Maun siene Sinden vejäwen.
Erkjläarunk toom studieren en nwtsty von Mar 2:9
Waut es leichta: Daut es leicht to sajen, daut eena wäm de Sinden vejäwen kaun, wiels doa kjeen Tieekjen needich es aus Bewies. Oba to sajen sto opp . . . un go brukt een Wunda, waut daut dan fa aulem kloa moaken wudd, daut Jesus de Macht haud, de Sinden to vejäwen. Aun dise Jeschicht un aun Jes 33:24 es to seenen, daut de Krankheiten met onse Sinden to doonen haben.
No jeistelje Schaza sieekjen
Erkjläarunk toom studieren en nwtsty von Mar 1:11
Un eene Stemm vom Himmel säd: Dit wia daut ieeschte Mol von de dree Städen en de Evangelien, wua Jehova selfst met Menschen räd (Mar 9:7; Joh 12:28).
Du best mien leewa Sän: Aus Jeist wia Jesus Gott sien Sän (Joh 3:16). Un von siene Jeburt aun wia Jesus aus Mensch Gott sien Sän, krakjt soo aus de volkomna Adam jewast wia (Luk 1:35; 3:38). Oba daut kaun goot sennen, daut Gott sien Wuat hia mea met meent, aus bloos to wiesen, wäa Jesus es. Aus hee dise Wieed säd un sienen heiljen Jeist opp am utgoot, wees Gott woll, daut hee Jesus nu to sienen jeisteljen Sän bestemt haud, aulsoo “wadajebuaren” wia met de Hopninj, em Himmel to läwen, un daut dee jesaulft worden wia toom Gott sien enjesada Kjennich un Huaga Priesta sennen. (Joh 3:3-6; 6:51; see uk Luk 1:31-33; Heb 2:17; 5:1, 4-10; 7:1-3.)
met die sie ekj sea tofräd: Ooda “ekj hab eenen grooten Jefaulen aun die”; “ekj hab eene groote Freid aun die”. De selwje Wieed woaren en Mat 12:18 jebrukt – daut es ut Jes 42:1 jenomen, waut eene Profezeiunk von dän vesproaknen Messias ooda Christus es. Wiels Gott sienen heiljen Jeist utgoot un Jesus aus sienen Sän bekjand, wees daut sea kloa, daut Jesus de vesproakna Messias wia.
Erkjläarunk toom studieren en nwtsty von Mar 2:28
Har äwa dän Sabat: Jesus brukt dise Wieed fa sikj selfst (Mat 12:8; Luk 6:5) un meend doamet, daut am uk de Sabat jejäft wia, om daut Woakj uttofieren, waut sien himlischa Voda am äwajäft haud. (See uk Joh 5:19; 10:37-38.) Aum Sabat deed Jesus eenje von siene jratste Wunda, un eenje von dee Wunda wieren Kranke heelen (Luk 13:10-13; Joh 5:5-9; 9:1-14). Dit wia secha een Bewies, woo hee de Menschen wudd von aul äare Trubbels friemoaken, wan hee ieescht wudd aus Kjennich rejieren. Daut woat soo aus eene Sabatru sennen (Heb 10:1).
23.-29. APRELL
SCHAZA UT GOTT SIEN WUAT | MARKUS 3-4
“Aum Sabat heelen”
jy-X 78 V. 1-2
Waut kaun eena aum Sabat doonen?
Aun eenen aundren Sabat besocht Jesus eene Judenschool, woomäajlich en Galiläa. Doa funk hee eenen Maun, un dän siene rajchte Haunt wia vedrieecht (Lukas 6:6). De Schreftjelieede un de Farisäa hauden Jesus eentwajch em Uag. Wuarom? Na, dee fruagen Jesus: “Es daut rajcht aum Sabat to heelen?” Doamet weesen see, waut see werkjlich em Hoat hauden (Matäus 12:10).
De judische Gloowesleida jleewden, daut eena eenen Kranken aum Sabat mau dan halpen kunn, wan daut Läwen en Jefoa wia. Doawäajen wia daut biejlikj orrajcht, wäm eenen Knoaken trigjtoducken ooda eenem to bebinjen, wan dee tonicht wia, wiels doa dan nich daut Läwen en Jefoa wia. Daut wia kloa, daut de Farisäa Jesus nich fruagen, wiels dee met dän oamen Maun sien Lieden metfeelden. Dee sochten bloos no eene Uasoak, daut see Jesus met waut beschuljen kunnen.
jy-X 78 V. 3
Waut kaun eena aum Sabat doonen?
Jesus oba wist, woo vedreit dee dochten. Hee wist, daut dee daut Jeboot, daut eena aum Sabat nich schaufen sull, too strenj neemen un daut et aul nich mea met de Schreft tooppaust (2. Mose 20:8-10). Hee haud daut aul ea beläft, daut dee äwa siene goode Woakjen spietich wieren. Un nu deed Jesus waut, waut doatoo fieed, daut et een Jestried aufjeef – hee säd to dän Maun met de vedrieejde Haunt: “Sto opp un komm häa” (Markus 3:3).
Erkjläarunk toom studieren en nwtsty von Mar 3:5, NW
sea truarich: Bloos Markus schreef doavon, woo Jesus sikj feeld, aus hee sach, woo stieekoppich de Gloowesleida en äare Hoaten wieren (Mat 12:13; Luk 6:10). Dise läwendje Beschriewunk von Jesus siene Jefeelen kjeemen veleicht von Petrus häa, waut selfst een Maun met deepe Jefeelen wia. (See daut Video “Eenselheiten äwa Markus”.)
No jeistelje Schaza sieekjen
Erkjläarunk toom studieren en nwtsty von Mar 3:29
wäa . . . jäajen dän Heiljen Jeist lastat: Lastren meent, jäajen Gott groff räden, dän beleidjen ooda äwa dän schempen ooda wan eena daut jäajen heilje Dinj deit. Wiels de heilja Jeist von Gott kjemt, es daut soo, aus wan se äwa Gott selfst lastren, wan se sikj mootwellich jäajen dän stalen ooda daut vestrieden wellen, wan se uk seenen, waut de Jeist deit. Aun Mat 12:24, 28 un Mar 3:22 jeit to seenen, daut de judische Gloowesleida daut wisten, daut Jesus derch Gott sienen Jeist Wunda deed, oba dee dreiden daut doano han, daut de Macht vom Soton dän beesen Fient kjeem.
eewje Schult: Daut späat sikj soo, hia sent de mootwelje Sinden met jemeent, waut eewje Foljen haben. Daut jeft kjeen Opfa, om soone Sind tootodakjen.
w14-X 15. 12. 12-13 V. 6-8
Es die daut opjedakjt?
6 Waut kjenn wie von dit Jlikjnis lieren? Ieeschtens, wie motten toostonen, daut wie nich de Kontroll doaräwa haben, woo bosich een Bibelstudium veraunkjemt. Bescheiden to sennen, woat ons halpen, daut wie oppaussen, daut wie een Studium nich noporren, daut hee sikj deepen loten saul. Wie doonen aules, waut wie kjennen, dän to halpen un to unjastetten, oba wie motten deemootich sennen un toojäwen, daut dee Entscheidunk en siene Henj es. Sikj Gott hanjäwen, mott von een weljet Hoat komen – de Leew fa Gott mott eenem bat doa brinjen. Aundasch nemt Jehova daut nich aun (Psa. 51:12; 54:6; 110:3).
7 Tweedens, de Lia von dit Jlikjnis woat ons halpen, nich mootloos to woaren, wan onse Oabeit nich fuaz Frucht drajcht. Wie motten jeduldich sennen (Jak. 5:7-8). Un wan wie ons bastet doonen un ons Bibelstudium seenen to halpen un daut dan oba nich Frucht drajcht, dan licht daut nich aun ons. Jehova lat de Sot bloos en deemootje Hoaten waussen, waut doa wellens sent, sikj to endren (Mat. 13:23). Doawäajen sull wie onsen Deenst nich doamet mäten, woo väl Frucht daut drajcht. En Jehova siene Uagen henjt daut nich doavon auf, woo deejanja veraunkjemt, waut doa studieet. Hee schazt väl dolla de Aunstrenjungen, waut wie met ons gaunzet Hoat doonen (läs Lukas 10:17-20; 1. Korinta 3:8).
8 Dreddens, wie seenen nich emma, waut en eenen Mensch aunjeit. Biejlikj, een Missionoa studieed met een Poa Lied, un nu kjeemen dee un fruagen am, aus see kunnen aunfangen to prädjen. Hee säd to dee, see musten ieescht opphieren met schmieekjen. Hee wia sea vewundat, aus dee am säden, daut see aul miere Moonat trigj doamet oppjehieet hauden. Wuarom hauden see oppjehieet? An wia daut kloa jeworden, daut Jehova daut sach, wan see schmieekjten un daut Jehova Heichlarie nich lieden kunn. Un daut brocht an bat doa, daut see sikj entscheiden deeden – entwäda see wudden ver dän Missionoa schmieekjen ooda gaunz doamet opphieren. See hauden eene Leew fa Jehova jekjräajen un daut holp an, sikj fa daut rajchte to entscheiden. See wieren em jeisteljen veraunjekomen un hauden Endrungen jemoakt, wan de Missionoa doa uk nuscht von wist.
ONS CHRISTELJET LÄWEN
Erkjläarunk toom studieren en nwtsty von Mar 4:9
Wäa Uaren haft toom hieren, däm lot hieren: Ea Jesus daut Jlikjnis von dän Maun vetald, waut seien jinkj, säd hee: “Horcht” (Mar 4:3). Aum Enj säd hee disen Sauz aus Woarnunk fa siene Nofolja. Doamet wull hee dee daut dietlich moaken, woo iernst see daut nämen sullen. Meist soone Woarnungen sent en Mat 11:15; 13:9, 43; Mar 4:23; Luk 8:8; 14:35; Opb 2:7, 11, 17, 29; 3:6, 13, 22; 13:9.
30. APRELL – 6. MEI
SCHAZA UT GOTT SIEN WUAT | MARKUS 5-6
“Jesus haft de Krauft, daut hee onse leewe Aunjehieeje oppwakjen kaun”
Erkjläarunk toom studieren en nwtsty von Mar 5:39
es nich jestorwen; daut schlapt: En de Bibel woat de Doot foaken met schlopen vejlikjt (Ps 13:3; Joh 11:11-14; Apj 7:60; 1Ko 7:39, NW; 15:51, NW; 1Tess 4:13, NW). Jesus haft dit veleicht doawäajen soo jesajcht, om to wiesen, daut de Menschen kjennen vom Doot oppjewakjt woaren, soo aus eena wäm von eenen fausten Schlop oppwakjen kaun. Jesus siene Krauft, de Mejal opptowakjen, kjeem von sienen Voda, “dee de Doodje daut Läwen jeft un daut verendach brinjt, waut noch nich doa es” (Ree 4:17).
jy-X 118 V. 6
Een Mejalkje läft wada!
Jesus haud aul ea aundre jeheelt un dan bestalt, daut dee daut nich sullen wiedavetalen, waut hee fa an jedonen haud, un soo deed hee daut uk wada met dise Elren. Oba, de Elren wieren soo jlekjlich, daut see un uk aundre Menschen “dit Nies . . . en de gaunze Jäajent” romräden deeden (Matäus 9:26). Wurscht du nich uk met Freiden doavon vetalen, wan doa wäa vom Doot oppjewakjt wort, dän du väl jeräakjent hautst? Dit wia daut tweede Mol, waut doavon jeschräwen woat, daut Jesus Doodes oppwakjt.
No jeistelje Schaza sieekjen
Erkjläarunk toom studieren en nwtsty von Mar 5:19
an vetalen: Dit Mol wia daut aundasch aus sest emma. Jeweenlich bestald Jesus, daut se daut sullen stellhoolen, wan hee een Wunda jedonen haud (Mar 1:44; 3:12; 7:36). Oba to disen Maun säd hee, dee sull siene Famielje daut vetalen, waut am passieet wia. Veleicht kunn daut doawäajen jewast sennen, wiels Jesus jefroacht wort, de Jäajent to veloten un hee wudd nich selfst kjennen Zeichnis jäwen. Daut wudd uk halpen jäajen daut schlajchte Jeräd, waut daut kunn jäwen, wäajen de Schwien wajch wieren.
Erkjläarunk toom studieren en nwtsty von Mar 6:11
scheddat junt dän Stoff von de Feet: Derch dit weesen de Jinja, daut see ver Gott nich de Veauntwuatunk hauden, wan de Menschen an soo behaundlen deeden un daut see Gott de Sach äwajeewen. Biejlikj soone Wieed woaren en Mat 10:14 un Luk 9:5 jebrukt. Markus un Lukas sajen noch, fa an eene Woarnunk [ooda om an to woarnen]. Aus Paulus un Barnabas en Pisidien Antiochia wieren, deeden see daut soo aus dit (Apj 13:51), un aus Paulus en Korint wia, deed hee daut doa uk. Hee scheddad sikj dän Stoff von de Kjleeda un säd: “Jun Bloot woat äwa june ieejne Kjap komen. Ekj sie rein” (Apj 18:6). Met soone Kjarpasproak wieren de Juden veleicht aul bekaunt. De ajchte Juden, waut derch de Nichjuden äa Launt reisden, scheddaden sikj dän Stoff von de Feet, waut fa an orrein wia, wan see trigj en daut judische Launt nenkjeemen. Oba Jesus haud waut aundret em Senn, aus hee siene Jinja dise Aunwiesunk jeef.