Du kaust en eene niee Welt läwen!

En de väaje Artikjels hab wie jeseenen, daut Gott woat boolt een Enj moaken met dise gottloose Welt – met aul äare Trubbels. Wuarom kjenn wie ons secha sennen, daut daut soo romkjemt? Wiels Gott sien Wuat, de Schreft, daut vesprakjt:

“De Welt . . . woat vegonen.” 1. JOHANES 2:17

En dänselwjen Varsch sajcht daut oba uk, daut eenje äwaläwen woaren:

“Wäa oba deit waut Gott well, woat eewich bliewen.”

Wäa doa äwaläwen well, mott aulsoo Gott sienen Wellen doonen. Toom weeten, waut Gott sien Wellen es, mott eena am ieescht kjanen lieren.

TOOM ÄWALÄWEN MOTT EENA GOTT “KJANEN LIEREN”

Miere Bilda: 1. Eene Nurs es gaunz utjepust un sett oppe Flua. 2. Enne Pause sitt see eene aundre Nurs, waut schaftich en een Heft läst. 3. Dee Nurs läst ar eenen Bibelvarsch väa un jeft ar een JW.ORG-Koatje.

Jesus säd: “Daut eewje Läwen es dit: daut see die, dän eensich woaren Gott . . . kjanen lieren” (Johanes 17:3). Om nich bloos daut Enj von dise Welt to äwaläwen oba uk fa emma to läwen, mott eena Gott kjanen lieren. Daut bediet väl mea aus bloos to jleewen, daut et eenen Gott jeft un jewesset äwa dän to weeten. Eena mott dän sien Frint sennen. Toom een gooda Frint met Gott woaren, mott eena sikj oba aunstrenjen. Well wie mol seenen, woo de Schreft ons derch wichtje Lieren halpt, een bätra Frint met Gott to woaren un uk to bliewen.

Wichtje Lieren ut de Schreft

Wie lieren, daut Gott wull, daut wie en een Paradies läwen.

Hee muak de ieeschte beid Menschen, Adam un Eva, un sad dee en dän schmocken Goaden Eden nenn. Dee wieren volkomen un Gott jeef dee aules, waut dee brukten toom een scheenet Läwen haben. Dee wudden haben kunt onen Enj läwen. Soo lang aus dee wudden Gott siene Frind bliewen, wudden dee nienich haben brukt stoawen. Oba see deeden een eefachet Jeboot von Gott nich jehorchen.

Wie lieren, wuarom wie nu soo lieden motten.

Doaderch, daut de ieeschta Mensch Adam ojjehuarsom wia, vespäld hee de Jeläajenheit, eewich to läwen – fa sikj selfst un fa aul siene Nokomen. De Bibel sajcht daut soo aus dit: “Soo aus derch eenen Mensch de Sind en de Welt nenn kjeem un derch de Sind de Doot, soo haft sikj de Doot äwa aule Menschen jespreet” (Reema 5:12). Kjinja kjennen biejlikj eene Krankheit von äare Elren metoawen. Wie, aus Adam siene Kjinja, haben von am de Sind metjeorwen. Un daut es, wuarom wie oolt woaren un stoawen.

Wie lieren, waut Gott aul fa ons jedonen haft toom ons halpen.

De Bibel sajcht: “Gott siene Leew fa dise Welt es soo groot, daut hee sienen eensjen Sän jeef, daut aul dee, dee aun am jleewen, nich veloaren gonen, oba daut eewje Läwen haben” (Johanes 3:16). Ut Leew schekjt Gott sienen Sän Jesus no de Ieed toom sien Läwen fa ons hanjäwen. Doatoo sajcht Prabhakar, een 86-joascha Maun von Indien: “Daut wiest mie, waut vonne groote Leew Jehowaa fa mie haft. Siene Leew jeft mie de Hopninj fa emma to läwen.”

Wie lieren, woo wie kjennen dankboa sennen fa daut, waut Gott fa ons jedonen haft.

De Schreft sajcht ons, woo wie Gott onse Dankboakjeit bewiesen kjennen fa daut, waut hee fa ons jedonen haft. Woo? Doaderch, daut “wie Gott siene Jebooten hoolen” (1. Johanes 2:3). Jehowa wiest ons leeftolich, waut wie doonen kjennen toom nu aul een scheenet Läwen haben (Jesaja 48:17-18). Gott well nich, daut wie lieden. Hee vesprakjt ons, wan wie siene Jebooten hoolen, woa wie nich bloos nu aul een scheenet Läwen haben, oba noch mol kjennen fa emma läwen.

LÄS GOTT SIEN WUAT, DE BIBEL, JIEDA DACH

De Nurs sett buten un kjikjt nom Himmel, nodäm daut see de Schreft en äare Pause jeläst haft. — Du kaust daut Enj von de Welt äwaläwen, wan du Gott om Help bätst un sienen Wellen deist

Wie äten jieda Dach toom aum läwen bliewen. Oba Jesus säd: “De Mensch läft nich bloos von Broot, oba von aule Wieed, dee Gott jerät haft” (Matäus 4:4).

Vondoag dän Dach rät Jehowa to ons derch de Schreft. Wan du de Heilje Schreft studieescht, woascht du lieren, waut Gott en de Vegonenheit fa de Menschen jedonen haft, waut hee nu fa ons deit un waut hee noch mol doonen woat. Un daut woat die halpen, een bätra Frint met Gott to woaren.

BÄD TO GOTT OM HELP

Waut, wan du daut doonen west, waut Gott von die velangt, oba daut schwoa fa die es, eenjet tochtoloten, waut hee fa orrajcht talt? Dan jroz halpt die daut een deel, Gott bäta kjanen to lieren.

Eene Fru, waut wie mol Sara nanen wellen, fieed een onmoralischet Läwen. Aus see ieescht aunfunk de Schreft to studieren, lieed see äwa Gott sien Jeboot “Rant wajch von aule Huararie” (1. Korinta 6:18). Sara bäd Gott om Help un dan kunn see opphieren met äa schlajchtet Läwen. Oba see mott noch emma jäajen Vesieekjungen kjamfen. See sajcht: “Wan mie onmoralische Jedanken enkomen, bäd ekj iernstlich to Jehowa, wiels ekj weet, ekj kaun doa nich auleen jäajen kjamfen. Derch de Krauft von daut Jebäd sie ekj Jehowa väl noda jekomen.” Soo aus Sara lieren millionende Gott emma bäta kjanen. Hee jeft an de Krauft äa Läwen to endren un soo to läwen aus am daut jefelt (Filippa 4:13, JHF).

Je bäta du Gott kjanen lieescht, je bäta woascht du “von Gott erkjant” sennen, soo aus een wieetvolla Frint (Galata 4:9, JHF; Psalm 25:14). Dan woascht du kjennen daut Enj von de Welt äwaläwen un en Gott siene niee Welt nenkomen. Oba woo woat de niee Welt sennen? Daut sitst du en dän näakjsten Artikjel.

a No de Schreft no es Jehowa Gott sien Nomen.