Enne Schreft jeit daut daut mieeschte om Gott sien Kjennichrikj. Derch dit Kjennichrikj woat Jehova daut utfieren, waut hee sikj von Aunfank aun met de Ieed väajenomen haud. Waut es dit Kjennichrikj? Woo weet wie, daut et nu aul rejieet? Waut haft daut aul aules jedonen? Un waut woat daut noch doonen? Daut woa wie en dit un en de näakjste beid Kapitels seenen.

1. Waut es Gott sien Kjennichrikj un wäa es de Kjennich?

Daut Kjennichrikj es eene Rejierunk, waut Jehova Gott oppjestalt haft. De Kjennich es Jesus Christus un dee rejieet vom Himmel (Matäus 4:17; Johanes 18:36). De Schreft sajcht von Jesus: “Hee woat eewich . . . Kjennich sennen” (Lukas 1:32-33). Jesus woat äwa jiedrem eenen oppe Ieed rejieren.

2. Wäa rejieet met Jesus toop?

Jesus woat nich auleen äwa de Ieed rejieren. Met am toop woaren noch aundre rejieren “von aule Menschenstam un Sproaken un Velkja” (Openboarunk 5:9-10). Woo väl woaren daut sennen? Sent daut aul de millionende Christen, waut sent siene Nofolja jeworden von dan, aus hee oppe Ieed wia? Nä. Bloos 144 000 woaren nom Himmel komen toom met Jesus toop rejieren (läs Openboarunk 14:1-4). Dit Kjennichrikj woat äwa aule aundre Christen oppe Welt rejieren (Psalm 37:29).

3. Wuarom es Gott siene Rejierunk bäta aus de Menschen äare?

Wan menschelje Rejiera uk noch wellen goodet doonen, kjennen dee daut oba lang nich emma. Un dan noch: dee kjennen nich fa emma rejieren. Un dee, waut no dee komen, wellen veleicht nich daut baste fa de Menschen. Oba en Jesus siene Städ woat kjeenmol een aundra Kjennich komen, wiels Gott haft een eewjet Rikj oppjestalt, waut nienich woat venicht woaren (Daniel 2:44). Jesus woat äwa de gaunze Welt rejieren un aulem jlikjen fein behaundlen. Hee es leeftolich un jerajcht un hee woat de Menschen lieren, sikj uk aula leeftolich un jerajcht to behaundlen (läs Jesaja 11:9).

4. Eene stoakje Rejierunk woat äwa de gaunze Welt rejieren

Daut haft noch kjeenmol eenen Harscha jejäft, waut soo väl Macht haud aus Jesus Christus. Läst Matäus 28:18 un dan got toop dise Froag derch:

• Waut es de Unjascheet von Jesus siene Macht un de menschelje Harscha äare?

Een Mensch rejieet mau fa een Stootje ooda bloos opp eene jewesse Plak. Woo es daut met Gott sien Kjennichrikj? Läst Daniel 7:14 un dan got toop dise Froagen derch:

• Woosoo es daut goot, daut Gott sien Kjennichrikj nienich woat een Enj haben?

• Woosoo es daut goot, daut et woat äwa de gaunze Welt rejieren?

5. Doa fält eene Rejierunk, waut nich von Menschen es

Wuarom es daut needich, daut Gott sien Kjennichrikj rejieet, enne Städ de menschelje Rejierungen? Kjikjt daut VIDEO un dan got toop de Froag derch, waut hia aunjejäft es.

VIDEO: Waut es Gott sien Kjennichrikj? (Een Biet) (1:41)

• Woo es daut utjekomen, daut de Menschen selfst rejieet haben?

Läst Liera 8:9 un dan got toop dise Froagen derch:

• Jleefst du, wudd Gott sien Kjennichrikj sellen en de Menschen äare Städ rejieren? Wuarom?

6. En Gott sien Kjennichrikj rejieren soone, waut met ons metfeelen kjennen

Wäajen ons Kjennich, Jesus, aus Mensch läwd, kaun hee “met onse Schwakheiten metfeelen” (Hebräa 4:15). Un de 144 000 true Mana un Frues, waut Jehova jewält haft toom met Jesus toop rejieren, sent “von aule Menschenstam un Sproaken un Velkja” (Openboarunk 5:9).

• Es daut nich goot to weeten, daut Jesus un siene Metharscha krakjt weeten, woo daut es, aus Mensch to läwen? Wuarom?

7. Gott sien Kjennichrikj haft bätre Jesazen

De Rejierungen stalen Jesazen opp, waut äare Menschen sellen halpen un beschitzen. Krakjt soo haft Gott sien Kjennichrikj uk Jesazen, waut de Menschen doa motten nokomen. Läst 1. Korinta 6:9-11 un dan got toop dise Froagen derch:

• Woo jleefst du, woat de Welt sennen, wan jieda eena sikj aun Gott siene Jesazen helt?a

• Jleefst du, haft Jehova daut Rajcht, Jesazen opptostalen fa de Menschen, waut unja sien Kjennichrikj sent? Wuarom?

• Aun waut es to seenen, daut soone Menschen, waut Gott siene Jesazen nich nokomen, sikj endren kjennen? (See Varsch 11.)

KAPITEL TOOPJEFOT

Gott sien Kjennichrikj es opp iernst eene Rejierunk em Himmel, waut äwa de gaunze Welt rejieren woat.

Waut hast du jelieet?

• Wäa woat en Gott sien Kjennichrikj rejieren?

• Woosoo es Gott sien Kjennichrikj eene bätre Rejierunk aus de Menschen äare?

• Waut es eenjet, waut Jehova von deejanje velangt, waut unja sien Kjennichrikj läwen wellen?

MEA NOSIEEKJEN

Läs die daut no, waut Jesus säd, wua Gott sien Kjennichrikj es.

“Es Gott sien Kjennichrikj en dien Hoat?” (Artikjel opp jw.org)

Wuarom es Jehova siene Zeijen daut wichtja, Gott sien Kjennichrikj tru to sennen, aus de menschelje Rejierungen?

Gott sien Kjennichrikj tru sennen (1:43)

Unjasto die daut, waut de Schreft von de 144 000 sajcht, waut Jehova jewält haft toom met Jesus toop rejieren.

“Wäa woat nom Himmel komen?” (Artikjel opp jw.org)

Waut holp eene Fru em Jefenkjnis entoseenen, daut Gott de eensje Hopninj es fa dise Welt?

“Ekj lieed, woo de Ojjerajchtichkjeit wudd opphieren” (Woat waka!, Nowamba 2011)

Jesus lieed siene Jinja, daut dee sullen kjeen Poat “von dise Welt” sennen (Johanes 15:19). Daut bediet, sikj opp kjeenem siene Sied to stalen enne Politikj un uk nich, wan doa Kjrich es. Oba daut es nich emma leicht un veleicht haben se sikj domm äwa ons. Woo kjenn wie Jehova Gott tru bliewen un ons opp kjeenem siene Sied stalen?

1. Woo denkjen woare Christen äwa menschelje Rejierungen?

Christen respakjten de Rejierunk. Wie doonen daut, waut Jesus säd: Wie jäwen “dän Kjeisa, waut am traft”. Daut bediet, daut wie de Jesazen von daut Launt nokomen, soo aus Taks betolen (Markus 12:17). De Schreft lieet, daut de menschelje Rejierungen bloos rejieren kjennen, wäajen Jehova daut toolat (Reema 13:1). Un wie weeten, daut dee weinja Macht haben aus Gott. Bloos ons Gott un sien himlischet Kjennichrikj kjennen de Menschen äare Trubbels leesen.

2. Woo kjenn wie wiesen, daut wie ons opp kjeene Sied stalen?

Krakjt soo aus Jesus sikj nich mank de Politikj mischt, doo wie daut uk nich. Aus de Menschen sagen, daut Jesus een Wunda jedonen haud un am dan wullen toom Kjennich moaken, leet hee daut nich (Johanes 6:15). Woosoo nich? Na, hee säd je lota: “Mien Kjennichrikj es nich von dise Welt” (Johanes 18:36). Un wiels wie Jesus siene Nofolja sent, stal wie ons uk opp kjeenem siene Sied. Biejlikj moak wie nich biem Kjrich met (läs Micha 4:3). Wie respakjten de Laundestieekjens, soo aus de Flag, oba wie bäden dee nich aun (1. Johanes 5:21). Un wie stalen ons uk nich opp de Sied von eene polietische Partei ooda wäm, waut sikj väaschlonen lat un schaufen uk nich jäajen dee. Soo wies wie, daut wie Gott siene Rejierunk, aulsoo sien Kjennichrikj, gaunz tru sent.

DOLLA UNJASTONEN

3. Woare Christen stalen sikj opp kjeenem siene Sied

Jesus un siene Jinja sent ons Väabilt. Läst Reema 13:1, 5-7 un 1. Petrus 2:13-14. Dan kjikjt daut VIDEO un got toop de Froagen derch, waut hia aunjejäft sent.

VIDEO: Woare Christen stalen sikj opp kjeene Sied (Poat 1) (4:28)

• Wuarom sell wie de Rejierungen respakjten?

• Woo kjenn wie wiesen, daut wie dee unjadon sent?

Eenjemol, wan doa Kjrich es, sajen eenje Lenda, daut see sikj opp kjeene Sied stalen, oba opp irjenteene Wajch unjastetten see beid Sieden. Waut meent daut werkjlich, sikj opp kjeenem siene Sied stalen? Läst Johanes 17:16. Dan kjikjt daut VIDEO un got toop de Froag derch, waut hia aunjejäft es.

VIDEO: Woare Christen stalen sikj opp kjeene Sied (Poat 2) (3:11)

• Waut meent daut, sikj opp kjeenem siene Sied to stalen?

Waut saul eena doonen, wan eene Rejierunk eenem bemotten well, waut to doonen, waut jäajen Gott sien Jesaz es? Läst Aposteljeschicht 5:28-29. Dan kjikjt daut VIDEO un got toop de Froagen derch, waut hia aunjejäft sent.

VIDEO: Woare Christen stalen sikj opp kjeene Sied (Poat 3) (1:18)

• Wan Menschen een Jesaz oppmoaken, waut jäajen Gott sien Jesaz es, wäms Jesaz sell wie dan jehuarsom sennen?

• Felt die waut bie, wua Christen nich wudden de Rejierungen jehorchen?

4. Stal die opp kjeenem siene Sied; nich enne Jedanken uk nich met Woakjen

Läst 1. Johanes 5:21. Dan kjikjt daut VIDEO un got toop de Froagen derch, waut hia aunjejäft sent.

VIDEO: Wuarom woare Christen Moot brucken – Toom sikj opp kjeenem siene Sied stalen (2:49)

• Wuarom wia Ayenge en daut Video sikj eenich, nich bie de polietische Partei ooda Laundesveierunk mettomoaken, soo aus de Flag bejreessen?

• Jleefst du, siene Entscheidunk wia weis?

Waut kaun ons daut noch schwoa moaken, ons opp kjeenem siene Sied to stalen? Kjikjt daut VIDEO un dan got toop de Froagen derch, waut hia aunjejäft sent.

VIDEO: Goode Lieren ut dän Woaktorm – Sikj en eene oneenje Welt opp kjeenem siene Sied stalen (5:16)

• Woo kjenn wie wiesen, daut wie opp kjeene Sied sent, wan een Launt jäajen daut aundre Sport spält?

• Woo wies wie, daut wie ons opp kjeene Sied stalen, wan de Entscheidungen von de Politikj ons toom gooden ooda toom schlajchten sennen kunnen?

• Waut kaun daut aun ons doonen, waut se enne Norechten sajen ooda waut aundre to ons sajen?

KAPITEL TOOPJEFOT

Christen strenjen sikj sea aun, sikj bie polietische Sachen opp kjeenem siene Sied to stalen; nich enne Jedanken, nich enne Woakjen un uk nich met Wieed.

Waut hast du jelieet?

• En waut mott wie de menschelje Rejierungen jehorchen?

• Wuarom stal wie ons enne Politikj opp kjeenem siene Sied?

• Waut kaun ons daut schwoa moaken, ons opp kjeenem siene Sied to stalen?

MEA NOSIEEKJEN

Waut mott wie eenjemol veleicht oppjäwen, om ons opp kjeenem siene Sied to stalen?

Jehova haft ons kjeenmol em Stäakj jeloten (3:14)

Woo kjennen Famieljes sikj aul em verut reedmoaken, sikj opp kjeenem siene Sied to stalen?

Ons opp kjeenem siene Sied stalen – aulentiet un aulawäajen (4:25)

Wuarom es daut nich de jratste Iea, fa eenem sien Launt entostonen?

“Fa Gott es aules mäajlich” (5:19)

Wan du äwa de Oabeit entscheiden motst, dan äwalaj, woo du daut väabieejen kaust, een Poat von de Welt to woaren.

“Een jiedra woat siene ieejne Laust droagen” (De Woaktorm, 15. Moaz 2006)