Jesus lat sikj no sien oppstonen vom Doot von dän Apostel Tomas un aundre Jinja seenen un hee haft eene Wund aun siene Haunt

Stunt Jesus met eenen menscheljen Kjarpa vom Doot opp ooda aus Jeist?

Waut de Schreft doatoo sajcht

De Schreft sajcht von Jesus: “Em Kjarpa wort hee doot jemoakt, oba em Jeist wort hee laewendij jemoakt” ooda “vom Doot oppjewakjt” (1. Petrus 3:18, NTR; Aposteljeschicht 13:34, PB; 1. Korinta 15:45; 2. Korinta 5:16).

Jesus selfst räd doavon, daut hee nich met eenen Kjarpa von Fleesch un Bloot wudd vom Doot oppstonen. Hee säd, hee wudd de Menschen erleesen, derch “mien Fleesch, daut ekj doatoo jäw, daut de Welt läwen kaun” (Johanes 6:51, PB; Matäus 20:28). Wan hee no sienen Doot wada haud sien Fleesch trigjenomen, wudd hee sien Opfa haben tonuscht jemoakt. Oba daut deed hee nich, wiels de Schreft sajcht, daut hee sien Fleesch un Bloot “een un fa aulemol” jeopfat haud (Hebräa 9:11-12, PB).

Woo kunnen Jesus siene Jinja am oba seenen, wan hee aus Jeist vom Doot oppstunt?

Enjel kjennen sikj met eenen Menschenkjarpa seenen loten. Biejlikj deeden waut Enjel daut ea mol soo un dee eeten un drunken mau rajcht met de Menschen toop (1. Mose 18:1-8; 19:1-3). Oba daut wieren doawäajen noch emma Jeistawäsen un dee kunnen von de Ieed wada veloten (Rechta 13:15-21).
No sien oppstonen vom Doot, neem Jesus uk eene menschelje Jestault aun, soo aus eenje Enjel daut ea uk aul jedonen hauden. Oba wiels hee een Jeist wia, kunn hee haustich verendach komen un uk wada veschwinjen (Lukas 24:31; Johanes 20:19, 26). Jesus leet sikj nich emma met dänselwjen Kjarpa seenen. Doawäajen kjanden siene goode Frind am ieescht mau dan, wan hee waut säd ooda deed (Lukas 24:30-31, 35; Johanes 20:14-16; 21:6-7).
Aus Jesus sikj von dän Apostel Tomas seenen leet, deed hee daut met eenen Kjarpa, waut Wunden haud. Daut deed hee toom Tomas sienen Gloowen stoakjen, wiels dee doaraun twieweld, aus Jesus wia vom Doot oppjestonen (Johanes 20:24-29).