Wuarom sust du daut weeten?
Wuarom es daut wichtich to weeten, aus daut eenen Schepfa jeft? Wan du die secha jeworden best, daut et eenen aulmajchtjen Gott jeft, dan woascht du die daut uk wellen unjastonen, aus de Schreft von dän kjemt. Wan du opp de Schreft vetrust, dan woascht du daut beläwen, waut hia aunjejäft es:
Dien Läwen woat eenen Senn haben
WAUT DE SCHREFT SAJCHT: “Hee deed junt goodet, jeef junt Räajen vom Himmel un fruchtboare Tieden. Hee jeef junt jenuach to äten un muak junt daut Hoat froo!” (Aposteljeschicht 14:17).
WAUT DAUT BEDIET: Aul daut scheene en de Natua es een Jeschenkj von dän Schepfa. Du woascht daut noch väl mea räakjnen, wan du utfinjst, woo sea dee om die bekjemmat es, waut aul daut jemoakt haft.
Du woascht gooden Rot finjen fa aules en dien Läwen
WAUT DE SCHREFT SAJCHT: “Jie [woaren] daut jerajcht sennen, nom rajcht seenen, fromm sennen un aule goode Wäaj vestonen” (Spricha 2:9).
WAUT DAUT BEDIET: Gott weet, waut die fält toom schaftich sennen, wäajen hee die jemoakt haft. Wan du en de Schreft läst, woascht du väl lieren, waut die em Läwen halpen woat.
Diene Froagen woaren beauntwuat woaren
WAUT DE SCHREFT SAJCHT: “[Du] woascht Gotteserkjantnis finjen” (Spricha 2:5).
WAUT DAUT BEDIET: Wan du die daut unjasteist, aus daut eenen Schepfa jeft, dan woascht du de Auntwuaten to dise wichtje Froagen kjrieen: To waut läw wie? Wuarom jeft daut soo väl Lieden? Waut woat met ons, wan wie stoawen? De rajchte Auntwuaten doatoo finjst du enne Schreft.
Du kjrichst eene Hopninj fa de Tookunft
WAUT DE SCHREFT SAJCHT: “Ekj hab daut goot äwajedocht, sajcht de HAR, un waut ekj fa junt jeplont hab, es Fräd un Erfolch, un nich Schoden. Ekj well junt eene Tookunft un Hopninj jäwen” (Jeremia 29:11).
WAUT DAUT BEDIET: Gott vesprakjt, daut hee met aul daut Schlajchte, met daut Lieden un dän Doot boolt een Enj moaken woat. Wan du opp Gott siene Vespräakjungen vetrust, woat dee Hopninj die halpen, met Moot aun diene Trubbels nauntogonen.