35. KAPITEL
Woo eena kaun goode Entscheidungen moaken
Wie motten foaken waut entscheiden. Un eenjet kaun fa ons goot ooda schlajcht sennen, ons Jehova noda brinjen ooda ons von am aufbrinjen. Eena mott biejlikj entscheiden, wua eena wonen well, woo eena sien Läwen moakt ooda aus eena sikj well befrieen. Wan wie goode Entscheidungen moaken, dan kaun ons daut scheen gonen un Jehova freit sikj.
1. Woo kaun de Schreft die halpen, goode Entscheidungen to moaken?
Ea du eene Entscheidunk moakst, bäd to Jehova un läs de Schreft toom seenen, woo hee doaräwa denkjt (läs Spricha 2:3-6). Eenjemol jeft Jehova ons een gaunz dieteljet Jeboot. Dan wudd et daut baste sennen, dit Jeboot notokomen.
Oba waut, wan daut en de Schreft nich een kloaret Jeboot jeft, waut sajcht, waut wie doonen sellen? Jehova wiest die doawäajen “dän Wajch, dän du gonen saust” (Jesaja 48:17). Woo? Veleicht jeft daut eenen Gruntsauz, waut die halpen kaun. Gruntsauzen sent Grunträajlen ooda Gruntwoarheiten, waut eenem wiesen, woo Gott denkjt un waut hee feelt. Foaken woa wie en, woo Gott äwa eene Sach denkjt, wan wie irjenteene Jeschicht en de Schreft läsen. Dan kjenn wie soone Entscheidungen moaken, waut am jefaulen.
2. Äwa waut saust du nodenkjen, ea du eene Entscheidunk moakst?
De Schreft sajcht: “Een vestendja Maun bedenkjt sikj siene Wäaj” (Spricha 14:15). Daut meent: Ea du waut entscheiden deist, sust du die de Tiet nämen, äwa de Mäajlichkjeiten notodenkjen, waut du hast. Äwalaj: “Woon biblischa Gruntsauz kaun mie halpen? Waut woat mie ennalich Fräd jäwen? Waut woat miene Entscheidunk aun aundre doonen?” Un daut wichtichste: “Woat Jehova daut schaftich moaken?” (5. Mose 32:29).
Jehova haft daut Rajcht ons to sajen, waut goot un schlajcht es. Wan wie siene Jesazen un Gruntsauzen goot kjanen un ons eenich sent dee notokomen, dan kjrie wie een schoapet Jewessen. Ons Jewessen es daut, waut ons weeten lat, wan waut rajcht ooda orrajcht es (Reema 2:14-15). Een schoapet Jewessen halpt ons, goode Entscheidungen to moaken.
DOLLA UNJASTONEN
Unjasto die daut noch bäta, woo de biblische Gruntsauzen un daut Jewessen ons bie Entscheidungen halpen.
3. Nemm de Schreft to Help
Woo kjennen de Gruntsauzen en de Schreft ons halpen, wan wie Entscheidungen moaken? Kjikjt daut VIDEO un dan got toop de Froagen derch, waut hia aunjejäft sent.
Waut es de friea Wellen?
Wuarom jeef Jehova ons dän frieen Wellen?
Waut vonne Help jeef Jehova ons, daut wie goode Entscheidungen moaken kjennen?
Toom eenen biblischen Gruntsauz, ooda eene Grunträajel, seenen, läst Efeesa 5:15-16. Dan rät doaräwa, woo eena de Tiet kaun fein utnutzen, ...
wan eena well pinkjlich de Schreft läsen.
wan eena sikj well aus Poa Lied, aus Elren, aus Sän ooda Dochta vebätren.
wan eena well no de Toopkomes wanken.
4. Eew dien Jewessen toom goode Entscheidungen moaken
Wan enne Schreft een gaunz kloaret Jeboot es, dan kaun daut leicht sennen, daut rajchte entscheiden. Oba waut doo wie, wan doa nich soon Jeboot es? Kjikjt daut VIDEO un dan got toop de Froag derch, waut hia aunjejäft es.
Waut deed de Sesta en daut Video toom äa Jewessen eewen un toom soone Entscheidunk moaken, waut Jehova jefoll?
Woosoo wudd wie nich sellen aundre froagen, fa ons to entscheiden? Läst Hebräa 5:14 un dan got toop dise Froagen derch:
Waut mott wie selfst weeten to unjascheeden, wan daut uk väl leichta wudd sennen, sestwäm froagen, fa ons to entscheiden?
Waut vonne Help jeft daut toom ons Jewessen oppschoapen un goode Entscheidungen moaken?
Ons Jewessen kaun ons soo aus eene Launtkoat dän Wajch em Läwen wiesen
5. Acht aundre äa Jewessen
Menschen doonen nich aules äwareen. Woo kjenn wie wiesen, daut wie aundre äa Jewessen achten? See wie mol twee Biespels:
1. Biespel: Eene Sesta jleicht daut sea sikj opptofiksen un dan trakjt dee no eene aundre Vesaumlunk, wua väl Sestren daut baudat, wan sikj wäa oppfikst.
Läst Reema 15:1 un 1. Korinta 10:23-24 un dan got toop dise Froagen derch:
No dise Varzhen no, waut woat de Sesta woomäajlich entscheiden? Waut wurscht du doonen, wan du met wäm toop wieescht un dän sien Jewessen sajcht äwa eene Sach nä un dient sajcht oba jo?
2. Biespel: Een Brooda weet, daut et no de Schreft no nich orrajcht es, met Mot stoakjet to drinkjen. Oba hee woat sikj doawäajen eenich, daut nich to doonen. Dan woat hee enjelot un sitt, daut de Breeda stoakjet drinkjen.
Läst Liera 7:16 un Reema 14:1, 10 un dan got toop dise Froagen derch:
No dise Varzhen no, waut woat de Brooda woomäajlich entscheiden? Waut wurscht du doonen, wan du wäm sitst waut doonen, waut dien Jewessen die nich toolat?
Waut halpt ons, rajcht to entscheiden?
1. Froag Jehova no Help, daut du seenen kaust, waut du doonen saust (Jakobus 1:5).
2. Sieekj enne Schreft ooda en onse Bieekja no Gruntsauzen, waut die halpen kjennen. Du kaust uk aundre Christen no Rot froagen.
3. Denkj doaräwa no, waut diene Entscheidunk aun dien Jewessen ooda aun aundre äa Jewessen doonen woat.
WAUT EENJE SAJEN: “Eena kaun je doonen, waut eena well. Waut jeit eenem daut aun, waut aundre denkjen?”
Wuarom sell wie nich endoontich sennen, woo Gott denkjt un uk nich, woo aundre Menschen denkjen?
KAPITEL TOOPJEFOT
Wie moaken goode Entscheidungen, wan wie ons daut unjastonen, woo Jehova äwa eene Sach denkjt un dan äwalajen, woo onse Entscheidunk aundre halpen ooda schoden kunn.
Waut hast du jelieet?
Woo kaust du soone Entscheidungen moaken, waut Jehova jefaulen?
Woo kaust du dien Jewessen oppschoapen?
Woo kaust du opp aundre Menschen äa Jewessen achten?
MEA NOSIEEKJEN
Woo kaust du soone Entscheidungen moaken, waut die Gott noda brinjen?
“Moak soone Entscheidungen, waut Gott ieren” (De Woaktorm, 15. Aprell 2011)
Lia mea äwa woo Jehova ons Rot jeft.
Kjikj mol, waut eenen Maun holp, eene schwoare Entscheidunk to moaken.
Lia mea äwa woo du Jehova jefaulen kaust, wan daut fa irjenteene Sach uk nich een dieteljet Jesaz jeft.
“Fält ons fa aules een Jeboot ut de Schreft?” (De Woaktorm, 1. Dezamba 2003)