3. Pauss no diene Jesuntheit opp

Fa Christen, waut sikj Gott hanjejäft haben, es aules en äa Läwen Poat von äaren Deenst fa Jehova. Daut es soo, aus wan dee Gott äaren Kjarpa aus een Opfa jäwen. Läst Reema 12:1-2 un dan got toop dise Froagen derch:

• Wuarom wurscht du sellen no diene Jesuntheit oppaussen?

• Woo kaust du daut biejlikj doonen?

En dien Bibelstudium hast du välet äwa Jehova jelieet. Un veleicht hast du uk must wesset endren toom daut nokomen, waut du jelieet hast. Oba doa kunn doawäajen noch waut sennen, waut die trigjhelt, die Jehova hantojäwen un die deepen to loten. En dit Kapitel woa wie eenjet seenen, waut eenem kunn trigjhoolen un waut eena doamet doonen kaun.

1. Woo väl motst du weeten, ea du die kaust deepen loten?

Ea du die kaust deepen loten, motst du “de Woarheit kjanen lieren” (1. Timotäus 2:4). Doa es oba nich met jesajcht, daut du nu motst kjennen de gaunze Schreft utlajen, daut du die kaust deepen loten. Mau rajcht soone Christen, waut aul lang jedeept sent, lieren noch emma mea (Kolossa 1:9-10). Oba du motst de biblische Gruntlieren vestonen. Un de Eltestasch woaren die halpen to seenen, aus du aul jenuach weetst.

2. Waut es eenjet, waut du ver de Doop doonen motst?

Ea du die kaust deepen loten, motst du een Leetsennen haben un omkjieren (läs Aposteljeschicht 3:19, JHF). Daut meent, daut die diene Sinden von Hoaten leet sent un daut du Jehova om Vejäwunk bätst. Du motst die uk gaunz eenich sennen, von schlajchtet wajchtobliewen un daut to doonen, waut Gott jefelt. Un dan fangst du uk aun, bie de Toopkomes mettomoaken un met de Vesaumlunk toop to prädjen.

3. Woosoo wurscht du nich sellen Angst haben, die deepen to loten?

Eenje haben Angst, daut see daut nich woaren kjennen nokomen, waut see Jehova vesproaken haben. Un daut es soo, wie moaken eenjemol Fäla, soo aus uk true Mana un Frues von de Bibeltiet deeden. Oba Jehova velangt von siene Deena nich, daut dee onen Fäla sent (läs Psalm 103:13-14). Hee freit sikj, wan du dien bastet deist un hee woat die halpen! Jehova vesechat ons uk, daut nuscht “ons von ... siene Leew scheeden” kaun (läs Reema 8:38-39).

DOLLA UNJASTONEN

4. Lia Jehova bäta kjanen

Woo goot motst du Jehova kjanen, ea du die kaust deepen loten? Du motst am soo goot kjanen, daut du am leefst un am jefaulen west. Kjikjt daut VIDEO toom seenen, woo Menschen von aulawäajen daut haben kunt doonen. Dan got toop de Froag derch, waut hia aunjejäft es.

VIDEO: Waut an bat doa brocht, sikj deepen to loten (3:56)

• Waut holp de Menschen en daut Video, sikj fa de Doop reedtomoaken?

Läst Reema 12:2 un dan got toop dise Froagen derch:

• Hast du noch irjent Twiewel äwa daut, waut de Schreft lieet ooda aus Jehova siene Zeijen de Woarheit lieren?

• Wan daut soo es, waut wurscht du dan kjennen doonen?

5. Lot die von nuscht trigjhoolen, die deepen to loten

Wan wie ieescht bat doa sent, ons Jehova hantojäwen un ons deepen to loten, dan komen bie aulem Schwierichkjeiten opp. Toom een Biespel seenen, kjikjt daut VIDEO un dan got toop de Froagen derch, waut hia aunjejäft sent.

VIDEO: De Leew fa Jehova holp mie, Schwierichkjeiten to äwakomen (5:22)

• Met waut vonne Schwierichkjeiten must Narangerel en daut Video foadich woaren toom Jehova deenen?

• Woo holp de Leew fa Jehova ar, daut see daut kunn?

Läst Spricha 29:25 un 2. Timotäus 1:7 un dan got toop dise Froag derch:

• Waut jeft ons dän Moot, Schwierichkjeiten to äwakomen?

6. Vetru opp Jehova siene Help

Jehova woat die halpen, daut du am jefaulen kaust. Kjikjt daut VIDEO un dan got toop de Froagen derch, waut hia aunjejäft sent.

VIDEO: Jehova Gott woat die halpen (2:50)

• Waut hilt dän Bibelschiela en daut Video doavon auf, sikj deepen to loten?

• Waut holp am, dolla opp Jehova to vetruen?

Läst Jesaja 41:10, 13 un dan got toop dise Froag derch:

• Wuahäa kaust du die secha sennen, daut du daut Vespräakjen hoolen kaust, wan du die Jehova hanjefst?

7. Woa noch dankboara fa Jehova siene Leew

Je dolla du doaräwa nodenkjst, woo sea Jehova die leeft, je dankboara woascht du sennen. Un dan woascht du am uk wellen fa emma deenen. Läst Psalm 40:6 un dan got toop dise Froag derch:

• Fa woone Säajnungen von Jehova best du besonda dankboa?

De Profeet Jeremia leewd Jehova un dän sien Wuat. Un fa am wia daut uk eene groote Iea, daut hee fa Jehova enstonen kunn. Hee säd: “Dien Wuat jeef mie Freid bat deep em Hoat. Ekj wort en dienen Nomen jeroopt, HAR, Gott” (Jeremia 15:16). Got toop dise Froagen derch:

• Wuarom es daut eene besondre Iea, eent von Jehova siene Zeijen to sennen?

• West du die deepen loten un eent von Jehova siene Zeijen woaren?

• Es doa irjentwaut, waut die noch trigjhelt?

• Waut jleefst du, motst du noch doonen, daut du bat de Doop kjemst?

KAPITEL TOOPJEFOT

Met Jehova siene Help kaust du aule Schwierichkjeiten äwakomen, waut die kunnen von de Doop aufhoolen.

Waut hast du jelieet?

• Woo väl motst du ut de Schreft weeten toom die deepen loten?

• Waut motst du em Läwen veleicht endren, daut du die kaust deepen loten?

• Wuarom wurscht du die nich sellen ut Angst trigjhoolen?

MEA NOSIEEKJEN

Unjasto die daut, waut die saul bat doa brinjen, die deepen to loten.

“Best du aul reed, die deepen to loten?” (De Woaktorm, Moaz 2020)

Lia, woo eena met Schwierichkjeiten kaun foadich woaren, waut eenem kunnen trigjhoolen.

“Wuarom sull ekj mie nich deepen loten?” (De Woaktorm, Moaz 2019)

See, woo een Maun groote Schwierichkjeiten kunn äwakomen toom sikj deepen loten.

Wuarom latst du die nich deepen? (1:10)

Een Maun, waut Ataa heet, wäad sikj ieeschtlich, sikj deepen to loten. See, waut am bat doa brocht, daut doch to doonen.

Sie ekj daut opp iernst wieet? (7:21)