1. Waut von strenjen Rot jeef de Apostel Paulus de jesaulwde Christen?

DE Apostel Paulus säd: “Stalt junt nich soo han aus dise Welt deit” (Reem. 12:2). Hee säd daut to de Christen en siene Tiet. Wuarom jeef hee Mana un Frues, waut sikj Gott hanjejäft hauden un met dän heiljen Jeist jesaulft wieren, soonen strenjen Rot? (Reem. 1:7).

2-3. (a) Woo well de Soton ons von Jehova aufbrinjen? (b) Woo kjenn wie ons von Iedeeen loosmoaken, waut “sea faust” en ons bennen sent?

² Paulus muak sikj Sorjen, wäajen eenje Christen sikj aul hauden hinjaret Licht fieren loten von de jefäadelje Iedeeen von dän Soton siene Welt (Efs. 4:17-19). Ons kunn daut biejlikj soo gonen. De Soton es de Harscha äwa dise Welt un deit aules, waut dee kaun, om ons von Jehova auftobrinjen. Wan dee biejlikj enwoat, daut wie wellen bekaunt sennen ooda ons äwa aundre erhäwen, dan kaun dee daut utnutzen toom ons opp siene Sied kjrieen. Hee brukt woomäajlich uk daut, waut wie tus ooda enne School ooda von de Menschen rom ons jelieet haben, daut wie aunfangen sellen, soo to denkjen, aus hee daut haben well.

EENE “NIEE JESENNUNK” KJRIEEN

4. Waut musten väle von ons doonen, aus dee de Woarheit aunneemen?

⁴ Denkjt die daut noch, waut du endren must, aus du de Woarheit ut Gott sien Wuat kjanen lieezhd un die eenich wortst, Jehova to deenen? Väle von ons musten met schlajchte Woakjen opphieren (1. Kor. 6:9-11). Woo dankboa wie doch sent, daut Jehova ons doamet holp!

5. Waut fa twee Sachen sell wie no Reema 12:2 no doonen?

⁵ Wie sellen oba kjeenmol denkjen, daut wie ons nu nich mea endren brucken. Ea wie ons deepen leeten, hieed wie opp, schwoare Sinden to begonen. Oba wie motten wieda doaraun schaufen, daut wie nuscht doonen, waut wada kunn to soone Sinden fieren. Woo kjenn wie daut? Paulus sajcht: “Stalt junt nich soo han aus dise Welt deit. Jie sellen derch june niee Jesennunk veendat woaren” (Reem. 12:2). No dit no mott wie tweeatlei doonen. Ieeschtens sell wie ons “nich soo han[stalen]” aus dise Welt, ooda nich soo denkjen aus dee. Un tweedens sell wie derch onse niee Jesennunk “veendat woaren”.

6. Waut lia wie von Jesus siene Wieed en Matäus 12:43-45?

⁶ Wan Paulus sajcht, daut wie sellen veendat woaren, dan es doa mea met en, aus bloos daut butaliche to endren. Doa es aules met en. (See dän Kausten “Veendat ooda vekjleet?”) Wie motten eene niee Jesennunk kjrieen, aulsoo onse deepste Jedanken, Jefeelen un Wenschen endren. Doawäajen sull wie aula äwalajen: “Doo ekj mie bloos von buten endren toom een Christ sennen ooda enda ekj uk mien Hoat un mien denkjen?” Daut es een groota Unjascheet. En Matäus 12:43-45 moakt Jesus dietlich, waut wie doonen sellen (läs). Doavon kjenn wie waut wichtjet lieren: Daut es nich jenuach, orrajchte Jedanken loostowoaren; wie motten uk lieren, soone Jedanken to haben, waut Gott jefaulen.