2. KAPITEL

De Schreft jeft ons eene scheene Hopninj

Jedrekjte Utgow

Aulawäajen oppe Welt motten de Menschen met schwoaret foadich woaren. Daut kaun dee truarich moaken, Sorjen ooda mau rajcht Weedoag jäwen. Best du mol soone Tiet derchjegonen? Veleicht motst du lieden, wäajens du krank best ooda doa es wäa jestorwen, dän du väl jeräakjent hast. Un dan denkjst du veleicht soo: “Woat daut Läwen noch mol bäta woaren?” De Schreft sajcht, jo.

1. Waut vonne Hopninj jeft de Schreft ons?

De Schreft sajcht ons, wuarom daut enne Welt soo väl schwoaret jeft. Oba dee sajcht ons uk, daut et bloos noch fa een Stootje es un dan woat et wajch sennen. Gott vesprakjt ons, daut hee ons woat “eene Tookunft un Hopninj jäwen” (läs Jeremia 29:11-12). Waut Gott vesproaken haft, halpt ons, met de vondoagsche Trubbels foadich to woaren un mootich to bliewen un fa emma Freid to haben.

2. Waut vesprakjt de Schreft ons, woo daut Läwen lota woat sennen?

De Schreft sajcht: “Doa woat kjeen Doot ooda Trua ooda Hielen ooda Weedoag mea sennen” (läs Openboarunk 21:4). Wan ons daut knaup jeit, ons orrajcht behaundelt woat, wan wie krank sent ooda wan doa wäa stoaft, dan kaun ons daut hopninjsloos moaken. Aul daut woat et nich mea jäwen. De Menschen woaren fa emma een scheenet Läwen haben en een Paradies oppe Ieed.

3. Woo kaust du die secha sennen, aus dit Vespräakjen werkjlich komen woat?

Een deel Menschen wenschen sikj goode Sachen, oba dee sent sikj nich secha, aus dee daut uk woaren kjrieen. Oba waut de Schreft vesprakjt, es gaunz aundasch. Wie kjennen ons secha moaken, waut dee sajcht, wan wie en de Schreft forschen (Aposteljeschicht 17:11). Wan du die daut unjasteist, waut de Schreft sajcht, dan woascht du selfst seenen kjennen, aus du daut jleewen kaust, waut de Schreft vesprakjt.

DOLLA UNJASTONEN

See mol eenjet, waut de Schreft ons fa lota vesprakjt. Un see uk, woo de Hopninj ut de Schreft Menschen nu aul halpt.

Miere Bilda: Hia woat aufjebilt, woo daut Läwen vondoag es un met daut vejlikjt, waut de Schreft vesprakjt, woo daut lota sennen woat. De Bilda komen unjen noch eemol väa

4. De Schreft vesprakjt ons een scheenet Läwen onen Enj

Kjikj no de Vespräakjungen ut de Schreft, waut hia unjen oppjerieecht sent. Woone von dee sent fa die besonda un wuarom?

Läst de Bibelvarzhen, waut bie de Vespräakjungen aunjejäft sent, un dan denkjt äwa dise Froagen no:

Waut denkjst du, kjennen dise Bibelvarzhen eenem Hopninj jäwen? Kjennen dee wäm von diene Famielje ooda Frind Hopninj jäwen?

Denkj mol han, du läfst en eene Welt, wua daut soo es aus dit:

KJEENA WOAT MEA . . .	JIEDA EENA WOAT . . .
Weedoag haben ooda wäajen daut Ella schwak sennen ooda stoawen motten (Jesaja 25:8).	seenen, woo siene leewe Aunjehieeje vom Doot oppstonen toom wada oppe Ieed läwen (Johanes 5:28-29).
krank woaren ooda behindat sennen (Jesaja 33:24; 35:5-6).	gaunz jesunt sennen un sikj junk feelen (Hiob 33:25).
orrajcht behaundelt woaren (Jesaja 32:16-17).	mea aus jenuach to äten haben, een jemieteljet Tus haben un noch eene scheene Oabeit (Jesaja 30:23; 65:21-22).
wäajen Kjrich lieden motten (Psalm 46:10).	gaunz en Fräden läwen kjennen (Psalm 37:11).
motten met schwoare Jedanken jeploacht sennen (Jesaja 65:17).	fa emma een scheenet Läwen haben (Psalm 37:29).

Een Jung, waut ea krank wia, es nu jesunt un deit siene Mame omfoten

Een Maun, waut ea oolt wia, es nu junk un fieet eene Mestkoa voll Jreens

5. De Hopninj ut de Schreft kaun ons Läwen endren

Väl Menschen sent mootloos ooda oajren sikj, wan rom an soo väl schlajchtet passieet. Un eenje strieden dan doafäa, Sachen proowen to endren. See, woo Menschen daut nu aul halpen kaun, waut de Schreft vesprakjt, daut aules woat bäta woaren. Kjikjt daut VIDEO un dan got toop dise Froagen derch.

VIDEO: Ekj wull jäajen Ojjerajchtichkjeit strieden (4:07)

Miere Bilda: Poats von daut Video “Ekj wull jäajen Ojjerajchtichkjeit strieden”. 1. Rafika deit Boomwoll plekjen, aus see junk wia, met äare Sort Menschen toop. 2. Rafika es toom ieeschte Mol opp eenen Kongress von Jehova siene Zeijen un kaun äa Wunda nich loten, aus see sitt, daut doa veschiedne Sorten Menschen veeent toop sent

Waut wia Rafika em Wäaj, soo aus daut Video wees?
Wan de Menschen uk nich opphieeden, sikj orrajcht to behaundlen, woo holp de Schreft ar doawäajen, aundasch to denkjen?

De Hopninj, waut de Schreft ons jeft, kaun ons halpen, nich mootloos to woaren un met daut schwoare en ons Läwen foadich to woaren. Läst Spricha 17:22 un Reema 12:12 un dan got toop dise Froagen derch:

Denkjst du, daut de Hopninj, waut wie en de Schreft finjen, dien Läwen nu aul endren kaun? Un wuarom?

WAUT EENJE SAJEN: “Aul dit goode woa wie hia oppe Ieed kjeenmol beläwen.”

Wuarom jleefst du es daut needich, daut wie ons daut unjastonen, woo daut doamet es?

KAPITEL TOOPJEFOT

De Schreft vesprakjt ons een scheenet Läwen fa lota. Un dise Hopninj halpt ons nu aul, daut schwoare derchtogonen.

Waut hast du jelieet?

Wuarom fält de Menschen daut aun Hopninj?
Waut sajcht de Schreft äwa de Tiet, waut noch komen woat?
Woo kaun de Hopninj fa lota ons nu aul halpen?

Woonen Dotem dit Kapitel derch wia:

Nemm die dit väa

Läs de Bibelvarzhen, waut en dit Kapitel aunjejäft sent, un soo woascht du mea von daut lieren, waut de Schreft ons vesprakjt.

Noch aundret:

Nemm die noch aundret väa

MEA NOSIEEKJEN

Lia, woo de Hopninj die halpen kaun, wan du daut schwoa hast.

“Wua kaun eena Hopninj finjen?” (Woat waka!, 22. Aprell 2004)

See mol, woo de Hopninj deejanje halpen kaun, waut eene Krankheit haben, waut nich wajchjeit.

“Kaun de Schreft eenem halpen, met eene Krankheit foadich to woaren?” (Artikjel opp jw.org)

Wan du dit Musikj-Video sitst, dan denkj mol, woo daut wudd sennen, wan du met diene Famielje toop wurscht em Paradies sennen un daut scheene Läwen haben, waut de Schreft vesprakjt.

Woo scheen woat daut sennen (3:37)

Läs von eenen Mensch, waut doafäa street, de Sachen enne Welt to endren; un woo sien Läwen endad, aus hee de Hopninj ut de Schreft kjanen lieed.

“Nu weet ekj, daut et nich aun mie es, de Welt to endren” (De Woaktorm, 1. Juli 2013)