48. KAPITEL
Wäl die goode Frind
Wan eena goode Frind haft, dan jeit eenem daut bäta un dee halpen eenem uk, wan eenem daut schlajcht jeit. Oba de Schreft sajcht ons, daut nich jieda eena een gooda Frint es. Woo kaust du die dan goode Frind wälen? Denkj mol aun dise Froagen.
1. Waut woaren de Frind, waut du die wälst, aun die doonen?
Wie Menschen woaren leicht soo aus dee, met dee wie toop sent. Daut kaun toom gooden ooda toom schlajchten sennen; endoont aus wie nu werkjlich met dee toop sent ooda bloos äwa Internet. Daut es soo aus de Schreft sajcht: “Wäa daut met weise Menschen helt, woat weis, oba wäa met Noaren vekjieet [met soone, waut Jehova nich leewen], woat Schoden lieden” (Spricha 13:20). Soone Frind, waut Jehova leewen un am deenen, kjennen die halpen, dicht bie Jehova to bliewen un goode Entscheidungen to moaken. Oba wan diene goode Frind nich Poat sent von de Vesaumlunk, dan kjennen dee die von Jehova aufbrinjen. Krakjt doawäajen sajcht de Schreft, daut wie ons sellen goode Frind sieekjen! Wan onse Frind Gott leewen, dan kjemt ons daut togood un dee uk. Dan es daut soo aus 1. Tessalonicha 5:11 sajcht: “Moakt junt unjarenaunda Moot un but junt unjarenaunda opp”.
2. Woo woat Jehova äwa dee Frind denkjen, waut du die wälst?
Jehova selfst paust opp, waut vonne Frind hee sikj wält. Hee “es de jerajchte sea noaun” (Spricha 3:32). Woo wudd Jehova sikj doaräwa feelen, wan wie ons soone Frind wälden, waut am nich leewden? Dan wudd hee sea enteischt sennen! (Läs Jakobus 4:4.) Oba Jehova freit sikj, wan wie am noda komen un von schlajchte Jesalschoft wajchbliewen un soone Frind haben, waut am leewen. Dan well hee uk ons Frint sennen (Psalm 15:1-4).
DOLLA UNJASTONEN
Unjasto die daut, wuarom daut soo wichtich es, de rajchte Frind to haben. Un see uk, woo du kaust goode Frind kjrieen, soone, waut fa die toom gooden sent.
3. Pauss opp fa schlajchte Jesalschoft
Soone, waut Gott nich leewen uk nich daut leewen, waut hee fa rajcht talt, sent schlajchte Jesalschoft. Kjikjt daut VIDEO un dan got toop de Froag derch, waut hia aunjejäft es.
Woo wudd wie ons kjennen met schlajchte Jesalschoft aufjäwen, onen daut entowoaren?
Läst 1. Korinta 15:33 un dan got toop dise Froagen derch:
Waut von Mensch kunn fa die schlajchte Jesalschoft sennen? Wuarom?
Läst Psalm 119:63 un dan got toop dise Froag derch:
Aun waut kaust du seenen, woont goode Frind sent?
Een vefulda Aupel kaun de aundre Apel uk vedoawen. Woo kunn een schlajchta Frint die schoden?
4. Menschen, waut aundasch sent aus wie, kjennen onse goode Frind woaren
De Schreft rät von David un Jonatan. Daut wieren twee Mana von daut ieeschtemmasche Israel. Dee wieren lang nich jlikjen oolt un uk gaunz veschieden oppjewossen, un doch wieren daut groote Frind. Läst 1. Samuel 18:1 un dan got toop dise Froag derch:
Wuarom derwen onse Frind daut nich emma krakjt soo haben aus wie un krakjt soo oolt sennen?
Läst Reema 1:11-12 un dan got toop dise Froag derch:
Woo kjennen Frind, waut Jehova leewen, sikj unjarenaunda Moot toospräakjen?
See en daut Video, woo een junga Brooda opp soone Städ Frind funk, wua hee nich aun jedocht haud. Kjikjt daut VIDEO un dan got toop de Froagen derch, waut hia aunjejäft sent.
Wuarom wieren Akil siene Elren en daut Video besorcht doaräwa, waut vonne Frind hee enne School haud?
Wuarom docht hee ieeschtlich, daut et wudden goode Frind sennen?
Waut deed hee, daut hee sikj nich auleen feeld?
5. Woo du goode Frind haben kaust
Unjasto die daut, woo du kaust woare Frind finjen un woo du selfst kaust een woara Frint sennen. Kjikjt daut VIDEO.
Läst Spricha 18:24 un 27:17 un dan got toop dise Froagen derch:
Woo halpen woare Frind sikj unjarenaunda?
Hast du woare Frind, waut soo aus dit sent? Wan nich, woo kaust du soone Frind finjen?
Läst Filippa 2:4 un dan got toop dise Froag derch:
Wan du goode Frind west, dan motst du uk selfst een gooda Frint sennen. Woo kaust du daut doonen?
Toom goode Frind haben, motst du selfst een gooda Frint sennen
WAUT EENJE SAJEN: “Daut es bäta, irjentwäm toom Frint haben, aus kjeenen Frint to haben.”
Waut wurscht du dan sajen?
KAPITEL TOOPJEFOT
Wan wie ons goode Frind wälen, dan doo wie Jehova jefaulen, un daut es fa ons selfst uk goot.
Waut hast du jelieet?
Wuarom es Jehova daut nich endoont, waut vonne Frind wie haben?
Waut vonne Frind sell wie nich haben?
Woo kaust du met goode Menschen Frind woaren?
MEA NOSIEEKJEN
See, woo een gooda Frint ons en schwoare Tieden kaun halpen.
“Groote Frind woaren, ea daut Enj kjemt” (De Woaktorm, Nowamba 2019)
Äwalaj, waut du doonen kaust toom goode Frind finjen.
Waut wurscht du sellen weeten äwa Frind em Internet?
Läs de Jeschicht “Ekj wenscht mie eenen Voda”. See, wuarom een Maun sikj aundre Frind socht.
“De Schreft haft äa Läwen veendat” (De Woaktorm, 1. Aprell 2012)