Woaktorm ONLINE-BIBLIOTÄKJ
Woaktorm
ONLINE-BIBLIOTÄKJ
Plautdietsch
Ä
  • Ä
  • ä
  • BIBEL
  • BIEEKJA, BLÄDA UN HEFTA
  • TOOPKOMES
  • Waut es Gott sien Kjennichrikj?
    Een scheenet Läwen fa emma! – Help toom de Schreft noch bäta vestonen
    • 7. Gott sien Kjennichrikj haft bätre Jesazen

      De Rejierungen stalen Jesazen opp, waut äare Menschen sellen halpen un beschitzen. Krakjt soo haft Gott sien Kjennichrikj uk Jesazen, waut de Menschen doa motten nokomen. Läst 1. Korinta 6:9-11 un dan got toop dise Froagen derch:

      • Woo jleefst du, woat de Welt sennen, wan jieda eena sikj aun Gott siene Jesazen helt?a

      • Jleefst du, haft Jehova daut Rajcht, Jesazen opptostalen fa de Menschen, waut unja sien Kjennichrikj sent? Wuarom?

      • Aun waut es to seenen, daut soone Menschen, waut Gott siene Jesazen nich nokomen, sikj endren kjennen? (See Varsch 11.)

      Een Poliez helt de Foatieja opp bie eenen Kjriezwajch. Menschen von veschiednet Ella gonen äware Gauss.

      Rejierungen stalen Jesazen opp toom äare Menschen halpen un beschitzen. Oba Gott sien Kjennichrikj haft noch bätre Jesazen toom de Menschen doa beschitzen un halpen

  • Waut sajcht de Schreft äwa Sex?
    Een scheenet Läwen fa emma! – Help toom de Schreft noch bäta vestonen
    • 41. Kapitel. Een Maun un eene Fru foten sikj aune Haunt

      41. KAPITEL

      Waut sajcht de Schreft äwa Sex?

      Een deel Menschen feelen sikj nich wool, von Sex to räden. Oba wan de Schreft von Sex rät, dan sajcht dee daut jlikjtoo, oba respakjtvoll. Waut de Schreft doaräwa sajcht, es fa ons toom gooden. Un daut es je uk dietlich, wiels Jehova ons Schepfa es un weet, waut fa ons daut baste es. Hee sajcht ons, waut wie doonen sellen toom am jefaulen un waut ons halpen woat, fa emma een scheenet Läwen to haben.

      1. Woo denkjt Jehova äwa Sex?

      Sex es een Jeschenkj von Jehova. Un hee well, daut et saul waut scheenet sennen tweschen eenen Ehemaun un dän siene Ehefru. Derch dit Jeschenkj kjennen Ehelied Kjinja haben un sikj uk unjarenaunda opp eene scheene Wajch äare Leew wiesen. Daut es, wuarom Gott sien Wuat sajcht: “Hab aul diene Freid met dee, dee du die en diene Jugent frieen deetst” (Spricha 5:18-19). Jehova well haben, daut befriede Christen sikj sellen tru bliewen, un doawäajen wudden dee kjeenmol Ehebruch begonen (läs Hebräa 13:4).

      2. Waut es Huararie?

      De Schreft sajcht, daut soone, waut “Onzucht [ooda Huararie] driewen ... woaren daut Gottesrikj nich oawen” (1. Korinta 6:9-10). De Bibelschriewa, waut opp Griechisch schreewen, brukten fa Huararie daut Wuat pornéia. Bie dit Wuat es met en, (1) Sex haben tweschen soone Menschen, waut nich unjarenaunda befriet sent,a (2) Mana met Mana ooda Frues met Frues ooda (3) met Tieren. Wan wie ons “von aule Huararie friehoolen”, dan doo wie Jehova jefaulen un daut es ons selfst uk toom gooden (1. Tessalonicha 4:3).

      DOLLA UNJASTONEN

      Lia, woo du kaust von Huararie wajchbliewen un woo die daut toom gooden es, wan du een reinet Läwen fieescht.

      Josef rant von Potifar siene Fru wajch. See helt Josef sienen Mauntel en äare Haunt.

      3. Ran von Huararie wajch

      Een trua Maun, waut Josef heet, strenjd sikj sea aun, rein to bliewen. Läst 1. Mose 39:1-12 un dan got toop dise Froagen derch:

      • Wuarom rand Josef wajch? (See Varsch 9.)

      • Jleefst du, daut Josef daut rajchte entscheiden deed? Wuarom?

      Woo kjennen de junge Menschen Josef vondoag dän Dach nodoonen un von Huararie wajchranen? Kjikjt daut VIDEO.

      VIDEO: Ran von Huararie wajch (5:06)

      Jehova well haben, daut wie ons aula sellen jäajen Huararie stalen. Läst 1. Korinta 6:18 un dan got toop dise Froagen derch:

      • Waut kunn to Huararie fieren?

      • Woo kaun eena von Huararie wajchranen?

      4. Du kaust de Vesieekjunk wadastonen

      Waut kaun eenem daut schwoa moaken, de Vesieekjunk to wadastonen, Huararie to driewen? Kjikjt daut VIDEO un dan got toop de Froagen derch, waut hia aunjejäft sent.

      VIDEO: Daut Bibelläsen halpt ons, Vesieekjungen to wadastonen (3:02)

      • Waut deed de Brooda en daut Video, aus hee ieescht enwort, daut siene Jedanken un Woakjen am kunnen bat doa brinjen, siene Fru ontru to woaren?

      Mau rajcht true Christen motten sikj eenjemol aunstrenjen, äare Jedanken rein to hoolen. Woo kaust du daut väabieejen, äwa orreine Jedanken notodenkjen? Läst Filippa 4:8 un dan got toop dise Froagen derch:

      • Äwa waut vonne Sachen sell wie nodenkjen?

      • Woo kaun ons daut halpen, Vesieekjungen to wadastonen, wan wie de Schreft läsen un ons en Jehova sienen Deenst drock hoolen?

      5. Jehova siene Gruntsauzen sent ons toom gooden

      Jehova weet, waut daut baste es fa ons. Hee sajcht ons, woo wie kjennen en aules rein bliewen un woo ons daut toom gooden es. Läst Spricha 7:7-27 ooda kjikjt daut VIDEO un dan got toop de Froagen derch, waut hia aunjejäft sent.

      VIDEO: Wan eena nich väabedocht es (9:31)

      • Woo kjeem de junga Maun en eene Faul nenn? (See Spricha 7:8-9.)

      • No Spricha 7:23 un 26 no, woo schlajcht kjemt daut ut, Huararie to driewen? Wan wie rein bliewen, waut vonne Trubbels kjenn wie dan utem Stich gonen?

      • Woo kaun ons daut halpen, fa emma een scheenet Läwen to haben, wan wie rein bliewen?

      Eenje Menschen denkjen, daut et nich leeftolich es, waut de Schreft doavon sajcht, wan Mana met Mana ooda Frues met Frues doonen. Oba Jehova es een leeftolja Gott un hee well, daut aule sellen fa emma een scheenet Läwen haben. Om daut wie daut kjrieen kjennen, mott wie soo läwen, aus hee daut velangt. Läst 1. Korinta 6:9-11 un dan got toop dise Froag derch:

      • Es daut daut eensje, waut Gott fa orrajcht talt, wan Mana met Mana un Frues met Frues wellen?

      Om Gott to jefaulen, mott jieda eena von ons sikj endren. Loont sikj daut, sikj auntostrenjen? Läst Psalm 19:9, 12 un dan got toop dise Froagen derch:

      • Jleefst du, es daut goot, waut Jehova fa rajcht un fa orrajcht talt? Wuarom wurscht du daut sajen?

      Miere Bilda: 1. Eene junge Fru, waut nich schaftich es, sett dicht bie äaren Jung. See drinkjt un schmieekjt met äare Frind toop bie eene Bar. 2. Deeselwje Fru vetalt schaftich met eene Sesta biem Vesaumlungshus.

      Jehova haft väl Menschen jeholpen, soon Läwen to fieren, aus hee fa rajcht talt. Hee kaun die uk halpen

      WAUT EENJE SAJEN: “Wan twee Menschen sikj jleichen, dan es daut nuscht waut schlemmet, wan dee Sex haben.”

      • Waut wurscht du dan sajen?

      KAPITEL TOOPJEFOT

      Sex es een Jeschenkj von Jehova fa eenen Ehemaun un siene Ehefru.

      Waut hast du jelieet?

      • Waut es bie Huararie aules met en?

      • Waut woat ons halpen, von Huararie wajchtobliewen?

      • Woo es ons daut toom gooden, wan wie daut nokomen, waut Jehova fa rajcht talt?

      Nemm die dit väa

      MEA NOSIEEKJEN

      Lia, wuarom Gott daut haben well, daut een Maun un eene Fru sikj sellen befrieen, wan dee wellen toopläwen.

      “Waut sajcht de Schreft äwa onbefriet toopläwen?” (Artikjel opp jw.org)

      Wan de Schreft uk lieet, daut et orrajcht es, wan Mana met Mana un Frues met Frues doonen, sajcht dee doawäajen oba nich, daut wie äwa soone Menschen sellen spietich sennen.

      “Es daut orrajcht, wan Mana met Mana un Frues met Frues wellen?” (Artikjel opp jw.org)

      Unjasto die daut, woo Gott sien Jesaz äwa Sex ons beschitzen deit.

      “Es toom Mul Sex haben werkjlich Sex haben?” (Artikjel opp jw.org)

      Läs de Erfoarunk “Ekj wort fein behaundelt”. Kjikj mol, wuarom een Maun, waut homoseksuell wia, sikj endad, om Gott to jefaulen.

      “De Schreft haft äa Läwen veendat” (De Woaktorm, 1. Aprell 2011)

      a Doa es veschiednet met en, opp soone orrajchte Wajch Sex to haben, soo aus toom Mul ooda to hinjen ooda wäm sien Jeschlajcht aunfoten toom dän oppreizen.

  • Woo sellen Christen äwa stoakjet denkjen?
    Een scheenet Läwen fa emma! – Help toom de Schreft noch bäta vestonen
    • 43. Kapitel. Stoakjet un Zeida steit oppem Desch bie een Toopkomen

      43. KAPITEL

      Woo sellen Christen äwa stoakjet denkjen?

      De Menschen denkjen veschieden äwa stoakjet. Eenje jleichen daut mol, waut met äare Frind toop drinkjen. Aundre drinkjen leewa nuscht. Un noch aundre drinkjen too väl. Waut sajcht de Schreft doatoo?

      1. Es daut orrajcht, stoakjet to drinkjen?

      De Schreft sajcht nich, daut stoakjet drinkjen orrajcht es. Dee sajcht mau rajcht: Eent von de Jeschenkja, waut Gott ons jeef, es “Wien, dee ... daut Hoat froo moakt” (Psalm 104:14-15). De Schreft rät von true Mana un Frues, waut stoakjet drunken (1. Timotäus 5:23).

      2. Waut von Rot jeft de Schreft soone, waut stoakjet drinkjen?

      Jehova talt too väl drinkjen un sikj besupen fa schlajcht (Galata 5:21). Sien Wuat sajcht: “Hool die nich met dee waut too väl Wien drinkjen” (Spricha 23:20). Wan wie bieaun mol jleichen, waut stoakjet to drinkjen, mau rajcht wan wie auleen sent, sell wie nich too väl drinkjen. Aundasch wudd wie nich kjennen kloa denkjen ooda ons räden un haundlen unja Kontroll hoolen ooda daut kunn onse Jesuntheit schoden. Wan wie ons nich beoabeiden kjennen un too väl drinkjen, dan wudd wie leewa sellen gaunz doamet opphieren.

      3. Woo kjenn wie daut achten, waut aundre äwa stoakjet drinkjen entscheiden?

      Jieda eena mott selfst entscheiden, aus dee well stoakjet drinkjen. Wie sellen nich wäm rechten, waut met Mot stoakjet drinkjt. Un wan doa wäa verheipts nich drinkjen well, dan sell wie dän uk nich proowen to bemotten (Reema 14:10). Un wie wudden leewa nuscht drinkjen, wan aundre daut wudd baudren (läs Reema 14:21). “Kjeena saul sien ieejnen nutzen sieekjen, oba daut, waut sienem näakjsten goot deit” (läs 1. Korinta 10:23-24).

      DOLLA UNJASTONEN

      See de biblische Gruntsauzen, waut die halpen kjennen to entscheiden, aus du stoakjet drinkjen west un woo väl du drinkjen west. See uk, waut du doonen kaust, wan du met stoakjet drinkjen Trubbel hast.

      4. Äwalaj, aus du stoakjet drinkjen west

      Woo docht Jesus äwa stoakjet drinkjen? Well wie doatoo mol sien ieeschtet Wunda seenen. Läst Johanes 2:1-11 un dan got toop dise Froagen derch:

      • Waut kjenn wie von dit Wunda doaräwa lieren, woo Jesus äwa stoakjet docht un äwa soone, waut stoakjet drinkjen?

      • Wan Jesus stoakjet drinkjen nich veboot, woo saul eena dan äwa soone denkjen, waut bieaun mol stoakjet drinkjen?

      Bloos wäajen een Christ de Frieheit haft, stoakjet to drinkjen, meent daut oba nich, daut et emma kluak es. Läst Spricha 22:3 un dan denkj äwa daut no, waut hia aunjejäft es toom seenen, aus du wurscht sellen stoakjet drinkjen ooda nich:

      • Wan du foaren motst ooda met Maschienen schaufst.

      • Wan du saust een Bäbe haben.

      • Wan de Dokta die haft toojerot, nich stoakjet to drinkjen.

      • Wan du daut nich kontrollen kaust, woo väl du drinkjst.

      • Wan du nom Jesaz no nich de Frieheit hast, stoakjet to drinkjen.

      • Wan du met wäm toop best, waut nich stoakjet drinkjen well, wäajen dee ea mol Trubbel doamet haud.

      Wurscht du sellen opp eene Kjast ooda bie een aundret Toopkomen de Jast stoakjet väasaten? Toom seenen, waut die halpen kaun, daut to entscheiden, kjikjt daut VIDEO.

      VIDEO: Saul ekj de Jast stoakjet aunbeeden? (2:41)

      Läst Reema 13:13 un 1. Korinta 10:31-32. No jieda Bibelvarsch got toop dise Froag derch:

      • Woo kaun dis Gruntsauz die halpen, soo to entscheiden, daut Jehova sikj freit?

      Een Brooda en een Restaraunt nemt nich Wien. De Sestren, waut doa met am toop sent, drinkjen Wien.

      Jieda Christ mott selfst entscheiden, aus dee well stoakjet drinkjen ooda nich. Eenjemol deit eena veleicht un opp aundatsmol leewa nich

      5. Äwalaj, woo väl du drinkjen west

      Wan du die eenich woascht, bieaun waut stoakjet to drinkjen, dan denkj aun dit: Wan Jehova daut uk nich aufsajcht, stoakjet to drinkjen, es hee oba jäajen supen. Wuarom? Läst Hosea 4:11, 18 un dan got toop dise Froag derch:

      • Waut kaun doa woaren, wan een Mensch too väl stoakjet drinkjt?

      Woo kjenn wie daut väabieejen, too väl stoakjet drinkjen? Wie motten eene Mot haben un ons dan uk doaraun hoolen. Läst Spricha 11:2 un dan got toop dise Froag derch:

      • Wuarom wudd daut goot sennen, die eene Jrens to saten, woo väl stoakjet du drinkjen west?

      6. Woo eena opphieren kaun met supen

      See, waut eenen Maun holp, opptohieren met supen. Kjikjt daut VIDEO un dan got toop de Froagen derch, waut hia aunjejäft sent.

      VIDEO: “Mie äakjeld daut Läwen, waut ekj fieed” (6:32)

      Miere Bilda: Bilda von daut Video “Mie äakjeld daut Läwen, waut ekj fieed”. 1. Dmitri kjikjt no eene Buddel Schnaups. 2. Dmitri un siene Fru un äare Dochta studieren toop de Schreft.
      • Waut deed stoakjet drinkjen aun Dmitri en daut Video?

      • Kunn hee fuaz von de Suparie looskomen?

      • Woo kjeem hee schlieslich doavon loos, stoakjet to drinkjen?

      Läst 1. Korinta 6:10-11 un dan got toop dise Froagen derch:

      • Woo iernst es Suparie?

      • Woo weet wie, daut soon Mensch, waut met drinkjen jeploacht es, sikj endren kaun?

      Läst Matäus 5:30 un dan got toop dise Froag derch:

      • De Haunt aufschnieden meent, daut wie motten waut oppjäwen toom Jehova jefaulen. Waut kaust du doonen, wan du proofst, von Suparie loostokomen?a

      Läst 1. Korinta 15:33 un dan got toop dise Froag derch:

      • Moakt daut waut ut, waut vonne Frind wie haben, woo väl stoakjet wie drinkjen? Laj daut ut.

      EENJE FROAGEN VELEICHT: “Es stoakjet drinkjen orrajcht?”

      • Waut wurscht du dan sajen?

      KAPITEL TOOPJEFOT

      Jehova haft ons stoakjet jejäft, daut ons daut kaun scheen schmakjen, oba hee es jäajen too väl drinkjen un supen.

      Waut hast du jelieet?

      • Waut sajcht de Schreft äwa stoakjet?

      • Waut es de Jefoa, wan eena too väl stoakjet drinkjt?

      • Woo kjenn wie wiesen, daut wie daut achten, waut aundre äwa stoakjet drinkjen entscheiden?

      Nemm die dit väa

      MEA NOSIEEKJEN

      Wan daut om stoakjet drinkjen jeit, woo kjennen junge Menschen rajcht entscheiden?

      Denkj ea du drinkjst (2:31)

      Wan du eenen Trubbel hast met stoakjet drinkjen, dan see, waut du doonen kaust toom doavon looskomen.

      “Stoakjet drinkjen unja Kontroll hoolen” (De Woaktorm, 1. Jaunewoa 2010)

      Sellen Christen met Jläsa toopsteeten?

      “Waut Läsa weeten wellen” (De Woaktorm, 15. Feebawoa 2007)

      See en de Jeschicht “Ekj wia een Tonkje onen Boddem”, woo een Maun von de Suparie looskjeem.

      “De Schreft haft äa Läwen veendat” (De Woaktorm, 1. Mei 2012)

      a Soone, waut von stoakjet aufhenjich sent, brucken veleicht Help von eenen Dokta toom doavon looskomen. Väle Doktasch roden too, daut soone, waut doamet Trubbel jehaut haben, leewa verheipts nich sellen stoakjet drinkjen.

  • Waut, wan du eene groote Sind bejeist?
    Een scheenet Läwen fa emma! – Help toom de Schreft noch bäta vestonen
    • Wan du Jehova uk sea leefst un proofst, kjeenmol waut to doonen, waut am wee deit, woascht du doch mol Fäla moaken. Oba eenje Sinden sent iernsta aus aundre (1. Korinta 6:9-10). Wan du uk eene iernste Sind bejeist, dan hool em Denkj, daut Jehova nich oppjehieet haft die to leewen un wellens es, die to vejäwen un to halpen.

      1. Waut mott wie doonen, daut Jehova ons vejäwen woat?

      Soone, waut Jehova leewen, sent grulich sea truarich, wan dee daut kloa woat, daut see eene groote Sind begonen haben. Oba waut Jehova sien Volkj vesprakjt, kaun dee Troost jäwen. Hee sajcht: “Uk wan june Sinden dunkelroot sent, kjennen dee Schnee witt woaren” (Jesaja 1:18). Wan ons daut opp iernst leet es, dan woat Jehova ons aules vejäwen. Woo wies wie daut, daut ons daut leet es? Wan wie met daut schlajchte opphieren un Jehova om Vejäwunk prachren. Un wie woaren dan uk doafäa oppkomen, daut wie nich orreine Jedanken fieren un de Jewanheiten endren, waut ons bat de Sind brochten. Wie woaren uk proowen soo to läwen, aus Jehova daut fa rajcht talt (läs Jesaja 55:6-7).

      2. Woo halpt Jehova ons derch de Eltestasch, wan wie sindjen?

      Wan wäa eene groote Sind begonen haft, dan sajcht Jehova: “Lot de Eltestasch von de Jemeent komen” (läs Jakobus 5:14-15). Dise Eltestasch leewen Jehova un uk siene Schop. Dee kjennen ons halpen, wada met Jehova oppem kloaren to komen (Galata 6:1).

      Woo halpen de Eltestasch, wan wäa eene groote Sind begonen haft? Twee ooda dree Eltestasch woaren dänjanjen met de Schreft halpen to seenen, wuarom daut orrajcht wia, waut hee deed. Dee woaren gooden Rot jäwen, daut dee daut nich wada deit. Wan wäa eene groote Sind begonen haft un kjeen Leetsennen haft, woaren de Eltestasch dän ut de Vesaumlunk rutsaten. Doaderch beschitzen dee de Vesaumlunk, wiels deejanja dan kjeenem bat doa brinjen kaun, waut Orrajchtet to doonen.

      DOLLA UNJASTONEN

      Lia, doafäa dankboa to sennen un daut noch bäta to vestonen, woo Jehova ons halpen well, wan wie eene groote Sind begonen haben.

      3. Onse Sind bekjanen es ons toom gooden

      Emma, wan wie sindjen, es daut jäajen Jehova. Doawäajen mott wie uk am onse Sinden bekjanen. Läst Psalm 32:1-5 un dan got toop dise Froag derch:

      • Wuarom es daut goot, wan wie Jehova onse Sinden bekjanen, enne Städ dee proowen plietsch to hoolen?

      Wan wie ieescht Jehova onse Sinden bekjant haben, dan kjenn wie uk de Eltestasch no Help froagen, daut ons daut leichta woat. Kjikjt daut VIDEO un dan got toop de Froag derch, waut hia aunjejäft es.

      VIDEO: Wäm Jehova goot es, däm trakjt hee trajcht (3:01)

      • Woo holpen de Eltestasch Canon en daut Video, trigj no Jehova to komen?

      Wie sellen de Eltestasch aules opprechtich sajen, wiels dee sent doa toom ons halpen. Läst Jakobus 5:16 un dan got toop dise Froag derch:

      • Wuarom kjennen de Eltestasch ons bäta halpen, wan wie dee opprechtich aules sajen?

      Miere Bilda: 1. Een Brooda es sea bedrekjt un bedakjt sikj sien Jesecht met de Henj. 2. De Brooda bät to Jehova. 3. De Brooda rät met eenen Eltesten äwa Fon. 4. De Brooda traft dree Eltestasch. 5. De Brooda kjikjt schaftich, wiels hee een reinet Jewessen haft.

      Bekjan diene Sind, sie opprechtich to de Eltestasch un nemm Jehova siene leeftolje Help aun

      4. Jehova wiest de Sinda Metleet

      Wan een Mensch eene groote Sind begonen haft un sikj nich well to daut schekjen, waut Jehova velangt, dan woat dän ut de Vesaumlunk rutjesat un wie wudden nich mea Jemeenschoft met dän haben. Läst 1. Korinta 5:6, 11 un dan got toop dise Froag derch:

      • Waut wudd daut aun de Vesaumlunk doonen, wan wie met eenen Sinda Jemeenschoft hauden, waut nich een Leetsennen haft, soo aus daut Jlikjnis von de Häw en dän Dieech wiest?

      De Eltestasch proowen Jehova sien Metleet notodoonen un wellen onvolkomne Menschen halpen, waut wäajen eene Sind ut de Vesaumlunk rutjesat worden. Väle sent wada trigj no de Vesaumlunk jekomen. Wuarom? Dee wort trajchtjewäsen, waut dan jroz nich aunjenäm wia; oba krakjt daut brocht dee to Besennunk.

      Woo es aun daut, woo Jehova met eenen Sinda omjeit, to seenen, daut hee metfeelent un leeftolich es un met de rajchte Mot trajchtwiesen deit?

      5. Jehova vejeft ons, wan ons daut leet es

      Jesus vetald een Jlikjnis, om ons halpen to vestonen, woo Jehova daut jeit, wan wäa een Leetsennen haft. Läst Lukas 15:1-7 un dan got toop dise Froag derch:

      • Waut lieet die dit von Jehova?

      Läst Hesekiel 33:11 un dan got toop dise Froag derch:

      • Waut mott eena doonen toom bewiesen, daut eenem daut werkjlich leet es?

      Een leeftolja Schophoad bebinjt een Schop, waut sikj velazt haft

      Krakjt soo aus een Schophoad es Jehova sea om siene Schop bekjemmat

      WAUT EENJE SAJEN: “Ekj hab Angst, daut de Eltestasch mie ut de Vesaumlunk rutsaten, wan ekj dee miene Sind vetal.”

      • Waut wurscht du dänjanjen sajen, waut sikj soo feelt?

      KAPITEL TOOPJEFOT

      Wan wie eene groote Sind begonen haben un ons daut oba opp iernst leet es un wie ons gaunz eenich sent, daut nich mea to doonen, dan woat Jehova ons vejäwen.

      Waut hast du jelieet?

      • Wuarom es daut goot, Jehova onse Sinden to bekjanen?

      • Waut mott wie doonen, daut Jehova onse Sinden woat vejäwen?

      • Wuarom sell wie de Eltestasch no Help froagen, wan wie eene groote Sind jedonen haben?

      Nemm die dit väa

      MEA NOSIEEKJEN

      See, woo een Maun Jehova sien Metleet späad, soo aus daut en Jesaja 1:18 sajcht.

      Twiewel kjeenmol, aus Jehova metliedent es (5:02)

      Woo proowen de Eltestasch deejanje to halpen, waut eene groote Sind begonen haben?

      “Woo de Eltestasch soone Leew un Metleet wiesen, waut eene groote Sind begonen haben” (De Woaktorm, August 2024)

      See, woo de Eltestasch soone Leew un Metleet wiesen, waut kjeen Leetsennen haben.

      “Woo kjennen de Eltestasch soone halpen, waut ut de Vesaumlunk rutjesat worden?” (De Woaktorm, August 2024)

      Läs de Jeschicht “Ekj must onbedinjt wada trigj no Jehova komen”, un lia, woo een Maun, waut von de Woarheit aufjekomen wia, met Jehova siene Help wada kunn trigjkomen.

      “De Schreft haft äa Läwen veendat” (De Woaktorm, 1. Aprell 2012)

Plautdietsche Bieekja (2006-2025)
Aufmalden
Aunmalden
  • Plautdietsch
  • Wäm schekjen
  • Enstalungen
  • Copyright © 2025 Watch Tower Bible and Tract Society of Pennsylvania
  • Räajlen un Rechtlienjes toom dise Sied brucken
  • Schutz fa diene Aungowen
  • Perseenelje Schutz-Enstalungen
  • JW.ORG
  • Aunmalden
Wäm schekjen