Woo kjenn wie en Gott siene Uagen rein sennen?

Stal die mol eene feine Mame väa, waut äaren kjlienen Jung reedmoakt fa de School. See kjikjt doano, daut hee jebot es un reine un schmocke Kjleeda aunhaft. Dit helt am jesunt un wiest aundre, daut siene Elren sikj fein om am kjemren. Ons leeftolja Voda Jehova well uk, daut wie rein sent; von buten un uk en ons denkjen, räden un haundlen. Ons es daut selfst toom gooden un wie ieren dan uk Jehova.

1. Woo kjenn wie renlich sennen?

Jehova sajcht, wie sellen “heilich sennen” (1. Petrus 1:16). Daut wie kjennen heilich sennen, mott wie en aule Stekjen rein sennen. Daut meent, daut wie ons pinkjlich boden un onse Kjleeda, ons Tus un ons Foatich rein hoolen. Wie kjennen uk halpen, ons Vesaumlungshus reintomoaken. Wan wie von buten rein bliewen, dan iea wie Jehova (2. Korinta 6:3-4).

2. Von waut mott wie wajchbliewen toom rein sennen?

De Schreft rot ons too: “Well wie ons nu von aules reinjen waut Kjarpa un Jeist besudelt” (2. Korinta 7:1). Daut meent, wie sellen ons aunstrenjen, von aules wajchtobliewen, waut onsen Kjarpa ooda ons Vestaunt schoden kunn. Wie sellen uk en onse Jedanken Jehova jefaulen. Doawäajen proow wie, jäajen orrajchte Jedanken to kjamfen (Psalm 104:34, NW). Wie strenjen ons uk aun, reine Räd to haben (läs Kolossa 3:8).

Derch waut kunn wie noch orrein woaren? Eenje Sachen kjennen onsen Kjarpa schoden. Doawäajen bliew wie von Tobbak wajch un keiwen nich Betel-Näten uk nich Koka-Bläda un brucken nich Droggs un doonen uk nich Medizien orrajcht brucken. Wan wie von aul dit wajchbliewen, dan sent wie jesunda un wiesen, daut wie daut Läwen achten. Wie proowen uk, von aundre orreine Sachen wajchtobliewen, soo aus schwiensche Bilda to kjikjen ooda sikj selfst jeschlajchtlich tofrädtostalen (Psalm 119:37; Efeesa 5:5). Daut kaun schwoa sennen, soone Aunjewanheiten tochtoloten, oba Jehova kaun ons halpen, daut to doonen (läs Jesaja 41:13).

DOLLA UNJASTONEN

3. Renlich sennen ieet Jehova

Wan wie de Jesazen läsen, waut Jehova de Israeliten ieeschtemma jeef, dan kjenn wie seenen, woo hee äwa Reinheit denkjt. Läst 2. Mose 19:10 un 30:17-19 un dan got toop dise Froagen derch:

• Waut lieren dise Varzhen ons äwa Jehova, woo hee äwa Renlichkjeit denkjt?

• Waut kaust du pinkjlich doonen, om renlich to sennen?

Aules renlich to hoolen, kjemt nich von veselfst; eena mott sikj aunstrenjen un daut brukt Tiet. Oba eena kaun daut, endoont wua eena wont ooda woo goot auf eena es. Kjikjt daut VIDEO un dan got toop de Froag derch, waut hia aunjejäft es.

VIDEO: Gott jleicht reine Menschen (4:10)

• Wuarom woaren de Menschen, waut wie prädjen, Jehova dolla achten, wan dee seenen, daut wie aules reinhoolen?

4. Schlajchte Jewanheiten tochloten

Wan du schmieekjst ooda Droggs brukst, dan weetst du woomäajlich, woo schwoa daut kaun sennen, doamet opptohieren. Waut kaun eenem halpen? Denkj mol doaräwa no, waut daut aun die deit. Läst Matäus 22:37-39 un dan rät toop doaräwa, woo Tobbak ooda Droggs brucken, ...

• eenem doavon aufhelt, met Jehova Frind to sennen.

• de Famielje un aundre rom eenem schoden kaun.

Moak eenen Plon, woo du eene schlajchte Jewanheit tochloten kaust.a Kjikjt daut VIDEO.

VIDEO: Sikj en aules kontrollen (2:47)

Läst Filippa 4:13 (JHF) un dan got toop dise Froag derch:

• Woo kaun eenem daut de Krauft jäwen, eene schlajchte Jewanheit tochtoloten, wan eena pinkjlich bät, de Schreft studieet un no de Toopkomes wankt?

5. Strenj die aun, enne Jedanken un Woakjen, rein to bliewen

Läst Kolossa 3:5 un dan got toop dise Froagen derch:

• Woo weet wie, daut schwiensche Bilda kjikjen ooda schwienschet äwa Fon schekjen ooda schriewen un sikj selfst jeschlajchtlich tofrädstalen fa Jehova orrein es?

• Jleefst du es daut rajcht, daut Jehova von ons velangt, em denkjen un Vehoolen rein to bliewen? Wuarom?

See, woo du jäajen orreine Jedanken schaufen kaust. Kjikjt daut VIDEO.

VIDEO: Sorj doafäa, daut du rein blifst (1:51)

Jesus brukt een Jlikjnis toom wiesen, daut eena aules doonen mott, waut doa needich es, toom em denkjen, haundlen un räden rein bliewen. Läst Matäus 5:29-30 un dan got toop dise Froag derch:

• Jesus meend nich, daut wie ons sullen kjarpalich waut aundoonen, oba daut wie musten waut doonen. Waut wudd eena krakjt doonen kjennen toom jäajen schwiensche Jedanken schaufen?b

Jehova räakjent daut sea väl, wan du die aunstrenjst, jäajen schlajchte Jedanken to kjamfen. Läst Psalm 103:13-14 un dan got toop dise Froag derch:

• Woo jeft dis Bibelvarsch die Moot, wan du jäajen eene orreine Jewanheit kjamfen motst?

Jeff nich opp, du kaust doavon looskomen!

Eena kunn leicht denkjen: “Ekj kaun doa nich met opphieren. Ekj bäta jäw bloos opp.” Oba denkj mol han: Wan wäa em Rees rant un sikj vestaupt un hanfelt, meent daut noch nich, daut dee vespält haft un fresch aunfangen mott. Soo es daut uk, wan du mol trigjfelst: Daut meent nich, daut du vespält hast un kjeenmol woascht von de schlajchte Jewanheit looskomen un uk nich, daut aul daut, waut du aul jedonen hast, fa nuscht es. Eenjemol felt eena eefach trigj. Soo, jäw nich opp! Met Jehova siene Help, kaust du doavon looskomen.

KAPITEL TOOPJEFOT

Jehova freit sikj äwa ons, wan wie en onsen Kjarpa, en onse Jedanken un en onse Woakjen rein bliewen.

Waut hast du jelieet?

• Wuarom es daut soo wichtich, rein to sennen?

• Woo kaust du renlich sennen?

• Woo kaust du diene Jedanken un diene Woakjen rein hoolen?

MEA NOSIEEKJEN

Waut fa eefache Sachen kaun eena doonen toom kjarpalich rein sennen, mau rajcht wan eena uk oam es?

Jesunt un rein sennen: De Henj wauschen (3:01)

Läs, waut du doonen kaust toom opphieren met schmieekjen.

“Woo eena met schmieekjen opphieren kaun” (Woat waka!, Mei 2010)

Unjasto die daut, waut schwiensche Bilda beseenen aun eenem deit.

“Schwiensche Bilda kjikjen: Baudat daut nuscht ooda schot daut?” (De Woaktorm, 1. August 2013)

See, woo een Maun doavon looskjeem, schwiensche Bilda to kjikjen.

“Daut haft lang jedieet, bat ekj doavon looskjeem” (De Woaktorm Num. 4 2016)