Aungowen fa daut Schoolheft fa Läwen un Deenst
5.-11. AUGUST
SCHAZA UT GOTT SIEN WUAT | 2. TIMOTÄUS 1-4
“Gott jeef ons nich eenen Jeist dee ons forchtsom muak”
w09-X 15. 5. 15 V. 9
Jugentliche – lot daut to seenen sennen, daut jie veraunkomen
9 Om Timotäus to halpen, holp Paulus am lota denkjen: “Gott jeef ons nich eenen Jeist dee ons forchtsom muak, oba dän Jeist von Leew un Krauft, un daut wie ons selfst beharschen [ooda “kloa denkjen”, NW] kjennen” (2. Tim. 1:7). Bie “kloa denkjen” es je met en, daut eena eene Sach kaun derchdenkjen un bedenkjen. Daut bediet uk, daut eena Dinja soo aunnemt, aus dee komen – wan dee uk nich no eenem sienen Wunsch no sent. Eenje Jugentliche, waut em jeisteljen noch nich sea wiet sent, wiesen eenen forchtsomen Jeist un proowen sikj ut schwieeje Loagen ruttobrinjen doaderch, daut see too väl schlopen ooda Tellewizhen kjikjen, drinkjen ooda Droggs brucken, emmawajch Fasten fieren ooda met Huararie to doonen haben. Ons Christen woat strenj jesajcht, “de gottloose un weltliche Liedenschoften auftosajen, ons to beharschen un opprechtich un gottesferchtich en dise Welt to läwen” (Tit. 2:12).
w03-X 1. 3. 9 V. 7
Sie mootich un stoakj!
7 Paulus schreef aun Timotäus: “Gott jeef ons nich eenen Jeist dee ons forchtsom muak, oba dän Jeist von Leew un Krauft . . . Doawäajen schäm die nich met dien Zeichnis fa onsen Harn” (2. Timotäus 1:7-8; Markus 8:38). Wan wie dise Wieed läsen, dan wudd wie kjennen äwalajen: “Schäm ekj mie wäajen mienen Gloowen ooda sie ekj brow met dän? Lot ekj miene Oabeitspoatna (ooda Schoolpoatna) weeten, daut ekj eena von Jehova siene Zeijen sie, ooda proow ekj daut plietsch to hoolen? Schämt sikj mie daut, daut ekj aundasch sie aus de mieeschte, ooda sie ekj brow doamet, daut dee daut enwoaren, daut ekj met Jehova Frind sie?” Wan wie ons wäaren, de goode Norecht to prädjen ooda aundasch to sennen aus de Mierheit, dan sull wie aun dän Rot denkjen, waut Jehova Josua jeef: “Sie mootich un entschloten”. Vejät niemols: Daut jeit nich doarom, woo onse Oabeitspoatna ooda Schoolpoatna doa naunkjikjen, oba woo Jehova un Jesus Christus doaräwa denkjen (Galata 1:10).
No jeistelje Schaza sieekjen
w17.07-X 10 V. 13
No woaren Rikjtum sieekjen
13 Timotäus wia een Maun met Gloowen. Aus Paulus ieescht jesajcht haud, daut Timotäus “een gooda Soldot fa Christus Jesus” wia, säd hee noch: “Een Soldot dee em Deenst beschafticht es, woat sikj daut nich noch drock moaken fa sien auldoagschet Läwen to sorjen, daut hee däm jefaulen kaun dee am aunjestalt haft” (2. Tim. 2:3-4). Jesus siene Nofolja vondoag dän Dach, wua uk eene Armee von äwa eene Million Voltietdeena mank sent, komen Paulus sienen Rot no, soo goot aus äare Omstend daut mäajlich moaken. Dee loten sikj nich velocken un von de Welt aulahaunt aunkaublen. Dee hoolen disen Gruntsauz em Denkj: “Wäa doa borcht, es däm sien Sklow, dee am daut borcht” (Spr. 22:7). De Soton wudd nuscht dolla jleichen, aus daut wie aul onse Tiet un Krauft doa nenstäakjen wudden, Sklowen von siene Haundelswelt to sennen. Eenje lieen sikj een deel Jelt toom sikj een Hus kjeepen, toom sikj lang loten utlieren, eene diere Koa kjeepen un soogoa toom eene diere Kjast moaken – aul daut kaun doatoo fieren, daut eena groote Jeltsorjen haft. Wan wie nich oppaussen, fa waut wie ons entscheiden, kjenn wie lang unja Schult sennen. Wie wiesen Weisheit, wan wie ons Läwen eefach moaken un de Schulden un Onkosten läach hoolen. Doaderch moak wie ons frie, om leewa Sklowen fa Gott to sennen enne Städ fa de vondoagsche Haundelswelt (1. Tim. 6:10).
w14-X 15. 7. 14 V. 10
Jehova sien Volkj helt “sikj von aule Ojjerajchtichkjeit” frie
10 Vondoag dän Dach kjricht Jehova sien Volkj nich foaken waut met Aufjefolne to doonen. Oba wan wie doch mol met Lieren to doonen kjrieen, waut jäajen de Schreft sent, mott wie ons gaunz eenich sennen un dee aufwiesen, endoont von wua dee komen. Daut wudd nich kluak sennen, ons met Aufjefolne en Striedarieen auftojäwen, aus daut nu perseenlich es ooda en dee äare Internet-Sieden ooda sestwoo. Wan eena daut uk bloos doatoo deed, daut eena dee halpen kunn, wudd soone Unjahoolunk jäajen dän Rot von ut de Schreft sennen, waut wie jroz jeseenen haben. Aus Jehova sien Volkj wudd wie väl ea Aufjefolne gaunz un goa meiden un aufwiesen.
12.-18. AUGUST
SCHAZA UT GOTT SIEN WUAT | TITUS 1 – FILEMON
“Stal Eltestasch aun”
w14-X 15. 11. 28-29
Waut Läsa weeten wellen
Wan de Schreft uk nich krakjt sajcht, woo de Eltestasch en de Tiet von de ieeschte Christen aunjestalt worden, jeft dee doch een bät to vestonen, woo daut jedonen wort. Doa woat biejlikj jesajcht, daut Paulus un Barnabas opp dän Trigjwajch von äare ieeschte Missionsreis wieren, un aus see “en aule Jemeenten Eltestasch aunjestalt hauden, un en fausten äwa an jebät hauden, befoolen see an dän Harn aun, aun dän see jleewden” (Apj. 14:23). Joaren lota schreef Paulus aun sienen Reispoatna Titus: “Ekj leet die doawäajen en Kreet, om daut äwaje en Ordnunk to brinjen, un soo aus ekj die befool, en jieda Staut Jemeenten Leidasch [ooda Eltestasch] auntostalen” (Tit. 1:5). Daut schient soo, daut uk Timotäus, dee väl met dän Apostel Paulus toop jereist haud, de Veauntwuatunk jejäft wort, Eltestasch auntostalen (1. Tim. 5:22). Daut es kloa, daut et reisende Oppsechtasch wieren, waut de Eltestasch aunstalden, un nich de Apostel un de Eltestasch von Jerusalem.
Dit Väabilt von ut de Bibel haft dän Väastaunt von Jehova siene Zeijen bat doa jebrocht, daut to endren, woo de Eltestasch un Deenstaumthelpa aunjestalt woaren. Von dän 1. Septamba 2014 aun woat daut soo aus dit jedonen: Jieda Kjreisoppsechta mott ieescht goot doaräwa denkjen, wan Eltestasch en sienen Kjreis väaschlonen, wäm toom Eltesta ooda Deenstaumthelpa auntostalen. Wan hee dee Vesaumlunk besieekjt, dan woat hee dänjanjen proowen bäta kjanen to lieren un met dän toop em Prädichtdeenst to gonen, wan am daut sest mäajlich es. Dan woat de Kjreisoppsechta met de Eltestasch toop doaräwa räden. No daut es daut siene Veauntwuatunk, de Eltestasch un Deenstaumthelpa en de Vesaumlungen en sienen Kjreis auntostalen. Opp dise Wajch woat daut dolla soo jedonen, aus daut mank de ieeschte Christen jedonen wort.
Wäa es fa aules veauntwuatlich? Soo aus emma haft “de trua, weisa Kjnajcht” aus ieeschtens de Veauntwuatunk, sienen Hushault Äten to jäwen (Mat. 24:45-47). Doa es met en, daut dee met de Help von dän heiljen Jeist en de Schreft sieekjen, om Aunleidunk to finjen, woo eena de biblische Gruntsauzen kaun nokomen, waut doamet to doonen haben, woo de Vesaumlunk oppe gaunze Welt mott enjerecht sennen. De trua Kjnajcht sat uk aule Kjreisoppsechtasch en un uk de Breeda von de Betel-Kommitees. Un jieda Betel jeft dan Aunleidunk, woo eena dän Rot von dän truen Kjnajcht daut baste kaun nokomen. Aule Eltestasch haben de iernste Veauntwuatunk, sea krakjt doano to kjikjen, waut de Schreft von dee velangt, waut see väaschlonen, om en Gott siene Vesaumlunk aunjestalt to woaren. Jieda Kjreisoppsechta haft de iernste Veauntwuatunk, ieescht goot doaräwa to denkjen un to bäden, waut de Eltestasch von dänjanjen jesajcht haben, un dan kaun dee dän aunstalen, wan dee aul soo wiet es.
No jeistelje Schaza sieekjen
w89-X 15. 5. 31 V. 5
Waut Läsa weeten wellen
Secha wia Paulus doa nich met envestonen, wan doa jesajcht wort, daut aule Menschen von Kreet schlajcht wieren. Wie kjennen ons doaräwa secha sennen, wiels Paulus wist, daut et opp Kreet feine Christen jeef, aun wäm Gott eenen Jefaulen haud un waut met sienen heiljen Jeist jesaulft wieren (Aposteljeschicht 2:5, 11, 33). Doa wieren jenuach true Christen, daut et en “jieda Staut” Vesaumlungen jeef. Wan soone Christen uk nich volkomne Menschen wieren, kjenn wie doch secha sennen, daut et nich Läajna ooda fule Frätasch wieren. Sest wudden dee nich sennen wieda von Jehova aunjenomen worden (Filippa 3:18-19; Openboarunk 21:8). Soo aus daut vondoag dän Dach mank aule Velkja es, jeef daut uk en Kreet truhoatje Menschen, waut doa reed wieren, de christelje Norecht auntonämen, un dee wieren secha uk truarich doaräwa, woo schlajcht daut mank de Menschen rom an toojinkj (Hesekiel 9:4; see uk Aposteljeschicht 13:48).
w08-X 15. 10. 31 V. 4
Besondret von de Breew aun Titus, aun Filemon un aun de Hebräa
15-16 – Wuarom säd Paulus nich to Filemon, daut dee Onesimus sull friemoaken? Paulus wull sikj nich von siene Oppgow auflenkjen loten, “Gott sien Kjennichrikj [to prädjen] un . . . vom Harn Jesus Christus [to lieren]”. Doawäajen hilt hee sikj von Striedarieen wajch, biejlikj soo aus daut, waut met de Sklowarie to doonen haud (Apj. 28:31).
19.-25. AUGUST
SCHAZA UT GOTT SIEN WUAT | HEBRÄA 1-3
“Leeft Jerajchtichkjeit un haust Ojjerajchtichkjeit”
w14-X 15. 2. 5 V. 8
Iea Christus, dän harlichen Kjennich!
8 Jehova muak sienen Sän 1914 em Himmel toom Kjennich. Daut sajcht: “Du rejieescht rajcht, un daut es de Rejierungs Stock fa dien Kjennichrikj.” Daut es vesechat, daut siene Rejierunk mank de Sienje kjeenen Unjascheet moaken woat. Siene Macht es jesazlich rajcht, wiels Gott es sien Troon. Daut meent, daut Jehova de Gruntloag von sien Kjennichrikj es. Dan uk noch, Jesus sien Troon woat fa “emma un eewich bliewen”. Es daut nich eene Iea, daut wie Jehova deenen kjennen un uk soonen majchtjen Kjennich haben, von Jehova enjesat?
w14-X 15. 2. 4 V. 7
Iea Christus, dän harlichen Kjennich!
7 Läs Psalm 45:7-8. Wuahäa wort Jesus von Jehova toom Kjennich jesaulft? Wiels Jesus räakjent Jerajchtichkjeit sea väl un kaun daut nich lieden, wan doa opp sienen Voda, Jehova, Schaund jebrocht woat. Jesus wort met “Freideneelj” jesaulft, mea aus siene “Kommaroden”, ooda Poatna, daut meent, de Kjennichs von Juda, waut von David aufstaumden. Wuarom? Wiels Jesus ieeschtlich von Jehova selfst jesaulft wort, un hee wort aus beides jesaulft, Kjennich un Huaga Priesta (Psa. 2:2; Heb. 5:5-6). Un Jesus wort uk nich met Eelj jesaulft, oba metem heiljen Jeist, un sien Kjennichs-Aumt es nich irdisch, oba himlisch.
No jeistelje Schaza sieekjen
it-1-X 411 V. 2
Bilt
Haft Jesus sienen Voda noch emma jlikjen sea jelikjent?
Jesus, Gott sien ieeschtjebuarna Sän, waut lota Mensch wort, likjent sienen Voda (2Ko 4:4). Woo weet wie, daut de Sän dan aul sienen Voda, dän Schepfa, likjend, aus hee jemoakt wort? Wiels Jesus es je dee, to wäm Gott räd un säd: “Well wie Menschen moaken, dee soo aus wie sent un ons likjnen” (1Mo 1:26; Joh 1:1-3; Kol 1:15-16). Aus Jesus aus volkomna Mensch oppe Ieed wia, deed hee sienen Voda siene Ieejenschoften un Perseenlichkjeit no soo goot, aus daut fa eenen Mensch mäajlich wia. Doawäajen kunn hee sajen: “Wäa mie jeseenen haft, haft uk dän Voda jeseenen” (Joh 14:9; 5:17, 19, 30, 36; 8:28, 38, 42). Oba hee likjend sienen Voda secha noch dolla, aus hee ieescht aus Jeist vom Doot oppjestonen wia un von sienen Voda, Jehova Gott, “aule Jewault . . . em Himmel uk oppe Ieed” kjrieech (1Pe 3:18, NW; Mat 28:18). Wiels Gott Jesus “huach jehowen” haft, es sienen Voda siene Harlichkjeit nu noch dolla aun am to seenen aus dan, ea hee dän Himmel veleet, om no de Ieed to komen (Flp 2:9; Heb 2:9). Nu “strolt [hee] de Harlichkjeit von Gott ut, däm hee en siene Oat un Wies uk jeneiw likjent” (Heb 1:2-4).
it-1-X 1160 V. 1
Himmel
De Wieed ut Psalm 102:26-27 räden von Jehova Gott, oba de Apostel Paulus neem dee hia opp Jesus Christus. Woosoo? Wiels Gott sienen eensjen Sän Jesus brukt toom daut Weltaul moaken. Paulus muak eenen Vejlikj. Hee säd, daut Gott de Schepfunk wudd kjennen “opprollen aus een[en] Mauntel”, daut dee nich mea wia, wan hee daut wull – oba Jesus, dee wudd emma bliewen (Heb 1:1-2, 8, 10-12).
26. AUGUST – 1. SEPTAMBA
SCHAZA UT GOTT SIEN WUAT | HEBRÄA 4-6
“Doo dien bastet, om en Gott siene Ru nentokomen”
w11-X 15. 7. 24 V. 3-5
Waut es Gott siene Ru?
3 Daut jeft twee Jrind, aun waut wie seenen kjennen, daut de säwenda Dach en de ieeschte Hundat Joa noch nich äwa wia. Ieeschtens: Denkj aun daut, waut Jesus to siene Jäajna säd, aus hee von an beschulcht wort, wiels hee aum Sabat heelen deed, waut see fa eene Sort Oabeit talden. De Har säd to dee: “Mien Voda oabeit bat vondoag, un soo oabeid ekj uk” (Joh. 5:16-17). Waut meend Jesus doamet? Jesus säd to siene Jäajna soo to sajen: “Mien Voda un ekj sent en deeselwje Sort Oabeit met en. Wiels mien Voda en sienen Sabat von dusende Joaren wiedajeoabeit haft, hab ekj uk de Frieheit to schaufen, mau rajcht aum Sabat.” Doamet wull Jesus sajen, daut Gott noch emma en dän säwenden Dach wia, wua hee von siene Oabeit ruen deed, aulsoo de Oabeit, waut doamet to doonen haud, de Ieed to moaken.
4 De Apostel Paulus jeft ons dän tweeden Grunt. Nodäm daut hee de Wieed ut 1. Mose 2:2 äwa Gott siene Ru brukt, leet Gott noch derch am sajen: “Wie oba, dee wie jleewen, gonen en de Ru nenn” (Heb. 4:3-4, 6, 9). No daut no wia de säwenda Dach en Paulus siene Tiet noch emma nich derch. Woo väl lenja woat dee Rudach noch dieren?
5 Om dee Froag to beauntwuaten, mott wie em Denkj hoolen, to waut de säwenda Dach wia. 1. Mose 2:3 sajcht ons daut: “Gott säajend dän säwenden Dach un sad dän oppoat un säd daut dee heilich wia”. Dee Dach wort von Jehova heilich jemoakt – dee wort jeheilicht, ooda oppoat jesat, om daut uttofieren, waut hee sikj väajenomen haud. Un hee haft sikj väajenomen, daut de Ieed voll jehuarsome Mana un Frues sennen saul, waut fa de Ieed un aules, waut opp dee läft, sorjen sellen (1. Mo. 1:28). Om dit derchtofieren, haben Jehova Gott un Jesus Christus, de “Har äwa dän Sabat”, “bat vondoag” jeoabeit (Mat. 12:8). Gott sien Rudach woat wiedagonen, bat sikj aules woat erfelt haben, wuatoo hee dän oppoat jesat haud. Daut woat aum Enj von Christus sien dusentjoaschet Rikj sennen.
w11-X 15. 7. 25 V. 6
Waut es Gott siene Ru?
6 Gott muak Adam un Eva kloa dietlich, waut hee sikj väajenomen haud; oba dee wullen doa nich metmoaken. Oba Adam un Eva wieren nich de eensje: aul millionen Menschen haben sikj jewäat, Gott jehuarsom to sennen. Mau rajcht Gott sien utjewäldet Volkj, de Israeliten, muak emma wada dän Fäla. Nich fa nuscht woarnd Paulus de Christen to siene Tiet, daut soogoa eenje von an kunnen dänselwjen Fäla moaken waut de Israeliten. Hee schreef: “Well wie doaropp han aule Fliet aunsaten, en dise Ru nenn to komen, daut nich irjentwäa tofaul komen mucht derch onjehuarsom sennen, soo aus jane” (Heb. 4:11). No Paulus no kaun Ojjehuarsom doatoo fieren, daut eena nich en Gott siene Ru nenkjemt. Waut meent daut fa ons? Waut, wan wie ons jäajen daut stalen, waut Gott sikj väajenomen haft? Sent wie dan en Jefoa, daut wie nich en Gott siene Ru nengonen woaren? Dit sent wichtje Froagen, un wie woaren lota noch mea doaräwa seenen. Oba nu opp verieescht well wie mol seenen, waut wie noch äwa Gott siene Ru lieren kjennen. Doatoo well wie ons de Israeliten äa schlajchtet Väabilt noch dolla unjastonen.
w11-X 15. 7. 27-28 V. 16-17
Waut es Gott siene Ru?
16 Vondoag dän Dach wudd een Christ nich jrod soo leicht doaropp stonen bliewen, daut eena jewesse Jebooten von ut daut Jesaz Moses hoolen must, om jerat to woaren. Waut Paulus derch dän heiljen Jeist jeleit aun de Efeesa schreef, es kloa jenuach: “Jie sent derch Gott siene Jnod jerat, wiels jie jleewen. Daut es nich derch june Woakjen. Daut es een Jeschenkj von Gott. Daut es nich ut Woakjen, soo daut kjeena Uasoak haft sikj selfst to lowen” (Efs. 2:8-9). Waut meent daut dan fa ons Christen, en Gott siene Ru nentogonen? Jehova sad dän säwenden Dach – sienen Rudach – oppoat, om daut opp eene harliche Wajch uttofieren, waut hee sikj met de Ieed väajenomen haud. Wie kjennen en Jehova siene Ru nengonen – ooda met am toop en siene Ru sennen – wan wie jehuarsom metoabeiden, om daut uttofieren, waut hee sikj väajenomen haft, soo aus hee ons daut derch siene Organisazion openboat.
17 Wan wie dän biblischen Rot oba wudden fa nuscht talen, waut de trua un weisa Kjnajcht ons jeft, un onsen ieejnen Wajch gonen wudden, dan wudd wie ons jäajen daut stalen, waut Jehova sikj väajenomen haft. Soo wudd wie daut opp Spell saten, met Jehova Frind to sennen. En dän näakjsten Artikjel woa wie daut derchgonen, waut Gott sien Volkj schoden kaun. Un wie woaren uk noch waut seenen: Aus wie en Gott siene Ru nenkomen, henjt doavon auf, aus wie jehorchen wellen ooda nich.
No jeistelje Schaza sieekjen
w16.09-X 13
Waut Läsa weeten wellen
Waut es “Gott sien Wuat”, wua Hebräa 4:12 von sajcht, daut et “läft un kjraftich” es?
▪ De Varzh doaver un doahinja wiesen, daut de Apostel Paulus von Gott siene Norecht schreef, ooda waut Gott de Menschen von sien Väanämen weeten leet, waut wie biejlikj en de Bibel finjen.
Hebräa 4:12 woat foaken en onse Bieekja aunjejäft, om to wiesen, daut de Bibel de Krauft haft, Menschen äa Läwen to veendren, un daut es uk gaunz rajcht. Oba daut halpt, wan eena uk de Varzh ver Hebräa 4:12 un doahinja läst, om to seenen, om waut daut doa jeit. Paulus hilt de hebräische Christen daut väa, daut see doa sullen metoabeiden, waut Gott sikj väajenomen haud. Välet von daut wia enne heilje Schreft to finjen. Paulus brukt daut Biespel von de Israeliten, waut doa wieren von Ägipten friejemoakt worden. Dee hauden de Hopninj, en daut vesproakne Launt nentokomen, wua “Malkj un Honnich ranen” wudd un wua dee wudden woare Ru haben (2. Mo. 3:8; 5. Mo. 12:9-10).
Daut wia, waut Gott de Israeliten doaräwa weeten leet, waut hee em Senn haud. Oba de Israeliten muaken äare Hoaten hoat un weesen nich Gloowen. Doawäajen kunnen de mieeschte von dee nich en de Ru nengonen (4. Mo. 14:30; Jos. 14:6-10). Oba Paulus schreef uk noch von “daut Vespräakjen, en Gott siene Ru nenn to komen” (Heb. 3:16-19; 4:1). Dit “Vespräakjen” es gaunz kloa uk Poat von daut, waut Gott doaräwa openboad, waut hee sikj väajenomen haud. Krakjt soo aus de hebräische Christen kjenn wie von dit Väanämen läsen un uk doano haundlen. Woo muak Paulus daut kloa, daut sikj dit Vespräakjen opp de Schreft stetten deed? Hee neem de Wieed ut 1. Mose 2:2 un Psalm 95:11.
Secha jeit ons daut to Hoaten, daut “daut Vespräakjen, en Gott siene Ru nenn to komen, noch steit”. Wie vetruen opp de biblische Hopninj, daut et werkjlich mäajlich es, en Gott siene Ru nentogonen, un wie haben aulet needje jedonen, om doa nentokomen. Wie haben daut nich doaderch jedonen, daut wie proowen, daut Jesaz Moses to hoolen, un proowen uk nich, derch aundre Woakjen Jehova sienen Jefaulen to kjrieen. Enne Städ daut moak wie met Gloowen un Freid bie Jehova sien Väanämen met, waut hee openboat haft, un doonen daut wieda. Oba soo aus bowen aul jesajcht wort, kaun “Gott sien Wuat” ut Hebräa 4:12 uk opp de Bibel gonen, un dusende Menschen von aulawäajen oppe Welt haben aunjefongen, de Bibel to studieren un to lieren, waut Gott ons äwa sien Väanämen haft weeten loten. Väle brinjt daut bat doa, äa Läwen to endren, Gloowen to wiesen un sikj deepen to loten. Daut et soo väl aun an deit, es een kloara Bewies, daut “Gott sien Wuat läft un . . . kjraftich un schoapa [es] aus daut schoapste dobbelt schniedende Schwieet”. Waut Gott en de Schreft äwa sien Väanämen openboat haft, haft aul en ons Läwen jewirkjt un daut woat uk wieda.
it-1-X 1183 V. 3
Hopninj
Dise Hopninj opp eewjet Läwen, waut uk nich to vedoawen jeit, es fa dee, waut “Poatna” von “de himlische Beroopung” sent (Heb 3:1, Friesenbibel), un dee Hopninj haft eenen stoakjen Grunt un es gaunz opp to veloten. De Hopninj stett sikj opp tweeatlei, wua Gott nich lieejen kaun: Ieeschtens opp sien Vespräakjen un tweedens opp sienen Eit. Un dise Hopnnj stett sikj opp Christus, dee nu onstoaflich em Himmel es. Doawäajen woat von dise Hopninj soo jerät aus von “eenen fausten, sechren Anka fa onse Seel, un dee jeit bat hinja dän Väahank em bennaschten Heilichtum em himlischen Tempel [soo aus een Huaga Priesta em Aulaheilichsten aum Veseenungsdach nenjinkj]. Doa es Jesus ver ons un aun onse Städ nenn jegonen, aus een Huagapriesta fa aule Eewichkjeit no de Ordnunk von Melchisedek” (Heb 6:17-20).