Woa aus Christ stoakja – “De groota Dach fa däm HARN es dicht bie”
“Well wie doavon räden, waut toom voljewosnen Christenläwen jehieet” (HEB. 6:1, PB)
1-2. Woo kjeem daut, daut de ieeschte Christen von Judäa un Jerusalem “en de Boaj nenn flichten” kunnen?
AUS Jesus hia oppe Ieed wia, kjeemen de Jinja no am un säden: “Saj ons wanea dit passieren woat, un aun waut fa een Tieekjen wie seenen kjennen, daut du kjemst, un daut dise Tiet aufschluten woat?” Waut Jesus dan to an säd, wia soont, waut noch en dee Tiet passieed, aus see läwden. Jesus säd to an, daut doa wudd waut butajeweeneljet passieren, waut an wiesen wudd, daut Jerusalem boolt wudd venicht woaren. Wan see daut seenen wudden, säd hee, “dan sellen dee, dee en Judäa sent, en de Boaj nenn flichten” (Mat. 24:1-3, 15-22, PB). Wudden de Jinja dit Tieekjen erkjanen un daut uk jehorchen, waut Jesus an säd?
2 Rom 30 Joa lota, en daut Joa 61 n. Chr., jeef de Apostel Paulus de Christen en Jerusalem un dee, waut doa rom wonden, iernsten Rot. Wan Paulus un de aundre Christen daut uk nich wisten, wudd daut, waut Jesus verutjesajcht haud, sikj mau fief Joa lota erfellen (Mat. 24:21). En daut Joa 66 n. Chr. deeden de reemische Soldoten Jerusalem aunjriepen un daut kjeem meist bat doa, daut dee de Staut enneemen. Oba opp eenst onverhofs veleeten de Reema un daut jeef de Christen de Jeläajenheit sikj fuattobrinjen.
3. Waut säd Paulus to de hebräische Christen, un wuarom?
3 Om daut de Christen sikj kunnen raden, musten dee daut ieescht erkjanen, daut sikj daut erfeld, waut Jesus jesajcht haud. Oba eenje deeden “schwoa lieren”. Dee wieren em jeisteljen noch soo aus kjliene Kjinja, waut bloos “Malkj” brukten (läs Hebräa 5:11-13, “PB”). Wan eenje von dee uk aul wieren lang Christen jewast, kjeemen dee oba emma wieda “von däm läwendjen Gott” auf (Heb. 3:12, PB). Eenje von dee hauden mau rajcht de Jewanheit, von de Christenvesaumlunk wajchtobliewen, un daut en soone Tiet, wua de schlemma “Dach noda [kjeem]” (Heb. 10:24-25, PB). Doawäajen säd Paulus to dee: “Well wie nu opphieren doavon to räden, woo wäa aunfangen kaun, aus Christ to läwen. Leewa well wie doavon räden, waut toom voljewosnen Christenläwen jehieet” (Heb. 6:1, PB).
4. Wuarom mott wie em jeisteljen waka bliewen un waut woat ons halpen, daut to doonen?
4 Jesus siene Profezeiunk woat sikj oba noch een latstet Mol erfellen un wie läwen nu en dee Tiet. De Schreft sajcht: “De groota Dach fa däm HARN es dicht bie”. Daut es dee Dach, wua dän Soton siene gaunze Welt woat to Enj komen (Zef. 1:14, PB). Wiels dis Dach soo dicht bie es, mott wie em jeisteljen waka bliewen un sea doaräwa nodenkjen, waut dise Profezeiungen met ons to doonen haben (1. Pet. 5:8). Proow wie daut werkjlich to doonen? Voljewosne, ooda stoakje Christen to sennen, woat ons halpen, em Uag to hoolen, daut wie en de latste Tiet läwen.
Waut daut meent, een stoakja Christ to sennen
5-6. (a) Waut es doa aules met en, stoakje Christen to sennen? (b) Waut fa twee Sachen mott wie doonen, om stoakje Christen to woaren?
5 Paulus säd to de Christen en Jerusalem, daut see sullen stoakje Christen sennen un hee säd an uk, woo see daut doonen kunnen (läs Hebräa 5:14, “PB”). “Utjewosne Menschen” kjennen nich bloos von “Malkj” läwen, dee brucken “stoakje Kost”. Em jeisteljen es daut krakjt soo. Wan wie wellen stoakje Christen sennen, mott wie “dän Aunfank von Gott sien räden”, aulsoo de Gruntlieren, vestonen, oba uk de “deepste Jeheemnisen” von de Woarheit (1. Kor. 2:10, PB). Utjewosne, ooda stoakje Christen, strenjen sikj uk sea aun, daut notokomen, waut dee lieren un daut halpt dee, tweschen goot un schlajcht to unjascheeden. Daut, waut dee von de Schreft lieren, halpt an uk, wan dee dan motten waut entscheiden.
6 Paulus schreef: “Doawäajen mott wie ons soo väl iernsta aun daut hoolen waut wie jehieet haben, daut wie nich doavon aufkomen” (Heb. 2:1, PB). Vom Gloowen aufkomen, kaun sea bosich gonen. Oba wie kjennen daut väabieejen, wan wie ons “väl iernsta aun daut hoolen”, waut wie von de Schreft lieren. Doawäajen mott jieda eena von ons mol äwa dit nodenkjen: “Jleich ekj bloos, de eefache Sachen von de Schreft to studieren? Intressieet mie daut opp iernst, Jehova sien Wuat to studieren ooda läs ekj de Schreft eefach bloos soo, onen doaräwa notodenkjen, waut ekj läs? Woo kaun ekj em jeisteljen veraunkomen?” Om daut wie kjennen stoakje Christen woaren, mott wie tweeatlei doonen: wie motten de Schreft goot kjanen un wie motten lieren, jehuarsom to sennen.
Lia de Schreft goot kjanen
7. Woo kjemt ons daut togood, Gott sien Wuat bäta to kjanen?
7 Paulus schreef: “Wäa noch von Malkj läwen mott, es noch een junget Kjint, un vesteit daut Wuat von de Jerajchtichkjeit noch nich” (Heb. 5:13, PB; von ons dunkel jemoakt). Om stoakje Christen to sennen, mott wie Gott sien Wuat goot kjanen un vestonen, waut hee ons sajen well. Doatoo mott wie de Schreft deep studieren un uk de Bieekja, waut de “trua, weisa Kjnajcht” ons jeft (Mat. 24:45-47, PB). Wan wie soo studieren, woa wie lieren, woo Gott denkjt un daut woat ons halpen, uk soo to denkjen, aus hee deit. Soo jinkj daut eene christelje Fru, waut Orchida heet. See sajcht: “Aus ekj aunfunk, jieda Dach de Schreft to läsen, endad mien Läwen. Daut dieed mie rom twee Joa, bat ekj de gaunze Schreft jeläst haud, oba mie späad sikj daut soo, aus wan ekj mienen Schepfa toom ieeschte Mol kjanen lieed. Ekj lieed väl äwa Jehova, waut hee jleicht un waut hee nich jleicht, woo väl Macht hee haft un woo weis hee es. Jieda Dach de Schreft to läsen, haft mie en eenje von de schwanste Tieden von mien Läwen sea jeholpen.”
8. Woo kaun ons daut halpen, Gott sien Wuat to läsen?
8 Wan wie jieda Dach een bät en Gott sien Wuat läsen, woa wie späaren, woo “kjraftich” daut es un waut daut aun ons doonen kaun (läs Hebräa 4:12, “PB”). Daut kaun ons halpen, ons to endren un dolla soo to woaren, daut Jehova eenen Jefaulen aun ons haft. Kust du die veleicht een bät mea Tiet nämen toom de Schreft läsen un die doarenn nenloten, waut dee sajcht?
9-10. Waut es doa aules met en, Gott sien Wuat goot to kjanen? Jeff een Biespel.
9 Wie motten weeten, waut de Schreft sajcht, oba daut es lang nich aules. To Paulus siene Tiet wisten de Christen von Jerusalem secha uk, waut de Schreft säd, oba dee kjeemen daut nich no. Dee rechten sikj nich no daut, waut see von de Schreft wisten, wan see waut entscheiden musten.
10 Wie motten Gott sien Wuat goot kjanen un daut uk nokomen, waut daut doa sajcht. Woo schauft daut? Well wie mol seenen, waut eene Sesta beläwd, waut Kyle heet. Kyle haud sikj mol oppe Oabeit met eent von äare Poatna jesträden. Waut deed see toom daut fiksen? See sajcht: “Mie foll fuaz de Varsch bie von Reema 12:18 (PB), wua daut sajcht: ‘Doot aules waut jie kjennen, wan daut mäajlich es, met aule Menschen Fräd to haben.’ Un doawäajen fruach ekj dee Fru, aus wie kunnen no de Oabeit vetalen.” Dee kunnen fein toop vetalen un dee Fru wia sea äwarauscht, woo Kyle met dise Sach omjinkj. Kyle sajcht: “Ekj hab jelieet, daut daut emma daut baste es, wan wie daut nokomen, waut de Schreft sajcht”.
Lia to jehorchen
11. Waut wiest, daut daut veleicht nich emma leicht es, jehuarsom to sennen?
11 Daut es nich emma leicht, daut notokomen, waut de Schreft sajcht. Biejlikj, korz nodäm aus Jehova de Israeliten von de Sklowarie ut Ägipten friejemoakt haud, wieren dee “entwei met Moses”. Dee fungen aun to grunzen un dee stalden “däm HARN oppe Proow”. Wuarom? Wäajens dee nich Wota toom drinkjen hauden (2. Mo. 17:1-4, PB). De Israeliten vespruaken: “Aules waut de HAR von ons velangt, well wie doonen”. Oba nich mol twee Moonat lota aus see daut vespräakjen hauden, bruaken see Gott sien Jesaz aul un deeden eenen Aufgott aunbäden (2. Mo. 24:3, PB; 24:12-18; 32:1-2, 7-9). Wuarom bruaken dee äa Vespräakjen? Veleicht ferchten dee sikj, wiels Moses soo lang wajch wia. Ooda veleicht dochten see, daut äare Fiend an wudden aunjriepen, un Mose wudd nich doa sennen toom an beschitzen soo aus ea (2. Mo. 17:8-16). Krakjt endoont waut de Grunt wia, de Israeliten “horchten nich” no Gott (Apj. 7:39-41, PB). Paulus rod de Christen too, sikj sea auntostrenjen, “daut nich irjentwäa tofaul komen mucht derch onjehuarsom sennen”, soo aus de Israeliten, waut ut Angst nich en daut vesproakne Launt nenjinjen (Heb. 4:3, 11, PB).
12. Woo lieed Jesus jehuarsom sennen, un woo kjeem am daut togood?
12 Wan wie wellen stoakje Christen woaren, mott wie ons sea aunstrenjen, Jehova to jehorchen. Krakjt soo aus Jesus, kjenn wie lieren, jehuarsom to sennen, mau rajcht wan wie lieden motten (läs Hebräa 5:8-9). Jesus jehorcht sienen Voda aul ea hee no de Ieed kjeem. Oba oppe Ieed wia daut fa am schwanda, wiels hee derch soo väl Lieden un schwoaret derch must. Jesus bleef jehuarsom, wan hee uk bat oppet latste aufjeprooft wort. Un doaderch wia hee krakjt de rajchta fa de niee Oppgow, waut Gott fa am reed haud; un daut wia, Kjennich un Huaga Priesta to woaren.
13. Woo kjenn wie wiesen, daut wie jelieet haben, jehuarsom to sennen?
13 Woo steit daut met ons? Sent wie ons gaunz eenich, Jehova uk en schwoare Tieden to jehorchen? (Läs 1. Petrus 1:6-7.) Wie weeten goot, waut Gott von ons velangt: woo wie ons vehoolen sellen, daut wie sellen opprechtich sennen, woo wie räden sellen, daut wie sellen perseenlich de Schreft läsen un studieren, no de Toopkomes wanken un prädjen gonen (Jos. 1:8; Mat. 28:19-20; Efs. 4:25, 28-29; 5:3-5; Heb. 10:24-25). Kom wie dise Jebooten mau rajcht uk dan no, wan wie derch schwoaret gonen? Wan wie jehuarsom sent, wiest daut, daut wie em jeisteljen veraunkomen.
Woo halpt ons daut, stoakje Christen to sennen?
14. Woo kaun ons daut toom Schutz sennen, stoakje Christen to woaren? Jeff een Biespel.
14 Wan wie lieren, soo to denkjen aus Jehova denkjt, woat ons daut von daut orreine denkjen un haundlen beschitzen, waut en de Welt vondoag dän Dach Mood es (Efs. 4:19). See wie biejlikj mol, woo eenen Brooda daut jinkj, waut James heet un daut emma sea jleicht, onse Bieekja to läsen. Eemol funk hee aun, opp soone Städ to schaufen, wua bloos Frues schauften. James sajcht: “Daut wia goot to seenen, daut väle von dee een orreinet Läwen fieeden”. Hee sajcht wieda: “Oba eene wia aundasch un dee intressieed sikj uk fa daut, waut de Bibel säd. Oba eenen Dach, aus wie auleen wieren, fruach see mie jlikjtoo, aus ekj wull met ar Sex haben. Ekj docht ieescht, see deed sposen, oba see hieed nich opp doamet. Fuaz foll mie een Artikjel von dän Woaktorm bie, wua daut von eenen Brooda räd, waut opp siene Oabeit krakjt soowaut beläft haud. En dän Artikjel wia daut Biespel von Josef un Potifar siene Fru. Ekj deed ar fuaz von mie wajchschuwen un see rand wajch” (1. Mo. 39:7-12). James wia sea dankboa, daut sest nuscht passieet wia un daut hee kunn sien Jewessen rein hoolen (1. Tim. 1:5).
15. Woo halpt ons daut, Jehova tru to bliewen, wan wie stoakje Christen woaren?
15 Stoakje Christen to woaren halpt ons uk, Jehova tru to bliewen, un daut wie ons “nich derch veschiedne framde Lieren vom rajchten Wajch aufbrinjen” loten (läs Hebräa 13:9, “PB”). Wan wie em jeisteljen veraunkomen, halpt ons daut, daut em Denkj to hoolen, “waut daut aulabaste es” (Filip. 1:9-10, PB). Un wie woaren emma dankboara woaren, fa aul daut goode, waut Gott fa ons jedonen haft (Reem. 3:24). Soone Dankboakjeit kjrieen Christen, waut “em äwalajen un vestonen … vestendje Menschen” jeworden sent. Un dee woaren uk emma jratre Frind met Jehova (1. Kor. 14:20, PB).
16. Waut holp eene Sesta, äa Hoat to stoakjen?
16 See wie mol, woo eene Sesta, waut Louise heet, daut een Stootje no äare Doop jinkj. See stunt too, daut daut fa ar daut wichtichste wia, waut aundre von äaren Deenst fa Jehova dochten. “Ekj deed nuscht orrajchtet,” säd see, “oba ekj wia nich sea flietich em Deenst fa Jehova un ekj deed daut nich werkjlich von Hoaten. Mie wort kloa, daut ekj waut endren must, wan ekj Jehova mien bastet jäwen wull. Ekj must dän Deenst fa Jehova aun de ieeschte Städ stalen. Daut wia daut jratste, waut ekj endren must.” Wiels Louise sikj soo aunstrenjd, kunn see von “Hoaten stoakj” woaren un daut jeef ar de Krauft, waut ar fäld, aus see lota sea krank wort (Jak. 5:8, PB). Louise säd: “Daut wia eene sea schwoare Tiet fa mie, oba ekj kjeem Jehova werkjlich noda.”
Von Hoaten jehuarsom sennen
17. Wuarom wia daut soo wichtich, daut de Christen en Jerusalem jehuarsom wieren?
17 Paulus sien Rot, stoakje Christen to woaren, rad de Christen äa Läwen, waut en Jerusalem un Judäa wonden. Dee, waut no dän Rot horchten, kunnen lota daut Tieekjen erkjanen, waut Jesus jejäft haud un “en de Boaj nenn flichten”. Aus dee “em Heilichtum daut oppscheiselje seenen” kunnen, daut meent de reemische Soldoten, waut doa rom Jerusalem wieren un uk aul nenjekomen wieren, dan wisten see, daut daut de Tiet wia to flichten (Mat. 24:15-16, PB). Jerusalem wort venicht, oba dee Christen, waut no daut horchten, waut Jesus säd, veleeten ea daut bat doa wia. Un no dän Jeschichtsschriewa Eusebius no, trocken dee no eene Staut, waut Pella heet. Soo kunnen dee daut schlemste utem Stich gonen, waut Jerusalem jeemols derchjinkj.
18-19. Wuarom es daut vondoag dän Dach soo wichtich, daut wie jehuarsom sent?
18 Wan wie stoakje Christen woaren, woa wie lieren, jehuarsom to sennen un daut woat ons daut Läwen raden, en dee Tiet, wua Jesus siene Profezeiunk äwa de groote Triebsaul sikj woat erfellen (Mat. 24:21). Woa wie jehuarsom sennen, krakjt endoont waut “de trua . . . Kjnajcht” ons dan woat fa Rot jäwen? (Luk. 12:42, PB). Woo wichtich es daut nich, daut wie lieren, “von Hoaten jehuarsom” to sennen! (Reem. 6:17, PB).
19 Daut wie kjennen stoakje Christen woaren mott wie ons aulsoo doarenn eewen, soo to denkjen, aus Jehova deit. Un daut kjenn wie doaderch doonen, wan wie Gott sien Wuat bäta kjanen lieren un lieren, jehuarsom to sennen.
[Footnoot]
a Eenje Nomes hab wie hia jeendat.
Waut wurscht du sajen?
• Waut meent daut, een stoakja Christ to sennen, un woo kjenn wie eena woaren?
• Wuarom mott wie de Schreft goot kjanen, om stoakje Christen to woaren?
• Woo lia wie, jehuarsom to sennen?
• Woo kjemt ons daut togood, daut wie stoakje Christen woaren?
[Bilt]
De Schreft kaun ons halpen, onse Trubbels to fiksen
[Bilt]
De ieeschte Christen rad daut daut Läwen, daut see Jesus sienen Rot nokjeemen