49. KAPITEL
Woo kaun june Famielje daut scheen gonen? (Poat 1)
Aun äaren Kjastdach wenscht een nieet Poa sikj, daut an daut fa emma soo scheen jinkj, aus dän Dach. Un daut schauft! Krakjt daut haben Christen, waut aul lang befriet sent un sikj sea aunjestrenjt haben, dän Rot ut de Schreft notokomen, selfst beläft.
1. Waut von Rot jeft de Schreft de Ehemana?
Jehova haft de Ehemana äwa de Famielje aunjestalt (läs Efeesa 5:23). Jehova well haben, daut dee soone Entscheidungen moaken, waut fa de Famielje toom gooden es. De Schreft jeft dän Rot: “Mana, siet june Frues ... goot” (Efeesa 5:25). Waut meent daut? Een leeftolja Ehemaun behaundelt siene Fru fein; tus uk ver aundre. Hee beschizt ar un sorcht fa ar, soo goot aus hee kaun. Hee acht uk doaropp, woo ar daut jeit (1. Timotäus 5:8). Un daut wichtichste es: Hee halpt ar, em jeisteljen stoakj to bliewen (Matäus 4:4). Biejlikj woat hee met ar toop bäden un de Schreft läsen. Wan een Ehemaun leeftolich fa siene Fru sorcht, dan kaun hee met Jehova Frind bliewen (läs 1. Petrus 3:7).
2. Waut von Rot jeft de Schreft de Ehefrues?
Gott sien Wuat sajcht: “De Frues sellen soo sorjen, daut see äare Mana achten” (Efeesa 5:33). Woo kaun eene Fru daut doonen? Wan see no siene goode Sieden kjikjt un woo sea hee sikj aunstrenjt, fa ar un de Kjinja to sorjen. See wiest uk, daut see äaren Maun acht, wan see siene Entscheidungen unjastett un to am un uk von am leeftolich rät, endoont aus hee Jehova deent ooda nich.
3. Woo kaun een Poa Lied äare Ehe noch vebätren?
De Schreft sajcht von soone, waut sikj befrieen: “Dee twee woaren eent woaren” (Matäus 19:5). Daut meent, daut dee doafäa oppkomen, daut see sikj toophoolen. Daut kjennen dee, wan dee foaken toop sent un gaunz frie un leeftolich sajen, waut see denkjen un woo an daut jeit. Kjeena un nuscht es fa dee wichtja aus äa Ehepoatna – buta Jehova. Un dee paussen besonda opp, daut see sikj nich met eenen aundren Maun ooda Fru opp eene Wajch aufjäwen, waut sikj nich jehieet.
DOLLA UNJASTONEN
See, woone biblische Gruntsauzen june Ehe halpen kaun.
4. Ehemana, leeft un sorcht fein fa june Frues
Soo aus de Schreft sajcht, sellen “de Mana äare Frues jrod soo goot sennen aus äaren ieejnen Kjarpa” (Efeesa 5:28-29). Waut es doamet jemeent? Kjikjt daut VIDEO un dan got toop de Froag derch, waut hia aunjejäft es.
Opp waut vonne Wajch kjennen Ehemana wiesen, daut see äare Frues leewen un fa dee sorjen?
Läst Kolossa 3:12 un dan got toop dise Froag derch:
Woo kaun een Ehemaun daut en siene Ehe nokomen, waut dis Varsch sajcht?
5. Ehefrues, leeft un respakjt june Mana
De Schreft rot eene Ehefru too, äaren Maun to respakjten, endoont aus dee Jehova deent ooda nich. Läst 1. Petrus 3:1-2 un dan got toop dise Froagen derch:
Wan dien Ehemaun Jehova nich deent, dan wenschst du die secha, daut dee wudd. Waut wudd mea halpen: dän en eentwajch väaprädjen ooda een goodet Vehoolen haben un dän Respakjt wiesen? Wuarom?
Ehelied kjennen toop goode Entscheidungen moaken. Oba eenjemol es de Fru veleicht nich met äaren Maun envestonen. Dan kaun see ruich un met Respakjt äare Meenunk sajen. Oba see mott daut enseenen, daut Jehova dän Maun de Veauntwuatunk jejäft haft to entscheiden, waut fa de Famielje daut baste es. See wudd sellen äa bastet doonen toom siene Entscheidunk unjastetten. Wan see daut deit, dan woat see methalpen, daut de Famielje daut scheen jeit. Läst 1. Petrus 3:3-5 un dan got toop dise Froag derch:
Woo denkjt Jehova doaräwa, wan eene Fru äaren Maun Respakjt wiest?
6. Jie kjennen met de Trubbels en de Ehe foadich woaren
Kjeene Ehe es volkomen. Doawäajen mott een Poa Lied toopschaufen, daut dee de Trubbels toop fiksen kjennen. Kjikjt daut VIDEO un dan got toop de Froagen derch, waut hia aunjejäft sent.
Aun waut wia en daut Video to seenen, daut daut Ehepoa nich mea soo sea veeent wia?
Waut deeden dee toom äare Ehe vebätren?
Läst 1. Korinta 10:24 un Kolossa 3:13. No jieda Varsch got toop dise Froag derch:
Woo kaun daut em Ehestaunt halpen, disen Rot notokomen?
De Schreft sajcht, daut wie ons unjarenaunda sellen ieren. Wäm ieren meent, daut eena dänjanjen leeftolich un met Respakjt behaundelt. Läst Reema 12:10 un dan got toop dise Froagen derch:
Saul eena em Ehestaunt velangen, daut de Poatna eenem daut ieeschte ieren saul? Wuarom wurscht du daut sajen?
WAUT EENJE SAJEN: “Ekj un mien Ehepoatna sent nich mea soo veeent, aus wie mol wieren.”
Woo wurscht du dänjanjen daut dietlich moaken, daut de Schreft halpen kaun?
KAPITEL TOOPJEFOT
Eenen Ehemaun un eene Ehefru kaun daut scheen gonen, wan dee sikj unjarenaunda leewen un respakjten un dän Rot ut de Schreft nokomen.
Waut hast du jelieet?
Waut kaun een Maun doonen, daut an daut en de Ehe scheen jeit?
Waut kaun eene Fru doonen, daut an daut en de Ehe scheen jeit?
Wan du befriet best, woon biblischa Gruntsauz kaun june Ehe halpen?
MEA NOSIEEKJEN
See gooden Rot, waut de Famielje halpen kaun, daut dee daut scheen jeit.
Kjikj daut Musikj-Video, waut kloa wiest, waut vonne Säajnungen daut brinjt, wan eena Gott sienen Rot en de Ehe nokjemt.
Unjasto die daut, waut daut meent, dän Ehemaun aus Haupt unjadon to sennen.
“Wuarom saul eene Fru unjadon sennen?” (De Woaktorm, 15. Mei 2010)
Woo kunn een Poa Lied schwoare Trubbels en äaren Ehestaunt un mau rajcht äare Scheedunk äwakomen?