3. Dankboakjeit wiest sikj derch Woakjen

Stal die mol väa, du best meist batem vedrinkjen un dan rat die wäa. Wurscht du daut bloos vejäten, waut deejanja fa die jedonen haud? Ooda wurscht du dän opp irjenteene Wajch proowen to wiesen, daut du dankboa best fa daut?

Bloos wäajen Jehova es daut mäajlich, daut wie kjennen fa emma läwen. Läst 1. Johanes 4:8-10 un dan got toop dise Froagen derch:

• Wuarom es Jesus sien Opfa een besondret Jeschenkj?

• Woo denkjst du äwa daut, waut Jehova un Jesus fa die deeden?

Woo kjenn wie wiesen, daut wie doafäa dankboa sent, waut Jehova un Jesus fa ons deeden? Läst 2. Korinta 5:15 un 1. Johanes 4:11; 5:3. No jieda Bibelvarsch got toop dise Froag derch:

• Woo kjenn wie no disen Varsch no wiesen, daut wie dankboa sent?

1. Waut brinjt eenem bat doa, sikj Jehova hantojäwen?

Wie jäwen ons Jehova han, wiels wie am leewen (1. Johanes 4:10, 19). De Schreft rot ons too: “Du saust dän Harn, dienen Gott, von gaunzem Hoaten, met gaunze Seel, met aule Jedanken un aul diene Krauft goot sennen” (Markus 12:30). Wie sajen nich bloos, daut wie Gott leewen; wie wiesen daut uk derch daut, waut wie doonen. Onse Leew fa Jehova brinjt ons bat doa, ons am hantojäwen un ons deepen to loten. Daut es krakjt soo aus bie een Poa, waut sikj befrieen well: de Leew brinjt dee bat doa.