‘Äwa aules sell jie groote Leew haben’
„Daut Enj von aule Dinja es dicht bie jekomen. . . . Äwa aules sell jie eena toom aundren groote Leew haben“ (1. PETRUS 4:7-8, Neue-Welt-Übersetzung [NW]).
JESUS wist, daut hee de latste Stunden met siene Jinja noch goot utnutzen must. Hee wist, waut siene Jinja noch aules ver sikj hauden. See sullen een jewaultjet Woakj doonen, un de Menschen wudden äwa an spietich sennen un an vefoljen, krakjt soo aus see am hauden (Johanes 15:18-20). Doawäajen präajd hee siene Jinja aun disen latsten Owent en, daut see sullen „Leew unjarenaunda haben“ (Johanes 13:34-35; 15:12-13, 17).
2 De Apostel Petrus, dee aun disen Owent uk doabie wia, neem disen Rot sea iernst. Joaren lota drekjt Petrus daut selfst ut, woo wichtich de Leew wia. Een Stootje ea de Staut Jerusalem venicht wort, jeef hee Christen en sienen Breef dän Rot: „Daut Enj von aule Dinja es dicht bie jekomen. . . . Äwa aules sell jie eena toom aundren groote Leew haben“ (1. Petrus 4:7-8, NW). Daut, waut Petrus don schreef, es uk sea wichtich fa aul dee, waut en de vondoagsche „latste Doag“ von dise Welt läwen (2. Timotäus 3:1). Waut es met „groote Leew“ jemeent? Wuarom sell wie „groote Leew“ to aundre haben? Un woo kjenn wie dise Leew bewiesen?
Waut es met „groote Leew“ jemeent?
3 Väle denkjen, de Leew es een Jefeel, waut veselfst kjemt. Oba Petrus meend nich bloos irjent eene Oat von Leew; hee räd von de baste Oat von Leew. Wua en 1. Petrus 4:8 daut Wuat „Leew“ steit, steit em Griechischen daut Wuat agápē. Met dit Wuat es jemeent, aundre to leewen, onen sikj selfst to jefaulen, un de Leew soo to bewiesen, aus de biblische Gruntsauzen daut velangen. Een Buak, waut biblische Wieeda erkjläat, sajcht: „De Agape-Leew kaun eena sikj selfst aunbefälen, wiels dee nich bloos een Jefeel es; eena kaun sikj entschieden väanämen, dise Leew to haben un dee derch Woakjen to bewiesen.“ Wiels wie onvolkomen sent, sent wie jeneicht, emma bloos aun ons selfst to denkjen, un doahäa mott ons denkjen jeholpen, daut wie ons unjarenaunda leewen sellen un ons doabie aun Gott siene Gruntsauzen hoolen sellen (1. Mose 8:21; Reema 5:12).
4 Daut bediet nich, daut de agápē-Leew onen Jefeel es un daut wie ons unjarenaunda leewen, bloos wiels wie daut schuldich sent. Soo aus Petrus säd, sell wie „eena toom aundren groote Leew“ haben.a Doatoo mott eena sikj aunstrenjen. Daut griechische Wuat, waut hia met „groote“ äwasat es, bediet buakstäwlich „utjestrakjte“ (Kingdom Interlinear Translation). Een Jelieeda säd doatoo: „Daut jeft daut Bilt von eenen, dee en eenen Rees rant un jrod ver sien Ziel noch eemol met siene gaunze Krauft aules hanjeft.“
5 Wie motten onse Leew doahäa nich bloos dan bewiesen, wan ons daut leicht felt, ooda bloos to jewesse Menschen. Christelje Leew bediet, ons Hoat „uttostrakjen“ un aundre uk dan to leewen, wan ons daut schwoa felt (2. Korinta 6:11-13). Dise Oat von Leew kjemt nich veselfst. Om doarenn bäta to woaren, mott wie ons aunstrenjen, krakjt soo aus eena, dee en eenen Rees ranen well, uk emma wada eewen un doaraun oabeiden mott, noch jeschekjta to woaren. Wuarom sell wie onbedinjt soone Leew eena toom aundren haben? Well wie emol dree Uasoaken doafäa seenen.
Wuarom sell wie ons unjarenaunda leewen?
6 Ieeschtens, ‘wiels Leew von Gott staumt’ (1. Johanes 4:7). Jehova, von dän dise wieetvolle Ieejenschoft kjemt, haft ons daut ieeschte jeleeft. De Apostel Johanes schreef: „Gott wees ons woo goot hee ons wia aus hee sienen eensjen Sän en de Welt schekjen deed, daut wie derch am läwen sellen“ (1. Johanes 4:9). Daut Gott sien Sän ‘en de Welt jeschekjt’ wort, meent, daut hee een Mensch wort, sienen Deenst derchfieed un aun eenen Pol storf — aules bloos, om daut wie derch am kjennen Läwen haben. Wuatoo saul ons dis butajeweenelja Bewies von Gott siene Leew driewen? Johanes schreef: „Leewe Frind, wan Gott ons soo goot es, dan sull wie ons uk unjarenaunda goot sennen“ (1. Johanes 4:11). Daut sajcht hia, daut Gott „ons soo goot es“, un nich bloos „die soo goot es“. Daut wiest ons kloa: Wan Gott onse Gloowesbreeda leeft, sell wie daut uk doonen.
7 Tweedens es daut nu besonda wichtich, ons unjarenaunda to leewen un onse Breeda en äare Noot bietostonen, wiels „daut Enj von aule Dinja es dicht bie jekomen“ (1. Petrus 4:7, NW). Wie läwen en „jreslich schwoare Tieden“ (2. Timotäus 3:1). Daut, waut vondoag soo enne Welt passieet, un uk Onheil derch Natuajewaulten ooda Jäajenstaunt von aundre Menschen kaun ons väl toosaten. Wan ons daut Läwen schwoa es, mott wie ons unjarenaunda emma enja toophoolen. Groote Leew helt ons faust toop un drift ons doatoo, „eena fa dän aundren [to] sorjen“ (1. Korinta 12:25-26).
8 Dreddens mott wie ons unjarenaunda leewen, wiels wie „däm beesen Fient kjeene Jeläajenheit“ jäwen wellen, tweschen ons Oneenichkjeit to veuasoaken (Efeesa 4:27). Soton vesteit daut, de Schwakheiten un Fäla von onse Gloowesbreeda fuaz uttonutzen, om daut wie ons doaraun steeten un tofaul komen sellen. Waut wudd wie doonen, wan een Gloowesbrooda to ons waut onfrinteljet säd ooda ons nich sea leeftolich behaundlen deed? Wudd wie wäajens soo waut de Vesaumlunk veloten? (Spricha 12:18). Nich, wan wie eena toom aundren groote Leew haben! Wiels soone Leew halpt ons, dän Fräd to bewoaren un Gott „veeent to deenen“ (Zefanja 3:9, NW).
Woo du diene Leew bewiesen kaust
9 De Leew mott tus enne Famielje aunfangen. Jesus säd, siene woare Nofolja wudden doaraun to erkjanen sennen, daut see Leew unjarenaunda hauden (Johanes 13:34-35). De Leew mott nich bloos enne Vesaumlunk kloa to seenen sennen, oba uk enne Famielje: tweschen Ehelied uk tweschen de Elren un de Kjinja. Daut rieekjt oba nich too, eenem siene Leew bloos ennalich to feelen; wie motten dee uk derch Woakjen bewiesen.
10 Woo kjennen Ehelied bewiesen, daut see sikj leewen? Een Ehemaun, dee siene Fru werkjlich leeft, bewiest ar tus uk ver aundre derch siene Wieed un Doten, daut hee ar schazt. Hee acht ar un nemt daut iernst, waut see denkjt un feelt (1. Petrus 3:7). Hee es mea om siene Fru bekjemmat aus om sikj selfst un strenjt sikj sea aun, om fa ar em tieteljen, em jeistlichen uk jefeelsmässich to sorjen (Efeesa 5:25, 28). Eene Ehefru, dee äaren Maun werkjlich leeft, deit am ‘huach achten’, uk wan hee nich emma aules soo nokjemt, aus see sikj daut wudd wenschen (Efeesa 5:22, 33; Reimer). See unjastett äaren Maun un es am unjadon. See es veninftich en daut, waut see von am velangt, un halpt met, daut jeistliche em Läwen aun de ieeschte Städ to stalen (1. Mose 2:18; Matäus 6:33).
11 Woo kjenn jie aus Elren june Leew to june Kjinja bewiesen? Wan jie hoat oabeiden, om em tieteljen fa june Kjinja to sorjen, es daut een Bewies fa june Leew to an (1. Timotäus 5:8). Oba Kjinja brucken mea aus bloos Äten, Kjleeda un een Dak äwarem Kopp. Wan see aus groote Menschen dän woaren Gott leewen un deenen sellen, motten see uk em jeistlichen belieet woaren (Spricha 22:6). Doatoo mott sikj de Famielje Tiet nämen, om toop de Bibel to studieren, prädjen to gonen un no de Toopkomes to gonen (5. Mose 6:4-7). Om daut eena daut bestendich nokjemt, mott eena reed sennen, ernoa waut opp sikj to nämen, besonda en dise schwoare Tiet. Wan jie junt aus Elren aunstrenjen, june Kjinja em jeistlichen to belieren, dan bewies jie, daut jie an leewen un daut jie junt werkjlich om äare eewje Freid sorjen (Johanes 17:3).
12 Elren sellen äare Leew uk doaderch bewiesen, daut see sikj doarom kjemren, woo äare Kjinja daut jefeelsmässich jeit. Kjinja sent em Hoaten sea empfintlich un motten sikj secha sennen, daut de Elren an leewen. Sajcht an, daut jie an väl räakjnen, un siet sea sea leeftolich to an, wiels soo späaren see, daut see jeleeft woaren un wieetvoll sent. Doot an opprechtich un von Hoaten lowen, wiels daut wiest an, daut jie äare Aunstrenjungen seenen un schazen. Wiest an leeftolich trajcht, daut see seenen, daut junt daut wichtich es, waut fa Menschen see woaren (Efeesa 6:4). Daut es soo scheen, wan de Famielje sikj unjarenaunda soo leeft. Daut halpt met, daut aule jlekjlich sent un faust toophoolen. Soo kaun de Famielje bäta met dän Druck omgonen, waut daut en dise latste Doag jeft.
13 De Leew drift ons doatoo, nich opp aundre äare Fäla to achten. Aus Petrus dän Rot jeef, „eena toom aundren groote Leew [to] haben“, erwänd hee uk, wuarom daut soo wichtich wia. Hee schreef: „Wiels ‚Leew dakjt väle Sinden too‘“ (1. Petrus 4:8). Met ‘Sinden toodakjen’ es nich jemeent, schwoare Sinden unjare Dakj to hoolen. Schwoare Sinden motten aun de veauntwuatliche Mana en de Vesaumlunk berecht woaren, om daut dee doaräwa haundlen kjennen (3. Mose 5:1; Spricha 29:24). Daut wudd nich sea leeftolich un soogoa jäajen de Bibel sennen, nuscht jäajen onveschämde Sinda to doonen, wiels soo wudd eena tooloten, daut dee noch fa wieda oschuldje Menschen schoden kunnen (1. Korinta 5:9-13).
14 Oba mieeschtens haundelt sikj daut bie de Fäla un Schwakheiten von onse Gloowesbreeda bloos om Kjlienichkjeiten. Wie aula moaken han un wada emol Fäla em räden uk em haundlen, soo daut aundre sikj veleicht aunjeschmäat ooda soogoa beleidicht feelen (Jakobus 3:2). Wudd daut dan rajcht sennen, wan wie de Fäla von aundre emma fuaz novetalden? Doaderch wudd wie enne Vesaumlunk bloos Oneenichkjeit veuasoaken (Efeesa 4:1-3). Wan wie ons von Leew leiden loten, woa wie de Fäla von eenen Gloowesbrooda nich ‘utjäwen’ (Psalm 50:20, NW). Soo aus eena met Zement un Foaw de schlajchte Städen aun eene Waunt toodakjt, soo sell wie uk met Leew de Schwakheiten un Fäla von onse Metmenschen toodakjen (Spricha 17:9).
15 De Leew drift ons doatoo, deejanje to halpen, dee werkjlich en Noot sent. Daut Läwen en dise latste Doag woat emma schwanda, un soo kaun daut derchut sennen, daut onse Gloowesbreeda em tieteljen Help brucken (1. Johanes 3:17-18). Jeit daut veleicht eenen en de Vesaumlunk knaup, ooda haft eena siene Oabeit veloaren? Veleicht kjenn wie dan dänjanjen uthalpen, doano aus wie kjennen (Spricha 3:27-28; Jakobus 2:14-17). Fält daut Hus von eene elre Wätfru opptofreschen? Dan kjenn wie ons veleicht aunbeeden, bie de Oabeit mettohalpen (Jakobus 1:27).
16 Oba wie bewiesen onse Leew nich mau bloos to deejanje, waut en onse Omjäajent wonen. Bieaun hieet eena von Gloowesbreeda en aundre Lenda, dee von Owwadasch, Ieedbäben ooda Birjakjrich betroffen sent. Veleicht brucken see drinjent Äten, Kjleeda ooda aundre Sachen. Daut moakt nuscht ut, auf dee von aundre Raussen ooda Velkja sent, wiels wie haben „Leew to de gaunze Broodaschoft“ (1. Petrus 2:17, NW). Doahäa unjastett wie jieren aules, waut jedonen woat, om fa Help to sorjen, soo aus de Vesaumlungen en daut ieeschte Joahundat deeden (Aposteljeschicht 11:27-30; Reema 15:26). Wan wie aul soone Jeläajenheiten woanämen, stoakj wie de Leew, waut ons en dise latste Doag toophelt (Kolossa 3:14).
17 Leew drift ons doatoo, aundre Menschen de goode Bootschoft von Gott sien Kjennichrikj to brinjen. Denkj emol aun Jesus. Wuarom deed hee prädjen un aundre lieren? „Am jaumad daut“ äwa de Häaden von Menschen, wiels dee daut em jeistlichen soo schlajcht jinkj (Markus 6:34). Äare faulsche Relijionsleida hauden an sult biblische Woarheiten lieren un an eene Hopninj jäwen. Oba enne Städ daut hauden dee an em jeistlichen gaunz hinjaloten un veleit. Doahäa treest Jesus de Menschen met „daut Evangelium von Gott sien Rikj“, wiels siene groote Leew un sien Metjefeel am doatoo dreewen (Lukas 4:16-21, 43).
18 Uk en de vondoagsche Tiet sent väle Menschen em jeistlichen hinjaloten un veleit worden un haben kjeene Hopninj. Wie sellen ons Jesus toom Väabilt nämen un doaropp achten, waut onse Metmenschen, dee Gott noch nich kjanen, em jeistlichen brucken. Dan woat onse Leew un ons Metjefeel ons doatoo driewen, an de goode Bootschoft von Gott sien Kjennichrikj to brinjen (Matäus 6:9-10; 24:14). Doa blift aul mau weinich Tiet, un doawäajen es daut nu drinjenda aus jeemols ea, dise Bootschoft to prädjen, om Menschen daut Läwen to raden (1. Timotäus 4:16).
„Daut Enj von aule Dinja es dicht bie jekomen“
19 Denkj wie noch eemol aun daut, waut Petrus schreef, ea hee dän Rot jeef, eena toom aundren Leew to haben. Hee schreef: „Daut Enj von aule Dinja es dicht bie jekomen“ (1. Petrus 4:7, NW). Boolt woat dise beese Welt veschwinjen, un doahinja woat Gott siene jerajchte niee Welt komen (2. Petrus 3:13). Doawäajen es daut nu nich de Tiet, sondasorj eefach soo wajchtoläwen. Jesus woarnd ons: „Siet väasechtich, daut jie junt nich derch fräten un supen un sorjen äwa dit Läwen, daut Hoat beloden, un daut dee Dach dan onverhofs äwa junt kjemt . . . soo aus eene Schlenj“ (Lukas 21:34-35).
20 Well wie doahäa onbedinjt ‘woaken’ un ons doaräwa em kloaren bliewen, en waut fa eene Tiet wie läwen (Matäus 24:42). Well wie oppaussen, daut Soton ons nich derch siene Vesieekjungen auflenkjt. Well wie uk kjeenmol tooloten, daut dise kolde un leewloose Welt ons doavon aufbrinjt, aundre to leewen. Oba äwa aules well wie dän woaren Gott, Jehova, emma noda komen, dee sien harlichet Väanämen met de Ieed boolt derch sien messianischet Kjennichrikj erfellen woat (Openboarunk 21:4-5).
[Footnoot]
a Aundre Bibeläwasatungen sajen en 1. Petrus 4:8, daut wie eena toom aundren „opprejchtje“ ooda „iewrije“ Leew haben sellen.
FROAGEN TOOM STUDIEREN
• Waut fa eenen Rot jeef Jesus siene Jinja toom Aufscheet, un waut bewiest, daut Petrus disen Rot sea iernst neem? (Aufschn. 1-2).
• Waut es met „groote Leew“ jemeent? (Aufschn. 3-5).
• Wuarom sell wie ons unjarenaunda leewen? (Aufschn. 6-8).
• Woo kaust du diene Leew to aundre bewiesen? (Aufschn. 9-18).
• Wuarom es nu nich de Tiet, sondasorj to sennen, un wuatoo sell wie entschieden sennen? (Aufschn. 19-20).
[Bilt oppe Sied 29]
Eene Famielje, dee faust toophelt, kaun met dän Druck en dise latste Doag bäta omgonen
[Bilt oppe Sied 30]
De Leew drift ons doatoo, deejanje to halpen, dee werkjlich en Noot sent
[Bilt oppe Sied 31]
Wie bewiesen aundre onse Leew, wan wie an de goode Bootschoft von Gott sien Kjennichrikj brinjen