Aus Adam un Eva dän Goaden Eden ieescht veloten hauden, hauden dee een schoof Kjinja. Kain, dee äa ieeschta Jung, wort een Foarma un de tweeda, waut Abel heet, wort een Hoad.

Eenen Dach brochten Kain un Abel Jehova een Opfa. Weetst du, waut een Opfa es? Daut es een besondret Jeschenkj. Jehova freid sikj äwa Abel sien Opfa, oba äwa Kain sient nich. Daut muak Kain sea doll. Jehova säd to Kain, hee sull oppaussen, daut siene Wutt am nich bat doa brocht, waut schlajchtet to doonen. Oba Kain horcht doa nich no.

Enne Städ daut säd dee to sienen Brooda: “Komm mol met mie oppe Stap.” Aus see doa auleen oppe Stap wieren, kjeem Kain no Abel un muak dän doot. Waut wudd Jehova met dit doonen? Jehova bestroft Kain. Dee must wiet fuat von siene Famielje un kunn kjeenmol mea trigjkomen.

Kjenn wie von daut waut lieren? Veleicht woa wie doll, wan nich aules soo es, aus wie ons daut wenschen. Wan wie daut späaren, daut wie doll woaren, ooda wan aundre daut enwoaren un ons dan sajen, wie sellen oppaussen, dan sell wie ons bosich beoabeiden, ea de Wutt ons kontrollen kaun.

Abel leewd Jehova un deed daut rajchte; doawäajen woat Jehova dän kjeenmol vejäten. Dee woat Abel wada toom läwen brinjen, wan dee de Ieed ieescht woat to een Paradies moaken.

Met de Tiet jeef daut een deel Menschen oppe Ieed. De mieeschte wieren schlajcht. Mau rajcht eenje Enjel em Himmel worden schlajcht. Dee veleeten äa Tus em Himmel un kjeemen no de Ieed. Weetst du, wuarom dee daut deeden? Dee wullen soonen Kjarpa haben, aus de Menschen hauden, un sikj met Frues befrieen.

De Enjel hauden dan met de Frues toop Säns. De Säns wossen opp un worden sea stoakj. Dee wieren domm to de Menschen un deeden dee tualeiden. Jehova kunn daut nich soo tochloten. Doawäajen wull hee derch eene Äwaschwamunk met de schlajchte Menschen een Enj moaken.

Oba doa läwd uk een Maun, waut aundasch wia un Jehova leewd. Daut wia Noah. Noah haud eene Fru un dree Junges: Sem, Ham un Jafet. De dree Junges wieren befriet. Jehova säd to Noah, hee sull eenen grooten Kausten buen, waut oppem Wota schwamen kunn, soo daut hee un siene Famielje bie de groote Äwaschwamunk nich stoawen wudden. Jehova säd uk, hee sull een deel Tieren en dän Kausten nenbrinjen, daut dee uk läwen bleewen.

Noah funk fuaz aun to buen. Hee un siene Famielje buden soo bie 50 Joa aun disen Kausten. Dee deeden daut krakjt soo, aus Jehova daut väajesajcht haud. Noah deed de Menschen uk woarnen, daut doa eene groote Äwaschwamunk komen wudd. Oba kjeena jeef doa waut om rom.

Tolatst kjeem de Tiet toom en dän Kausten nengonen. Well wie mol seenen, waut dan wort.